“Ala hinga lango ni nga na ngbonga ni pëpe”

“Ni la, zia ala lango pëpe, ngbanga ti so ala hinga lango ni nga na ngbonga ni pëpe.”​—MAT. 25:13.

KIRINGO TËNË NI AYEKE SO WA?

So e hinga lango wala ngbonga ti nda ni pëpe, na alege wa a yeke nzoni mingi ndali ti e?

Na lege wa aChrétien so a soro ala ti gue na yayu alango pëpe?

Na alege wa e lingbi ti fa so e leke tere ti e ndali ti singo ti Christ?

1-3. (a) Aye wa alingbi ti mû maboko na e ti hinga ye so e lingbi ti manda na yâ ti atoli ti Jésus use? (b) Ahundango ndo wa a lingbi e kiri tënë na ni?

TARA ti bâ so mbeni kota zo ti kodoro ahunda na mo ti yô lo na oto ti gue na lo na mbeni kpengba bungbi. Ye oko, apenze ngbonga kete kozoni ti tene mo gue mo wara lo, mo bâ so essence ayeke mingi na yâ ti oto ni ape. Mo kpe hio ti gue ti vo mbeni. Na ngoi so mo gue ti vo ni, kota zo ni asi. Lo gi mo gbä lo wara mo ape. Teti so lo lingbi ti ku ape, lo hunda mbeni zo ti gue na lo. Kete na pekoni mo si na mo bâ so kota zo ni ahon lo zia mo. A yeke sara mo tongana nyen?

² Tara ti bâ fadeso mo la mo yeke kota zo ni so, na hongo ti mo mo mû ambeni kpengba koli ota ti bâ lege ti ambeni kota kua ti mo. Mo fa na ala kua ni, na ala ota kue ayeda ti sara ni. Me na ngoi so mo kiri, mo bâ so gi azo use la asara kusala ti ala. Oko ni so asara kua ti lo pëpe so agi araison. Ti tâ tënë ni, lo tara même ti sara kua ni ape. A yeke sara mo tongana nyen?

³ Atapande so e londo ti bâ ague oko na aparabole ti Jésus use: parabole ti amasia na ti atalent. Aparabole so use kue andu ngoi ti nda ni nga afa ndani so ambeni Chrétien so a soro ala ti gue na yayu ayeke duti ande be-ta-zo nga ala yeke sara ye na ndara, me ambeni ayeke sara ti ala tongaso pëpe (Mat. 25:1-30).a Lo fa ye so e lingbi ti manda na yâ ti atoli so, lo tene: “Ni la, zia ala lango pëpe, ngbanga ti so ala hinga lango ni nga na ngbonga ni pëpe.” Jésus aye ti tene so adisciple ti lo ayeke hinga pëpe mbilimbili ngoi so lo yeke futi dunia ti Satan (Mat. 25:13). E lingbi ti sara ye alingbi na wango so laso. Ngbanga ti nyen a lingbi e sara ye alingbi na wango ti Jésus so? Azo wa la aleke tere ti ala awe ti sö kuâ? Nyen la a lingbi e sara laso ti lango pëpe?

NGBANGA TI NYEN A LINGBI E LANGO PËPE?

4. Ti lango pëpe, ngbanga ti nyen a yeke kota ye pëpe ti hinga mbilimbili ngoi so nda ni ayeke si na ni?

⁴ Ti sara ambeni ye, na tapande ti sara kua na yâ ti mbeni usine, ti bâ mbeni docteur, ti mû bus wala train, a hunda ti tene zo asara ye alingbi na mbeni kapa. Ye oko, ti ambeni kua tongana kua ti azo ti mingongo wâ wala kua ti mungo maboko na azo na peko ti mbeni ye ti ngangu tongana sese so ayengi, bango l’heure alingbi ti gboto lê ti mo yongoro na kua ni wala a lingbi même ti ga na kpale. Na yâ ti aye tongaso, a yeke kota ye ti zia li ti mo na ndo ti kua ni ahon ti hinga wala l’heure asi oke awe. Legeoko nga, kusala ti e ti fango tënë ayeke mû maboko na azo ti hinga ye so Jéhovah asara ti sö na azo. Laso kusala so ayeke kota mingi ndali ti so futingo ti dunia so ayeke pusu nduru nduru. Ti lango pëpe na ti sara ye so Jéhovah ahunda na e, e yeke pëpe na bezoin ti hinga mbilimbili ngoi so nda ni ayeke si ande na ni. Biani, so e hinga pëpe mbilimbili lango ni wala ngbonga ni ayeke nzoni mingi ndali ti e na yâ ti aye oku.

