Ala mû tere ti ala wani ti sara ye na Équateur

BRUNO, mbeni ita-koli na Italie so ade maseka, ayeke lani na kota desizion ti mungo ni. Lo londo ti hunzi mandango mbeti na lycée na note ti lo ayeke nzoni ahon ti amba ti lo ti klase. Afami ti lo nga na awafango mbeti awa lo ti gue na da senda-gi. Me, angu kete kozoni, lo mû tere ti lo na Jéhovah awe na lo mû zendo ti zia ye so bê ti Nzapa aye na kozo ndo na yâ ti fini ti lo. Tongaso, desizion wa la lo yeke mû? Lo tene: ‘Mbi tene lani na Jéhovah na yâ ti sambela so mbi yeke sara ye alingbi na zendo so mbi mû na lo na ti zia lo na kozo ndo.’ Me lo tene nga polele na Jéhovah na yâ ti sambela so ni ye ti wara ngia na yâ ti kusala so ni sara na Jéhovah nga ti sara mara ti akusala nde nde.

Angu kete na pekoni, Bruno ague na Équateur, na Amerika ti Mbongo. Lo tene: “Jéhovah akiri tënë na sambela ti mbi na mbeni lege so ahon so mbi ku tere ti mbi na ni.” Ye so adö bê ti lo mingi ayeke so, na ngoi so lo si na Équateur, lo wara gbâ ti ambeni maseka so ague nga kâ ti sara ye mingi na yâ ti kua ti Jéhovah.

AMASEKA SO ‘ATARA JÉHOVAH’

Bruno nga na amaseka saki mingi na yâ ti dunia, ayeda na tisango ndo ti Jéhovah so atene: “I tara Mbi na ye so fadeso, . . . ti bâ tongana Mbi lungula fenêtre ti yayu na i pëpe, na Mbi sa na ndo i ye ti nzoni so ndo alingbi na ni pëpe.” (Mal. 3:10). Yengo so ala ye na Nzapa apusu ala ti ‘tara Jéhovah’ na lege so ala wani ayeda ti mû ngoi ti ala, ngangu ti ala nga na amosoro ti ala ti mû maboko na kusala ti lo na yâ ti mbeni kodoro so ayeke na bezoin ti awafango tënë ti Royaume mingi.

Kete na pekoni so amaseka so asi na yâ ti fini kodoro ni, ala bâ so “akobe ti fango ni ayeke mingi, me azo ti kua ni ayeke mingi pëpe.” (Mat. 9:37). Na tapande, Jaqueline so alondo na Zamani asû mbeti na filiale ti Équateur lo tene: “Mbi sara kua na Équateur asara gi ngu use, me mbi yeke na azo 13 awe so mbi yeke manda Bible na ala na osio na popo ti ala ayeke gue lakue na abungbi. A yeke nzoni mingi.” Chantal so alondo na Canada atene: “Na 2008, mbi gue lani na mbeni mbage ti sese ti Équateur so ayeke na yanga ti ngu-ingo, kâ congrégation ayeke gi oko. Me fadeso acongrégation ayeke ota na apionnier ti ndo ni ahon 30.” Lo tene so a yeke mbeni pendere ye ti bâ gbâ ti afini zo so ayeke maï na yâ ti tâ tënë. Ade ti ninga ape lo gue na yâ ti mbeni gbata so ayeke na ndo ti ahoto so ayo na nduzu mètre 2743. Wungo ti azo ti yâ ti gbata ni ahon 75 000 me congrégation ayeke gi oko. Chantal atene so azo mingi ayeda na tâ tënë na lo yeke na ngia mingi ti fa tënë na yâ ti gbata ni so.

