Azo so ayeke biani asaint alingbi sala nyen teti mo?

NA YÂ Mbeti ti Nzapa, a lingbi ti kiri peko ti tënë na yanga ti Grec “saint” na “zo ti be-vulu” na yâ ambeni Bible. Tënë so andu azo wa? Mbeni bakari, An Expository Dictionary of New Testament Words, atene so tongana a ndu awamabe, “tënë ni so afa ala kue na a ndu pëpe gi azo so dutingo nzoni-kue ti ala ayeke nde mingi, wala azo so akui awe, so ândö asala ambeni kota kusala ti nzoni-kue.”

Ni la, bazengele Paul afa lani akozo Chrétien kue tongana azo so ayeke biani asaint, wala azo ti be-vulu. Na tapande, lo to mbeni mbeti so a sû ni na kozo siècle N.E. “na église [“kongregation”, NW] ti Nzapa so ayeke na kodoro ti Corinthe, na azo kue ti be-vulu so ayeke na [gbâ-vaka ti Rome] ti Achaïe kue.” (2 aCorinthien 1:1). Na pekoni, Paul ato mbeti “na ala kue so ayeke na kodoro ti Rome, ala so Nzapa andoye ala mingi, A hiri ala ti ga azo ti be-vulu”. (aRomain 1:7). A yeke polele so lani azo ti be-vulu so ade akui pëpe, nga a zia ala nde pëpe ngbanga ti so ala yeke na mbeni tambela so ayeke nzoni mingi ahon ti tanga ti awamabe kue. Tongaso, na ndo ye wa si a bâ lani ala tongana asaint?

Nzapa asala si ala ga nzoni-kue

Bible afa so a yeke pëpe zo wala mbeni bungbi si atene zo tongaso ayeke mbeni saint. Lo tene: ‘[Nzapa] asö e, na Lo hiri e na hiringo ti nzoni-kue, na lege ti kusala ti e pëpe, me na lege ti ye so Lo mveni aye na grâce ti Lo’. (2 Timothée 1:9). Zo ti be-vulu aga nzoni-kue ngbanga ti so a yeke Jéhovah si ahiri lo, na lege ti grâce wala nzobe ti Lo so zo alingbi na ni pëpe, nga a lingbi na ye so Lo leke na bê ti Lo ti sala.

Azo ti be-vulu ti kongregation ti aChrétien ayeke na yâ mbeni “fini mbele”. Mênë so Jésus Christ asa amû ngangu na mbele so na a sala si azo so ayeke mû mbage na ni aga nzoni-kue (aHébreu 9:15; 10:29; 13:20, 24). Teti a sukula ala awe na lê ti Nzapa, ala ga ‘asacrificateur ti nzoni-kue, si ala mû sacrifice ti yingo so alingbi na lê ti Nzapa na lege ti Jésus-Christ.’​—1 Pierre 2:5, 9.

Hundango asaint ti mû maboko nga ti tene nzoni tënë ti e na Nzapa

Teti azo kutu mingi amä na bê so “asaint” alingbi ti mû mbeni ngangu so ayeke nde na awamabe, ala yeke voro ala na lege ti ambeni ye ti ala so angbâ wala na hundango na ala ti tene nzoni tënë ti ala na Nzapa. Ye oko, Bible afa tongaso? Na yâ Fango ye ti lo na ndo ti Hoto, Jésus afa na adisciple ti lo tongana nyen ti ga ndulu na Nzapa, lo tene: “A lingbi i sambela na lege so: Babâ ti e so ayeke na yayu, e ye iri ti Mo aga nzoni-kue.” (Matthieu 6:9). A lingbi e sambela tâ gi Jéhovah Nzapa oko.

Ti fa so “asaint” ayeke tene nzoni tënë ti azo na Nzapa, ambeni wandara ti alege ti vorongo ayeke fa peko ti aRomain 15:30 (Buku ti Nzapa, Fini Mbuki), so atene “Aita ti mbi, na iri ti Kota Gbia ti i Jésus Christ, nga na lege ti yengo tele so Yingo ayeke zia nzara ni na bê ti zo, mbi hunda na ala ti bungbi oko na mbi, ti sambela Nzapa ndali ti mbi”. Paul ayeke wa lani awamabe ti sambela lo wala ti di iri ti lo si ala ga ndulu na Nzapa? A yeke tongaso pëpe. Atâa so Bible awa e ti sambela ndali ti azo so ayeke biani asaint, wala azo ti be-vulu, na ndo oko pëpe Nzapa akomande e ti sambela na mara ti azo ti be-vulu so wala na lege ti ala.​—aPhilippien 1:1, 3, 4.

