Atënë so azo ahunda
Atënë ti Jésus so ayeke na Matthieu 19:10-12 aye ti fa so azo so asoro ti ngbâ kumbamba awara matabisi ti dutingo kumbamba na lege ti ye ti ndima?
▪ Zia e bâ ye so asi si Jésus asara tënë na ndo ti dutingo kumbamba so. Na ngoi so aFarizien aga ti bâ Jésus na ndo ti tënë ti divorce, lo fa na ala polele bango ndo ti Jéhovah na ndo ti mariage. Atâa so Ndia amû lani lege na koli ti sû mbeti ti divorce ti mû na wali ti lo tongana lo bâ mbeni “ye ti sioni” na mbage ti wali ni, na tongo nda ni a yeke tongaso pëpe (Deut. 24:1, 2). Na pekoni Jésus atene: “Tongana a yeke ndali ti lango-sioni pëpe, si mbeni zo asara divorce na wali ti lo na lo sara mariage na mbeni wali nde, lo gi mbeni wali nde la.”—Mat. 19:3-9.
Na mango tënë so, adisciple atene: “Tongana tënë ti mungo tere ti koli na wali ni ayeke tongaso, a yeke nzoni pëpe ti sara mariage.” Jésus atene na ala, a tene: “A yeke azo kue si ayeke yeda na tënë so pëpe, me gi ala so ayeke na matabisi ni. Teti ambeni zo ayeke dä so ayeke ambaïwa ngbanga ti so mama ti ala adü ala gi tongaso. Ambeni ayeke ambaïwa ndali ti so azo asara si ala ga ambaïwa. Me, ambeni zo ayeke dä so asara tere ti ala wani ambaïwa ngbanga ti royaume ti yayu. Zia zo so alingbi ti yeda na ni ayeda na ni.”—Mat. 19:10-12.
Ambeni zo ayeke ambaïwa ndali ti so mama ti ala adü ala na mbeni kpale na tere ti ala, wala ndali ti ndao wala azo la asara si ala ga ambaïwa. Me, a yeke wara nga ambeni zo so asara tere ti ala wani ambaïwa. Atâa so ala lingbi ti sara mariage, ala kanga nzara ti bê ti ala, ala ngbâ kumbamba “ngbanga ti royaume ti yayu.” Na tapande ti Jésus, ala soro ti ngbâ kumbamba tongaso si ala mû tere ti ala kue ti sara kua ti Royaume. A dü ala pëpe na matabisi ti dutingo kumbamba nga a mû na ala matabisi ni so mungo pëpe. Ala wani la aye ti wara matabisi ni so, so ti tene, ala la agi ti wara matabisi ni so.
Bazengele Paul aluti na ndo ti tënë ti Jésus so na lo fa so atâa so aChrétien kue, akumbamba wala azo so asara mariage awe, alingbi ti sara na Nzapa tongana ti so lo ye, akumbamba so ‘aleke na bê ti ala’ ti ngbâ kumbamba ‘asara nzoni mingi.’ Na lege wa ala sara nzoni mingi? A lingbi azo so asara mariage awe amû mbeni ngoi nga na ngangu ti ala ti bâ lege ti wali wala koli ti ala nga ti gi ti nzere na lê ti mba. Me aita so ayeke kumbamba alingbi ti mû tere ti ala kue na kua ti Seigneur sân ti gi bê ti ala tongana ti azo so asara mariage awe. Ala bâ dutingo kumbamba ti ala tongana mbeni “matabisi” so alondo na Nzapa.—1 aCor. 7:7, 32-38.
Tongaso, Bible afa pëpe so mbeni Chrétien ayeke wara matabisi ti dutingo kumbamba na lege ti ye ti ndima. Me, lo yeke gi ti wara ni na ngbango kumbamba tongaso si lo sara kua ti Royaume sân ti zia si mbeni ye agboto lê ti lo. Azo mingi laso aleke na bê ti ala ti ngbâ kumbamba ndali ti kua ti Royaume. A yeke nzoni tanga ti azo agi ti kpengba ala.