‘Fade mbi duti na mbeto ti zo wa?’
“Tongana bira alondo na tere ti mbi, même na yâ ye so, bê ti mbi aduti kpô.”—PS. 27:3.
NA LEGE WA AVERSÊ SO GE AYEKE MÛ MABOKO NA MO TI DUTI NA MBETO APE?
1. Psaume 27 ayeke kiri tënë na ahundango ndo wa?
NGBANGA TI NYEN e yeke fa tënë mingi atâa so aye ti dunia so ayeke ga gi sioni ahon ti kozo? Ngbanga ti nyen a nzere na e ti mû ngoi nga na ngangu ti e mingi ti fa tënë atâa so akpale ti konomi ayeke mingi? Tongana nyen la e lingbi ti ngbâ ti duti na mbeto pëpe na ngoi so azo mingi ayeke gi bê ti ala na ndo ti kekereke? Bia ti Gbia David so ayeke na Psaume 27 akiri tënë na ahundango ndo so.
2. Kota mbeto ayeke sara si zo asara ye tongana nyen? Nyen la e yeke na kite dä ape?
2 David ato nda ti Psaume so na atënë so: “L’Éternel ayeke Lumière ti mbi na Salut ti mbi; Fade mbi kpe mbeto ti zo nyen? L’Éternel ayeke Gbada ti Bira ti fini ti mbi; fade mbi duti na mbeto ti zo nyen?” (Ps. 27:1). Kota mbeto alingbi ti sara si mbeni zo awoko na lo sara ye oko ape. Me zo so azia bê ti lo na Jéhovah ayeke na mbeto ape (1 Pi. 3:14). Tongana e mû Jéhovah tongana gbada ti bira ti e, ‘fade e duti na siriri, na bê ti e aduti nzoni, na mbeto ti sioye asara e pëpe.’ (aProv. 1:33; 3:25). Ngbanga ti nyen?
“L’ÉTERNEL AYEKE LUMIÈRE TI MBI NA SALUT TI MBI”
3. Na lege wa Jéhovah ayeke lumière ti e? Nyen la a lingbi e sara?
3 Tongana Bible atene “L’Éternel ayeke Lumière ti mbi”, a ye ti tene so Jéhovah ayeke fa tâ tënë na e (Ps. 27:1). Lumière alingbi ti sara si e bâ mbeni ye ti sioni so ayeke na ndo ti lege so e tambela dä, me a yeke zi ye ti sioni ni ape. Alingbi e kpe ye ti sioni ni. Legeoko nga, Jéhovah afa na e nda ti aye so ayeke si na yâ ti dunia so. Lo mû nga wango na e na ndo ti aye ti sioni ti dunia so. Na yâ ti Bible, lo mû na e anzoni wango so ayeke mû lakue maboko na e. Me a lingbi e sara ye alingbi na ye so e manda. Tongana e sara tongaso, e yeke duti na ndara ahon awato ti e nga na amaître ti e.—Ps. 119:98, 99, 130.
4. (a) Ngbanga ti nyen la David atene Jéhovah ayeke salut ti ni? (b) Na ngoi wa mbilimbili la Jéhovah ayeke ga salut ti e?
4 Atënë ti David so ayeke na Psaume 27:1 afa na e so lo girisa pëpe tongana nyen la Jéhovah azi lo ândö. Na tapande, Jéhovah azi lani lo “na tïtî bamara [nga] na tïtî ours”. Jéhovah asara nga si lo sö benda na ndo ti Goliath. Na pekoni Jéhovah azi lo na ngoi kue so Gbia Saül ayeke gi ti kpo lo na likongo (1 Sam. 17:37, 49, 50; 18:11, 12; 19:10). A yeke ndali ti aye so kue la David atene so Jéhovah ayeke salut ti ni. Jéhovah ayeke ga salut ti awakua ti lo tongana ti so lo sara na David. Lo yeke sara ni lawa? Na ngoi ti “kota ye ti vundu” so ayeke ga.—Apoc. 7:14; 2 Pi. 2:9.