Me, Nzapa ahunda ti tene e sambela lo na lege ti mbeni Zo so lo soro. Jésus Christ atene: “Mbi yeke Lege ni, na Tene-biani na Fini. Mbeni zo aga na Babâ pëpe, gi na lege ti Mbi.” Lo tene nga: “Ye so i hunda na iri ti Mbi, fade Mbi sala ye so, si Babâ alingbi wara gloire na yâ Molenge ni. Tongana i hunda mbeni ye na iri ti Mbi, fade Mbi sala ye so.” (Jean 14:6, 13, 14). E lingbi ti hinga biani so Jéhovah ayeke ndulu ti mä asambela so e sala na iri ti Jésus. Na ndo Jésus ni, Bible atene: “Azo so ayeke ga ndulu na Nzapa na lege ti lo, lo yeke na ngangu ti sö ala na kuâ biani biani, ngbanga ti so lo yeke ngbâ na fini lakue lakue ti hunda na Nzapa ti tene lo sala nzoni bê na azo ni so.”​—aHébreu 7:25, (Buku ti Nzapa, Fini Mbuki).

Tongana Jésus ayeke ndulu ti sambela Nzapa teti nzoni ti e, ka ngbanga ti nyen azo ti Chrétienté ayeke hunda maboko na “asaint” na yâ sambela ti ala? Na yâ buku ti lo Ngoi ti mabe (Angl.), wasungo-mbaï Will Durant afa ndo so salango ye so alondo dä. Atâa so lo tene azo asala mbito ti Nzapa Ti Ngangu Ahon mingi na ala bâ so ala lingbi ti ga ndulu na Jésus hio, Durant atene: “Tongana mbeni zo ake ti bata awango gumbaya so Jésus amû na yâ chapitre oku ti mbeti ti Matthieu, kamene ayeke sala lo ti bâ yâ ti lê ti [Jésus] tongana lo yeke sala tënë na lo. Ni la, a bâ a tene a yeke nzoni zo azia sambela ti lo na gbele mbeni saint, so église atene lo yeke biani na yayu, na ti toto na lo ti tene nzoni tënë ti lo na Christ.” Atënë so ayeke tâ na lege ni?

Bible afa na e so tongana e sambela Nzapa na lege ti Jésus, e lingbi ti ‘sala tënë na ti si na Nzapa na mbito pëpe’. (aEphésien 3:11, 12). Nzapa Ti Ngangu Ahon Kue ayeke yongoro mingi pëpe na azo ti tene lo mä sambela ti e. Na bê kue, wasungo psaume David asambela tongaso: “O Mo so Mo mä sambela, fade mi kue aga na Mo.” (Psaume 65:3). Ahon ti tene lo mû ngangu na azo na lege ti aye so “asaint” so akui awe azia na peko ti ala, Jéhovah ayeke sa yingo vulu ti lo na ndo azo so ahunda ni na mabe. Jésus atene: “Tongana i so i yeke sioni, i hinga lege ti mû matabisi ti nzoni na amolenge ti i, fade Babâ ti i na yayu aye mingi ahon pëpe ti mû Yingo Vulu na ala so ahunda Lo?”​—Luc 11:13.

Kusala ti azo ti be-vulu

Azo ti be-vulu so Paul ato lani ambeti na ala akui awe a sala fadeso angu ngbangbo mingi nga, na ngoi so alingbi, ala wara “couronne ti fini”, so ti tene a zingo ala ti duti na fini na yayu (Apocalypse 2:10). Awakua ti Jéhovah Nzapa ahinga so vorongo azo so ayeke biani asaint ague nde na ye so Bible afa na alingbi ti bata zo pëpe na kobela, aye ti ngangu ti ndagigi, kpale ti nginza, mbakoro, wala kui. Tongaso, peut-être mo yeke hunda tele ti mo, ‘Azo ti be-vulu ti Nzapa ayeke bi bê biani na ndo e? A lingbi e ku ti tene ala sala mbeni ye teti nzoni ti e?’

Na yâ mbeni prophétie so Daniel asû na mbeti, a sala tënë ti azo ti be-vulu dä mingi. Na siècle omene K.N.E., lo bâ mbeni kpengba suma, so gango tâ tënë ni ague ngbii asi na ngoi ti e. Lo bâ anyama ti ngonda osio, so azia ambito na bê ti zo, asigigi na kota ngu-ingo. Anyama so aduti fä ti ayanga-ti-komande ti azo, so awara lege pëpe ti mû na azo aye so amanke ala biani. Na pekoni, Daniel atene: “Me fade azo ti be-vulu ti Lo Ti Nduzu Ahon Kue awara royaume, na ala kamata royaume ni teti lakue, même teti lakue lakue.”​—Daniel 7:17, 18.

