Zia pëpe si mbeni ye akanga lege na mo ti wara gloire

1, 2. (a) Mbupa ti Hébreu so a kiri pekoni na “yango-iri” nga na “gloire” aye ti sara tënë ti nyen? (b) Ahundango ndo wa e yeke bâ na yâ ti article so?

TONGANA mo mä tënë “yango-iri”, wala “gloire”, mo yeke pensé na nyen? Mo yeke pensé na pendere ti aye so ayeke na yâ ti création? (Ps. 19:2). Mo yeke pensé na gonda nga na gloire so a yeke mû na azo ti mosoro, wala na azo so ahinga ye mingi wala ala so asara ambeni kota ye? Na yâ ti Bible, mbupa so a kiri pekoni na “yango-iri” nga na “gloire” ayeke oko, nga aye ti sara tënë ti mbeni ye so ane. Na ngoi ti giriri, a yeke leke alê ti nginza na aye tongana lor wala argent. Tongana lê ti nginza ni ane, ngere ni ayeke nga mingi. A yeke ndali ni la mbupa so a kiri pekoni na “gloire” aye ti sara tënë ti mbeni ye so ane wala so apika bê ti zo mingi.

² Mingi ni azo ayeke mû gloire na azo so ayeke na komandema wala so iri ti ala awu mingi. Me ti tene Nzapa ayä iri ti mbeni zo, nyen la lo yeke gi na mbage ti zo ni? A-Proverbe 22:4 atene: “Futa ti tâ be-ti-molenge na kpengo mbeto ti L’Éternel ayeke mosoro, na yango-iri, na fini.” Nga, disciple Jacques atene: “Ala sara tere ti ala kete na gbele Jéhovah, na fade lo yeke yä ala na nduzu.” (Jacq. 4:10). Gloire wala yango-iri so Jéhovah ayeke mû na e ayeke nyen? Aye wa la alingbi ti kanga lege na e ti wara ni? E lingbi ti sara tongana nyen ti mû maboko na azo ti wara ni?

3-5. Jéhovah amû gloire na e na alege wa?

³ Mbeni zo ti sungo psaume afa so lo hinga biani so Jéhovah ayeke mû na lo gloire. (Diko Psaume 73:23, 24.) Na lege wa Jéhovah amû gloire na azo so amä yanga ti lo? Lo mû gloire na ala na lege so lo bâ ala na nzoni lê nga lo iri tënë nzoni na ndo ti ala na alege mingi. Na tapande, lo mû maboko na ala ti hinga ye so lo ye, nga lo mû lege na ala ti duti na nzoni songo na lo.​—1 aCor. 2:7; Jacq. 4:8.

⁴ Jéhovah amû nga na e gloire na lege so lo mû lege na e ti fa nzoni tënë (2 aCor. 4:1, 7). Tongana e fa tënë, e yeke gonda Jéhovah; ye so ayeke sara si e wara gloire so alondo na lo nga e mû maboko na azo. Jéhovah amû zendo na e lo tene: “Azo so ayä iri ti Mbi, fade Mbi yä iri ti ala.” (1 Sam. 2:30). Jéhovah ayä iri ti azo so ayeke fa tënë na lege so lo sara si ala wara nzoni iri, so ti tene, lo bâ ala na nzoni lê nga ambeni zo na yâ ti congrégation ayeke tene nzoni tënë ti ala.​—aProv. 11:16; 22:1.

⁵ Kekereke ti azo so amä yanga ti Jéhovah ayeke duti tongana nyen? Bible amû zendo atene: “Fade Lo [Jéhovah lo] yä iri ti mo si sese ni aga ye ti mo; fade mo bâ lâ ti lungulango azo ti sioni.” (Ps. 37:34). Awakua ti Nzapa ayeke na pendere beku ti ngbâ na fini lakue lakue.​—Ps. 37:29.

“MBI YE PËPE TI WARA GLOIRE SO ALONDO NA AZO”

6, 7. Ngbanga ti nyen azo mingi ake lani ti yeda so Jésus ayeke Messie?

