Ala mû tere ti ala wani ti sara ye na Mexique

A NZERE mingi ti bâ so gbâ ti aTémoin so ade maseka agi ti duti na aye mingi ape na yâ ti fini ti ala tongaso si ala bi tere ti ala mingi na yâ ti kua ti fango tënë (Mat. 6:22). Aye wa la ala changé na yâ ti fini ti ala? Akpale wa la ala tingbi na ni? Ti hinga ni, zia e bâ atënë so ambeni so ayeke fa tënë na ndembe so na Mexique atene.

“A LINGBI E CHANGÉ AMBENI YE”

Dustin na Jassa so alondo na Amerika asara mariage na janvier, ngu 2007. Kete na pekoni, ala wara lege ti vo mbeni bateau ti voile na ala lango na yâ ni teti ngu oko. A yeke mbeni ye so ala pensé dä aninga. Ala kanga bateau ni nduru na Astoria, Orégon, na Amerika, mbeni pendere gbata so ahoto so gbako ayeke na ndo ni nga na ati so neige ayeke dä angoro ni. Gbata ni ayo mingi na Kota ngu-ingo ti Pacifique ape. Dustin atene: “Ando kue so mo bâ, a yeke gi pendere!” Dustin na Jassa abâ so ala yeke na aye mingi ape na yâ ti fini ti ala nga ala zia bê ti ala kue na Jéhovah. Ala tene: ‘E lango na yâ ti mbeni bateau so yongo ni aga nduru na mètre miombe, e sara mbeni kua so amû ngoi ti e mingi ape, e sara bungbi na yâ ti congrégation ti mbeni yanga ti kodoro nde nga ngoi na ngoi e mû kua ti pionnier auxiliaire.’ Me a si na mbeni ngoi, ala tene so ala handa tere ti ala. Dustin atene: “E mû ngoi ti e lani mingi ti leke bateau ti e me pëpe ti mû maboko na congrégation. E hinga so tongana e ye biani ti zia Jéhovah na kozo ndo na yâ ti fini ti e, a lingbi e changé ambeni ye.”

Jassa akiri atene: “Kozoni si mbi sara mariage, mbi yeke lani na Mexique, mbi sara bungbi na yâ ti mbeni congrégation ti Anglais. Fango tënë kâ anzere lani na mbi mingi na mbi ye mingi ti kiri kâ.” Ti mû lege lani na Dustin na Jassa ti maï nzara ti ala ti fango tënë na kodoro wande, na ngoi ti vorongo Nzapa na yâ ti sewa, ala komanse ti diko ambaï ti fini ti aita so ague na ando so akobe ni abe awe ti tene a ko ni (Jean 4:35). Dustin atene: “E ye lani ti wara mara ti ngia ti ala so.” Na ngoi so akamarade ti Dustin na Jassa so ayeke na Mexique atene na ala so mbeni fini groupe so abâ gigi kâ ayeke na bezoin ti mungo maboko, ala mû desizion ti gue. Ala zia akua ti nginza ti ala, ala kä bateau ti ala ti voile ni na ala gue na Mexique.

‘AYE TI NZONI SO ADE E WARA MARA NI LÂ OKO APE’

Dustin na Jassa asara kodoro na gbata ti Tecomán, nduru na Kota ngu-ingo ti Pacifique me ayo akilomètre 4345 na mbongo ti Astoria. Dustin atene: “Dê ayeke dä mbeni ape nga e yeke bâ ahoto ape, me ndo ni achauffé ngangu nga akeke ti citron ahon ndo ni.” Na tongo nda ni a yeke lani ngangu na ala ti wara kua. Teti so ala yeke na nginza ape, fani use na yâ ti lango oko oko, ala yeke te loso na haricot teti ayenga mingi. Jassa atene: “Me tâ gi na ngoi so loso na haricot ni akomanse ti fun sen na hon ti e, azo so e manda Bible na ala atonda ti mû na e amango, abule, apapaye nga na asakpa so citron asi yâ ni.” A si na mbeni ngoi, Dustin na Jassa awara kua na lege ti internet na yâ ti mbeni ekole so ayeke na Taïwan na ala yeke sara ni na lege ti internet. Nginza so ala wara fadeso na lege ti kua so alingbi na ala ti bâ lege ti abezoin ti ala ti lâ oko oko.