A YEKE LAKUE KETE YE PËPË

Tâ tënë, ti sara kua na yâ ti mbeni kodoro nde ayeke lakue kete ye pëpe. A yeke même kete ye pëpe na ambeni maseka ti mû desizion ti gue. Kayla, mbeni maseka-wali so alondo na États-Unis atene so ambeni zo ti congrégation ti lo na États-Unis atene lani na lo so a lingbi lo gue ape. Ala hinga pëpe ndani so lo ye ti gue ti sara kua ti pionnier na kodoro wande. Lo hinga so ala yeke gi lani ti mû maboko na lo, me sarango ye ti ala amû vundu na lo. Na ambeni ngoi, lo hinga pëpe wala nzoni desizion la lo ye ti mû so. Atâa so kue, Kayla amû desizion ti gue. Lo tene: “Gbâ ti sambela so mbi tene na Jéhovah nga na alisoro so mbi sara na aita biazo amû maboko na mbi ti bâ so Jéhovah ayeke iri tënë nzoni na ndo ti azo so ayeke nduru ti mû tere ti ala ti sara na lo.”

Ti ambeni mingi, kota kpale ni ayeke mandango mbeni fini yanga ti kodoro. Siobhan so alondo na Irlande atene: “A yeke lani ngangu na mbi ti tene ye so mbi ye ti tene ni. A lingbi mbi manda ti kanga bê ti ku, mbi manda yanga ti kodoro ni nzoni nga ti he mbi wani afaute so mbi sara.” Anna so alondo na Estonie atene: “Ndowa, gbâ ti apoussière nga na ngu ti wâ so ayeke dä pëpe ason mingi pëpe tongana a haka ni na mandango yanga ti Espagnole. Na ambeni ngoi mbi ye lani ti zia lege ti mandango ni. A lingbi mbi zia lê ti mbi gi na ndo ti aye ti nzoni so mbi sara me pëpe na ndo ti afaute ti mbi.”

A yeke nga ngangu ti duti yongoro na afami nga na akamarade. Jonathan so alondo na États-Unis atene: “Kete na pekoni so mbi si, bê ti mbi anze ndali ti so mbi yeke yongoro na akamarade nga na afami ti mbi. Me mbi hon ndo ti bibe ni so na lege so mbi mû bê ti mbi mingi ti manda Bible mbi wani nga ti fa tënë. Kete na pekoni, anzoni ye so mbi wara na fango tënë nga na afini kamarade so mbi wara na yâ ti congrégation amû maboko na mbi ti kiri ti wara ngia.”

Mbeni kpale ni ayeke gigi ti azo na yâ ti kodoro ni. Kite ayeke pëpe so gigi ni kâ ayeke tâ nde na ti ndo so mo londo dä. Beau so alondo na Canada atene so na kodoro ti lo lo yeke lakue na kuran nga na ngu ti tuyau, me ti fadeso lo yeke wara aye ni so lakue lakue ape. Yere, kpale ti a-oto ti yongo azo nga kpale ti dikongo mbeti ayeke aye so amû ndo na yâ ti akodoro so yere ayeke dä. Ines so alondo na Autriche ahon ndo ti mara ti aye tongaso na ziango lê ti lo gi na ndo ti anzoni sarango ye ti azo ti ndo ni. Lo tene: “Ala hinga ti yamba agene, ti sara ye na nzoni bê, ti mû maboko na zo nga ti sara tere ti ala kete. Na ndo ni, ala ye ti hinga ye mingi na ndo ti Nzapa.”

“YE TI NZONI SO NDO ALINGBI NA NI PËPE”

Atâa so amaseka so kue ayeke sara kua na Équateur asara asacrifice, ala bâ so Jéhovah amû na ala “ye mingi ahon ndo ti aye kue” so ala ku tere ti ala na ni (aÉph. 3:20). Biani, ala bâ so ala wara “ye ti nzoni so ndo alingbi na ni pëpe.” (Mal. 3:10). Bâ atënë ti bê ti ala na ndo ti kusala ti ala:

Bruno: “Mbi komanse kua ti pionnier ge na Équateur na yâ ti apendere ndo so ayeke na Amazonie. Na pekoni, mbi mû maboko na kua ti konongo yâ ti filiale ti Équateur. Ti fadeso mbi yeke sara kua na Béthel. Ândö na Italie, mbi soro ti zia Jéhovah na kozo ndo, na lo sara biani si mbi yeke na ngia na yâ ti fini ti mbi, mbi sara aye nde nde na yâ ti kusala ti lo.”

Beau: ‘Fadeso songo ti mbi na Jéhovah akpengba mingi ndali ti so na Équateur, mbi lingbi ti mû ngoi ti mbi kue ti sara na kusala ti lo. Nga, mbi lingbi ti voyagé ti gue na apendere ndo; a yeke mbeni ye so mbi ye lani ti sara.’