⁶ Aye wa la alingbi ti kanga lege na e ti wara gloire so Nzapa aye mingi ti mû na e? Mbeni oko ye ni ayeke tongana e bâ na nene ni mingi bango ndo ti azo so ayeke na nzoni songo na Nzapa pëpe. Bâ tënë so bazengele Jean atene na ndo ti ambeni zo so ayeke na komandema na ngoi ti Jésus. Lo tene: “Azo mingi, même na popo ti amokonzi ni, amä na bê na [Jésus] biani. Me ngbanga ti aFarizien, ala ke ti fa na gigi so ala mä na bê na lo si a tomba ala na yâ ti synagogue pëpe, teti ala ye gloire so alondo na azo ahon même gloire so alondo na Nzapa.” (Jean 12:42, 43). A yeke lani nzoni mingi ti tene amokonzi so abâ na nene ni mingi pëpe pensé so aFarizien alingbi ti duti na ni na ndo ti ala.

⁷ Na tongo nda ti kusala ti Jésus, lo fa polele ndani so azo mingi ayeda pëpe so lo la lo yeke Messie ni. (Diko Jean 5:39-44.) Teti angu ngbangbo mingi azo ti Israël ayeke ku lani gango ti Messie kungo. Na ngoi so Jésus akomanse ti fa ye, peut-être ambeni zo ahinga na lege ti prophétie ti Daniel so Messie aga nduru ti si awe. Anze kete kozoni, na ngoi so Jean wabatizengo zo ayeke fa tënë, azo mingi atene: “Âmanke Christ ni la pëpe?” (Luc 3:15). Me na ngoi so Messie ni asi, azo so ayeke fa ye na azo na ndo ti Mbeti ti Nzapa amä na bê na lo pëpe. Ngbanga ti nyen? Jésus afa raison ni na ngoi so lo hunda ala, lo tene: “So ala yeke yeda na gloire so alondo na amba ti ala na popo ti ala, na ala yeke gi pëpe ti wara gloire so alondo na Nzapa oko, ala lingbi ti mä na bê tongana nyen?”

8, 9. Mû tapande ti lumière ti fa tongana nyen la gloire so alondo na azo alingbi ti ga kota mingi na lê ti e ahon ti so alondo na Jéhovah.

⁸ Tongana e haka gloire na lumière, e yeke hinga nzoni mingi tongana nyen la gloire so alondo na azo alingbi ti ga kota mingi na lê ti e ahon ti so alondo na Jéhovah. Na lê ti nduzu a yeke wara aye tongana lâ, nze na atongoro so ayeke za lumière. Peut-être mo dabe ti mo na mbeni bï so lê ti nduzu ayeke polele so mo bâ atongoro saki na saki. Peut-être “gloire ti atongoro” ni apika bê ti mo mingi (1 aCor. 15:40, 41). Na yâ ti ambeni gbata, lumière ayeke mingi asara si a lingbi ti duti ngangu ti bâ atongoro. Ngbanga ti nyen? A yeke ngbanga ti so awâ so ayeke za na tere ti alege, na yâ ti astade nga na yâ ti ada aza mingi wala ayeke pendere mingi ahon lumière ti atongoro? Ên-ën. A yeke ndali ti so awâ ti gbata ni ayeke nduru mingi na e na asara si a yeke ngangu mingi na e ti bâ atongoro. Ti bâ pendere ti atongoro, a lingbi e gue na mbeni ndo so ayo na gbata so awâ ayeke dä.