Tënë ti bê ti Dustin na Jassa na ndo ti fini ndo so ala yeke dä ayeke so wa? Ala tene: “E bâ so guengo ti e kâ aga na e aye ti nzoni mingi. Songo ti e na Jéhovah akpengba mingi nga songo ti e na popo ti e akpengba mingi. Lâ oko oko e yeke bungbi oko ti sara aye mingi: fango tënë, sarango lisoro ti bâ tongana nyen ti mû maboko na azo so e manda Bible na ala nga lekengo abungbi. E gi nga bê ti e tongana ti kozo ape.” Ala kiri atene: “Mbeni ye so kozo e gbu nda ni nzoni kue ape, fadeso e hinga ni nzoni: zendo so ayeke na Psaume 34:9 ayeke tâ tënë. Versê ni atene: ‘Tara L’Éternel, na fade mo bâ Lo yeke nzoni!’”

YE SO APUSU AZO SAKI MINGI TI MÛ TERE TI ALA WANI TI SARA KUA

Aita ahon 2 900 ague ti fa tënë na ando so bezoin ti awafango tënë ti Royaume ayeke dä mingi na Mexique. Na popo ti ala mo yeke wara ala so asara mariage awe nga na akumbamba, mingi ti ala ayeke na ngu 20 na ndo ni wala ngu 30 na ndo ni. Nyen la apusu aita so kue ti sara ngangu kua so? Na ngoi so a hunda tënë so na groupe ti ambeni ita ni, ala fa akota raison ota. A yeke araison wa?

Ti fa ndoye ti ala na mbage ti Jéhovah nga na mbage ti amba ti ala. Na ngoi so Leticia awara batême, lo yeke na ngu 18. Lo tene: “Na ngoi so mbi mû lani tere ti mbi na Jéhovah, mbi hinga so a ye ti tene ti sara na lo na bê ti mbi kue nga na âme ti mbi kue. Ti fa so mbi ye Jéhovah na bê ti mbi kue, mbi ye ti mû ngoi ti mbi mingi nga na ngangu ti mbi mingi ti sara na kusala ti lo.” (Marc 12:30). Hermilo, so fadeso asara mariage na Leticia, ayeke lani na ngu 20 na ndo ni na ngoi so lo gue ti fa tënë na ndo so bezoin ti awafango tënë ti Royaume ayeke dä mingi. Lo tene: “Mbi bâ so, ti mû maboko na azo ti kaï nzara ti ala na lege ti yingo ayeke tâ nzoni lege ti fa ndoye ti mbi na mbage ti amba ti mbi.” (Marc 12:31). Tongaso, lo zia Monterrey, gbata so anzoni ye ayeke dä mingi, ndo so lo yeke sara lani kua dä na yâ ti mbeni banque nga lo duti nzoni, na lo gue na mbeni kete gbata.

Ti tene ala wara tâ ngia so aninga. Kete na peko ti batême ti Leticia, lo na mbeni ita-wali so aninga na yâ ti kua ti pionnier ague na mbeni gbata so ayo, kâ ala fa tënë nze oko. Leticia atene: “Bê ti mbi adö lani ngangu. Ti bâ tongana nyen la azo ayeda nzoni mingi na tënë ti Royaume so e fa na ala amû na mbi ngia mingi. Na nda ti nze ni, mbi tene na yâ ti bê ti mbi mbi tene: ‘So a yeke ye so mbi ye ti sara na yâ ti fini ti mbi la!’” Ti Essly, so ayeke mbeni ita-wali kumbamba so ayeke fadeso na ngu 20 na ndo ni, a yeke ngia so lo bâ na mbage ti ambeni ita la apusu lo ti fa tënë na ando so bezoin ayeke dä mingi. Na ngoi so lo ngbâ na lycée, lo tingbi na gbâ ti aTémoin so afa tënë na nzara ni na ando so bezoin ayeke dä mingi. Lo tene: “Ti bâ ngia so aita so ayeke na ni asara si mbi kue mbi ye ti sara mara ti kua so na yâ ti fini ti mbi.” Aita-wali mingi asara tongana ti so Essly asara so. Na Mexique, aita-wali kumbamba ahon 680 ayeke fa tënë na ando so bezoin ayeke dä mingi. Ala zia nzoni tapande na amaseka nga na akota zo!

