Kua ti pionnier ayeke kpengba songo ti e na Nzapa
“A yeke nzoni ti sara bia ti sepela Nzapa ti e.”—PS. 147:1.
1, 2. (a) Nyen la ayeke si tongana e pensé na mbeni zo so e ye lo nga e sara tënë ti lo? (Bâ foto so ayeke na tongo nda ti article ni.) (b) Ahundango ndo wa e yeke sara tënë na ndo ni?
TONGANA e yeke pensé na mbeni zo so e ye lo na e yeke sara tënë ti lo, songo ti e na zo ni ayeke kpengba mingi. Songo ti e na Jéhovah Nzapa nga kue ayeke tongaso. David so ayeke lani berger ayeke mû abï mingi ti bâ atongoro nga ti gbu li na ndo ti kota ti Zo so asara atongoro so. Lo tene: “Tongana mbi bâ ayayu ti Mo, ye so li tïtî Mo asara, nze na atongoro so Mo sara, Zo ayeke nyen, si Mo dabe Mo na lo? Na molenge ti zo, si Mo ga ti bâ lo?” (Ps. 8:4, 5). Na pekoni so bazengele Paul agbu li na ndo ti pendere lege so Jéhovah asara ti tene ye so lo leke ti sara ndali ti Israël ti yingo aga tâ tënë, lo tene: “Bâ, tongana nyen mosoro ti Nzapa, ndara ti lo na hingango ye ti lo ayeke kota!”—aRom. 11:17-26, 33.
2 Na fango tënë, e yeke pensé na Jéhovah nga e sara tënë ti lo. Ye so ayeke kpengba songo ti e na lo. Apionnier mingi abâ so mbeni ye ti nzoni so ala wara na pekoni so ala mû tere ti ala mingi ti fa tënë ti Royaume ayeke so, a sara si ala ndoye Nzapa mingi. Atâa mo yeke pionnier wala mo ye ti ga pionnier, gbu li nzoni na ndo ti ahundango ndo so: Na lege wa kua ti pionnier ayeke kpengba songo ti mo na Jéhovah? Tongana mo yeke pionnier, hunda tere ti mo: ‘Nyen la ayeke mû maboko na mbi ti ngbâ ti sara pendere kusala so?’ Tongana mo yeke pionnier ape, hunda tere ti mo: ‘Nyen la mbi lingbi ti sara ti mû kua ti pionnier?’ Zia e bâ alege so kua ti pionnier alingbi ti kpengba songo ti e na Nzapa.
LEGE SO KUA TI PIONNIER AYEKE KPENGBA SONGO TI E NA NZAPA
3. Na lege wa sarango lisoro na azo na ndo ti aye ti nzoni so Royaume ayeke ga na ni amû maboko na e?
3 Tongana e fa na azo aye ti nzoni so Royaume ayeke ga ande na ni, a yeke kpengba songo ti e na Nzapa. Versê wa la mo ye mingi ti sara na kua na ngoi so mo yeke fa tënë da na da? Peut-être a yeke Psaume 37:10, 11; Daniel 2:44; Jean 5:28, 29; wala Apocalypse 21:3, 4. Lakue tongana e sara lisoro na azo na ndo ti azendo so, e dabe ti e so “nzoni matabisi kue nga na matabisi so alingbi kue” alondo na Jéhovah, Nzapa so amû ye mingi. Ye so asara si songo ti e na lo akpengba mingi.—Jacq. 1:17.