⁹ Legeoko nga, tongana gloire so alondo na azo la agbu bê ti e mingi, alingbi ti kanga lege na e ti gi ti wara gloire so ayeke ninga so Jéhovah aye mingi ti mû na e nga ti bâ ni na nene ni. Azo mingi ayeda na tënë ti Royaume pëpe ndali ti so ala sara mbeto ti tënë so akamarade wala afami alingbi ti tene na ndo ti ala. Me, nzara ti warango gloire so alondo na azo alingbi ti gbu nga awakua ti Nzapa so amû tere ti ala na lo awe? Tara ti bâ so a hunda na mbeni ita-koli so ade maseka ti fa tënë na mbeni ndo so azo ni ahinga lo mingi, me ala hinga lo tongana Témoin ti Jéhovah pëpe. Lo yeke sara mbeto na lo ke ti fa tënë na ndo ni so? Ka tongana a he mbeni ita ndali ti so lo yeke gi ti sara aye mingi na yâ ti bungbi? Lo yeke zia si azo so ayeke na nzoni bango ndo na lege ti yingo pëpe asara ngangu na ndo ti aye so lo soro ti sara na yâ ti fini ti lo? Ka tongana mbeni ita asara kota siokpari? Lo yeke honde ndo ni ndali ti so lo sara mbeto ti tene a zi na maboko ti lo akusala so lo yeke sara na yâ ti congrégation wala ti zia vundu na bê ti azo so lo ye ala? Tongana ye so ayeke kota ye mingi na lê ti lo ayeke ti leke songo ti lo na Jéhovah, lo yeke “iri a-ancien ti congrégation ti ga na tere ti lo” ti mû maboko na lo.​—Diko Jacques 5:14-16.

10. (a) Nyen la alingbi ti si tongana e gi bê ti e ahon ndo ni na ndo ti tënë so azo alingbi ti tene na ndo ti e? (b) Nyen la e yeke na kite dä pëpe tongana e yeke na tâ be-ti-molenge?

¹⁰ Peut-être mo bâ so mo yeke sara ngangu ti ga mbeni nzoni Chrétien, me mbeni ita ayeke mû wango lakue na mo. Mo lingbi ti yeda na wango ni na mo bâ nzoni dä. Wala mo lingbi ti sara sanka ni ndali ti so mo yeke zo ti baba, mo sara mbeto ti tene iri ti mo abuba, wala mo gi araison ndali ti ye so mo sara. Bâ nga so mo na aita ayeke sara mbeni kua. Mo yeke sara mbeto so tongana mo fa mbeni nzoni ye si ala sara wala mo sara kua ngangu, mbeni zo la ayeke wara gonda ni? Tongana mo yeke na mara ti abibe so, girisa ape so “zo so ayeke na tâ be-ti-molenge [la ayeke wara] yango-iri.”​—aProv. 29:23.

11. A yeke nzoni e sara ye tongana nyen na ngoi so azo agonda e? Ngbanga ti nyen?

¹¹ A yeke nzoni a-ancien nga na aita so “agi” ti sara akusala na yâ ti congrégation asara hange ti gi gloire so alondo na azo (1 Tim. 3:1; 1 aThes. 2:6). Tongana a gonda mbeni ita ndali ti mbeni kua so lo sara ni nzoni, a yeke nzoni lo sara ye tongana nyen? Peut-être lo yeke leke pëpe mbeni image ti yä iri ti lo, tongana ti so Gbia Saül asara lani (1 Sam. 15:12). Me lo yeda so lo sara aye ni so gi ndali so Jéhovah amû maboko na lo? Lo yeda nga so lo yeke sara ande anzoni ye na yâ ti ngoi so ayeke ga gi tongana Jéhovah angbâ ti iri tënë nzoni na ndo ti lo nga ti mû maboko na lo? (1 Pi. 4:11). Ye so ayeke na yâ ti bê ti e na ngoi so azo agonda e la ayeke fa mara ti gloire so e ye ni biani.​—aProv. 27:21.

“ALA YE TI SARA AYE SO BÊ TI BABÂ TI ALA AYE”

12. Nyen la akanga lege na ambeni Juif ti mä Jésus?

¹² Mbeni ye so alingbi ti kanga lege na e ti wara gloire so alondo na Nzapa ayeke anzara ti bê ti e. Asioni nzara alingbi ti kanga lege na e ti mä tâ tënë. (Diko Jean 8:43-47.) Jésus atene na ambeni Juif atene ala ye ti mä tënë ti lo pëpe ndali ti so ‘ala ye ti sara aye so bê ti babâ ti ala Zabolo aye.’