5. Na lege wa so e hinga pëpe lawa la nda ni ayeke si ande amû lege na e ti fa ye so ayeke na yâ ti bê ti e?

⁵ Kozoni, so e hinga pëpe lawa la nda ni ayeke si ande amû lege na e ti fa ye so ayeke biani na bê ti e. Jéhovah ane e la lo mû lege na e ti tene e wani e soro ti duti be-ta-zo na lo. E yeke sara na Jéhovah ndali ti so e ye lo, me gi pëpe ndali ti so e ye ti sö kuâ na ngoi ti futingo ti dunia so ti wara fini ti lakue lakue. (Diko Psaume 37:4.) E yeke na ngia ti sara ye so bê ti Nzapa aye, nga e bâ so lo yeke fa ye na e ndali ti nzoni ti e (És. 48:17). E bâ so acommandement ti lo ayeke ye so ane pëpe.​—1 Jean 5:3.

6. Tongana ndoye la apusu e ti sara na Nzapa, bê ti lo ayeke duti tongana nyen? Ngbanga ti nyen?

⁶ Use ni, so e hinga pëpe lango ni nga na ngbonga ni amû lege na e ti zia ngia na bê ti Jéhovah. Tongana e sara na Jéhovah ndali ti so e ye lo me pëpe ndali ti so nda ni ayeke pusu nduru nduru wala gi ndali ti so e ye ti wara futa ni, e yeke mû maboko na Jéhovah ti fa so wato ti lo, Satan, ayeke zo ti mvene. (Job 2:4, 5; diko aProverbe 27:11.) Teti so e hinga apasi nga na vundu so Satan aga na ni, e yeke na ngia ti mû mbage ti komandema ti Jéhovah na ti ke sioni komandema ti Satan.

7. Ngbanga ti nyen mo mû fini ti mo ti sara na Nzapa nga ti mû maboko na azo?

⁷ Ota ni, so e hinga pëpe mbilimbili lango ti nda ni amû maboko na e ti dö ambeni ye ti zia ti mû fini ti e ti sara na Nzapa. Laso ambeni zo so ahinga Nzapa pëpe nga kue ahinga so a yeke futi dunia so. Ala sara mbeto so mbeni ye ti ngangu tongana yengingo ti sese alingbi ti futi sese na ngoi kue, a sara si ala yeke tene: “Zia e te na e nyon ngbanga ti so kekereke e yeke kui kuingo.” (1 aCor. 15:32). Me e sara ti e mbeto ape. Nga e yeke bi bê ti e gi na e wani pëpe (aProv. 18:1). E yeke zia ye so bê ti Jéhovah aye na kozo ndo na yâ ti fini ti e, nga e yeke mû aye kue so e yeke na ni, aye tongana ngoi nga na ngangu ti e, ti fa na nzoni tënë ti Royaume ti Nzapa. (Diko Matthieu 16:24.) Kusala so e yeke sara na Nzapa amû na e ngia, mbilimbili na ngoi so e mû maboko na azo ti hinga lo.

8. Tapande wa ti Bible afa so a lingbi e zia bê ti e kue na Jéhovah nga na tënë ti lo so ayeke na yâ ti Bible?

⁸ Osio ni, so e hinga pëpe lango ni wala ngbonga ni amû maboko na e ti zia bê ti e kue na Nzapa nga ti sara kue ti sara ye alingbi na tënë ti lo so ayeke na yâ ti Bible. Teti so e yeke na siokpari na yâ ti tere ti e, e yeke ka nduru ti zia bê ti e na ndo ti e wani. Paul awa aChrétien kue lo tene: “Zia zo so abâ ti lo atene ni luti awe asara hange si lo tï pëpe.” Lo sara lani tënë ti azo ti Israël 23 000 so ake lani yanga ti Jéhovah na akui kozoni si ala lï na Sese ti Zendo. Lo tene: “Aye so asi na ala tongana atapande, na a sû ni na Mbeti ti Nzapa ti gboto mê ti e, e so nda ti aye ti angoi nde nde asi na ndo ti e.”​—1 aCor. 10:8, 11, 12.

