Ti zia bê kue na ndo ti Jéhovah aga na aye ti nzoni

BABÂ na mama ti mbi awara tere na ngu 1919 na assemblée internationale ti aWamandango Bible na Cedar Point, Ohio, na Amerika. Ala sara mariage gi na yâ ti ngu ni so. A dü mbi na ngu 1922. Ngu use na pekoni, a dü ita ti mbi Paul. A dü wali ti mbi Grace na ngu 1930. Babâ na mama ti lo, Roy na Ruth Howell, ayeke aWamandango Bible. A-âta ti lo nga kue ayeke aWamandango Bible nga ala yeke kamarade ti Ita Charles Taze Russell.

Mbi na Grace e wara tere na ngu 1947 na e sara mariage na lango 16 ti juillet, ngu 1949. Kozo ti tene e sara mariage, e sara lisoro polele na ndo ti ye so e yeke sara ande na yâ ti fini ti e. E mû desizion ti sara kua ti ngoi kue nga ti dü molenge ape. Na lango 1 ti octobre, ngu 1950, e komanse kua ti pionnier. Na ngu 1952, a tisa e ti sara kua ti circonscription.

KUA TI CIRCONSCRIPTION NGA NA EKOLE TI GALAAD

E use kue e bâ so e yeke na bezoin ti tene a mû maboko na e mingi ti sara kua ti circonscription so lâ oko e sara ni ape. Na ngoi so mbi yeke manda ye na mbage ti aita so aninga na yâ ti kua ni, mbi gi nga mbeni zo ti mû maboko na Grace. Mbi ga nduru na Marvin Holien, mbeni ita so mbi na lo e hinga tere aninga nga so lo ninga na yâ ti kua ti surveillant so ague na ando nde nde, mbi hunda lo mbi tene: “Grace ade maseka na lo yeke na kode mingi ape. Mo lingbi ti fa mbeni ita ti tene lo na Grace afa tënë teti mbeni ngoi tongaso si Grace awara ambeni kode?” Lo yeda lo tene: “Edna Winkle ayeke mbeni kpengba pionnier so alingbi ti mû maboko na lo mingi.” Angu mingi na pekoni, Grace asara tënë ti Edna, lo tene: “Lo sara si mbi yeke na mbeto na yanda-da ti azo ape, mbi hinga tongana nyen ti hon ndo ti atënë so azo ayeke tene ti kanga lege na e ti fa tënë na ala, nga lo fa na mbi ti mä zo nzoni tongaso si mbi hinga mbilimbili tënë so mbi lingbi ti tënë. Lo yeke lani tâ zo so mbi yeke na bezoin ti lo.”

Mbi na Grace e sara kua na yâ ti acirconscription use so ayeke na Iowa. Ambeni kodoro ti Minnesota nga na Dakota ti Mbongo ayeke nga na yâ ti acirconscription ni. Na pekoni, a tokua e na circonscription oko so ayeke na New York, so na yâ ni a yeke wara ando tongana Brooklyn nga na Queens. E bâ so lani e hinga ye na ndo ti kua ti circonscription nzoni ape na a yeke mbeni ye so e yeke girisa ni lâ oko ape. Na yâ ti circonscription so, a yeke wara nga congrégation ti Brooklyn Heights, so aita ni ayeke sara bungbi na Da ti Royaume so ayeke na Béthel. Gbâ ti azo so aninga na Béthel ayeke na yâ ti congrégation ni so. Na peko ti kozo diskur ti kusala so mbi mû na yâ ti congrégation ni, Ita Nathan Knorr aga nduru na mbi atene: “Malcolm, mo mû na e awango so alingbi ti mû maboko na e. Girisa ape so tongana mo mû wango na e na nzoni bê ape, a yeke mû maboko na e ape, nga mo yeke mû maboko na bungbi ti Jéhovah ape. Ngbâ ti sara nzoni kua so.” Na peko ti bungbi ni, mbi tene peko ti tënë so Ita Nathan Knorr atene na mbi so na Grace. E gue na yâ ti chambre so a mû na e na Béthel so ayeke na nduzu. E gi bê ti e ahon ndo ni na e toto.

Anze kete na pekoni, e wara mbeni lettre so na yâ ni a tisa e ti gue na klase 24 ti Ekole ti Galaad, so a-élève ni awara lani diplôme ti ala na février, ngu 1955. Kozo ti tene e gue na ekole ni, a tene na e so aye so e yeke manda so aye pëpe ti tene so nyen na nyen e yeke ga amissionnaire. Me, a yeke leke e ti sara kua ti surveillant so ague na ando nde nde nzoni mingi ahon ti kozo. Tere ti e anzere lani mingi ti gue na ekole so me a mû nga maboko na e ti sara tere ti e kete.

Na ngoi so e hunzi ekole ni, a tokua e ti sara kua ti district. Na yâ ti district ti e, a yeke wara akodoro tongana Indiana, Michigan nga na Ohio. Na décembre, ngu 1955, e wara lettre ti Ita Nathan Knorr. A yeke mbeni ye so e ku tere ti e na ni pëpe. Na yâ ti lettre ni lo tene: ‘Ala tene na mbi tâ tënë, ala fa na mbi tënë ti bê ti ala. Mbi ye ti hinga wala ala ye ti kiri na Béthel ti ngbâ ge wala ala ye ti duti na Béthel teti mbeni ngoi, na pekoni ala gue afa tënë na kodoro wande. Tongana ala ye kua ti district na ti circonscription, ala fa ni na mbi.’ E tene na lo so a yeke nzere na e ti sara kua kue so a mû na e ti sara. Hio na pekoni, a hunda na e ti gue na Béthel!