13, 14. (a) Azo ti gingo nda ti ye atene nyen na ndo ti mongoli ti e na mango zo? (b) E yeke sara tongana nyen ti soro zo so e yeke mä lo?

¹³ Na ambeni ngoi e yeke mä gi ye so e ye ti mä (2 Pi. 3:5). Jéhovah aleke mongoli ti e na mbeni lege so alingbi ti sara sanka ti ambeni bruit. Duti kpô na bâ wala abruit oke la mo lingbi ti mä na ndembe so. Peut-être mo mä pëpe ambeni na yâ ti ngoi so ahon. Ngbanga ti nyen? Atâa so mongoli ti mo alingbi ti mä gbâ ti abruit nde nde so kue, a yeke mû maboko na mo ti zia li ti mo gi na ndo ti mbeni oko. Me tongana e mä azo use so ayeke sara tënë na ngoi oko, a yeke duti ngangu na mongoli ti e ti mû maboko na e. Azo ti gingo nda ti ye abâ so e lingbi pëpe ti dengi mê ti mä azo use na même ngoi. Ye so afa so tongana azo use ayeke sara tënë na mo na même ngoi, a lingbi mo soro zo wa la mo yeke dengi mê ti mä ti lo. Mo yeke soro ande lo so mo ye ti mä lo. A-Juif ti ngoi ti Jésus aye lani ti sara aye so bê ti babâ ti ala Zabolo aye, ni la ala ye ti mä Jésus ape.

¹⁴ Bible afa so “ndara” na “buba” ayeke gi lakue na mbeni lege ti pusu e ti mä ala (aProv. 9:1-5, 13-17). A yeke na e ti soro. E yeke mä zo wa? E yeke mä zo so e ye ti nzere na lo. Tongana e yeke angasangbaga ti Jésus, e yeke mä lo nga e yeke mû peko ti lo (Jean 10:16, 27). Jésus atene so adisciple ti lo ayeke “na mbage ti tâ tënë”. (Jean 18:37). “Ala hinga go ti awande pëpe.” (Jean 10:5). Azo tongaso so asara tere ti ala kete so ayeke wara gloire so alondo na Nzapa.​—aProv. 3:13, 16; 8:1, 18.

“AYE TI VUNDU SO AYEKE NDALI TI GLOIRE TI ALA”

15. Na lege wa la aye ti vundu so asi na Paul “ayeke ndali ti gloire” ti aÉphésien?

¹⁵ Tongana e gbu ngangu e ngbâ ti sara ye so bê ti Jéhovah aye, a yeke mû maboko na azo ti wara gloire. Paul atene na congrégation ti Éphèse, lo tene: “Mbi hunda na ala ti tene bê ti ala awoko pëpe ngbanga ti aye ti vundu so asi na mbi ndali ti ala, teti aye ti vundu so ayeke ndali ti gloire ti ala.” (aÉph. 3:13). Na lege wa la aye ti vundu so asi na Paul “ayeke ndali ti gloire” ti aÉphésien? So Paul ayeke nduru ti ngbâ ti sara kusala na aÉphésien atâa na yâ ti akpale afa na ala so apasa so ala wara so ala yeke aChrétien ayeke kota ye mingi ahon tanga ti aye kue. Tongana fade Paul azia ti sara kusala ti lo na ngoi ti aye ti vundu, ala lingbi ti pensé so songo ti ala na Jéhovah, kusala ti ala ti fango tënë nga na beku ti ala ayeke nga kota ye ape. Me so Paul agbu ngangu, lo fa so dutingo disciple ti Christ ayeke kota mingi ahon asacrifice kue.

