Mo yeke za gloire ti Jéhovah?

‘E yeke za gloire ti Jéhovah tongana ti tatara.’​—2 ACOR. 3:18.

MO YEKE KIRI TËNË TONGANA NYEN?

Atâa so e lingbi kue pëpe, tongana nyen la e lingbi ti mû gloire na Jéhovah?

Tongana nyen la asambela ti e nga na abungbi ti e ayeke mû maboko na e ti za gloire ti Nzapa?

Nyen la alingbi ti mû maboko na e ti ngbâ ti mû gloire na Jéhovah?

1, 2. Ngbanga ti nyen azo alingbi biani ti mû peko ti asarango ye ti tere ti Jéhovah?

E KUE na yâ ti ambeni ye e kpa ababâ wala amama ti e. Tongaso, bê ti e adö pëpe tongana mbeni zo atene na mbeni molenge ti koli atene: ‘Mo sara ye tâ gi tongana babâ ti mo.’ Wala lo tene na mbeni molenge-wali: ‘Sarango ye ti mo adabe ti mbi na mama ti mo.’ Mingi ni amolenge ayeke haka ka peko ti asarango ye ti ababâ na amama ti ala. Me ka e, e lingbi ti mû peko ti sarango ye ti Jéhovah, Babâ ti e ti yayu? Atâa so e bâ lo pëpe, e lingbi ti manda ye na ndo ti anzoni sarango ye ti Nzapa na bango aye so lo créé. E lingbi nga ti manda ye na ndo ti asarango ye ti Jéhovah na mandango Bible nga na gbungo li na ndo ti aye so e diko, mbilimbili na ndo ti aye so molenge ti lo, Jésus Christ, asara nga lo tene (Jean 1:18; aRom. 1:20). Tongaso, e lingbi ti za gloire ti Jéhovah.

² Kozoni si Nzapa acréé Adam na Ève, lo hinga so azo alingbi ti sara ye so bê ti lo aye, ti mû peko ti asarango ye ti lo nga ti mû gloire na lo. (Diko Genèse 1:26, 27.) E so e yeke aChrétien e ye ti mû peko ti asarango ye ti tere ti Wasarango e. Tongana e sara ni e yeke na kota pasa ti za gloire ti Jéhovah atâa kodoro ti e wala mara ti e wala e manda mbeti asi na ndo wa. Ngbanga ti nyen? Ngbanga ti so “Nzapa ayeke sara kangbi na popo ti azo pëpe, me na yâ ti amara kue, zo so akpe mbeto ti lo na asara ye so ayeke mbilimbili, lo yeke nzere na lê ti Nzapa.”​—Kus. 10:34, 35.

3. Bê ti e ayeke tongana nyen na ngoi so e yeke sara na Jéhovah?

³ A-Chrétien so a soro ala ti gue na yayu aza gloire ti Jéhovah. Bazengele Paul so ayeke mbeni oko ti ala atene: “Na oko ngoi so lê ti e so a zi voile dä awe ayeke za gloire ti Jéhovah tongana ti tatara, a gbian e kue ti ga tongana oko image so na ti wara gi kota gloire na kota gloire na peko ti tere.” (2 aCor. 3:18). Na ngoi so Moïse alondo na ndo ti Hoto ti Sinaï na lo zu na atableau so aCommandement bale-oko ayeke na ndo ni, lê ti lo asu ndali ti so Jéhovah alondo ti sara tënë na lo (Ex. 34:29, 30). Ye oko, ye so asi na Moïse so alingbi ti si na aChrétien pëpe, nga azo alingbi ti bâ pëpe na ndo ti lê ti ala mbeni sungo ti lumière. Me azo alingbi ti bâ ngia so ala yeke na ni na ngoi so ala sara tënë ti Jéhovah, ti asarango ye ti tere ti lo, nga na ti anzoni ye so lo leke na bê ti lo ti sara teti azo. Atâa e yeke na beku ti gue na yayu wala ti ngbâ na sese, e yeke tongana atatara ti wen ti giriri na lege so e yeke za gloire ti Jéhovah na yâ ti fini ti e nga na fango tënë (2 aCor. 4:1). Mo yeke za gloire ti Jéhovah na dutingo na mbeni fini so anzere na lo nga na mungo mbage lakue na kusala ti fango tënë?

