“Mo kpa zo so ayeke ga nzoni pionnier!”

1. Tënë ti bê ti mbeni ita na ndo ti kua ti lo ti pionnier ayeke so wa?

¹ Kathe B. Palm atene: “Mbeni kusala ti hon kusala ti pionnier ayeke pëpe. Mbi wara ngia dä mingi nga a sara nzoni na mbi mingi na lege ti yingo.” Lo sara angu ahon 40 na yâ ti kua ti pionnier na kodoro ti Chili (na Amerika ti mbongo). Lo fa tënë na yâ ti kodoro ni kue. Na gbungo li na ndo ti aye ti nzoni so azo so asara kusala ti ngoi kue awara, peut-être mbeni zo atene na mo: “Mo kpa zo so ayeke ga nzoni pionnier!”

2. Fa ngbanga ti nyen e yeke wara kota ngia na sarango akusala ti yingo.

² Lege ti duti na ngia na yâ ti fini: Jésus, so ayeke tapande ti e, awara lani ngia mingi na sarango ye ti bê ti Babâ ti lo (Jean 4:34). Ni la, a yeke na bê ti lo kue si Jésus afa na adisciple ti lo so ti wara tâ ngia a lingbi zo abi tere ti lo na yâ ti kua ti Jéhovah. E yeke na ngia mingi tongana fini ti e asi singo na akusala so amû ngia na Jéhovah. Na ndo ni, tongana e mû ngoi ti e, ngangu ti e na mosoro ti e ti mû maboko na azo, ngia ti e ayeke kiri ti kono.​—Kus. 20:31, 35.

3. Ngia wa e yeke wara na mungo ngoi mingi na fango tënë?

³ Tongana e mû ngoi mingi na fango tënë, lege ayeke zi nga na e mingi ti wara ngia ti to nda ti a-étude na ti ngbâ ti sara ni. Nga tongana e ninga na yâ ti kusala ni na akode ti e amaï, e ga ti bâ so même ando so e bâ ti e lani e tene azo ni aye ti mä e pëpe, kusala ni alë lengo dä nzoni. Apionnier alingbi ti sara kusala na gbâ ti aye so ala manda na Ekole ti aPionnier na peko ti ngu oko tongaso so ala sara na yâ ti kusala ni (2 Tim. 2:15). Na ngoi so e yeke ngbâ ti sara kusala so, e lingbi ti lu tâ tënë na yâ ti bê ti mbeni zo, so na pekoni a yeke maï.​—Zo-ti. 11:6.

4. A lingbi amaseka so aga nduru ti hunzi mandango mbeti ti ala na lycée abi bê ti ala na nyen?

⁴ Amaseka: Na ngoi so ala yeke hunzi mandango mbeti na lycée, ala gbu li ti ala nzoni na kekereke ti ala awe? Juska laso, mingi ti aye so ala sara angoro na tere ti programme ti ekole ti ala. Me tongana ala wara diplôme ti ala awe, ala yeke sara ande nyen na ngoi so ayeke ngbâ senge so? Ahon ti sara kua ti nginza so amû ngoi ti ala kue, ala lingbi ti zia na yâ ti sambela ti ala ti ga pionnier? Akode so ala yeke manda ande (ti fa tënë na azo nde nde, ti hon ndo ti akpale ti ala wani, ti sara ye na ndara na ti maï anzoni kode ti fango ye) ayeke ga na ala aye ti nzoni na yâ ti fini ti ala kue.

5. Ababâ na amama nga na aita ti congrégation alingbi ti pusu amaseka ti mû kua ti pionnier tongana nyen?

⁵ Ababâ na amama, ala yeke mû maboko na amolenge ti ala ti mû kua ti pionnier? Atënë ti ala na nzoni tapande ti ala alingbi ti sara si amolenge ti ala azia Royaume ti Nzapa na kozo ndo (Mat. 6:33). Ray, so ato nda ti kua ti pionnier na peko ti so lo hunzi mandango mbeti ti lo na lycée, atene: “Lakue mama ti mbi atene so kua ti pionnier ayeke ga na ngia na zo mingi.” Aita kue ti congrégation alingbi ti wa amba ti ala ti ga pionnier na lege ti tënë ti yanga ti ala nga ti mû maboko na ala. José, so ayeke ti kodoro ti Espagne, atene: “Congrégation ti mbi abâ kua ti pionnier tongana kua so ayeke tâ nzoni ndali ti amaseka. Atënë ti ala na nzoni bango ndo so ala yeke na ni na ndo ti kua ti pionnier nga na maboko so ala yeke mû asara si hio mbi mû kusala ni.”

