Ala mû tere ti ala wani ti sara ye na Philippines

A SARA ngu bale-oko tongaso awe, Gregorio na wali ti lo Marilou, so ala use kue ayeke na ngu 30 na ndo ni, ayeke sara kua ti pionnier na Manille; atâa so ala yeke sara kua ti nginza na alango ti kua. A yeke lani ngangu, me ala wara lege ti sara ni. Na pekoni a kono kamba ti kua ti Marilou, lo ga wayinda na yâ ti banque so lo yeke sara kua dä. Lo tene: “Kua ti nginza ti e amû lege na e ti duti na gbâ ti anzoni ye.” Teti so koli na wali so ayeke wara nginza nzoni, ala mû desizion ti leke mbeni pendere da na mbeni pendere ndo so ayo kilomètre 19 na tö ti Manille. Ala hunda na mbeni ndokua ti leke na ala da ni na ala leke ti futa ndokua ni nze oko oko juska na yâ ti ngu bale-oko.

“MBI BÂ SO MBI YEKE NZI JÉHOVAH LA”

Marilou atene: “Fini kua ti mbi ni amû ngoi nga na ngangu ti mbi mingi, a sara si mbi yapu na yâ ti akua ti yingo tongana ti kozo ape. Mbi bâ so mbi yeke nzi Jéhovah la.” Lo fa nda ni lo tene: “Mbi lingbi mbeni pëpe ti mû na Jéhovah ngoi so mbi mû yanga ti sara na kua ti lo.” Teti so ye so amû ngia na Gregorio nga na Marilou ape, na mbeni lango ala sara lisoro na ndo ti lege so ala yeke sara kua na fini ti ala. Gregorio atene: “E ye lani ti changé mbeni ye na yâ ti fini ti e me e hinga ape tâ ye so a lingbi e sara. E sara lisoro na ndo ti lege so e lingbi ti mû fini ti e ti sara ye mingi na yâ ti kusala ti Jéhovah, nzoni la e yeke na molenge ape so. E sambela ti tene Jéhovah afa lege na e.”

Na ngoi ni so, ala mä adiskur mingi na ndo ti fango tënë na ndo so bezoin ti awafango tënë ti Royaume ayeke dä mingi. Gregorio atene: “E bâ so Jéhovah la akiri tënë na e na lege ti adiskur so.” Lo na wali ti lo asambela ti wara kpengba mabe tongaso si ala wara ngangu ti mû anzoni desizion. Kota kpale ti ala ayeke gi da ti ala so a ngbâ ti leke ni. Ala futa nginza ni asi ngu ota awe. Ala yeke sara tongana nyen? Marilou atene: “Tongana e fâ yâ ti contrat ni, e yeke perdre kota nginza so e futa na yâ ti ngu ota so. Me e bâ ni tongana mbeni lege la azi na e ti fa wala e yeke zia na kozo ndo ye so bê ti Jéhovah aye wala aye so bê ti e aye.” Tongana ala dabe ti ala na tënë so atene Paul ‘adö aye lo zia,’ ala fâ yâ ti contrat ni, ala zia kua ti nginza ti ala, ala kä mingi ti aye ti ala nga ala gue na zoa ti Palawan, mbeni kete kodoro so ayo kilomètre 480 na mbongo ti Manille.​—aPhil. 3:8.

“ALA MANDA KODE TI DUTI NZONI”

Kozo ti tene Gregorio na Marilou ague, ala gi ti leke tere ti ala ti duti na aye mingi ape. Me a yeke gi na ngoi so ala si na ndo ni awe la ala ga ti hinga tâ ye so aku fade ala kâ. Marilou atene: “Li ti e akpe. Wâ ti courant ayeke dä ape, aye so zo ayeke na bezoin ni ti duti nzoni ayeke dä ape. Aye mingi so zo ayeke wara na kota gbata ayeke ge ape. A lingbi e de keke e tingo wâ si e tö ye dä. E lingbi pëpe ti sigigi ti gue ti te ye.” Me ala ngbâ ti dabe ti ala na ndo ti raison so apusu ala ti gue, nga kete na pekoni ala hon ndo ti akpale ni. Marilou atene: “Fadeso mbi ye mingi ti bâ pendere ti aye so Nzapa aleke, so na popo ni atongoro so aza mingi na bï. Ye so anzere na e ahon tanga ni kue ayeke ti bâ so azo ayeke na ngia na ngoi so e fâ tënë na ala. Na ngoi so e yeke fa tënë ge, e ‘manda kode ti duti nzoni’ na ye so e yeke na ni.”​—aPhil. 4:12.