4. Ngbanga ti nyen na ngoi so e fa tënë na azo e kiri e bâ nzoni bê ti Jéhovah na nene ni mingi?
4 Tongana e bâ tongana nyen la mingi ti azo ayeke na ngia ape nga ala wara tâ ye ti mungo maboko pëpe, a yeke sara si e kiri e bâ tâ tënë na nene ni mingi. Azo ti dunia so awara pëpe mungo maboko so ala yeke na bezoin ni ti sara mbeni nzoni ye na yâ ti gigi ti ala nga ti duti na ngia. Mingi ti ala ayeke na mbeto ti gigi ti kekereke nga ala yeke na beku ape. Ala yeke gi ti sara mbeni nzoni ye na yâ ti gigi ti ala. Même mingi ti azo so ayeke voro Nzapa ahinga Bible nzoni ape. Ala yeke tongana azo ti Ninive. (Diko Jonas 4:11.) Tongana e mû ngoi mingi ti fa tënë, e yeke bâ polele mingi tongana nyen la Jéhovah ayeke bâ lege ti e nzoni na lege ti yingo (És. 65:13). Me Jéhovah asara ye mingi ahon gi ti bâ lege ti abezoin ti azo ti lo. Lo tisa azo kue ti wara dengo bê nga ti duti na tâ beku. Ye so adabe ti e na nzoni bê ti Jéhovah.—Apoc. 22:17.
5. Tongana nyen la fango tâ tënë na azo asara si e gi bê ti e ahon ndo ni pëpe na ndo ti akpale ti e?
5 Tongana e fa tâ tënë na azo, a yeke sara si e gi bê ti e ahon ndo ni na ndo ti akpale ti e pëpe. Trisha, mbeni ita-wali so ayeke pionnier permanent, atene so vundu asara lani lo mingi na ngoi so babâ na mama ti lo asara divorce. Mbeni lâ vundu ahon ndo ti lo na tere ti lo anzere pëpe ti gue ti fa tënë. Me lo gue kamême lo sara mbeni étude. Lo sara étude ni na ambeni molenge ota so akono na yâ ti mbeni sewa so akpale ayeke dä mingi. Babâ ti ala adö ala azia na yaya ti ala ti koli asara pasi na ala mingi. Trisha atene: “Akpale na avundu ti mbi ayeke ye oko ape tongana a haka ni na ti ala. Na ngoi so e yeke sara étude ni, tere ti ala akomanse ti nzere mingi. Amolenge so ayeke mbeni matabisi so alondo na Jéhovah, mbilimbili na lango ni so.”
6, 7. (a) Na lege wa mabe ti e akiri akpengba mingi na ngoi so e fa atâ tënë ti Bible na azo? (b) Tongana e bâ so afango ye ti Bible amû maboko na azo so e manda Bible na ala ti tene gigi ti ala aga nzoni, a sara e tongana nyen?
6 Tongana e fa atâ tënë ti Bible na azo, a yeke kpengba mabe ti e. Bazengele Paul atene na ambeni Juif ti ngoi ti lo so ayeke sara pëpe aye so ala fa na azo ti sara, lo tene: “Mo so mo yeke fa ye na mbeni zo, mo fa ye na mo wani pëpe?” (aRom. 2:21). Apionnier ti laso ayeke ti ala nde mingi! Ala yeke wara ka alege mingi ti fa tâ tënë na azo nga ti sara a-étude na azo. Ti sara ni nzoni, a hunda ti tene ala leke tere ti ala ndali ti a-étude oko oko kue, nga peut-être ti sara arecherche ti kiri tënë na ahunda ti azo. Janeen, mbeni ita-wali so ayeke pionnier, atene so lakue tongana lo yeke fa tâ tënë na azo, lo kiri lo mä na bê ngangu na atâ tënë ni so.
7 Tongana e bâ so afango ye ti Bible amû maboko na azo so e manda Bible na ala ti tene gigi ti ala aga nzoni, a yeke sara si e kiri e bâ ndara ti Nzapa na nene ni mingi (És. 48:17, 18). Ye so ayeke mû maboko na e ti ngbâ lakue ti sara ye alingbi na afango ye ti Bible so na yâ ti fini ti e. Adrianna, mbeni pionnier atene: “Tongana azo azia bê ti ala na ndo ti ndara ti ala, gigi ti ala ayeke gi kirikiri. Me na ngoi so ala komanse ti zia bê ti ala na ndo ti ndara ti Jéhovah, ala komanse ti wara aye ti nzoni na pekoni.” Mbeni pionnier so iri ti lo Phil atene so bê ti lo adö ti bâ tongana nyen azo awara lege ti changé fini ti ala grâce na mungo maboko ti Jéhovah.
