Tongana nyen la mo yeke mû wango?

A hunda na mo awe ti mû wango na azo? Na tapande, a hunda mara ti atënë so ge na mo awe? Atënë tongana: ‘A yeke nzoni mbi sara nyen? Mbi lingbi ti gue na matanga so? Mbi lingbi ti sara kua so? Mbi lingbi ti gi ti sara mariage na zo so?’

Ambeni zo alingbi ti hunda na mo na bê ti ala kue ti mû maboko na ala ti mû adesizion: adesizion so alingbi ti sara ngangu na ndo ti songo ti ala na akamarade ti ala, asewa ti ala wala même songo ti ala na Jéhovah. Kiringo tënë ti mo ni ayeke luti na ndo ti nyen? Mo yeke mû ka wango na azo tongana nyen? Atâa tënë ni akpa mbeni senge tënë wala mbeni ngangu tënë, aProverbe 15:28 atene: “Zo ti mbilimbili agi bê ti lo si lo kiri tënë”. Zia e bâ tongana nyen aversê oku ti Bible so alingbi ti mû maboko na e na ngoi so e yeke mû wango.

1 Gi ti hinga ye ni nzoni.

“Zo so akiri tënë kozoni si lo mä tënë ni, so ayeke ye ti buba na ye ti kamene na lo.”​—APROV. 18:13.

Tongana e ye ti mû nzoni wango na zo, a lingbi e hinga dutingo ti zo so aga ti gi mungo maboko ni nga bango ndo ti lo. Zia e mû mbeni tapande: Tongana mbeni zo ahunda mo ti fa na lo nzoni lege ti si na ndo ti mo, nyen la a lingbi mo hinga si mo mû maboko na lo? Mo lingbi ti fa na lo nzoni lege ti tene lo mû sân ti tene mo hinga ndo so lo yeke dä na ndembe ni so? Oko pëpe! Legeoko nga, ti mû nzoni wango na zo ahunda ti gi ti hinga dutingo ti zo ni nga bango ndo ti lo. Ambeni ye ayeke dä so andu lo so alingbi ti sara ngangu na ndo ti tënë so e yeke tene na lo? Tongana e hinga dutingo ti zo ni nzoni pëpe, e lingbi ti mû na lo mbeni wango so alingbi même ti sara si li ti lo aga kirikiri.​—Luc 6:39.

Gi ti bâ wala zo ni agi nda ti ye nzoni na ndo ti tënë ni. Tongana mbeni zo ahunda wango, a yeke peut-être nga nzoni ti hunda na lo atënë tongana: “Afango ye wa ti Bible mo pensé ti sara ye alingbi na ni?” “Aye so mo soro ti sara ni so, aye ti nzoni wa mo yeke wara na pekoni nga akpale wa mo yeke tingbi na ni?” “Mo gi nda ti ye na ndo ti tënë ni so awe?” “Mo wara mungo maboko wa na mbage ti azo tongana a-ancien, babâ na mama ti mo wala zo so amanda Bible na mo?”

Kiringo tënë na ahundango ndo so alingbi ti mû maboko na e ti hinga ngangu so zo ni asara ti wara mbeni kiringo tënë. Nga, na ngoi so e yeke mû na lo wango, a lingbi e bi bê ti e na atënë so ambeni zo atene peut-être na lo awe. A lingbi e gi ti bâ wala zo ni ayeke gi gi mbeni zo so alingbi ti mû na lo awango so lo ye ni na so ‘anzere na mê ti lo’.​—2 Tim. 4:3.

2 Dö tere pëpe ti kiri tënë.

“A lingbi zo oko oko aduti nduru ti mä tënë, ti sara tënë hio hio pëpe.”​—JACQ. 1:19.

Na nzoni bibe e lingbi ti kiri tënë hio. Me a yeke lakue lege ti ndara ti sara tongaso, mbilimbili tongana e yeke sara tënë na ndo ti mbeni ye so ade e gi nda ti ye na ndo ni pëpe? A-Proverbe 29:20 atene: “Mo bâ zo so asara tënë fade fade? Gango nzoni ti zo tongaso ayeke ngangu ahon gango nzoni ti wabuba.”