16. Nyen la asi na Paul na Lystre?

¹⁶ Paul ayapu na yâ ti kusala ti Nzapa nga lo gbu ngangu. Gbu li na ndo ti ye so tapande ti lo asara na ndo ti aita. Kusala 14:19, 20 atene: “A-Juif alondo na Antioche nga na Iconium aga na ala handa gbâ ti azo so, na azo ni abo Paul na tênë, ala gboto lo na sese juska ala zia lo na gigi ti gbata [ti Lystre], ala bâ ti ala atene lo kui awe. Me tongana adisciple aga angoro lo, lo londo lo lï na yâ ti gbata ni. Na ndade ni, lo na Barnabas azia ndo ni na ala gue na Derbé.” Tara ti bâ tongana nyen a yeke lani ngangu na Paul, so a bo lo na tênë na angbâ kete lo kui, ti tambela na gere akilomètre 100 na ndade ni.

17, 18. (a) Tongana nyen la peut-être Timothée ahinga tënë ti pasi so Paul abâ na Lystre? (b) So Paul agbu ngangu asara nyen na ndo ti Timothée?

¹⁷ Timothée ayeke na popo ti “adisciple” so amû maboko na Paul so? Mbeti ti Kusala atene ni polele tongaso ape, me peut-être lo yeke dä. Bâ tënë so Paul atene na yâ ti use lettre so lo tokua na Timothée, lo tene: “Mo mû tâ gi peko ti fango ye ti mbi, ti dutingo ti mbi, . . . ti mara ti aye nde nde so asi na mbi na Antioche [a tomba lo na yâ ti gbata ni], na Iconium [a tara ti bo lo na tênë] nga na Lystres [a bo lo na tênë], ti mara ti aye ti ngangu so a sara na mbi si mbi kanga bê dä; me Seigneur azi mbi na yâ ti aye so kue.”​—2 Tim. 3:10, 11; Kus. 13:50; 14:5, 19.

¹⁸ Timothée ahinga so Paul agbu ngangu na yâ ti angangu kpale so kue. Timothée amanda ye mingi na lege ti tapande ti Paul. Na ngoi so Paul akiri na Lystre, lo mä so Timothée ayeke mbeni nzoni tapande na yâ ti congrégation, “aita so ayeke na Lystre na Iconium asara tënë ti lo nzoni.” (Kus. 16:1, 2). A si na mbeni ngoi, Timothée awara akota kusala na yâ ti bungbi.​—aPhil. 2:19, 20; 1 Tim. 1:3.

19. Tongana nyen la gbungo ngangu ti e alingbi ti mû maboko na amba ti e?

¹⁹ Tongana e ngbâ ti sara ye so bê ti Nzapa aye, a yeke sara nga ye mingi na ndo ti amba ti e, mbilimbili amaseka. A lingbi ti sara si ala ga ambeni wakua so ayeke nzoni mingi so Nzapa alingbi ti sara kusala na ala. Na ngoi so e yeke fa tënë, amaseka ayeke bâ e nga ala yeke bâ fason so e yeke sara na tënë na azo na ala yeke manda ye dä. Ala yeke manda nga ye na ndo ti e mbilimbili na ngoi so e yeke sara ye na gbele akpale. Paul ‘aye ti gbu ngangu na yâ ti ye kue’ tongaso si azo kue so angbâ be-ta-zo ‘alingbi ti wara salut na gloire ti lakue lakue.’​—2 Tim. 2:10.

20. Ngbanga ti nyen a yeke nzoni e ngbâ ti gi gloire so alondo na Nzapa?

²⁰ E yeke na nzoni raison ti ngbâ ti ‘gi ti wara gloire so alondo na Nzapa oko’. (Jean 5:44; 7:18). Jéhovah amû “fini ti lakue lakue na ala so ayeke gi gloire”. (Diko aRomain 2:6, 7.) Na ndo ni, tongana e gbu ngangu alingbi ti mû maboko na amba ti e ti ngbâ be-ta-zo nga ti wara fini ti lakue lakue. Tongaso zia pëpe si mbeni ye akanga lege na mo ti wara gloire so alondo na Nzapa.