A yeke nzoni ti sambela asaint?

ZO WA la tongana lo yeke na kpale lo yeke hunda na mbeni zo ti mû na lo maboko ape zo wa? Atâa kpale ti e ni ayeke so wa, kite ayeke pëpe so e yeke soro mbeni kamarade so ahinga ti zia tere ti lo na place ti amba ti lo nga so mara ti kpale ni so asi na lo awe. Mara ti kamarade ni so ayeke duti tâ nzoni zo ti mû maboko na e.

Ambeni zo ayeke sara nga tongaso na ndo ti tënë ti sambela. Ahon ti tene ala sambela lo Nzapa ni, ala bâ so ala kpa ti si nduru na lo ape, na tongaso, ti ala, a yeke nzoni ala sambela asaint. Ala tene so a-oko pasi so azo abâ laso, mara ni la si asaint abâ nga ni lani, na ala lingbi ti zia tere ti ala na place ti amba ti ala azo. Na tapande, ambeni zo so agirisa mbeni ye ti ala so ayeke kota mingi na lê ti ala ayeke sambela “Saint” Antoine de Padoue, mokonzi ti aye so agirisa wala so a nzi ni. Ti ambeni so tere ti nyama ti ala ason, ala yeke sambela “Saint” François d’Assise. Ambeni nga so mbeni zo ti mû maboko na ala ayeke dä ape ayeke sambela “Saint” Jude Thaddée.

Bible ayeda ti tene e sambela asaint? Nyen la ayeke mû maboko na e ti hinga wala sarango tongaso ayeke na lege ni? Teti so asambela ti e ni ayeke gue na Nzapa, e ye ti hinga wala lo wani lo yeke mä ni? Me e ye nga ti hinga wala tongana e sambela asaint, Nzapa ayeke bâ ni tongana nyen?

BIBLE ATENE TI LO NYEN NA NDO TI SAMBELANGO ASAINT?

Tënë ti sambelango asaint aluti na ndo ti fango ye ti Eglize Catholique so atene asaint ayeke mû tënë ti mbeni zo ague na ni na gbele Nzapa. Mbeni bakari ti aCatholique (New Catholic Encyclopedia) atene so ndani ayeke ti tene zo so aye ti tene Nzapa asara grâce na lo, a lingbi lo fa tënë ti lo ni na mbeni zo so Nzapa amû na lo droit ni si lo Nzapa ni alingbi ti mä lo. Ni la, azo so ayeke sambela asaint, ala yeke sambela ala ngbanga ti so, na ala, asaint ayeke na nzoni ndo na tere ti Nzapa na ala lingbi ti tene nzoni tënë ti azo ni so na Nzapa.

E yeke wara fango ye ni so na yâ ti Bible? Ambeni zo atene so bazengele Paul la asigigi na tënë ti sambelango asaint na yâ ti ambeti ti lo. Na tapande, na yâ ti mbeti so lo tokua na aChrétien ti Rome, lo tene: “Ti fadeso, aita, mbi wa ala na lege ti Seigneur ti e Jésus Christ nga na lege ti ndoye so alondo na yingo, ti tene ala tiri legeoko na mbi na yâ ti sambela na Nzapa ndali ti mbi.” (aRomain 15:30). Paul ahunda lani na amba ti lo aChrétien ti tene ala mû tënë ti lo ague na ni na gbele Nzapa la? Oko ape! Ti tâ tënë ni, ala la adoit fade ti hunda na lo Paul ni, lo so lo yeke bazengele ti Christ, ti tene nzoni tënë ti ala na Nzapa. Na lege ti atënë so, Paul ayeke fa lani so a yeke na lege ni ti tene e hunda na mbeni mba ti e Chrétien ti sambela Nzapa ndali ti e. Me a yeke tâ na lege ni oko pëpe ti sambela mbeni zo so azo apensé atene lo yeke na yayu kâ ti gue na tënë ti e na gbele Nzapa. Ngbanga ti nyen?

Na yâ ti Évangile ti Jean, Jésus atene: “Mbi yeke lege ni, tâ tënë na fini. Zo kue so aga na Babâ ayeke ga gi na lege ti mbi.” (Jean 14:6). Lo tene nga: “Ye so kue ala hunda na Babâ na iri ti mbi, lo lingbi ti mû ni na ala.” (Jean 15:16). Jésus atene pëpe so a yeke nzoni e tene asambela ti e na lo si lo gue na ni na Nzapa. Nde na so, lo ye ti tene so ti tene Nzapa amä asambela ti e, a lingbi e tene ni na Nzapa ni wani na iri ti lo Jésus, me pëpe na iri ti mbeni zo nde.

