Sara hange na aye so bê ti mo aye

Bible awa e atene: “Aye so alondo na bê ayeke: sioni tënë, tënë ti fango zo, tënë ti gingo wali wala koli nde, tënë ti lango-sioni, tënë ti nzi, tënë ti témoin ti wataka nga na zonga.” (Mat. 15:19). Bê ti e na lege ti fä alingbi ti handa e na ti gue na e ti gi araison ti sara mbeni ye so ague nde na ye so bê ti Nzapa aye. Peut-être a yeke gi na pekoni so e sara ye na lege ti ndara ape awe la e ga ti hinga so bê ti e ahanda e. Nyen la alingbi ti mû maboko na e ti hinga aye so bê ti e aye kozoni si e sara ye ti sioni?

MO YEKE HINGA AYE SO BÊ TI MO AYE TONGANA NYEN?

Diko Bible lâ oko oko na gbu li na ndo ti aye so mo diko.

Bazengele Paul atene: “Tënë ti Nzapa ayeke na fini na ayeke na ngangu ti sara ye, a za ahon épée so yanga ni ayeke use na a kpo a lï juska a kangbi popo ti âme na yingo.” Tënë ti Nzapa so ayeke na yâ ti Bible ‘alingbi ti hinga nda ti abibe ti bê ti zo nga na aye so bê ti zo ni aye ti sara.’ (Héb. 4:12). Ti haka sarango ye ti e na ye so Bible afa alingbi biani ti mû maboko na e ti hinga aye so bê ti e aye. A yeke kota ye ti tene e diko Bible lâ oko oko nga e gbu li na ndo ti aye so e diko; ye so ayeke sara si e hinga apensé ti Jéhovah.

Ti yeda na wango ti Bible nga ti sara ye alingbi na aye so Bible afa, a yeke sara ngangu na ndo ti ti yingo-ti-hinga ti e so “ayeke fa” lege na e (aRom. 9:1). Yingo-ti-hinga ti e alingbi ti kanga lege na e ti gi mbeni raison ti sara ye ti sioni. Na ndo ni, e yeke wara na yâ ti Bible atapande so alingbi ti “gboto mê ti e”. (1 aCor. 10:11). Ti manda ye na lege ti atapande so alingbi ti sara si e mû pëpe sioni lege. Nyen la a yeke nzoni e oko oko kue e sara?

Sambela Nzapa ti mû maboko na mo ti hinga aye so bê ti mo aye.

Jéhovah ayeke “tara bê ti azo”. (1 Chron. 29:17). Lo ‘yeke kota ahon bê ti e, na lo hinga ye kue.’ (1 Jean 3:20). Zo alingbi ti handa Nzapa pëpe. Tongana e fa atënë ti bê ti e nga na aye so e sara nzara ni polele na yâ ti sambela na Jéhovah, lo lingbi ti mû maboko na e ti hinga aye so bê ti e aye. E lingbi même ti hunda na Nzapa ti ‘créé bê so avuru na yâ e’. (Ps. 51:12). Tongaso, ti hinga aye so bê ti e aye, a yeke nzoni e girisa ti sambela ape.

Dengi mê nzoni na ngoi ti abungbi.

Ti dengi mê nzoni ti mä aye so a yeke fa na ngoi ti abungbi, a lingbi ti mû maboko na e ti bâ ye so ayeke na yâ ti bê ti e nzoni. Atâa so a yeke lakue pëpe la e yeke wara afini sango na ngoi ti abungbi ti e, tongana e gue lakue e yeke gbu nda ti afango ye ti Bible nzoni mingi ahon ti kozo nga akpengba dango bê so e yeke wara ayeke mû maboko na e ti bâ yâ ti aye so bê ti e aye. Acommentaire ti aita ti e ayeke sara nga si bê ti e aga nzoni ahon ti kozo (aProv. 27:17). Ti bungbi lakue pëpe na aita ti e aChrétien na ngoi ti abungbi alingbi ti ga na e kpale. A lingbi ti gue na e ti ‘gi ye so bê ti e aye’. (Prov. 18:1). Tongaso a yeke lege ti ndara ti hunda tere ti e: ‘Mbi yeke gue ka na abungbi kue nga mbi yeke bâ nzoni na lege ni?’​—Héb. 10:24, 25.