Gregorio atene: “Na ngoi so e si lani ge, aTémoin ayeke gi osio. Tere ti ala anzere ngangu na ngoi so mbi komanse ti mû diskur yenga oko oko nga mbi yeke pika guitare ti tene e he na abia ti Royaume.” Na yâ ti ngu oko, Gregorio na Marilou abâ tongana nyen kete groupe so aga mbeni kpengba congrégation so ayeke na awafango tënë 24. Gregorio atene: “Ndoye so congrégation so afa na mbage ti e andu bê ti e mingi.” Laso, tongana ala dabe ti ala na ngu omene so ala sara na yâ ti kete kodoro so, ala tene: “Tongana e bâ afini zo so aga na yâ ti congrégation, mbeni ye ti mû ngia na e ti lingbi na ni ayeke dä ape. E kiri e bâ so e yeke na ngia mingi na yâ ti fini ti e.”

“MBI ‘TARA JÉHOVAH, NA MBI BÂ SO LO YEKE NZONI’!”

Na Philippines, aita nduru na 3 000 ague na ando so bezoin ti awafango tënë ti Royaume ayeke dä mingi. Na popo ti ala a yeke wara aita-wali kumbamba 500. Iri ti mbeni ayeke Karen.

Karen, so ayeke fadeso na ngu 25 tongaso, akono na gbata ti Baggao, na Cagayan. Na ngoi so lo de maseka, fani mingi lo yeke pensé ti fa tënë mingi ahon ti kozo. Lo tene: “Teti so mbi hinga so ngoi so angbâ ayeke mingi ape nga a lingbi mara ti azo nde nde kue amä tënë ti Royaume, mbi ye ti fa tënë na ndo so bezoin ti awafango tënë ti Royaume ayeke dä mingi.” Atâa so ambeni membre ti sewa ti Karen awa lo ti manda mbeti ayo ahon ti gue ti fa tënë na mbeni ndo so ayo, lo sambela Jéhovah ti fa lege na lo. Lo sara nga lisoro na ambeni ita so ayeke fa tënë na mbeni ndo so ayo. Na ngoi so lo yeke na ngu 18, lo gue na mbeni ndo so ayo na gbata so lo yeke dä kilomètre 64.

Kete congrégation so Karen ague ti mû maboko na ni, a yeke bâ lege ti ando so ayeke na yâ ti ahoto na tere ti Kota ngu-ingo ti Pacifique. Karen atene: “Gi ti londo na congrégation ti Baggao ti gue na fini congrégation ni, e tambela lango ota, e montê ahoto e zu nga e fâ angu ahon 30.” Lo kiri lo tene: “Ti si na ndo ti ambeni wamandango Bible, mbi yeke tambela angbonga omene, mbi lango na da ti mbeni, na ndade ni mbi kiri mbi tambela ngbonga omene ti kiri na yanga-da.” Karen awara aye ti nzoni na peko ti angangu so lo sara so? Lo tene: “Na ambeni ngoi, gere ti mbi asuku.” Lo he ngia lo kiri lo tene: “Me, mbi yeke na a-étude 18. Mbi ‘tara Jéhovah, na mbi bâ so lo yeke nzoni!’”​—Ps. 34: 9.

“MBI MANDA TI ZIA BÊ TI MBI KUE NA JÉHOVAH”

Nyen la apusu Sukhi, mbeni ita-wali kumbamba so ayeke na ngu 40 tongaso na Amerika, ti gue na Philippines? Na ngu 2011, lo gue na mbeni kota bungbi ti circonscription na lo mä mbeni ita-koli na wali ti lo so a hunda tënë na ala. Ala fa so ala kä mingi ti aye ti ala ti gue na Mexique ti mû maboko na kua ti fango tënë. Sukhi atene: ‘Lisoro so apusu mbi ti gbu li na ndo ti ambeni ye so mbi pensé dä kozo ape ti zia na gbele mbi ti sara.’ Tongana Sukhi, so ayeke zo ti Inde, amä so a yeke na bezoin ti azo mingi ti fa tënë na azo so ayeke tene yanga ti Punjabi so ayeke na Philippines, lo mû desizion ti gue ti mû maboko na ala. Lo wara lani akpale?

