Ala mû tere ti ala wani ti sara ye na Brésil

A NINGA angu kete awe, Rúbia (1), mbeni ita-wali so ayeke fadeso na ngu 30, asara lani mbeni voyage ti gue ti bâ Sandra (2), mbeni ita-wali so ayeke sara kua ti pionnier na yâ ti mbeni kete congrégation so ayeke na mbongo ti Brésil. Na ngoi ti vizite ni, mbeni ye so asi adö bê ti Rúbia mingi na asara si fini ti lo achangé. Nyen la asi lani? Zia Rúbia wani afa ni na e.

“A HON GBUNGO LI TI MBI”

“Sandra amû mbi e gue ti sara vizite na mbeni wali so lo yeke manda Bible na lo. Na ngoi ti étude ni, wali ni atene: ‘Sandra, ambeni maseka-wali ota na place ti kua ti mbi aye ti manda Bible, me mbi tene na ala so a lingbi ala ku tour ti peko. Mbi hinga so wungo ti azo so mo ye ti manda Bible na ala na ngu so alingbi awe.’ Ye so ahon gbungo li ti mbi. A lingbi a sû iri ti azo so aye ti hinga ye na ndo ti Jéhovah na mbeti ti ku tour ti peko! Na yâ ti congrégation ti mbi, a yeke ngangu ti tene mbi wara même étude oko. Tâ gi na ngoi ni so, so e yeke na yanga-da ti wali so ayeke manda Bible so, nzara ti mungo maboko na azo na yâ ti kete kodoro ti lo agbu mbi ngangu. Kete na pekoni, mbi zia kota gbata so mbi yeke dä kozo, mbi gue na ndo so Sandra ayeke sara kua ti pionnier dä.”

Aye ti nzoni wa Rúbia awara na pekoni? Lo tene: “Na peko ti nze use, mbi yeke lani na azo 15 so mbi yeke sara étude na ala.” Nga kete na pekoni, tongana ti Sandra, Rúbia ayeke na mbeni molongo ti iri ti azo so ayeke ku ti manda Bible!

A PUSU LO TI GBU LI NA NDO TI KUA TI LO TI FANGO TËNË

Diego (3), mbeni ita-koli so fadeso ngu ti lo ahon 20 tongaso, ague lani na ndo ti ambeni ita-koli so ayeke apionnier na Prudentópolis, mbeni kete gbata na mbongo ti Brésil. Vizite so apusu lo ti gbu li na ndo ti kusala ti lo ti fango tënë. Na yâ ti congrégation ti lo, lo yeke mû lani gi angbonga kete ti fa tënë nze oko oko. Me na ngoi so lo gue na ndo ti aita pionnier so na ala fa na lo aye ti nzoni so ala wara, lo bâ so ala yeke na ngia mingi na yâ ti kusala ti ala ti fango tënë ahon ti lo. Diego atene: “Tongana mbi bâ so ala yeke na ngia nga tere ti ala anzere mingi, mbi ye ti sara mbeni nzoni ye na yâ ti fini ti mbi ti duti na ngia tongana ti ala.” Na peko ti vizite so lo ga pionnier.

Mo yeke mbeni Témoin so ade maseka? Legeoko tongana Diego, mo yeke fa tënë nga mo yeke gue na abungbi me mo bâ so fango tënë aga na mo ngia mingi pëpe? Tongana a yeke tongaso, mo lingbi ti changé ambeni ye na yâ ti fini ti mo ti mû lege na mo ti wara ngia na fango tënë na ando so bezoin ti awafango tënë ayeke dä mingi? A yeke na lege ni ti tene mo sara mbeto ti zia ambeni ye ti nzoni so mo yeke na ni. Me amaseka mingi azia ambeni nzoni ye ti ala. Na mbeto pëpe ala changé aye so ala zia na gbele ala ti sara nga na anzara ti bê ti ala tongaso si ala lingbi ti sara ye mingi na yâ ti kusala ti Jéhovah. Bâ tapande ti Bruno.

KOTA WAPIKANGO MOZOKO WALA WAFANGO TËNË?