BÊ TI E AYEKE GUE NA E NA NDO WA?

Bê ti e so ayeke na handa alingbi ti handa e na yâ ti aye mingi. Zia e bâ ambeni ye ni osio: ti gi ti wara gi aye ti mitele, nyongo sämba, azo so e yeke soro ti sara kamarade na ala nga na aye so e yeke sara na ngoi ti angia.

Ti gi ti wara gi aye ti mitele.

A yeke na lege ni ti gi ti kaï anzara ti e na lege ti mitele. Ye oko, Jésus amû mbeni tapande so agboto mê ti e na ndo ti bingo bê ahon ndo ni na ndo ti aye ti mitele. Na yâ ti oko ti atoli ti Jésus, lo wa e ti gbu li na ndo ti tapande ti mbeni zo ti mosoro so yâ ti agogoro ti lo asi na aye. Zo ti mosoro so ayeke pëpe na place ti bungbi ambeni lê ti kobe ti lo dä. Lo leke ti kungbi agogoro ti lo na ti leke ambeni kota ni. Lo tene: “Mbi yeke bungbi alê ti kobe ti mbi kue nga na anzoni ye ti mbi kue dä. Na pekoni, mbi yeke tene na âme ti mbi: ‘Âme ti mbi, mo wara gbâ ti anzoni ye so alingbi na ngu mingi. Mo duti kpô, mo te, mo nyon na mo sara ngia.’” Ye oko, zo ti mosoro so abi bê ti lo pëpe na ndo ti kpengba ye so: Lo lingbi ti kui na bï ni so.​—Luc 12:16-20.

Tongana e yeke ga mbakoro, lekengo aye ti mitele so alingbi ti bata e na lâ ti mbakoro ti e alingbi ti gbu bê ti e mingi. Ye so asara si e lingbi ti komanse ti gi araison ti sara kua juska na angoi ti abungbi so e yeke sara na alakui wala ti bâ na nene ni mbeni pëpe akua ti e ti Chrétien. A yeke nzoni pëpe ti sara hange na mara ti bibe so? Wala peut-être e ngbâ maseka na e bâ so mbeni kua so ayeke nzoni ahon kua ti ngoi kue ayeke dä ape. E yeke gboto yâ ti ngoi ti mungo kua ti pionnier na tenengo so a yeke nzoni e gi ti wara gbâ ti nginza kozoni awe si? A yeke nzoni e sara kue ti duti na mosoro laso na mbage ti Nzapa ape? Zo wa la ahinga wala kekereke e yeke ngbâ na fini?

Nyongo sämba.

A-Proverbe 23:20 atene: “Mo duti pëpe na popo ti azo so anyon vin mingi.” Tongana mbeni zo aye sämba mingi, lo lingbi ti gi araison ti nyon ni lakue. Lo lingbi ti tene so lo yeke nyon ni ti tene tere ti lo anzere, me pëpe ti sulêe. Tongana a lingbi e nyon sämba si tere ti e anzere, a yeke peut-être ngoi ti tene e gbu li ti e nzoni na ndo ti ye so bê ti e aye la.

Azo so e soro ti sara kamarade na ala.

Biani, na ambeni ngoi e lingbi pëpe ti kpe ti duti na azo so ayeke aTémoin ape, na tapande na ekole, na place ti kua wala na ngoi so e yeke fa tënë. Me ti mû ngoi ti duti na ala na même ti lë kpengba songo na ala ayeke na lege ni ape. E yeke gi araison ti sara songo na ala na tenengo so ala yeke na gbâ ti anzoni sarango ye? Bible awa e atene: “Zia ambeni zo ahanda ala pëpe. Ti sara songo na asioni zo ayeke buba anzoni sarango ye ti zo.” (1 aCor. 15:33). Legeoko tongana ti so mbeni kete sioni yöro alingbi ti sara si mbeni ngu aga sioni, sarango songo na azo so akpe mbeto ti Nzapa pëpe alingbi ti sara sioni na e na lege ti yingo na ti gue na e ti bâ aye, ti yü bongo, ti sara tënë nga ti sara ye tongana ti azo ti dunia so.