9. Na lege wa atara ayeke sara si e ga nzoni ahon ti kozo nga e kiri e ga nduru mingi na Nzapa?

⁹ Oku ni, so e hinga pëpe lawa la nda ni ayeke si ande amû lege na e ti zia si atara asara si e ga nzoni ahon ti kozo. (Diko Psaume 119:71.) Alango ti nda ni ti dunia so ayeke biani “angoi ti akpale so ayeke ngangu na zo ti kanga bê na yâ ni”. (2 Tim. 3:1-5). Azo mingi na yâ ti dunia ti Satan ake e, ni la a lingbi ti sara ngangu na e ndali ti mabe ti e (Jean 15:19; 16:2). Tongana e sara tere ti e kete na e mû peko ti aye so Jéhovah afa, mabe ti e ayeke kiri ti ga nzoni ahon ti kozo tongana ti so wâ ayeke sara si mbeni wen aga nzoni ahon ti kozo. E yeke zia pëpe ti sara na Jéhovah. E yeke kiri ti ga nduru mingi na Jéhovah ahon ti so e pensé na ni.​—Jacq. 1:2-4; 4:8.

10. Nyen la alingbi ti sara si zo abâ so ngoi ahon hio mingi?

¹⁰ Ngoi alingbi ti hon hio wala ahon gbä. Tongana e yeke na aye mingi ti sara na e gi ti bâ l’heure ape, e yeke bâ so l’heure ahon hio mingi. Legeoko nga, tongana e bi tere ti e kue na yâ ti pendere kua so Jéhovah amû na e ti sara, lango ni nga na ngbonga ni alingbi ti si hio mingi sân ti tene e hinga. Mingi ti ala so a soro ala ti gue na yayu ayeke anzoni tapande teti e ndali ti so ala yeke na aye mingi ti sara na yâ ti kusala ti Nzapa. Zia e kiri e bâ na nduru tënë ye so asi lani na pekoni so Jésus aga Gbia na ngu 1914 na e bâ tongana nyen ambeni zo aleke tere ti ala me ambeni asara ape.

ALA SO A SORO ALA TI GUE NA YAYU ALEKE TERE TI ALA

11. Na peko ti ngu 1914, ngbanga ti nyen ambeni zo so a soro ala ti gue na yayu apensé so Jésus asi lani hio pëpe?

¹¹ Dabe ti mo na atoli ti Jésus na ndo ti amasia nga na atalent. Tongana amasia wala angbâa ti yâ ti atoli so ahinga ngoi so koli so ayeke mû wali fini fini wala maître ti ala ayeke ga lani na ni, ka ala yeke pëpe na bezoin ti lango pëpe. Me ala hinga ni pëpe, ni la a lingbi ala leke tere ti ala. Teti angu mingi, aChrétien so a soro ala ti gue na yayu ahinga so ngu 1914 ayeke duti ande mbeni ngoi so ayeke nde, me ala hinga mbilimbili pëpe ye so ayeke si ande. Tongana aye asi pëpe tongana ti so ala ku tere ti ala na ni, ambeni apensé so Jésus ayeke si hio pëpe. Ngoi mingi na pekoni mbeni ita-koli atene: ‘Ambeni zo na popo ti e apensé biani so e yeke gue lani na yayu na yâ ti kozo yenga ti octobre ti ngu 1914.’

12. Na lege wa aChrétien so a soro ala ti gue na yayu afa so ala yeke be-ta-zo nga ala sara ye na ndara?

¹² Bâ tongana nyen bê ti zo ayeke nze tongana lo ku nda ni na aga pëpe! Na ndo ni, aita abâ pasi lani na ngoi ti Kozo Bira so Amû Sese Kue. Kua ti fango tënë akaï même kue. A yeke mo bâ mo tene aChrétien so a soro ala ti gue na yayu alango. Me na ngu 1919, mbeni ye azingo ala! Jésus aga na yâ ti temple ti yingo ti bâ azo so atene ala yeke aChrétien. Ye oko, Jésus abâ so ambeni Chrétien so a soro ala ti gue na yayu ayeke atâ Chrétien ape na ala lingbi mbeni pëpe ti ngbâ ti sara kua na Jésus, Maître ni (Mat. 25:16). Ala leke tere ti ala pëpe; ala yeke tongana amasia ti buba so amû mafuta na tere ti ala ti zia na yâ ti alampe ti ala pëpe. Nga, legeoko tongana ngbâa so ayeke zo ti goigoi so ayeke be-ta-zo na maître ti lo pëpe, ala yeke pëpe nduru ti sara asacrifice ndali ti Royaume. Ye oko, mingi ti aChrétien so a soro ala ti gue na yayu ayeke be-ta-zo na mbeni lege so apika bê nga ala ye mingi ti sara na Maître ti ala même na yâ ti angangu ngoi ti bira.