Na yâ ti angu so ahon Bruno (4), so ayeke fadeso na ngu 28, amanda mbeti na yâ ti mbeni kota ekole ti mozoko. Lo ye lani ti ga mbeni kota wapikango mozoko. Lo manda ni lani nzoni mingi, a sara si a tisa lo fani mingi ti gue ti mû li ni na yâ ti mbeni bungbi ti pikango mozoko. Lo yeke gue lani ti ga mbeni kota zo ti pikango mozoko. Me Bruno atene: “Mbi bâ so mbeni ye amanke na yâ ti fini ti mbi. Mbi mû lani tere ti mbi na Jéhovah awe, me mbi hinga so mbi mû fini ti mbi kue na lo ape na ye so asara mbi nzoni ape. Mbi fa atënë ti bê ti mbi na Jéhovah na yâ ti sambela nga mbi sara tënë ni na aita so aninga na yâ ti congrégation.” Na pekoni so Bruno agbu li nzoni na ndo ti dutingo ti lo, lo mû desizion ti zia kusala ti lo ti fango tënë na kozo ndo, lo zia lege ti ekole ti mozoko, na lo gue na mbeni ndo so ayeke na bezoin ti awafango tënë mingi. Aye ti nzoni wa lo wara na peko ti desizion ti lo so?

Bruno ague na gbata ti Guapiara so ayo akilomètre 260 tongaso na gbata ti São Paulo nga azo 7 000 tongaso ayeke na yâ ni. A yeke lani mbeni kota changement na lo. Lo tene: “Mbi gue na yâ ti mbeni kete da so frigo, télé wala Internet ayeke dä ape. Me na tere ti da ni mbi wara ambeni ye so mbi yeke na ni kozo ape: mbeni jardin nga na akeke so a yeke te lengo ni.” Bruno ayeke sara kusala na ndo ni so na yâ ti mbeni kete congrégation. Fani oko na yâ ti yenga oko lo yeke mû kobe, ngu nga na ambeti na yâ ti bozo ti lo na lo mû moto ti lo lo gue lo fa tënë na akete kodoro so ayo. Azo mingi so ayeke na ando ni so ade ti mä nzoni tënë ape. Bruno atene: “Mbi manda lani Bible na azo juska 18. Tongana mbi bâ lege so a-étude so achangé aye na yâ ti fini ti ala, a nzere na mbi mingi.” Lo kiri lo tene: “Na ngoi ni so, mbi bâ so mbi wara ye so amanke lani na yâ ti fini ti mbi: ngia so zo ayeke wara na ziango aye ti Royaume na kozo ndo.” Lo hinga so tongana lo ngbâ lani na yâ ti kua ti lo ti pikango mozoko so, lo yeke wara ngia so lâ oko ape. Me Bruno ayeke wara nginza tongana nyen ti futa na aye so lo yeke na bezoin ni na Guapiara? Na ngia na yanga lo tene: “Na fango pikango guitare na azo.” E lingbi ti tene so lo ngbâ lani mbeni kota wapikango mozoko.

“MBI MÛ DESIZION TI NGB”

Dutingo ti Mariana (5), so fadeso aga nduru ti wara ngu 30 awe, akpa ti Bruno. Atâa so lo wara nginza mingi na yâ ti kua ti lo ti avocat, lo bâ so lo yeke na ngia kue ape. Lo tene: “Mbi bâ so lani mbi yeke ‘tomba pupu senge.’” (Zo-ti. 1:17). Aita mingi awa lo ti gbu li na ndo ti kua ti pionnier. Na pekoni so Mariana agbu li nzoni na ndo ti dutingo ti lo, lo na akamarade ti lo Bianca (6), Caroline (7) nga na Juliana (8) amû desizion ti mû maboko na congrégation ti Barra do Bugres. A yeke mbeni kete kodoro so ayo akilomètre ngbangbo mingi na ndo ti ala nga ayeke nduru na kodoro ti Bolivie. Nyen la asi na pekoni?