Sukhi atene: “A yeke lani ngangu mingi na mbi ti soro aye so a lingbi mbi bata ni na ati so a lingbi mbi kä ni. Nga, mbi zia nzoni ndo ti mbi so mbi lango dä ngu 13 so, mbi gue mbi lango na da ti mbeni sewa teti mbeni ngoi. A yeke lani kete ye ape, me a yeke mbeni nzoni lege ti tene mbi leke tere mbi ti duti na aye mingi ape na yâ ti fini ti mbi.” Akpale wa lo wara na pekoni so lo gue na Philippines? Lo tene: “Mbeni kota kpale ti mbi ayeke so mbi yeke sara ka mbeto ti akete kete nyama ahon ndo ni. Mbeni ayeke nzara ti kodoro ti mbi so ayeke sara mbi mingi. Mbi manda ti zia bê ti mbi kue na Jéhovah ahon ti kozo.” Sukhi awara aye ti nzoni na pekoni? Lo he ngia lo tene: “Jéhovah atene na e atene: ‘I tara Mbi ti bâ tongana Mbi sa na ndo i ye ti nzoni pëpe.’ Mbi ga ti bâ so tënë so ayeke tâ tënë na ngoi so mbeni wali ahunda mbi atene: ‘Mo yeke kiri lawa? Mbi yeke na atënë mingi ti hunda na mo.’ Tënë so anzere na mbi mingi na amû lege na mbi ti mû maboko na azo so aye ti hinga Jéhovah!” (Mal. 3:10). Sukhi akiri atene: “Biani, ye so ayeke lani ngangu mingi ayeke mungo desizion ti gue. Me na pekoni so mbi mû desizion ni, bê ti mbi adö ti bâ tongana nyen Jéhovah abâ lege ti aye kue so mbi yeke na bezoin ni.”

“MBI HON LANI NDO TI MBETO SO MBI YEKE NA NI”

Sime, mbeni ita-koli so asara mariage awe na so aga nduru ti wara ngu 40 awe, azia Philippines ti gue ti sara mbeni nzoni kua ti nginza na mbeni kodoro so ayeke nduru na Israël. Na ngoi so Sime ayeke kâ, wango so mbeni surveillant ti circonscription amû na lo nga na diskur so mbeni membre ti Bebungbi amû, a pusu lo ti zia Jéhovah na kozo ndo na yâ ti fini ti lo. Lo tene: “Na ngoi so mbi gbu li ti mbi ti zia kua ni mbi gi bê ti mbi mingi.” Atâa so kue, lo zia kua ti nginza ti lo, lo kiri na Philippines. Laso, Sime na wali ti lo, Haidee, ayeke fa tënë na Davao del Sur, na mbongo ti Philippines. A yeke mbeni ndo so akono mingi so bezoin ti awafango tënë ti Royaume ayeke dä mingi. Sime atene: “Mbi yeke na ngia mingi so mbi hon lani ndo ti mbeto so mbi yeke na ni ti zia kua ti mbi nga mbi yeke na ngia so mbi zia Jéhovah na kozo ndo na yâ ti fini ti mbi. Mbeni ye ti nzoni ti hon sarango na Jéhovah na ngangu ti mo kue ayeke dä ape.”

“A MÛ NA E NGIA MINGI”

Ramilo na wali ti lo Juliet ayeke apionnier nga ala use kue ayeke na ngu 30 na ndo ni. Na ngoi so ala mä so mbeni congrégation so ayo gi kilomètre 30 na ndo ti ala ayeke na bezoin ti mungo maboko, ala mû tere ti ala wani ti mû maboko. Ni la yenga oko oko, atâa ngu apika wala pëpe, Ramilo na Juliet ayeke gue kâ fani mingi na moto ti ala ti sara bungbi nga ti fa tënë. Atâa so sarango voyage na ndo ti alege so adû ayeke dä nga na ndo ti apont so a sara na kamba ayeke ga na akpale, ala yeke na ngia ti fa tënë mingi ahon ti kozo. Ramilo atene: “Mbi na wali ti mbi e yeke na a-étude 11! Fango tënë na ndo so ayeke na bezoin ti awafango tënë mingi ahunda ti sara asacrifice, me a mû na e ngia mingi!”​—1 aCor. 15:58.

Mo ye ti wara asango na ndo ti fango tënë na ndo so ayeke na bezoin ti awafango tënë ti Royaume mingi na kodoro ti mo wala na kodoro wande? Sara lisoro na surveillant ti circonscription nga diko article “Mo lingbi ti gue ‘na Macédoine’?” na yâ ti Kusala ti Royaume ti août, ngu 2011.