8. Na lege wa fango tënë legeoko na aita ayeke mû maboko na e?
8 Ti fa tënë legeoko na aita ayeke mû ngangu na e (aProv. 13:20). Mingi ti apionnier ayeke mû ngoi mingi ti fa tënë legeoko na aita. Ye so amû lege mingi na ala ti “kpengba tere na popo” ti ala. (aRom. 1:12; diko aProverbe 27:17.) Mbeni pionnier so iri ti lo Lisa atene: “Na place ti kua, lakue azo ayeke na bibe ti mandako nga ala yeke zia bê na amba ti ala. Lâ oko oko mo yeke mä akpere-kpere na abuba tënë. Zo ayeke sara kue ti ga kota zo na ndo ti amba ti lo. Na ambeni ngoi, ndali ti sarango ye ti mo ti Chrétien, azo ayeke bi kamene na lê ti mo wala ala yeke he mo. Ye oko, fango tënë legeoko na aita ayeke mû biani ngangu na zo. Na lakui tongana mbi kiri na yanga-da mbi yeke na ngia, atâa mbi fatigué tongana nyen.”
9. Tongana koli na wali ti lo asara kua ti pionnier, na lege wa a yeke mû maboko na mariage ti ala?
9 Tongana e sara kua ti pionnier legeoko na koli wala wali ti e, a yeke sara si songo ti mariage ti e akiri akpengba ngangu (Zo-ti. 4:12). Madeline, so koli ti lo nga kue ayeke pionnier, atene: “Mbi na koli ti mbi e yeke mû ngoi mingi ti sara lisoro na ndo ti fango tënë ti e na yâ ti lango ni wala na ndo ti mbeni ye so e wara na yâ ti dikongo Bible ti e so e lingbi ti sara na kua na fango tënë. Ngu oko oko so e yeke sara na yâ ti kua ti pionnier asara si songo ti e akiri akpengba mingi ahon ti kozo.” Trisha atene so lo na koli ti lo amä tere ti vo gi aye so alingbi na ngangu ti ala. Ye so asara si ala papa ndali ti nginza ape. Ala yeke gue legeoko ti sara avizite na a-étude ti ala. Ye so amû maboko na ala ti kpengba songo ti mariage ti ala ahon ti kozo.
10. Tongana e zia aye ti Royaume na kozo ndo nga e bâ so Nzapa ayeke mû maboko na e, e yeke zia bê ti e na Jéhovah tongana nyen?
10 Tongana e zia aye ti Royaume na kozo ndo, e bâ so Jéhovah ayeke mû maboko na e nga lo yeke kiri tënë na asambela ti e, a yeke sara si e zia bê ti e mingi na lo. Biani, aChrétien kue so ayeke be-ta-zo ayeke zia bê ti ala na Jéhovah. Me apionnier abâ so a yeke gi na ziango bê kue na Jéhovah la ala lingbi ti ngbâ ti sara kua ti pionnier. (Diko Matthieu 6:30-34.) Curt, so ayeke pionnier nga suppléant ti surveillant ti circonscription, ayeda ti gue ti sara vizite na mbeni congrégation. Ti londo na ndo ti lo ti si na congrégation ni, lo yeke sara ngbonga use na ndambo. Essence so ayeke na yâ ti oto ti ala, lo na wali ti lo so ayeke nga pionnier, alingbi gi ti tene ala gue na ni, me ti kiringo ni ayeke dä ape, nga a ngbâ yenga oko ti tene Curt awara nginza ti lo ti nze. Curt atene: “Mbi komanse ti hunda tere ti mbi wala desizion so mbi mû so ayeke nzoni.” Me na pekoni so ala sambela, ala tene so ala yeke gue ndali ti so ala hinga na bê ti ala kue so Nzapa ayeke bâ lege ti abezoin ti ala. Na ngoi so ala ye ti hon, mbeni ita-wali airi ala na téléphone na lo tene so lo yeke na mbeni cadeau ti mû na ala. A yeke tâ wungo ti nginza so ala yeke na bezoin ni ndali ti voyage ni. Curt atene: “Tongana mara ti aye so asi na mo fani mingi, a yeke ngangu pëpe ti bâ so Jéhovah la ayeke mû maboko na mo so.”