E YEKE NA NZARA TI ZA GLOIRE TI JÉHOVAH

4, 5. (a) Legeoko tongana ti Paul, bira wa la e yeke tiri? (b) Tongana nyen siokpari asara ngangu na ndo ti e?

⁴ Teti so e yeke awakua ti Jéhovah, e ye biani ti gonda Wasarango e nga ti mû gloire na lo na yâ ti aye kue so e sara. Me atâa so e ye ti sara ye so ayeke mbilimbili, e yeke sara mingi ni ye so ayeke na lege ni pëpe. Paul nga kue awara lani kpale so. (Diko aRomain 7:21-25.) Lo fa ngbanga ti nyen a lingbi e tiri na asioni nzara so ayeke na yâ ti e, lo tene: “Azo kue asara siokpari awe na ala si nduru na gloire ti Nzapa pëpe.” (aRom. 3:23). Teti so Adam asara lani siokpari, a dü azo kue ngbâa ti siokpari so ayeke tongana mbeni sioni gbia so ayeke komande na ndo ti ala.​—aRom. 5:12; 6:12.

⁵ Siokpari ayeke nyen? A yeke ye kue so ague nde na asarango ye ti Jéhovah, alege ti lo, afango ye ti lo nga na ye so lo ye. Siokpari ayeke buba songo ti zo na Nzapa. Siokpari ayeke kanga lege na e ti za gloire ti Nzapa, gi tongana ti so mbeni ye alingbi ti kanga lege na mbeni zo ti pikango kokora ti pika ye so lo ye ti pika. E lingbi ti sara siokpari na mbana wala na mbana pëpe (Nom. 15:27-31). Siokpari ayeke mbeni ye so asara ngangu mingi na ndo ti azo, na a kangbi ala na Wasarango ala (Ps. 51:7; És. 59:2; aCol. 1:21). Lege so mingi ti azo ayeke sara ye na fini ti ala asara si ala yeke na songo oko pëpe na Nzapa, na ye so asara si ala wara pëpe pendere pasa so ayeke ti za gloire ti Nzapa. Siokpari asara sioni na azo ahon tanga ti aye kue.

6. Atâa so e yeke awasiokpari, tongana nyen la e lingbi ti za gloire ti Nzapa?

⁶ Atâa so a dü e na siokpari, Jéhovah ayeke “Nzapa so ayeke mû beku na zo”. (aRom. 15:13). Na lege ti sandaga ti Jésus so lo mû ti zi azo, Jéhovah asara si lege ayeke dä ti zi e na gbe ti siokpari. So e mä na bê na sandaga so asara si e yeke “angbâa ti siokpari” mbeni pëpe, nga e lingbi ti za gloire ti Jéhovah (aRom. 5:19; 6:6; Jean 3:16). Tongana e ngbâ ti duti na nzoni songo na Nzapa, kite ayeke pëpe so lo yeke iri tënë nzoni na ndo ti e laso. Nga, na yâ ti ngoi so ayeke ga, lo yeke sara si e lingbi kue nga lo yeke mû na e fini ti lakue lakue. A yeke mbeni kota pasa so, so atâa so e ngbâ awasiokpari, Nzapa abâ so e lingbi ti za gloire ti lo.

ZA GLOIRE TI JÉHOVAH

7. Nyen la a lingbi e hinga ni na ndo ti e tongana e ye ti za gloire ti Nzapa?

⁷ Ti wara lege ti za gloire ti Jéhovah, a lingbi e hinga awokongo ti e wani (2 Chron. 6:36). A lingbi e hinga awokongo ti e ni na e gi ti hon ndo ni tongaso si e mû gloire na Nzapa. Na tapande, tongana e tï na yâ ti siokpari so ayeke bango porno, a lingbi e yeda so e yeke na bezoin ti mungo maboko ti a-ancien na e hunda ala ti mû maboko na e (Jacq. 5:14, 15). A yeke kozo ye so a lingbi zo asara la tongana lo ye biani ti mû gloire na Nzapa. E awakua ti Jéhovah, a lingbi e gi ti bâ dutingo ti e nzoni ti bâ wala e yeke sara ye alingbi na afango lege ti lo so ayeke mbilimbili (aProv. 28:18; 1 aCor. 10:12). Atâa awokongo ti e ayeke so wa, a lingbi e ngbâ ti tiri na ni tongaso si e za gloire ti Nzapa.