Gi ti bâ wala wango ti mo ni ague oko na ndara ti Nzapa. Hunda tere ti mo: ‘Bango ndo nga na “yingo ti dunia so” asara ngangu na ndo ti bango ndo ti mbi?’ (1 aCor. 2:12, 13). Girisa pëpe so gi nzoni bê so zo ayeke na ni alingbi pëpe ti sara si mbeni wango aduti nzoni. Na ngoi so bazengele Pierre amä tënë ti aye ti ngangu so Jésus atene ayeke ku lo, lo mû wango na Jésus lo tene: “Zia a zi mo na yâ ti ye so, Seigneur; ye tongaso ayeke si ande na mo oko pëpe.” Ye so Pierre asara so afa nyen na e? A fa na e so tongana mbeni zo so ayeke même na nzoni bê asara hange pëpe, lo lingbi ti maï ‘abibe ti Nzapa pëpe, me abibe ti azo.’ (Mat. 16:21-23). A yeke nzoni ti mû maboko na zo, me a lingbi e girisa ape so ndara ti Nzapa ayeke kota mingi ahon ndara ti e wani. Ni la a yeke kota ye ti tene e gbu li ti e kozoni si e sara tënë.​—Job 38:1-4; aProv. 11:2.

3 Sara tere ti mo kete na sara ye alingbi na Bible.

“Mbi yeke sara ye oko pëpe na bê ti mbi wani. Me mbi yeke tene gi aye so Babâ afa na mbi.”​—JEAN 8:28.

Mo yeke tene ande: “Tongana mbi yeke na place ti mo, ka mbi yeke . . . ”? Même tongana mo bâ so tënë so zo ni ahunda ayeke ngangu pëpe, a yeke nzoni ti mû tapande ti Jésus so asara tere ti lo kete nga lo sara ye ahon ndo ni pëpe. Ndara ti lo nga na hingango ye ti lo ahon ti azo kue; ye oko lo tene: “Mbi sara tënë ti bê ti mbi wani pëpe, me Babâ . . . si amû na mbi mbeni commandement na ndo ti ye so a lingbi mbi fa na mbi sara tënë ni.” (Jean 12:49, 50). Afango ye ti Jésus nga na awango ti lo aluti lakue na ndo ti ye so bê ti Babâ ti lo aye.

Na tapande, Luc 22:49 afa so adisciple ti Jésus ahunda ti hinga wala a lingbi ala tiri na azo so aga ti gbu lo. Mbeni disciple ni asara kusala na épée ti bata Jésus. Mara ti tondo ni so ayeke na Matthieu 26:52-54 afa so même na angoi ti ngangu so, Jésus amû ngoi ti mû maboko na adisciple ti lo ti hinga ye so bê ti Jéhovah aye. Teti so Jésus ahinga kota tënë so ayeke na Genèse 9:6 nga na aprophétie ti Psaume 22 na ti Ésaïe 53, a mû lege na lo ti fa nzoni ye so a lingbi ala sara so asö fini ti azo nga anzere na Jéhovah.

4 Sara kusala na ambeti ti e.

“Zo wa mbilimbili si ayeke ngbâa be-ta-zo so ayeke sara ye na ndara? Lo so wa ti lo azia lo na ndo ti azo ti kua ti lo ti mû na ala kobe ti ala na ngoi ni so alingbi?”​—MAT. 24:45.

Jésus azia ngbâa be-ta-zo so ayeke sara ye na ndara ti mû na e nzoni kobe ti yingo. Kozo si mo mû wango na ndo ti ambeni kota tënë wala mo fa mbeni ye so a lingbi a sara, mo yeke mû ngoi ti gi nda ti ye na ndo ni nzoni na yâ ti ambeti ti e?

E lingbi ti wara gbâ ti asango na yâ ti Index des publications de la Société Watch Tower nga na Watchtower Library.a A lingbi e girisa ti sara kusala na agbakuru so pëpe. A yeke wara na yâ ni molongo ti atënë saki na saki nga na gbâ ti a-article ti mû maboko na mbeni zo so ayeke gi wango. Mo lingbi ti mû maboko na amba ti mo ti sara kua na agbakuru so ti manda aye so Bible afa nga ti haka ni ti bâ so wa andu tënë ti ala ni tongaso si ala mû mbeni nzoni desizion? Tongana ti so mbeni carte alingbi ti mû maboko na mbeni zo ti soro lege so lo yeke mû ti gue na ndo so lo ye ti gue dä, ambeti ti e alingbi ti mû maboko na mbeni zo ti mû adesizion so ayeke mû maboko na lo ti si na ye so lo zia na gbele lo so ayeke fini ti lakue lakue.