DABE TI MO NA ANGOI KUE SO JÉHOVAH AMÛ MABOKO NA MO
5, 6. (a) Na lege wa aye so e yeke dabe ti e na ni amû maboko na e ti duti na mbeto ape? (b) Ngbanga ti nyen a yeke nzoni ti dabe ti e na ndo ti lege so Jéhovah amû maboko na awakua ti lo ândö?
5 Mbeni kpengba ye so e lingbi ti sara ti duti na mbeto pëpe ayeke na Psaume 27:2, 3. (Diko ni.) David adabe ti lo na angoi so Jéhovah asö lani lo (1 Sam. 17:34-37). Aye so lo dabe ti lo na ni so azi mbeto na yâ ti lo na lo gbu ngangu na yâ ti aye so ayeke ngangu mingi. Mo nga kue a si na mo tongaso? Na tapande, mo sambela ngangu ndali ti mbeni kpale na pekoni mo bâ so Jéhovah amû na mo ndara wala lo kpengba mo ti gbu ngangu na yâ ti tara ni? Wala mo dabe ti mo tongana nyen Jéhovah amû maboko na mo ti hon ndo ti aye so aye ti kanga lege na mo ti sara kusala ti lo na ngia? Wala mo dabe ti mo tongana nyen la mbeni kota yanga-da azi na mo na yâ ti kusala ti lo? (1 aCor. 16:9). Tongana mo dabe ti mo na aye ni so asara nyen na ndo ti mo laso? A yeke nzoni aye ni so angbâ ti sara si mo hinga na bê kue so Jéhovah alingbi ti mû maboko na mo ti hon même ndo ti akpale so ayeke ngangu mingi wala ti gbu ngangu na yâ ni.—aRom. 5:3-5.
6 Nyen la e yeke sara nyen tongana mbeni ngangu ngorogbia aye ti futi aTémoin ti Jéhovah kue tongana mbeni groupe? Ambeni zo ti ngoi ti e atara ti sara tongaso, me ala wara lege ape. Tongana e dabe ti e tongana nyen la Jéhovah amû maboko na azo ti lo ândö, e yeke gbu ngangu atâa ye wa la asi kekereke.—Dan. 3:28.
BÂ TÂ VORONGO NA NENE NI
7, 8. (a) Na Psaume 27:4, nyen la David ahunda na Jéhovah? (b) Kota temple ti Jéhovah ti yingo ayeke nyen? Tongana nyen la e yeke voro lo dä laso?
7 Ndoye so e yeke na ni teti tâ vorongo, a yeke mû nga maboko na e ti duti na mbeto ape. (Diko Psaume 27:4.) Na ngoi ti David, “da ti L’Éternel” ayeke lani tabernacle. A yeke David la aleke aye kue kozoni ti mû lege na molenge ti lo Salomon ti leke mbeni pendere temple na Jéhovah. Ngu ngbangbo mingi na pekoni, Jésus atene so mbeni ngoi ayeke si ande so azo ayeke na bezoin pëpe ti gue na temple so lê abâ si ala voro Jéhovah (Jean 4:21-23). Jéhovah aleke mbeni ye so azi lege na e ti voro lo na mbeni lege so lo yeda na ni. Lo yeke yeda na vorongo ti e gi tongana e mä na bê na sandaga ti Jésus. Na aHébreu chapitre 8 ti si na 10 bazengele Paul afa so ye ni so ayeke kota temple ti yingo so e lingbi ti voro Nzapa dä, so “maboko ti zo la asara ni pëpe”. Paul afa so temple so abâ gigi na ngoi so Jésus awara batême na ngu 29 na lo mû tere ti lo wani ti sara ye so bê ti Jéhovah aye (aHéb. 10:10). Tongana nyen la e yeke voro Nzapa na yâ ti temple ni so? E yeke sara ni na sambelango Jéhovah “na tâ bê ti e, na kite oko pëpe nga na mabe”, nga na fango tënë na ndo ti lo na azo na mbeto pëpe. E yeke voro nga Nzapa na yâ ti temple so na ngoi so e gue na abungbi nga na ngoi ti vorongo Nzapa na yâ ti sewa (aHéb. 10:22-25). Ndoye so e yeke na ni teti tâ vorongo ayeke mû maboko na e ti ngbâ ti sara aye so na yâ ti angoi ti ngangu so.