13. Na peko ti ngu 1914, bango ndo wa aChrétien so a soro ala ti gue na yayu ayeke na ni? Bango ndo wa ala yeke na ni laso?

¹³ Na peko ti ngu 1914, Tour ti Ba Ndo afa bango ndo ti mingi ti aChrétien so a soro ala ti gue na yayu na ngoi ni kâ. A tene so ala so ayeke na nzoni bango ndo, bê ti ala anze pëpe. A kiri atene: “E ye lani pëpe ti tene a sara ye so bê ti e aye; ni la tongana e bâ so ye so e yeke ku ti tene asi na octobre ti ngu 1914 so ayeke na lege ni ape, e yeke na ngia so Seigneur achangé ape ye so Lo leke ti sara gi ti nzere na e. E ye pëpe ti tene Lo sara tongaso.” Ala ye gi ti hinga nzoni mingi ye so Nzapa aleke ti sara. Laso aChrétien so a soro ala ti gue na yayu ayeke sara nga tere ti ala kete nga ala ye ti sara ye so bê ti Nzapa aye. Ala tene pëpe so yingo asara tënë na ala. Me ala ye gi ti ngbâ ti sara kusala so Jésus amû na ala na ndo ti sese. Nga, laso aChrétien so ayeke na beku ti wara fini ti lakue lakue na ndo ti sese, “azo mingi mingi” so ayeke “ambeni ngasangbaga”, ayeke mû tapande ti ala.​—Apoc. 7:9; Jean 10:16.

E LEKE TERE TI E

14. Ngbanga ti nyen a yeke nzoni e sara ye so ngbâa be-ta-zo so ayeke sara ye na ndara afa?

¹⁴ Nzapa asoro ngbâa be-ta-zo so ayeke sara ye na ndara ti mû kobe ti yingo na azo ti lo, wala ti fa na ala tongana nyen ti bâ nzoni na lege ti tënë ti lo so ayeke na yâ ti Bible nga na lege ti yingo ti lo. Ala so ayeke na popo ti azo mingi mingi so aleke tere ti ala ayeke sara ye so ngbâa ni afa. A yeke mo bâ mo tene ala kiri atuku mafuta na yâ ti alampe ti ala. (Diko Psaume 119:130; Jean 16:13.) Ye so asara si ala kpengba, ala leke nga tere ti ala ndali ti kiringo ti Christ, ala ngbâ ti sara kusala même na yâ ti angangu kpale. Na tapande, na yâ ti mbeni da ti kanga ti aNazi, aita ayeke gi na Bible oko. Ala sambela ti wara gbâ ti kobe ti yingo. Kete na pekoni, ala mä so mbeni ita so a ga na lo na yâ ti da ti kanga ni fini fini aga na ambeni fini numéro ti Tour ti Ba Ndo so lo honde ni na yâ ti gere ti lo so ayeke na keke. Angu mingi na pekoni, Ernst Wauer, mbeni Chrétien so a soro lo ti gue na yayu nga oko ti aita so a zi ala na da ti kanga, atene: “Jéhovah amû lani maboko na e na mbeni lege so ayeke pendere mingi ti tene e bata na li atënë ti yâ ti a-article ni so amû ngangu na zo.” Lo kiri lo tene: “Laso, a yeke ngangu pëpe ti wara kobe ti yingo, me e yeke bâ ni lakue na nene ni? Mbi hinga so Jéhovah ayeke iri ande tënë nzoni mingi na ndo ti azo so azia bê ti ala kue na lo, so angbâ be-ta-zo nga so ayeke te kobe na table ti lo.”

15, 16. Na lege wa mbeni ita-koli na wali ti lo awara ye ti nzoni ndali ti so ala fa tënë na nzara ni? Nyen la mo lingbi ti manda na lege ti atapande so?