Na ngoi so adisciple ti Jésus ahunda na lo ti fa na ala tongana nyen ti sambela, Jésus akiri tënë, a tene: “Tongana i yeke sambela, i tene: ‘Babâ ti e, e ye azo kue a gonda iri ti mo!’” (Luc 11:2, Tene ti Nzapa, Fini Mbuki, 1988). Biani, “tongana [e] yeke sambela,” a lingbi atënë ti e ni, e tene ni na Nzapa me na Jésus ape wala na mbeni zo nde ape. So atënë ti Jésus ni ayeke polele so, a yeke na lege ni ti sambela Nzapa na iri ti Jésus, me pëpe na iri ti mbeni zo nde. Nga, a yeke na lege ni ape ti tene atënë ti e ni na “asaint” si ala gue na ni na gbele Nzapa.

Sambela ayeke kota ye mingi na lê ti Nzapa, na ti voro mbeni zo nde na Nzapa, Bible ake ni (Jean 4:23, 24; Apocalypse 19:9, 10). Ni la, a lingbi atënë ti sambela ti e ni ague gi na Nzapa me na mbeni zo nde ape.

A YEKE NA LEGE NI TI SARA MBETO TI SAMBELA NZAPA?

Na yâ ti mbeni fango ye ti lo, Jésus amû tapande ti mbeni molenge so ahunda na babâ ti lo ti mû na lo ye ti tengo ni. Fade babâ ni ayeke mû na lo tênë ahon ti mû na lo mapa? Wala lo yeke mû na lo sioni ngbo ahon ti mû na lo susu? (Matthieu 7:9, 10). Babâ so aye molenge ti lo ayeke sara tongaso ape.

Zia tere ti mo fadeso na place ti mbeni babâ na bâ tapande so. Molenge ti mo aye ti hunda na mo mbeni ye so agbu bê ti lo mingi. Mo yeke sara ka kue ti tene songo ti mo na lo aduti nzoni, na ti tene lisoro aduti na popo ti mo na lo lakue. Me mbeto ti tene lo ga lo hunda na mo ye ni so asara lo na nda ti mbeto ni ayeke nga dä ape. Lo hunda na mbeni zo nde ti ga ti bâ mo na place ti lo. A yeke sara mo tongana nyen? Ka tongana lakue la lo yeke sara tongaso, lo yeke zia tënë ni na yanga ti oko zo ni so na lo fa so lo yeke changé ape, a yeke nzere na mo? Oko ape! Ababâ so aye amolenge ti ala aye ka ti tene amolenge ti ala wani asara tënë na ala nga ala sara mbeto ape ti hunda na ala ye so ala amolenge ni aye.

Na fango nda ti tapande ti molenge so ahunda ye ti tengo ni so, Jésus atene na azo mingi so ayeke mä lo, lo tene: “Asinga ala so, atâa so ala yeke sioni, ala hinga tongana nyen ti mû amatabisi so ayeke nzoni na amolenge ti ala, si fade Babâ ti ala so ayeke na yayu ayeke mû anzoni ye na azo so ahunda ni na lo pëpe?” (Matthieu 7:11). Ti tâ tënë ni, ababâ wala amama aye ka mingi ti mû anzoni ye na amolenge ti ala. Me ti Jéhovah, Babâ ti e ti yayu, ayeke mingi ahon so, lo ye ti mä asambela ti e na ti kiri tënë na ni.

Nzapa aye si e sambela lo wani, même si awokongo ti e wala asiokpari ti e asara e vundu mingi. Lo hunda pëpe na mbeni zo nde ti mä asambela ti e. Bible amû na e wango so: “Mo zia kungba ti mo na ndo L’Éternel, na fade Lo bata mo.” (Psaume 55:23). Ahon ti tene e sambela mbeni saint wala mbeni zo nde si zo ni la ague na sambela ti e ni na Nzapa, a yeke nzoni e sara mbeto ti Jéhovah Nzapa ape, e sambela gi lo.

Babâ ti e ti yayu ayeke bi bê ti lo na e oko oko kue. Lo ye ti mû maboko na e na yâ ti akpale ti e, ni la lo tisa e ti ga nduru na lo (Jacques 4:8). So ngia si e yeke na ni ti ga nduru na Nzapa, Babâ ti e so ayeke mä ka asambela!​—Psaume 65:3.