8. Atâa so e lingbi kue ape, a yeke nzoni e sara nyen?

⁸ Gi Jésus oko la asara ye so anzere lakue na Nzapa nga aza gloire ti lo tâ mbilimbili kue. Atâa so e lingbi kue tongana Jésus ape, a yeke nzoni e sara ngangu ti mû tapande ti lo (1 Pi. 2:21). Jéhovah ayeke bâ gi pëpe guengo na li ni ti e me lo yeke bâ nga ngangu so e yeke sara ti mû gloire na lo, na lo yeke iri tënë nzoni na ndo ni.

9. Tongana nyen la Bible ayeke mû maboko na e ti za gloire ti Nzapa nzoni?

⁹ Bible alingbi ti fa na e tongana nyen la e lingbi ti za gloire ti Nzapa nzoni mingi. A yeke kota ye ti manda Bible nzoni nga ti gbu li na ndo ni (Ps. 1:1-3). Dikongo Bible lâ oko oko ayeke mû maboko na e ti sara ye nzoni ahon ti kozo. (Diko Jacques 1:22-25.) Aye so e manda na yâ ti Bible la ayeke kpengba mabe ti e. A yeke nga ni la ayeke mû ngangu na e ti ke ti sara akota siokpari na ti nzere na Jéhovah.​—Ps. 119:11, 47, 48.

10. Tongana nyen la sambela alingbi ti mû maboko na e ti sara na Jéhovah nzoni?

¹⁰ Tongana e ye ti za gloire ti Nzapa, e yeke nga na bezoin ti “ngbâ lakue ti sambela.” (aRom. 12:12). A yeke nzoni e sambela Jéhovah ti mû maboko na e ti sara na lo na lege so lo yeda na ni. E lingbi ti hunda na lo ti mû na e yingo vulu ti lo, kpengba mabe, nga ti kpengba e ti luti na lê ti tara. E lingbi nga ti hunda lo ti mû maboko na e ti ‘hinga ti sara kusala na lege ni na tënë so ayeke tâ tënë.’ (2 Tim. 2:15; Mat. 6:13; Luc 11:13; 17:5). Legeoko tongana ti so molenge ayeke zia bê ti lo na ndo ti babâ ti lo, e nga kue a lingbi e zia bê ti e na ndo ti Jéhovah, Babâ ti e ti yayu. Tongana e hunda lo ti mû maboko na e ti sara na lo nzoni mingi ahon ti kozo, a lingbi e hinga biani so lo yeke sara ni. A lingbi e pensé pëpe so asambela ti e alingbi ti son bê ti Jéhovah. Tongaso, zia si na lege ti asambela ti e e gonda Jéhovah, e kiri merci na lo, nga e hunda lo ti mû maboko na e mbilimbili tongana e yeke na yâ ti akpale. E lingbi nga ti hunda lo ti mû maboko na e ti sara na lo na mbeni lege so amû gloire na iri ti lo so ayeke nzoni-kue.​—Ps. 86:12; Jacq. 1:5-7.

11. Na lege wa abungbi ti congrégation ayeke mû maboko na e ti za gloire ti Nzapa?

¹¹ Nzapa amû na “ngbâa be-ta-zo so ayeke sara ye na ndara” kua ti bango lege ti angasangbaga ti lo so ayeke na ngere mingi na lê ti lo (Mat. 24:45-47; Ps. 100:3). Ngbâa so aye mingi ti mû maboko na e oko oko kue ti za gloire ti Jéhovah. Legeoko tongana ti so mbeni tailleur ayeke leke mbeni kete ye na tere ti mbeni bongo ti tene alingbi zo ni pendere, abungbi ti e ayeke mû maboko na e ti changé ambeni kete ye na yâ ti fini ti e tongaso si asarango ye ti e ti aChrétien aga nzoni mingi ahon ti kozo (aHéb. 10:24, 25). A yeke ndali ni la a yeke nzoni e si na l’heure na abungbi. Tongana e yeke si ka lakue na bungbi na retard, e yeke wara pëpe aye ti nzoni kue so e lingbi fade ti wara na ngoi ti abungbi.

