Tënë ti kengo zo senge senge ayeke na ndo kue

JONATHAN ayeke mbeni koli so babâ na mama ti lo ayeke aCoréen, me ala dü lo na États-Unis. Lani so lo de kete, azo ake lo ndali ti mara ti lo. Tongana lo kono, lo gi mbeni ndo so lo lingbi ti sara kodoro dä sân ti tene a hinga mara ti lo gi na bango lê ti lo. Lo ga docteur na mbeni gbata na banga ti Alaska, na États-Unis, so lê ti lo na ti mingi ti azo so lo yeke kaï kobela ti ala akpa tere. Lo pensé ti lo so peut-être guengo na ndo ni kâ la ayeke sara si lo wu bê ti lo na tënë ti mara ni.

Yâ ti ye ni aga ti buba na ngoi so lo yeke gi ti kaï kobela ti mbeni wali ti ngu 25. Tongana wali ni asigigi na yâ ti coma awe, lo bâ lê ti Jonathan ngbii, mo ye ti bâ! lo zonga lo sioni ndali ti so lo ye ka tënë ti aCoréen ape. Ye so asara Jonathan nzoni oko ape. Lo ga ti bâ so a-effort kue so lo sara ti gue na ndo so lo na azo ni lê ti ala ayeke oko akanga nga lege pëpe na azo ti ke lo senge senge.

A yeke ye ti vundu ti bâ so ye so asi na Jonathan so asi na azo mingi. Na ndo kue so azo ayeke dä, tënë ti kengo zo senge senge so ayeke dä nga.

Atâa so tënë ti kengo zo senge senge so amû ndo, mingi ti azo ayeke londo ka hio ti ke tënë ni. A yeke mbeni ye so zo ahinga li ti lo na ni ape. A sara tongana nyen si ye so azo ake ni mingi amû nga ndo na mbage? Ti tâ tënë ni, mingi ti azo so ake tënë ti kengo zo senge senge abâ pëpe so ala wani nga kue ayeke tï na yâ ni. Mo pensé mo kue tënë ni abâ mo?

TËNË NI SO ABÂ E OKO OKO KUE

Atâa e hinga wala e hinga ape, a yeke ngangu na e azo ti hinga so e kue e yeke ke zo senge senge na yâ ti bê ti e. Bible afa ndani, lo tene: “Bê ti zo ayeke na handa ahon mbeni ye kue.” (Jérémie 17:9). Ni la, peut-être na bê ti e e tene so e ye ti e azo kue, atâa mara ti lo ayeke so wa. Wala e tene so tongana e ke ambeni zo andâ raison ni ayeke dä.

Ti hinga wala na yâ ti bê ti e kâ e yeke ka na sioni pensé na ndo ti ambeni zo wala pëpe, tara ti bâ ye so: Mo oko na ndo ti lege mo yeke tambela na bï na yâ ti vukongo ndo. Amaseka-koli use so mo hinga ala lâ oko ape ayeke ga na mbage ti mo. Ala yeke na gaba, na a kpa mo bâ mo tene mbeni ye ayeke na maboko ti mbeni oko ni.

Mo yeke tene so amaseka-koli so ayeke sara sioni na mo? Biani, peut-être ambeni ye so asi na mo kozo alingbi ti sara si mo sara hange na ala. Me aye ni so la si apusu tâ mo ti pensé so nyen na nyen amaseka-koli use so ayeke asioni zo? Kota hundango tënë ni ayeke so: Na li ti mo, akoli ni so ayeke ti mara wa? Kiringo tënë ti mo la ayeke fa tâ ye so ayeke na bê ti mo. A yeke fa peut-être so tënë ti kengo zo senge senge ayeke kamême kete na gbe ti bê ti mo.

Ti tâ tënë ni, e kue tënë ti kengo zo senge senge ayeke na gbe ti bê ti e, atâa a yeke na alege wa. Même Bible kue agboto lê na ndo ti ye so asi ka na e azo, so ti e gi ye so lê ti e abâ la si e yeke fâ ka ngbanga na ndo ni, na mingi ni aye ti pekoni ayeke nzoni ape. Lo tene: “Zo abâ lê ti zo.” (1 Samuel 16:7). Teti so e azo kue e yeke gi tongaso, lege ayeke dä ti zia lege ni? Mbeni lâ kpale ni so ayeke hunzi ande na ndo ti dunia kue?