A-ancien mingi afa na aita ti sara kusala na Index wala Watchtower Library ti gi a-article, ye so ayeke mû maboko na aita ni ti mû adesizion so aluti na ndo ti Mbeti ti Nzapa. Ye so ayeke mû maboko na ala gi pëpe ti leke akpale ti ala ti laso me nga ti gi nda ti ye lakue na ti zia bê ti ala na kobe ti yingo so Jéhovah ayeke mû na e. Tongana ala sara tongaso, ala yeke ‘sara si ngangu ti gbungo li ti ala ni aga nzoni ti hinga popo ti ye ti nzoni na ye ti sioni.’​—aHéb. 5:14.

5 Mû desizion na place ti azo ape.

“Fade zo oko oko ayô kungba ti lo wani.”​—AGAL. 6:5.

A yeke na zo oko oko ti soro na nda ni wango wa la lo yeke sara ye alingbi na ni. Jéhovah amû na e kue liberté ti soro ti zia si andia ti lo afa lege na e wala pëpe (Deut. 30:19, 20). Na yâ ti ambeni ye, mbeni zo ayeke peut-être na bezoin ti sara ye alingbi na gbâ ti aye so Bible afa, me a lingbi zo ni la amû desizion lo wani. Tongana mbeni zo ahunda na e wango, a lingbi e hunda tere ti e: ‘Mbi yeke biani na droit ti kiri tënë na hundango tënë so?’ Na ambeni ngoi, a yeke nzoni mingi ti tene a-ancien la amû maboko na zo ni. Me tongana lo de maseka, a yeke nzoni ti tene babâ na mama ti lo la amû maboko na lo.

[Kete tënë na gbe ni]

[Encadré/​Foto na lembeti 8]

Ye ti manda na ngoi ti Vorongo Nzapa na yâ ti sewa

Na ngoi ti mandango ye na sewa, ngbanga ti nyen mo gi pëpe nda ti ye na yâ ti ambeti ti e ti wara kiringo tënë na atënë so azo ahunda na mo ade ti ninga ape? A-article wa nga na aye wa so Bible afa mo lingbi ti gi ni ti tene a mû maboko na mbeni zo so ahunda mara ti atënë so? Na tapande, mbeni ita ahunda mo so lo ye ti lë songo na mbeni zo ti tene na nda ni ala sara mariage. Na ngoi so mo yeke sara kusala na Index wala Watchtower Library, gi kozoni atënë so andu droit tënë ni. Na tapande, na yâ ti Index mo lingbi ti gi kota li ti tënë “Fréquentations” wala “Mariage.” Na pekoni, bâ akete li ti tënë so ayeke na gbe ni ti gi ambeni article so alingbi na tënë ni. Na ngoi so mo yeke bâ mbeni kota li ti tënë bâ nga wala mbage so atene “Voir aussi” ayeke dä ndali ti so alingbi ti gue na mo ti wara biani tënë so mo yeke gi ni.

[Encadré na lembeti 9]

Grâce na aye so Jéhovah amû na e na lege ti bungbi ti lo, e lingbi ti wara nga ti mû awango so ayeke nzoni mingi. Zo-ti-fa-tene 12:13 atene: “Tënë ti zo ti ndara ayeke tongana keke ti fa lege na abagara, na tongana pointe so akanga ngangu. Berger oko amû tënë ti aproverbe so, na a bungbi tënë ni na mbeti.” Legeoko tongana “keke ti fa lege na abagara,” mbeni nzoni wango so a mû na ndoye ayeke fa nzoni lege na azo so aye biani wango. Nga, tongana ti so a yeke sara kusala na pointe ti leke na ambeni ye ti da si akpengba na aluti ngangu, nzoni wango ayeke mû maboko na mbeni zo ti mû anzoni desizion so aluti ngangu. Azo ti ndara ayeke na ngia ti sara ye alingbi na ‘tënë ti aproverbe so a bungbi ni na mbeti’ so alondo na Jéhovah ‘oko Berger’ ti ala.

A yeke nzoni e mû tapande ti Berger ti e Jéhovah na ngoi so e yeke mû wango. E yeke na ngia ti dengi mê ti mä azo so ahunda wango na e nga ti mû maboko na ala na ngoi kue tongana lege ayeke dä. Tongana wango ti e aluti na ndo ti aye so Bible afa, a yeke ga na aye ti nzoni na azo nga ayeke mû maboko na ala ti wara fini ti lakue lakue.