6. E lingbi ti sara nyen tongana ade nzara ti kua ti pionnier agbu e pëpe?

⁶ Hon ndo ti akpale: Me ka tongana mo tene: ‘Mbi yeke na nzara ti ga pionnier pëpe.’ Tongana a yeke kozo bango ndo ti mo la, sambela Jéhovah na ndo ni na tene na lo, ‘Mbi hinga pëpe wala mbi lingbi na kua ti pionnier, me mbi ye ti sara ye so anzere na mo.’ (Ps. 62:9; aProv. 23:26). Na pekoni gi ti tene Jéhovah afa lege na mo na lege ti Bible nga na bungbi ti lo. Aita mingi so aga pionnier permanent ‘atara’ kozoni kua ti pionnier auxiliaire, na ngia so ala wara dä apusu ala ti sara kusala ti ngoi kue.​—Ps. 34:9.

7. Tongana na bê ti e e tene e lingbi ti sara ngbonga 70 nze na nze pëpe, e lingbi ti sara nyen ti hon ndo ni?

⁷ Ka tongana mo bâ so mo lingbi ti mû ngbonga 70 nze na nze pëpe? Sara tënë ni na apionnier so dutingo ti mo na ti ala ayeke oko (aProv. 15:22). Na pekoni, sû na mbeti mara ti akapa nde nde so mo lingbi ti wara. Mo yeke bâ so a yeke ngangu pëpe ti mû ambeni ngoi so mo yeke mû ndali ti aye so ayeke senge senge ti fa na tënë.​—aÉph. 5:15, 16.

8. Ngbanga ti nyen ti kiri ti bâ dutingo ti e ngoi na ngoi?

⁸ Kiri mo bâ dutingo ti mo: Dutingo ti zo ayeke changé ka. A yeke nzoni mo gi ti bâ dutingo ti mo ngoi na ngoi. Na tapande, mo ga nduru na retraite awe? Randy, so ague na retraite hio, atene: “Desizion so amû lege na mbi ti tene mbi na wali ti mbi e mû kua ti pionnier. Ye so amû nga lege na e ti gue ti fa tënë na ndo so kota bezoin ayeke dä. Mbi wara aye ti nzoni mingi na peko ti desizion so mbi mû, me ti so ayeke kota mingi ahon atanga ni kue ayeke nzoni yingo-ti-hinga.”

9. A yeke nzoni akoli na awali so asara mariage awe akiri abâ nyen?

⁹ Na peko ti so ambeni ita na awali ti ala agbu li ti ala nzoni, ala bâ so ala yeke na bezoin pëpe ti tene ala na awali ti ala kue asara kua ti nginza. Biani, ye so ahunda peut-être ti tene sewa ni adö ambeni ye azia, me ye so ayeke ga na ala aye ti nzoni mingi. Jean, so wali ti lo ake kua ti nginza ti lo ti tene lo kono yâ ti fango tënë ti lo, atene: “Ti hinga so wali ti mbi ayeke mû ka alango ti lo ti sara na kua ti Jéhovah anzere na mbi mingi.”

10. Nyen la apusu aChrétien ti kiri ti bâ wala ala lingbi ti mû kua ti pionnier?

¹⁰ Mbeni fä ti ndoye na ti mabe: Jéhovah asara si fango tënë ayeke kusala so ahon atanga ni kue, so e kue e lingbi ti sara. Na yâ ti ngoi kete a yeke futi dunia so, na gi azo so airi ndo na Jéhovah na iri ti lo si ayeke sö kuâ (aRom. 10:13). Kota ndoye so e yeke na ni na mbage ti lo nga na singila teti ye so lo sara tënë ti e ayeke pusu e ande ti sara ye alingbi na yanga so Molenge ti lo amû ti fa tënë na ngia (Mat. 28:19, 20; 1 Jean 5:3). Na ndo ni, so e hinga e tene e yeke na alango ti nda ni ayeke pusu e ti sara ye kue so e lingbi ti sara na yâ ti fango tënë na tango so ngoi ade so, ahon ti sara kusala na ye ti dunia so kue.​—1 aCor. 7:29-31.

11. Tongana mbeni ita atene na e so e kpa zo so ayeke ga nzoni pionnier, a yeke nzoni e bâ tënë ti lo ni so tongana nyen?

¹¹ Kua ti pionnier ayeke pëpe gi tënë ti warango ngbonga; a yeke mbeni ye so afa so e ndoye Nzapa mingi. Ni la, tongana mbeni ita atene na mo so mo kpa zo so ayeke ga nzoni pionnier, so lo yeke gonda mo la. Nga sambela Jéhovah mingi ti tene lo mû maboko na mo ti lï na popo ti azo so abi tere ti ala na yâ ti pendere kusala so.

[Kete tënë na lembeti 4]

Ababâ na amama, ala yeke mû maboko na amolenge ti ala ti mû kua ti pionnier?

[Kete tënë na lembeti 5]

Jéhovah asara si fango tënë ayeke kusala so ahon atanga ni kue, so e kue e lingbi ti sara.