ZIA E SARA YE TONGANA TI NZAPA

12. Na lege wa e lingbi ti sara ye tongana ti Nzapa?

¹² Tongana e ye ti za gloire ti Jéhovah, a lingbi e “ga azo so asara ye tongana ti Nzapa”. (aÉph. 5:1). Mbeni lege so e lingbi ti sara ye tongana ti Nzapa ayeke ti manda ti pensé tongana lo. Tongana e gi ti sara ye na fason ti e wani me pëpe tongana ti so Nzapa aye, e yeke mû gonda na Nzapa pëpe nga a yeke sara sioni na e wani. Teti so e yeke na yâ ti dunia ti Satan, a lingbi e sara ngangu ti ke ye so Jéhovah ake nga ti ye ye so Jéhovah aye (Ps. 97:10; 1 Jean 5:19). A lingbi e hinga na bê ti e kue so nzoni lege ti sara na Jéhovah ayeke ti sara aye kue so amû gloire na lo.​—Diko 1 aCorinthien 10:31.

13. Ngbanga ti nyen a lingbi e ke siokpari? Ye so apusu e ti sara nyen?

¹³ A yeke nzoni e ke siokpari ndali ti so Jéhovah ake ni. Tongana e ke siokpari e yeke sara kue ti duti yongoro na ye kue so alingbi ti pusu e ti sara siokpari. Na tapande, a lingbi e sara hange si e ga a-apostat pëpe. Azo so aga a-apostat asara siokpari, na ala lingbi ti mû gloire na Nzapa pëpe (Deut. 13:6-9). Tongaso a lingbi e kpe a-apostat wala zo kue so atene ni yeke ita me so lo yeke mû gonda na Nzapa ape. A lingbi e kpe ala même tongana ala yeke afami ti e (1 aCor. 5:11). Même tongana e gi ti fa na a-apostat nga na ambeni zo so ayeke kasa bungbi ti Jéhovah so aye so ala tene ayeke mvene, e yeke wara nga ye ti nzoni na pekoni ape. Biani, a lingbi e gi pëpe ti hinga ye so ala tene, atâa na yâ ti mbeti wala na ndo ti Internet, ndali ti so a lingbi ti buba songo ti e na Jéhovah.​—Diko Ésaïe 5:20; Matthieu 7:6.

14. Nzoni lege so ahon tanga ni kue ti mû tapande ti Jéhovah ayeke so wa? Ngbanga ti nyen?

¹⁴ Mbeni nzoni lege so ahon tanga ni kue ti mû tapande ti Babâ ti e ti yayu ayeke ti fa so e yeke na ndoye (1 Jean 4:16-19). Ndoye so e yeke na ni na popo ti e afa so e yeke adisciple ti Jésus nga e yeke awakua ti Jéhovah (Jean 13:34, 35). Atâa so siokpari so a dü e dungo na ni alingbi ti sara si ngoi na ngoi e sara ye na ndoye ape, a lingbi e sara kue ti fa na ngoi kue so e yeke na ndoye. Ngangu so e yeke sara ti fa so e yeke na ndoye nga ti duti na ambeni sarango ye ti aChrétien alingbi ti mû maboko na e ti sara ye na nzoni bê nga ti ke ti sara siokpari.​—2 Pi. 1:5-7.

15. Tongana nyen la ndoye ayeke sara ngangu na ndo ti songo ti e na amba ti e?

¹⁵ Ndoye so e yeke na ni apusu e ti sara aye ti nzoni na azo (aRom. 13:8-10). Na tapande, tongana koli na wali aye tere, ala yeke ngbâ lakue be-ta-zo na mba. Tongana e ndoye a-ancien na e bâ akua so ala yeke sara na nene ni, e yeke mä ala nga e yeke woko tere ti e na gbe ti ala. Amolenge so aye ababâ na amama ti ala ayeke mä yanga ti ala, ayeke ne ala nga ayeke tene sioni tënë ti ala ape. Tongana e ye amba ti e, e yeke bâ ala tongana ambumbuse zo ape wala e yeke tene pëpe tënë na ala na mbeni lege so ane zo ape (Jacq. 3:9). Nga a-ancien so andoye angasangbaga ti Nzapa ayeke sara ye na ala na nzoni bê.​—Kus. 20:28, 29.