Aye so e yeke sara na ngoi ti angia.

Laso, senda-kode asigigi na gbâ ti aye ti ngia so a yeke ngangu pëpe ti wara ni, me mingi ti aye ti ngia ni so ayeke nzoni ndali ti aChrétien pëpe. Paul atene: ‘Zia a sara même tënë ti sioni ye nde nde kue na popo ti ala pëpe.’ (aÉph. 5:3). Ka tongana e ye mingi ti bâ wala ti mä mbeni sioni ye? E lingbi ti tene so zo kue ayeke na bezoin ti tene tere ti lo anzere kete wala ti sara ngia kete na a yeke na zo oko oko ti soro ngia so lo ye ti sara. Me zia e bâ na nene ni wango ti Paul so na e zia lege pëpe na lê ti e ti bâ ye ti sioni wala na mê ti e ti mä ye ti sioni.

E LINGBI TI CHANGÉ

Tongana asi na e so bê ti e ahanda e na e ga azo so ayeke gi lakue araison ti sara aye ni sioni, e lingbi ti changé (aÉph. 4:22-24). Zia e bâ atapande use ti ngoi ti e.

A lingbi Miguela achangé bango ndo ti lo na ndo ti aye ti mitele. Lo tene: “Mbi na wali ti mbi na molenge ti e ti koli, e yeke na yâ ti mbeni kodoro so azo abâ na nene ni mingi tënë ti dutingo nzoni nga na warango afini ye so senda-kode asigigi na ni so ayeke nzoni mingi. Na mbeni ngoi, mbi mû ngoi ti mbi kue ti gi ti wara aye kue so mbi lingbi ti wara na yâ ti dunia, na mbi pensé so mbi lingbi ti sara ni sân ti ga zo so aye akungba mingi. Kete na pekoni, mbi ga ti bâ so nzara ti warango akungba mingi ayeke hunzi ka ape. Na yâ ti sambela, mbi fa na Jéhovah abango ndo ti mbi nga na aye so bê ti mbi aye. Mbi fa na lo so mbi na sewa ti mbi, e ye ti sara na lo na bê ti e kue. E mû desizion ti duti na aye mingi pëpe na yâ ti fini ti e na e gue na mbeni ndo so ayeke na bezoin ti awafango tënë mingi. Aninga ape e mû kua ti pionnier. E ga ti bâ so e yeke nga na bezoin ti gbâ ti akungba pëpe ti tene e wara ngia na yâ ti fini ti e.”

Ye so asi na Lee afa tongana nyen bango tere ti mo zo wani nzoni amû maboko na lo ti ke asioni kamarade. Lee atene: “Kua ti mbi asara si lakue mbi yeke wara tere na awande so ayeke kä na mbi akungba. Mbi hinga lani so azo ayeke nyon ka sämba ahon ndo ni na angoi ti warango tere ti e ni so, me mbi ye ka mingi ti gue. Fani mingi angbâ kete mbi nyon sämba ahon ndo ni me na pekoni mbi regretté. A lingbi lani mbi bâ aye so ayeke na yâ ti bê ti mbi nzoni. Wango ti Bible nga na aye so a-ancien awa mbi ti sara amû maboko na mbi ti bâ so ye so lani mbi yeke gi biani ayeke ti sara songo na azo so andoye Jéhovah ape. Fadeso mbi yeke sara kue ti bâ lege ti buze ti mbi na lege ti téléphone nga ti wara tere mingi pëpe na azo so ayeke kä na mbi akungba.

A lingbi e sara ye mbilimbili na e wani nga e hinga aye so bê ti e aye. Na ngoi so e yeke sara ni, a lingbi e gi mungo maboko ti Jéhovah na yâ ti sambela na e dabe ti e so “lo hinga tënë ti lingo ti bê ti azo.” (Ps. 44:22). Nzapa amû nga na e Bible so ayeke tongana tatara teti e (Jacq. 1:22-25). Adango bê nga na awango so e yeke wara na lege ti ambeti ti e nga na abungbi ti e ayeke nga kota ye. Aye so ayeke mû maboko na e ti bata bê ti e nga ti ngbâ ti tambela na ndo ti lege ti mbilimbili.