8 Na yâ ti dunia, awakua be-ta-zo ti Jéhovah ayeke mû angoi ti ala mingi ti fa tënë, ti manda afini yanga ti kodoro, nga ti gue na ando so bezoin ti awafango tënë ti Royaume ayeke dä mingi. Aye so ala sara so afa so, tongana ti wasungo Psaume so, ala hunda na lo gi mbeni ye oko. Ala ye ti tene Jéhovah airi tënë nzoni na ndo ti ala nga ti voro lo atâa ye wa la asi.—Diko Psaume 27:6.
ZIA BÊ TI MO NA MUNGO MABOKO TI NZAPA
9, 10. Tënë so ayeke na Psaume 27:10 aye ti tene nyen?
9 Atënë ti David so ayeke na Psaume 27:10 afa tongana nyen la lo zia bê ti lo mingi na mungo maboko ti Jéhovah. Lo tene: “Tongana babâ na mama ti mbi azia mbi, fade L’Éternel akamata mbi.” Aye so a sara tënë ni na 1 Samuel chapitre 22 amû lege na e ti tene so babâ na mama ti David azia lo ape. Ye oko, laso afami ti azo mingi ake ala. Azo mingi so afami ti ala ake ala awara mungo maboko na batango tere na mbage ti congrégation ti aChrétien so asara ye na ndoye.
10 Jéhovah ayeke nduru ti mû maboko na awakua ti lo même tongana azo ake ala. Tongaso e yeke na kite oko pëpe so lo yeke bâ lege ti ala na ngoi so ala tingbi na ambeni kpale. Na tapande, tongana e yeke gi bê ti e na ndo ti lege so e yeke bâ lege ti sewa ti e na lege mitele, a lingbi e girisa pëpe so Jéhovah ayeke mû ande maboko na e (aHéb. 13:5, 6). Lo hinga dutingo ti e nga lo hinga ye so e yeke na bezoin ni.
11. Tongana e zia bê ti e na Jéhovah ayeke sara nyen na ndo ti azo? Fa mbeni tapande ni.
11 Bâ tapande ti Victoria, mbeni wamandango Bible na Libéria. Na ngoi so lo manda Bible na lo gue na li ni ti wara batême, koli so lo na lo avivre adö lo azia na amolenge ota. Atâa so lo yeke na da ape nga lo sara kua ape, lo ngbâ ti manda Bible nga lo wara batême. Mbeni lâ, molenge ti lo ti wali so ayeke na ngu 13 awara mbeni bozo so nginza asi yâ ni. Ti kpe ti tene ala tï na yâ ti tara, ala ke même ti diko nginza ni. Ala gi hio ti wara wa ti bozo ni so ayeke mbeni turugu. Lo tene na ala so tongana azo kue asara ye na lege ni tongana aTémoin ti Jéhovah, ka dunia ayeke duti nzoni nga na siriri mingi. Victoria afa na turugu ni na yâ ti Bible tënë ti fini dunia so Jéhovah amû zendo ni. So Victoria angbâ be-ta-zo apika bê ti turugu ni mingi, na lo mû na Victoria mbeni kota wungo ti mbage ti nginza ni. Ndali ti so aTémoin ti Jéhovah azia bê kue na lo ti bâ lege ti ala, ala yeke sara ye na lege ni, na azo ahinga ala na ni na yâ ti dunia.
12. Ngbanga ti nyen e yeke ngbâ lakue ti voro Jéhovah atâa so a lingbi ti zi e na kua wala e wara pëpe nginza ti e? Mû mbeni tapande ni.