Mariana atene: “Mbi ye lani ti ngbâ kâ teti nze ota. Me na nda ti nze ota so, mbi yeke sara a-étude 15! Azo so mbi yeke manda Bible na ala so ayeke na bezoin ti tene a mû maboko na ala mingi ti maï na yâ ti tâ tënë. Ni la, mbi yeke na nzara ti tene na ala ape so mbi yeke zia ala ti kiri. Mbi mû desizion ti ngbâ.” A yeke ye so aita-wali osio so kue asara. Fadeso Mariana abâ so lo sara mbeni nzoni ye na yâ ti fini ti lo. Lo tene: “A nzere na mbi mingi so Jéhovah asara kusala na mbi ti mû maboko na azo ti changé fini ti ala ti ga nzoni ahon ti kozo. Ti hinga so fadeso mbi yeke mû ngoi nga na ngangu ti mbi ti sara mbeni ye so ayeke biani nzoni ayeke mbeni pasa teti mbi.” Caroline afa na nduru tënë tënë ti bê ti aita-wali osio so kue, lo tene: “Tongana mbi lango na bï, tere ti mbi anzere ngangu ndali ti so mbi mû fini ti mbi ti sara na kua ti Jéhovah. Ye so ayeke kota na yâ ti fini ti mbi ayeke ti hinga tongana nyen ti mû maboko na azo so mbi yeke manda Bible na ala. Ti bâ lege so ala yeke gue na li ni anzere mingi. Mbi bâ gango tâ tënë ti atënë so: ‘Tara L’Éternel, na fade mo bâ Lo yeke nzoni!’”​—Ps. 34:9.

Jéhovah ayeke biani na ngia ti bâ gbâ ti amaseka-koli na amaseka-wali na yâ ti dunia so ‘amû tere ti ala mveni na nzobe’ ti fa nzoni tënë ti Royaume ti lo na ando so ayo (Ps. 110:3; aProv. 27:11). Jéhovah ayeke iri tënë nzoni mingi na ndo ti awakua tongaso so amû tere ti ala wani ti sara na lo.​—aProv. 10:22.

[Encadré/Foto na lembeti 5]

Ye oko amanke e ape

Na ngoi so João Paulo na wali ti lo Noemi atene lani so ala ye ti gue ti fa tënë na mbeni ndo so kota bezoin ayeke dä, ambeni ita na yâ ti congrégation atene na ala atënë so akpengba zo ape. Ambeni atene so na yâ ti kete kodoro a yeke duti ngangu na João Paulo na Noemi ti wara nginza ti bâ na lege ti abezoin ti ala. Ambeni atene so a yeke nzoni ala gue ape ndali ti so aye mingi angbâ na yâ ti congrégation ti ala ti sara. João Paulo atene so a yeke ngangu pëpe ti tene bê ti ani anze atâa so aita so ayeke gi lani ti mû maboko na ani. Me laso, na pekoni so ala gue afa tënë teti ambeni ngu na mbeni ndo so ayeke na bezoin ti awafango tënë mingi, ala yeke na ngia so ala zia lani pëpe desizion ti ala ti sara ye mingi na fango tënë. João Paulo afa so ngbene ye so ala gue kâ, ye oko amanke ala ape nga fadeso ala yeke na aye ti nzoni mingi ahon ti kozo. Noemi atene: “E wara ye ti nzoni na peko ti ngangu so e sara so.”

Ti lango na yâ ti akete kodoro ayeke kete ye ape. Azo so ague na ando so ayo awara nginza na ndo wa ti bâ na lege ti abezoin ti ala? Ala gbu li na ndo ti alege nde nde so ala lingbi ti sara kua na akode ti ala. Ambeni afa yanga ti Anglais wala ti mbeni kodoro nde na azo, ala fa mbeti na amolenge na yanga-da, ambeni afü bongo wala ala zia peinture na tere ti ada wala ala sara kua kue so ala lingbi ti wara ngoi ti fa tënë mingi. Tënë ti bê ti azo so ague na ando so ayeke na bezoin ti awafango tënë mingi so ayeke so wa? Ala kue abâ so ala wara aye ti nzoni na peko ti ngangu so ala sara!

[Encadré/Foto na lembeti 6]

Ti duti ayo na afami alingbi ti sara zo vundu

Tiago atene: “Kete na pekoni so mbi si na yâ ti fini congrégation, bê ti mbi akomanse ti nze. Awafango tënë ayeke gi kete na yâ ti gbata ni nga a yeke ngangu ti wara aye ti ngia. Nzara ti kodoro ti mbi akomanse ti sara mbi. Mbi bâ so a lingbi mbi sara mbeni ye ti hon ndo ni. Ni la, mbi komanse ti sara ngangu ti gi ti hinga aita ti yâ ti congrégation ni nzoni, ye so amû maboko na mbi. Mbi wara afini kamarade, nga kete na pekoni mbi yeke na ngia mingi nga ndo ni aga tongana kodoro ti mbi.”

[Foto na lembeti 3]

Noemi na João Paulo, Ascurra na Santa Catarina