11. Ambeni ye ti nzoni wa apionnier awara?
11 Biani, fani mingi apionnier abâ so na ngoi so ala bi tere ti ala na yâ ti kua ti Jéhovah nga ala gi ti duti na kpengba songo na lo, ala wara aye ti nzoni mingi (Deut. 28:2). Me azo so asara kua ti pionnier ayeke wara nga akpale. Siokpari so ayeke na yâ ti tere ti e nga na sioni dunia so asara si e kue e yeke bâ pasi. Ngoi na ngoi ambeni kpale alingbi ti sara si apionnier azia kua ni teti mbeni ngoi. Me mingi ni lege ayeke dä ti leke akpale ni so wala même ti kpe ni. Nyen la alingbi ti mû maboko na apionnier ti ngbâ ti sara kusala ti ala so?
NGBÂ TI SARA KUA TI PIONNIER
12, 13. (a) Nyen la a lingbi mbeni pionnier asara tongana lo yeke na kpale ti wara ngbonga ti lo? (b) Ngbanga ti nyen a yeke kota ye ti tene lo zia ngoi ti diko Bible lâ na lâ, ti manda ye lo wani nga ti gbu li na ndo ni?
12 Mingi ti apionnier ayeke na ye mingi ti sarango ni. A lingbi ti duti ngangu ti sara aye kue, ni la a yeke kota ye ti leke akapa ti e nzoni (1 aCor. 14:33, 40). Tongana mbeni pionnier ayeke na kpale ti wara ngbonga ti lo, peut-être a lingbi lo gbu li nzoni na ndo ti lege so lo yeke sara kua na ngoi ti lo (aÉph. 5:15, 16). Lo lingbi ti hunda tere ti lo lo tene: ‘Mbi yeke mû ngoi mingi ndali ti angia wala asenge senge ye? A lingbi mbi gi ti kanga nzara ti bê ti mbi mingi? Mbi lingbi ti changé aye na yâ ti kapa ti kua ti nginza ti mbi?’ A lingbi apionnier ahunda tere ti ala na ahundango ndo so lakue nga ala changé aye so a lingbi ala changé na yâ ti kapa ti ala.
13 A lingbi mbeni pionnier azia na yâ ti kapa ti lo ti diko Bible lâ na lâ, ti manda ye lo wani nga ti gbu li dä. Tongaso, a lingbi pionnier asara ngangu si lo zia pëpe aye so ayeke akota ye pëpe ti mû ngoi so lo zia ndali ti aye so ayeke akota ye ahon atanga ni (aPhil. 1:10). Na tapande, bâ so mbeni pionnier akiri na yanga-da na pekoni so lo mû ngoi mingi ti fa tënë na yâ ti lango ni. Lo leke ti tene na lakui lo leke abungbi ti lo. Me, kozoni kue lo diko alettre so a tokua na lo. Na pekoni, lo zi ordinateur ti diko amessage so azo atokua na lo na Internet nga lo kiri tënë na ala. Na ngoi so lo yeke sara kua na ndo ti Internet, lo gue na ndo ti mbeni Site ti bâ wala ngere ti mbeni ye so lo ye ti vo akiri na gbe ni. Sân ti tene lo hinga, ngbonga use aga nduru ti hon awe na ade lo komanse ti leke bungbi ni ape. Ngbanga ti nyen ye so ayeke mbeni kpale? Biani, tongana mbeni zo ti kpengo loro aye ti ninga na yâ ti kua ti kpengo loro, a lingbi lo te nzoni kobe lakue. Legeoko nga, a lingbi pionnier amanda ye lo wani lakue si lo ngbâ na yâ ti kua ti pionnier.—1 Tim. 4:16.
14, 15. (a) Ngbanga ti nyen a yeke nzoni apionnier agi ti duti na aye mingi pëpe na yâ ti fini ti ala? (b) Tongana mbeni pionnier awara akpale, a yeke nzoni lo sara nyen?
14 Anzoni pionnier ayeke sara ngangu ti duti na aye mingi ape. A yeke ye so la Jésus awa adisciple ti lo ti sara (Mat. 6:22). Lo gi ti duti na aye mingi na yâ ti fini ti lo ape tongaso si lo bi bê ti lo kue gi na ndo ti kusala ti lo. Lo tene: “Anyama ti mungo kondo ayeke na adû ti ala, na andeke ti nduzu ayeke na ando ti wu tere ti ala dä. Me Molenge ti zo ayeke na mbeni ndo ti zia li ti lo dä pëpe.” (Mat. 8:20). Pionnier so amû tapande ti Jésus ayeke girisa ape so tongana lo yeke na aye mingi, a yeke hunda ngoi mingi ti tene lo bata ni nzoni, lo leke ni wala lo changé ni.