12 Bâ ye so asi na Thomas, mbeni wafango tënë so ade ti wara batême ape na Sierra Leone. Lo komanse ti fa mbeti na lycée, me nduru na ngu oko a futa lo pëpe. A lingbi Thomas asara lisoro na wayinda ti ekole ni ti tene a futa na lo nginza ti lo. Wayinda ni ayeke lani mbeni prêtre, na lo tene na Thomas so ekole ni ayeda pëpe na aye so aTémoin ti Jéhovah amä na bê na ni. Lo tene na Thomas ti soro kua ti lo wala aye so lo mä na bê na ni na yâ ti Bible. Thomas ake kua ni atâa so a futa na lo pëpe nginza ti lo. Na pekoni, Thomas awara kua ti lekengo radio na téléphone ti maboko. Atapande mingi afa so tongana e zia bê ti e kue na Jéhovah, e yeke sara pëpe mbeto ti manke ye so e yeke na bezoin ni. Ndali ti so Jéhovah la asara ye kue nga lo yeke bata azo ti lo lakue, e hinga biani so lo yeke bâ lege ti e.
13. Ngbanga ti nyen aita so ayeke na yâ ti akodoro so ayeke na yâ ti yere ayeke na aye mingi ti sara na yâ ti kua ti fango tënë?
13 Na yâ ti akodoro mingi so ayeke na yâ ti yere aita ayeke na aye mingi ti sara na yâ ti kusala ti fango tënë. Ngbanga ti nyen? Mbeni filiale atene so azo mingi so ayeda ti manda Bible ayeke na kua ape, tongaso ala yeke na ngoi mingi ti manda Bible na kota lâ. Aita nga ayeke na ngoi mingi ti fa tënë. Azo ayeke yeda hio so e yeke na yâ ti alango ti nda ni ndali ti so ala bâ aye ti sioni so angoro ala. Na yâ ti mbeni kodoro, awafango tënë mingi ayeke na a-étude ahon ota. Mbeni ita so asara kua ti missionnaire ahon ngu 12 na yâ ti kodoro ni so atene so mingi ti aita ayeke na angoi mingi ti fa tënë nga ti sara a-étude ndali ti so ala yeke pëpe na aye mingi so amû ngoi ti ala.
14. Na alege wa Nzapa ayeke bata ande azo mingi mingi?
14 Jéhovah amû zendo ti mû maboko na azo ti lo kue tongana mbeni groupe, ti bata ala nga ti sö ala, na e yeke na kite oko pëpe so lo yeke sara ye alingbi na ni (Ps. 37:28; 91:1-3). Gbâ ti azo la ayeke sö kuâ ande “na yâ ti kota ye ti vundu”. (Apoc. 7:9, 14). Tongaso, Nzapa ayeke bata gbâ ti azo so na lege so lo yeke zia ande lege pëpe na mbeni zo ti futi azo ti lo kue na alango ti nda ni so. Mbeni lege so Jéhovah ayeke bata ande na azo ti lo ayeke so lo mû na ala aye kue so ala yeke na bezoin ni ti gbu ngangu na yâ ti atara na ti bata songo ti ala na lo. Na Harmaguédon, Jéhovah ayeke bata ande azo ti lo na lege so lo yeke sö fini ti ala.
“O L’ÉTERNEL, FA NA MBI LEGE TI MO”
15, 16. Ye ti nzoni wa e yeke wara tongana e sara ye alingbi na aye so Nzapa afa na e? Fa mbeni tapande ni.