¹⁵ Ambeni ngasangbaga ayeke mû maboko na aita ti Christ na bingo tere ti ala kue na yâ ti kusala ti fango tënë (Mat. 25:40). Ala yeke pëpe tongana sioni ngbâa ti yâ ti toli ti Jésus so asara ye na goigoi. Ala ye mingi ti sara kua ngangu nga ti sara asacrifice ti zia Royaume na kozo ndo na yâ ti fini ti ala. Na tapande, na ngoi so a tisa Jon na wali ti lo Masako ti gue na Kenya ti fa tënë na achinois so ayeke kâ, ala gi bê ti ala na tongo nda ni. Me na pekoni so ala gbu li ti ala na ndo ti dutingo ti ala nga ala sambela ndali ni, ala yeda ti gue.

¹⁶ Ala wara aye ti nzoni mingi ndali ti ngangu so ala sara. Ala tene: “Fango tënë ge anzere mingi.” Ala komanse ti sara a-étude mbasambala. Ala wara nga gbâ ti anzoni ye. Na nda ni ala tene: “E kiri singila na Jéhovah lâ na lâ so lo mû lege na e ti ga ge.” Tâ tënë, ambeni ita mingi amû mara ti desizion ti ala so na ala ye ti ngbâ ti duti na aye mingi ti sara na yâ ti kusala ti Nzapa atâa lawa la nda ni ayeke si. Gbu li na ndo ti aita saki na saki so ague na Ekole ti Galaad na so ayeke sara kusala ti missionnaire. Tongana mo diko article “E Sala Ye Kue So E Lingbi Sala!” na yâ ti Tour ti Ba Ndo ti 15 octobre, ngu 2001, mo yeke hinga ye mingi na ndo ti kusala ti missionnaire. Na ngoi so mo diko pendere article so asara tënë na ndo ti ye so missionnaire ayeke sara na yâ ti lango oko oko, gbu li ti bâ tongana nyen la mo lingbi ti sara aye mingi na yâ ti kusala ti Nzapa. Kusala ti mo ayeke mû gonda na lo nga ayeke mû ngia na mo mingi.

MO NGA KUE LANGO PËPE

17. So e hinga pëpe lango ni wala ngbonga ni, na lege wa a ga na ye ti nzoni na e?

¹⁷ Biani, so e hinga pëpe mbilimbili lango wala ngbonga so a yeke futi ande dunia so aga na ye ti nzoni na e. Ahon ti tene e sara ngonzo wala e duti na vundu, e kiri e ga nduru mingi na Jéhovah, Babâ ti e so ayeke sara ye na ndoye, na ngoi so e bi tere ti e kue ti sara ye so bê ti lo aye. Teti so lê ti e ayeke gi na ndo ti kusala so Jésus amû na e nga e kpe aye so alingbi ti gboto lê ti e yongoro, e yeke na ngia ti sara na Jéhovah.​—Luc 9:62.

18. Ngbanga ti nyen e ye ti ngbâ ti sara kusala na Nzapa?

¹⁸ E ga nduru nduru mingi awe na lango ti fango ngbanga ti Nzapa. E ye pëpe ti zia vundu na bê ti Jéhovah wala Jésus. Ala mû na e pendere kua ti tene e sara na alango ti nda ni so. A nzere na e mingi so ala yeke na confiance na e.​—Diko 1 Timothée 1:12.

19. Na lege wa e lingbi ti leke tere ti e?

¹⁹ Atâa beku ti e ayeke ti wara fini na yayu wala na yâ ti Paradis na sese, e yeke ngbâ ti sara kua so Nzapa amû na e so ayeke ti fa tënë nga ti sara si azo aga adisciple. E yeke pëpe na bezoin ti hinga mbilimbili lango wala ngbonga so lâ ti Jéhovah ayeke ga ande na ni. E lingbi ti leke tere ti e ndali ni na e yeke ngbâ ti sara ni (Mat. 24:36, 44). E hinga biani so tongana e ngbâ ti zia bê ti e kue na Jéhovah nga e zia Royaume ti lo na kozo ndo, vundu ayeke sara e pëpe.​—aRom. 10:11.

[Kete tënë na gbe ni]

[Foto na lembeti 26]

Même na yâ ti aye ti ngangu, gi ti wara kobe ti yingo

[Foto na lembeti 27]

Ngoi ayeke hon hio tongana e zia li ti e gi na ndo ti akusala ti e ti aChrétien