Ti tene gigi ti ala aga nzoni nga asi singo na aye ti nzoni. Na ngoi so Essly ahunzi mandango mbeti ti lo na lycée, lo wara mbeni bourse ti dasendagi. Amba ti lo awa lo ti yeda na bourse ni ti gi ti wara “nzoni gigi”, so ti tene ti wara diplôme ti dasendagi, nzoni kua ti nginza, oto, nga ti mû ngoi ti voyagé. Me lo yeda na wango ti ala ni pëpe. Essly atene: “Akamarade ti mbi mingi so ayeke aChrétien agi lani ti wara aye so, na mbi bâ so ala bâ mbeni pëpe aye ti yingo tongana aye so ayeke kota ye na lê ti ala. Mbi bâ nga lani so na ngoi so ala gi ti yôro tere ti ala mingi na yâ ti aye ti dunia so, ala wara akpale mingi na pekoni. Mbi ye lani ti mû lâ ti maseka ti mbi kue ti sara na Jéhovah.”

Na pekoni so Essly ahunzi mandango mbeti ti lo na lycée, lo kiri lo manda ambeni ye so amû lege na lo ti wara kua ti bâ lege ti abezoin ti lo na ngoi so lo sara kua ti pionnier. Na pekoni lo gue na mbeni ndo so bezoin ti awafango tënë ti Royaume ayeke dä mingi. Lo manda même kete yanga ti kodoro so azo ti Otomi nga na ti Tlapaneco ayeke tene. Tongana lo gbu li ti lo na ndo ti angu ota so lo fa tënë na ando so bezoin ayeke dä so, lo tene: “Ti sara kua na ando so bezoin ayeke dä mingi, a sara si mbi wara ngia mingi na mbi bâ so mbi sara tâ nzoni ye na fini ti mbi. Nzoni ye so ahon atanga ni kue, a yeke so songo ti mbi na Jéhovah akpengba ngangu.” Phillip na wali ti lo Racquel, so ala yeke na ngu 30 na ndo ni so alondo na Amerika, atene: “Aye ti dunia so ayeke changé hio hio na asara si ambeni zo abâ so aye aga kirirkiri na yâ ti gigi ti ala. Me ti sara kua na ando so e ngbâ ti wara gbâ ti azo so ayeda na atënë so ayeke na yâ ti Bible, a sara si e bâ so gigi ti e aga nzoni. A yeke tâ nzoni mingi!”

LEGE SO ALA HON NA NDO TI AKPALE

Biani, ti fa tënë na ando so kota bezoin ti awafango tënë ti Royaume ayeke dä ayeke kete ye ape. A lingbi ti duti ngangu na mo ti wara nginza ti bâ lege ti abezoin ti mo. Ti hon ndo ni, a lingbi mo sara ye na ndara alingbi na ndo so mo yeke fa tënë dä. Verónica, so asara kua ti pionnier teti angu mingi atene: “Na mbeni ndo so mbi fa tënë dä, mbi yeke kä lani kobe so tongo ni aninga ape nga ngere ni ayeke ngangu ape. Na mbeni ndo ni nde, mbi yeke kä lani abongo nga mbi yeke fâ kuä ti li ti azo. Fadeso mbi yeke balêe yâ ti ada nga mbi yeke fa na ababâ na amama so awara amolenge fini fini tongana nyen ti fa ye nzoni na ala.”