Anna: ‘Teti so mbi yeke wali so ade kumbamba, mbi pensé lani mbi tene mbi lingbi pëpe ti duti na fini tongana missionnaire. Me fadeso mbi hinga so lege ayeke dä ti tene mbi sara ni. Merci ndali ti aye ti nzoni so Jéhovah asara na mbi, ti sara si azo aga adisciple, ti leke aDa ti Royaume nga ti wara afini kamarade. A nzere na mbi mingi.’

Elke: ‘Na kodoro ti mbi na Autriche, mingi ni mbi yeke sambela lani ti wara kamême étude oko. Ge mbi yeke na a-étude 15. A nzere na mbi mingi ti bâ tongana nyen ala yeke na ngia ti hinga ye na ndo ti Jéhovah.’

Joel: ‘Ti sara na Jéhovah na kodoro wande ayeke mbeni pendere ye mingi. Mo yeke manda ti zia bê ti mo mingi na ndo ti Jéhovah, nga anzere mingi ti bâ so lo iri tënë nzoni na ndo ti angangu so mo sara! Na yâ ti kozo ngu ti mbi ge na pekoni so mbi zia États-Unis, awafango tënë ti kete groupe so mbi yeke na yâ ni ayeke lani 6 me ala si fadeso 21. Na Mémorial e si 110.’

KA TI MO AYEKE TONGANGA NYEN?

Ala aita-koli na aita-wali so ade maseka, dutingo ti ala amû lege na ala ti gue ti sara kua na mbeni ndo so a yeke na bezoin ti awafango tënë ti Royaume dä mingi? Tâ tënë, ti mû mbeni kota desizion tongaso ahunda ti leke aye kozoni nzoni. Na ndo ni kue, a lingbi mo duti na kota ndoye na mbage ti Jéhovah nga na azo. Tongana mo yeke na mara ti ndoye so nga mo lingbi ti gue ti sara kua na mbeni kodoro nde, sambela Jéhovah na bê ti mo kue na ndo ti tënë ni. Sara nga tënë ni na babâ na mama ti mo so ayeke aChrétien nga na a-ancien ti congrégation ti mo. Na nda ni mo lingbi ti bâ so mo nga kue mo lingbi ti sara na Jéhovah na mara ti lege tongaso so ayeke pendere mingi.

[Tënë na lembeti 3]

“Gbâ ti sambela so mbi tene na Jéhovah nga na alisoro so mbi sara na aita biazo amû maboko na mbi ti bâ so Jéhovah ayeke iri tënë nzoni na ndo ti azo so ayeke nduru ti mû tere ti ala ti sara na lo.”​—Kayla so alondo na États-Unis

[Encadré/ Foto na lembeti 6]

Ye ti sara kozo ti gue ti fa tënë na mbeni kodoro nde

• Manda ye mo wani lakue

• Kiri mo diko alembeti 4-6 ti Kusala ti Royaume ti août 2011.

• Sara lisoro na azo so asara kusala awe na yâ ti mbeni kodoro nde

• Gi ti hinga ye na ndo ti sarango ye ti azo nga na mbaï ti kodoro ni

• Gi ti to nda ti manda yanga ti kodoro ni

[Encadré/Foto na lembeti 6]

Ambeni zo so asara kusala na yâ ti mbeni kodoro nde ayeke wara nginza na lege so . . .

• ala sara kua ti nginza teti ambeni nze ngu oko oko na yâ ti kodoro ti ala

• ala zia da ti ala na ambeni zo ti loué ni wala buze ti ala ti tene mbeni zo abâ lege ni

• ala sara kua na lege ti Internet

[Afoto na lembeti 4, 5]

1 Jaqueline alondo na Zamani

2 Bruno alondo na Italie

3 Beau alondo na Canada

4 Siobhan alondo na Irlande

5 Joel alondo na États-Unis

6 Jonathan alondo na États-Unis

7 Anna alondo na Estonie

8 Elke alondo na Autriche

9 Chantal alondo na Canada

10 Ines alondo na Autriche