Paul afa so ‘ye ti héritier so teti azo ti be-vulu’ ayeke tâ ye biani, so a yeke ti komande legeoko na Christ na yayu (aEphésien 1:18-21). Mênë ti Jésus azi lege na azo ti be-vulu 144 000 ti zingo na kuâ na ti wara gloire na yayu. Bazengele Jean atene: “Ngia ayeke na ala so awara ye ti ala na kozo londongo ti awakinda, na ala yeke nzoni-kue. Kui use ni ayeke na ngangu pëpe ti sala ye na ala, me fade ala ga asacrificateur ti Nzapa na ti Christ, na ala komande legeoko na Lo ngu [saki] oko.” (Apocalypse 20:4, 6; 14:1, 3). Na yâ ti suma, Jean amä go ti a-ange gbâ ni gbâ ni na hengo bia na gbele Jésus so asi singo na gloire, ala tene: “Mo vo azo teti Nzapa na mênë ti Mo, na popo ti akete mara kue, na ti yanga nde nde kue, na ti azo nde nde kue, na ti amara kue; na Mo sala si ala ga royaume, asacrificateur teti Nzapa ti e; na fade ala komande na ndo sese.” (Apocalypse 5:9, 10). So tâ ye ti dengo bê! Jéhovah Nzapa, lo mveni, asoro akoli na awali so nzoni mingi. Nga, na sese ge, ala sala na Nzapa be-ta-zo, a lingbi ti tene so ala wara akpale kue so asi na azo (1 aCorinthien 10:13). Tongaso, e lingbi ti hinga biani so azo ti be-vulu so, wala asaint, so azingo na kuâ, ayeke komande ande na nzobe, teti ala yeke bâ awokongo nga na akatikati ti e.

Adeba nzoni so Royaume ayeke ga na ni

Ngorogbia ti Royaume aga ndulu ti zi sioye nga na pasi kue na ndo sese. Fade na lâ ni kâ, azo ayeke ga ndulu mingi na Nzapa ahon ti kozoni. Jean asû na mbeti: “Na mbi mä mbeni yanga so asala tënë ngangu na yâ trône, a tene, Bâ, Tabernacle ti Nzapa ayeke na popo ti azo, fade Lo duti na ala, na ala ga azo ti Lo, na Nzapa mveni ayeke na popo ti ala”. Fade ye so ayeke ga na gbâ ti adeba nzoni na ndo azo, teti prophétie ni angbâ lakue ti tene: “Fade Lo mbô ngule kue na lê ti ala, na kui ayeke mbeni pëpe. Vundu, wala toto, wala sana, ayeke mbeni pëpe teti kozo ye ni ahon awe.”​—Apocalypse 21:3, 4.

So tâ ngoi ti ngia ande! A fa nga aye so komandema ti mbilimbili-kue ti Christ na ti azo ti be-vulu 144 000 ayeke ga na ni ande na Michée 4:3, 4, so atene: ‘Fade [Jéhovah] afâ ngbanga na popo ti amara; Lo leke tënë ti amara ti ngangu so ayeke na yongoro ndo; fade ala pika épée ti ala si a ga soc, na likongo ti ala si a ga zeme ti fâ tikeke; fade mara ayä épée na tele ti mbeni mara pëpe, na ala manda ti sala bira mbeni pëpe. Fade azo oko oko kue aduti na gbe ti vigne ti ala mveni, na gbe ti keke ti figue ti ala mveni; zo oko ti mû mbito na ala ayeke pëpe teti yanga ti L’Eternel Ti Sabaoth asala tënë ni awe.’

Hiringo ndo ti wara mbage ti e na yâ mara ti adeba nzoni tongaso, a yeke azo ti be-vulu si amû ni. Teti fini wali aduti fä ti ala, azo so ayeke biani asaint ayeke tene lakue: “Ga!” Na tënë ni angbâ ti tene: “Na zo so amä, zia lo tene, Ga! Na zo so ayeke na nzara ti ngu, zia lo ga; zo so aye, zia lo nyon ngu so amû fini, zia lo nyon senge senge.” (Apocalypse 22:17). Nyen si ayeke na yâ “ngu ti fini” so? Mbeni ye ni ayeke tâ hingango ye ti ye so Nzapa aleke ti sala. Na yâ sambela, Jésus atene na Nzapa: “So ayeke fini ti lakue lakue: ti hinga Mo, Mo so gi Mo oko ayeke tâ Nzapa, na ti hinga Jésus Christ, Lo so Mo to Lo awe.” (Jean 17:3). E lingbi ti wara hingango ye so na mandango Bible lakue. So ngia si e lingbi ti duti na ni, teti na lege ti Tënë ti Nzapa, e lingbi ti hinga azo so ayeke biani azo ti be-vulu na ti manda tongana nyen Nzapa ayeke sala ande kusala na ala ti ga na azo aye ti nzoni ti lakue lakue!

[Foto na lembeti 4]

Yingo apusu Paul ti sû ambeti na azo so ayeke biani asaint

[Foto na lembeti 4, 5]

Abazengele ti Jésus, so aduti be-ta-zo, aga azo so ayeke biani asaint, wala azo ti be-vulu

[Foto na lembeti 6]

E lingbi ti sambela Nzapa na bê kue na lege ti Jésus Christ

[Foto na lembeti 7]

Asaint so azingo na kuâ, wala azo ti be-vulu, ayeke komande ande sese na nzobe