15 Tongana e ye ti ngbâ ti duti na mbeto ape, a lingbi e zia si Nzapa angbâ ti fa ye na e. David atene: “O L’Éternel, fa na mbi lege ti Mo; fa na mbi lege so ayeke mbilimbili.” (Ps. 27:11). Ti zia si Nzapa afa ye na e aye ti tene so a lingbi e dengi mê nzoni na aye so Bible atene nga na fango lege so bungbi ti Jéhovah ayeke fa na e. Nga, a lingbi e sara ye hio ague oko na ni. Na tapande, azo mingi asara ye alingbi na wango ti ndara so ahunda ti duti na aye mingi pëpe. Ala futa abon ti ala nga ala kä aye so ala yeke na bezoin ni ape. A sara si na ngoi so kpale ti konomi aga ngangu, ala gi bê ti ala na ndo ti kpale ti nginza mingi ape. Fadeso ala yeke na bezoin pëpe ti sara kua ngangu ti ngbâ ti futa aye so ala yeke nga biani na bezoin ni ape, na ala lingbi ti fa tënë mingi. A yeke nzoni e oko oko kue e hunda tere ti e: ‘Mbi yeke sara ye hio alingbi na aye kue so mbi diko na yâ ti Bible nga na yâ ti ambeti so ngbâa be-ta-zo so ayeke sara ye na ndara asigigi na ni, atâa ayeke ngangu mingi na mbi?’—Mat. 24:45.
16 tongana e zia lege na Jéhovah ti fa ye na e nga ti fa na e tongana nyen ti sara ye na fini ti e, mbeni ye ti sara e mbeto ayeke dä ape. Mbeni pionnier permanent na États-Unis ahunda na kota zo ti place ti kua ti lo ti zia lo na mbeni place ni nde ti tene amû lege na lo na azo ti sewa ti lo kue ti ngbâ ti sara kua ti pionnier. Kota zo ni atene na lo so lo yeke wara kua ni so lâ oko ape ndali ti so lo yeke na kota diplôme ape. Tongana mo la ye so asi na mo, vundu ayeke sara mo so mo sara kua ti ngoi kue na mo yeke na kota diplôme ape? Yenga use na pekoni, a zi kota zo ni so na kua na fini kota zo ni ahunda ita ni na ndo ti aye so ita ni aye ti sara. Ita ni atene na lo so lo na wali ti lo ayeke aTémoin ti Jéhovah so ayeke sara kua ti ngoi kue na ala ye ti ngbâ ti sara ni. Me kozoni si ita ni akiri azi yanga, fini kota zo ni atene: “Mbi hinga so mo yeke ti mo nde. Na ngoi so lani babâ ti mbi aga nduru ti kui, ambeni mba ti mo aTémoin use ayeke ga lakue adiko Bible na lo. Na mbi tene na bê ti mbi so tongana mbi wara lege ti mû maboko na mbeni Témoin ti Jéhovah, mbi yeke sara ni.” Na ndade ni na ndapre, ita ni awara kua so ngbene kota zo ni ake ti mû na lo so. Tongana e zia Royaume na kozo ndo na yâ ti fini ti e, Jéhovah ayeke sara ye alingbi na zendo so lo mû ti mû na e ye kue so e yeke na bezoin ni.—Mat. 6:33.
A LINGBI E DUTI NA MABE NGA NA BEKU
17. Nyen la ayeke mû maboko na e ti duti na mbeto ti kekereke pëpe?
17 David abâ so a yeke kota ye ti duti na mabe nga na beku tongana lo tene: “Mbi hinga fade mbi bâ nzobe ti L’Éternel na sese ti azo ti fini.” (Ps. 27:13). Fini ti e ayeke duti tongana nyen tongana Nzapa amû na e beku ape nga e hinga pëpe aye so a sara tënë ni na Psaume 27? Tongaso, na yâ ti alango ti nda ni so, a lingbi e ngbâ ti sambela Jéhovah ti mû na e ngangu na ti sö e na ngoi ti Harmaguédon.—Diko Psaume 27:14.
[Foto na lembeti 23]
David awara ngangu na ngoi so lo dabe ti lo na aye so Jéhovah asara ti zi lo
[Foto na lembeti 25]
E bâ kpale ti konomi tongana mbeni pasa so azi lege na e ti fa tënë mingi?