16. Ndoye ayeke mû maboko na e tongana nyen na fango tënë?

¹⁶ Na ngoi so e yeke fa tënë, a yeke nzoni a bâ polele so e yeke na ndoye. Teti so e ndoye Jéhovah, a lingbi bê ti e anze ape tongana azo ake ti mä e wala ala sara nzara ti tënë ni ape. Me e ngbâ lakue ti fa nzoni tënë. Ndoye ayeke pusu e ti leke tere ti e nzoni kozo ti gue ti fa tënë nga ti ga anzoni wafango ye. Tongana e ndoye Jéhovah nga na azo, e yeke bâ pëpe fango tënë ti Royaume gi tongana kua so a mû na e ti sara. Me e yeke bâ ni tongana mbeni kota pasa la a mû na e na e yeke sara ni na ngia.​—Mat. 10:7.

NGBÂ LAKUE TI MÛ GLOIRE NA JÉHOVAH

17. So e hinga so siokpari alingbi ti kanga lege na e ti za gloire ti Nzapa, a lingbi e sara nyen?

¹⁷ Mingi ti azo na yâ ti dunia ahinga pëpe so siokpari ayeke sioni mingi, me e e hinga ni. A yeke ndani la, e hinga so a lingbi e tiri ngangu na bibe ti siokpari so ayeke na yâ ti e. E hinga so a lingbi e leke yingo-ti-hinga ti e nzoni tongaso si alingbi ti mû maboko na e ti sara ye so ayeke mbilimbili na ngoi so mbeni sioni nzara akomanse ti maï na yâ ti e (aRom. 7:22, 23). Biani, e lingbi ti woko, me Nzapa alingbi ti mû na e ngangu ti sara ye so ayeke mbilimbili na yâ ti aye kue.​—2 aCor. 12:10.

18, 19. (a) Nyen la ayeke mû maboko na e ti sö benda na yâ ti bira so e yeke sara na Satan nga na adémon ti lo? (b) Nyen la a lingbi e leke na bê ti e ti ngbâ ti sara?

¹⁸ Tongana e ye ti mû gloire na Nzapa, a lingbi e tiri nga na Satan na adémon ti lo. Aye ti bira so Nzapa amû na e na lege ti yingo ayeke mû maboko na e ti sö benda na ndo ti ala (aÉph. 6:11-13). Satan ayeke sara ngangu kue ti tene a mû na lo gloire so gi Jéhovah oko la alingbi ti wara ni. Zabolo angbâ nga ti sara ngangu kue ti buba songo ti e na Jéhovah. A yeke ndali ni la, tongana e nga na azo kutu na kutu so siokpari ayeke na tere ti e, akoli, awali na amolenge e ngbâ be-ta-zo nga e mû gloire na Nzapa, a yeke mû ande kamene mingi na Satan. Tongaso, zia e ngbâ ti gonda Jéhovah, tongana ti acréature ti yayu so atene: “Jéhovah, mo so mo yeke Nzapa ti e, mo lingbi ti tene a mû na mo gloire, na gonda na ngangu ngbanga ti so mo sara aye kue, nga a yeke ndali ti ye so bê ti mo aye si aye ni ayeke dä na a sara ala.”​—Apoc. 4:11.

¹⁹ Zia e duti lakue na kota nzara ti ngbâ ti mû gloire na Jéhovah. A yeke nzere na lo mingi tongana lo bâ so mingi ti awakua ti lo ayeke sara ngangu kue ti sara ye tongana ti lo na ti za gloire ti lo (aProv. 27:11). A yeke nzoni atënë ti bê ti e aduti tongana ti David so ahe bia atene: “O Seigneur, Nzapa ti mbi, fade mbi sepela Mo na bê ti mbi kue; na fade mbi mû gloire na iri ti Mo lakue.” (Ps. 86:12). Azo so amä yanga ayeke wara ande lege ti za gloire ti Jéhovah na mbeni lege so alingbi kue nga ala yeke gonda lo teti lakue lakue. A yeke duti ande mbeni pendere pasa mingi ti duti dä na ngoi ni so. Mo yeke za gloire ti Jéhovah Nzapa laso, na beku ti sara ni ande teti lakue lakue?

[Foto na lembeti 27]

Mo yeke za gloire ti Jéhovah na alege so?