15 Apionnier ahinga so kusala ti ala ayeke nzoni mingi, me ala pensé pëpe so ala yeke nzoni mingi ahon aita. Ala hinga so kua ti pionnier ayeke mbeni matabisi so alondo na Jéhovah. Tongaso, a lingbi pionnier oko oko kue azia bê ti lo kue na Jéhovah si lo ngbâ ti sara kua so (aPhil. 4:13). Apionnier alingbi ti wara akpale (Ps. 34:20). Tongana a si, a yeke nzoni ala hunda na Jéhovah ti fa lege na ala nga ala zia si lo mû maboko na ala, ahon ti zia kua ti pionnier ni hio. (Diko Psaume 37:5.) Tongana ala bâ tongana nyen la na ndoye Jéhovah ayeke bâ lege ti ala, songo ti ala na lo ayeke kiri ti kpengba ahon ti kozo.—És. 41:10.
MO LINGBI TI MÛ KUA TI PIONNIER?
16. Tongana mo ye ti ga pionnier, a yeke nzoni mo sara nyen?
16 Tongana mo ye ti sara kua ti pionnier ti wara aye ti nzoni so apionnier ayeke wara, sara tënë ni na Jéhovah (1 Jean 5:14, 15). Sara lisoro na ndo ni na apionnier. Zia na gbele mo ti sara ambeni ye so ayeke mû maboko na mo ti ga pionnier. A yeke ye so Keith na Erika asara. Ala sara ye legeoko tongana ti azo so ngu ti ala na ala ayeke oko so asara mariage, ala sara kua ti nginza na yâ ti alango kue so azo ayeke sara kua, nga kete na peko ti mariage ti ala, ala vo da na mbeni fini oto. Ala tene: “E pensé so aye so ayeke sara si e duti nzoni mingi, me ye oko achangé ape.” Na ngoi so a zi Keith na kua, lo mû kua ti pionnier auxiliaire. Lo tene: “Sarango kua ti pionnier adabe ti mbi so fango tënë ayeke sara si zo ayeke na ngia mingi.” Ala sara kamarade na mbeni ita na wali ti lo so ayeke apionnier. Apionnier so amû maboko na ala ti bâ ngia so zo ayeke wara tongana lo gi ti duti na aye mingi pëpe nga lo sara kua ti pionnier. Nyen la Keith na Erika asara? Ala tene: “E sû na lê ti mbeti molongo ti aye so e zia na gbele e ti sara na lege ti yingo, e collé ni na tere ti frigo ti e, nga lakue tongana e sara mbeni ye ni oko, e sû kamba dä.” A si na mbeni ngoi, ala ga apionnier.
17. Ngbanga ti nyen a yeke nzoni ti tene mo gbu li nzoni ti bâ wala mo lingbi ti sara kua ti pionnier?
17 Mo lingbi ti ga pionnier? Tongana mo bâ so mo lingbi pëpe ti ga pionnier fade fadeso, sara ye kue so mo lingbi ti sara ti ga nduru mingi na Jéhovah na fango tënë na ngangu ti mo kue. Tongana mo sambela Jéhovah nga mo gbu li nzoni na ndo ti dutingo ti mo, mo lingbi ti bâ so tongana mo changé ambeni ye na yâ ti fini ti mo, a yeke mû lege na mo ti sara kua ti pionnier. Tongana mo sara kua ti pionnier, ngia so mo yeke wara ayeke hon asacrifice kue so mo sara. Mo yeke duti na ngia mingi ndali ti so mo zia Royaume ti Nzapa na kozo ndo na yâ ti fini ti mo nga mo mû ye mingi na azo (Mat. 6:33). Mo yeke wara ngoi mingi ti pensé na Jéhovah nga ti sara tënë ti lo. Ye so ayeke sara si mo yeke ye lo mingi nga mo zia ngia na bê ti lo.