Ti sara ye alingbi na angobo nga na asarango ye ti azo, a lingbi ti duti mbeni kpale tongana mo yeke na popo ti azo so ayeke na ando so ayo na kota gbata. A yeke ye so asi na Phillip na wali ti lo Racquel na ngoi so ala fa tënë na ndo so azo ni ayeke tene yanga ti Nahuatl dä. Phillip atene: “Sarango ye ti azo ti ndo ni ayeke lani tâ nde mingi na ti e.” Nyen la amû maboko na ala ti hon ndo ni? Phillip atene: “E gi ti bâ gi anzoni sarango ye so ayeke na popo ti azo ti Nahuatl: nzoni songo ayeke na popo ti ala na yâ ti sewa, ala sara ye na lege ni na mbage ti amba ti ala nga ala yeke nduru ti mû ye na zo.” Racquel atene nga atene: “So e lango kâ nga e fa tënë legeoko na aita ti e na azo ti ndo ni, a mû lege na e ti manda aye mingi.”

TONGANA NYEN TI LEKE TERE TI MO

Tongana mo ye ti fa tënë na ando so bezoin ayeke dä, nyen la mo lingbi ti sara ti leke tere ti mo? Aita so ahinga ye na ndo ti kua so atene: Kozo ti gue, gi ti duti na aye mingi ape na yâ ti fini ti mo nga gi ti wara ngia gi na yâ ti aye so mo yeke na ni (aPhil. 4:11, 12). Mbeni ye nde so mo lingbi ti sara ayeke so wa? Leticia atene: “Mbi ke lani ti sara akua so ahunda ti tene mbi ngbâ ndo oko aninga. Mbi ye lani ti tene mbeni ye akanga lege na mbi ape ti gue na ngoi kue na ando kue so bezoin ayeke dä.” Hermilo atene: “Mbi manda ti tö ye, ti sukula bongo nga ti repassé ni.” Verónica atene: “Na ngoi so mbi na babâ na mama ti mbi nga na aita ti mbi e yeke lani place oko, mbi yeke balêe ndo nga mbi yeke tö akobe so ngere ni ayeke ngangu ape me so vitamine ayeke dä. Mbi manda nga ti bata nginza.”

Levi na Amelia, so alondo na Amerika na so asara mariage asara ngu miombe awe, afa tongana nyen la ti fa na Nzapa na yâ ti sambela atâ ye so agbû bê ti mo zo amû maboko na ala ti leke tere ti ala ti fa tënë na Mexique. Levi atene: “E gi ti hinga wungo ti nginza so e yeke na bezoin ni ti mû lege na e ti fa tënë na kodoro wande na yâ ti ngu oko, na pekoni e sambela Jéhovah ti mû maboko na e ti wara tâ gi wungo ti nginza ni.” Gi na yâ ti ambeni nze, ala wara lege ti bata wungo ti nginza so ala fa ni na yâ ti sambela ti ala nga sân ti ku ala gue na Mexique. Levi atene: “Jéhovah akiri tënë na sambela ti e, a yeke fadeso na e ti sara ti e.” Amelia atene nga atene: “E pensé e tene e yeke ngbâ kâ gi teti ngu oko, me fadeso e sara ngu mbasambala awe nga ade e pensé pëpe na kiringo ni. Dutingo ti e ge amû lege na e ti bâ na lê ti e wani mungo maboko ti Jéhovah. Lâ oko oko e yeke bâ tongana nyen la lo fa nzoni bê ti lo na mbage ti e.”

Sambela amû nga maboko mingi na Adam na wali ti lo Jennifer so alondo na Amerika na so ayeke fa tënë na azo so ayeke tene yanga ti Anglais na Mexique. Ala mû wango atene: “Ku pëpe ti tene aye kue aga nzoni awe si. Zia na yâ ti sambela ti mo tënë ti nzara so mo yeke na ni ti fa tënë na kodoro wande na sara ye alingbi na atënë ti sambela ti mo. Gi ti duti na aye mingi pëpe na yâ ti fini ti mo, sû mbeti na filiale ti kodoro so mo ye ti gue ti fa tënë dä nga tongana mo leke aye kue awe, mo gue.”a Tongana mo sara tongaso, mo yeke wara ngia na yâ ti gigi ti mo nga mo yeke wara gbâ ti anzoni ye na lege ti yingo.