ANGU SO E SARA NA BÉTHEL

Mbi yeke na ngia mingi na yâ ti angu so mbi sara na Béthel ti bâ lege ti mungo na azo adiskur ti tene ala mû ni nga ti fa ye na kodoro ti Amerika kue. Amaseka-koli mingi so mbi fa ye lani na ala nga mbi mû maboko na ala aga azo so ayeke sara akota kua na yâ ti bungbi ti Jéhovah. Na nda ni, mbi ga wakuasu ti Ita Knorr na ndokua so ayeke bâ lege ti kua ti fango tënë na ndo ti sese kue.

Angu so mbi sara na bureau ti service anzere na mbi mingi. Mbi na Thomas J. (Bud) Sullivan e sara kua na bureau ti service. Lo yeke surveillant ti ndokua so teti angu mingi. Me ambeni zo ayeke nga dä so mbi manda ye mingi na mbage ti ala. Mbeni oko ti ala ayeke Fred Rusk so a mû lani lo ti fa ye na mbi. Mbi dabe ti mbi so mbi hunda lo, mbi tene: “Fred, mo changé gbâ ti aye na yâ ti ambeni lettre ti mbi ngbanga ti nyen?” Lo he ngia me lo tene na mbi polele, lo tene: “Malcolm, tongana mo sara tënë ti mbeni ye na yanga, zo alingbi ti tene atënë mingi ti fa ndani, me tongana mo sara tënë ti mbeni ye na mbeti, mingi ni tongana tënë ni alondo ge, a lingbi a duti polele nga tâ na lege ni.” Na pekoni lo tene na nzoni bê lo tene: “Sara mbeto ape, mo sara nzoni nga a si na mbeni ngoi mo yeke sara ande nzoni mingi.”

Na yâ ti angu so Grace asara na Béthel, lo sara akua nde nde, lo sukula yâ ti ada nga lo bâ lege ti ada ti lango ti tene angbâ nzoni. Lo ye akua so mingi. Juska laso, ngoi na ngoi tongana e wara ambeni ita so ade lani maseka na Béthel na yâ ti angu ni so, na ngia na yanga ala yeke tene na Grace atene: “Mo fa lani na mbi tongana nyen ti leke gbogbo. Mbi tene na mo, ye so mo sara so anzere na mama ti mbi mingi.” Grace asara nga kua na ndokua ti apériodique, ti alettre nga na ti lekengo akasete ti e. Sarango akua so amû maboko na lo ti hinga so, na yâ ti bungbi ti Jéhovah atâa ye wa la e sara wala ndo wa la e sara kua dä, a yeke mbeni kota pasa nga mbeni ye ti nzoni. Juska laso, bango ndo ti lo achangé ape.

ACHANGEMENT SO E SARA

Na ngu 1975, e bâ so mama ti mbi nga na babâ na mama ti Grace so aga mbakoro awe ayeke na bezoin ti tene e bi lê mingi na ndo ti ala. Na nda ni e mû mbeni ngangu desizion. E ye lani pëpe ti sigigi na Béthel nga ti zia aita ti e ti Béthel so e ye ala mingi. Me, mbi bâ so a yeke na mbi ti bâ lege ti ababâ na amama ti e. Ni la, a si na mbeni ngoi e sigigi na Béthel, me e yeke na beku ti kiri tongana aye aga nzoni.

Ti wara nginza ti bâ lege ti abezoin ti e, mbi sara kua na mbeni ndokua ti assurance na kua ti mbi ayeke ti gue na yanga-da ti azo ti kä na ala ambeti ti assurance. Mbi yeke dabe ti mbi lakue na tënë so mbeni wayinda atene na mbi na ngoi so mbi yeke manda kua ni. Lo tene: “Ti tene kua so amaï, a lingbi mo iri azo na téléphone na alakui. A yeke na ngoi so la mo lingbi ti wara azo. A yeke kota ye ti tene lakue na alakui mo duti ge mo iri azo na téléphone.” Mbi tene na lo: “Teti so mo sara kua so aninga, ni la apusu mo ti sara tënë so. Mbi yeke sara ye alingbi na ni. Me mbi yeke nga na akua ti Nzapa so mbi yeke bâ ni lakue na nene ni, mbi ye ti ngbâ ti bâ ni gi tongaso. Mbi yeke iri ndo na ambeni lakui, me na mardi nga na jeudi na lakui, mbi yeke na ambeni kpengba bungbi so a lingbi mbi gue dä.” Teti so mbi manke abungbi pëpe ndali ti kua ti nginza, Jéhovah airi tënë nzoni na ndo ti mbi.

E yeke lani na tere ti mama ti mbi na hôpital na ngoi so lo kui na juillet, ngu 1987. Kota zo ti hôpital aga atene na Grace atene: “Madame Allen, gue na yanga-da mo wu tere ti mo. Zo kue ahinga so mo yeke ge lakue na tere ti mama ti koli ti mo. Gi bê ti mo ape.”

Na décembre ngu 1987, e sû demande ti kiri ti sara kua na Béthel, ndo so e ye lani mingi. Me alango kete na pekoni, Grâce asara kizama na adocteur atene so lo yeke na cancer ti kamba ti yâ. Na pekoni so a opéré lo na lo kiri lo wara sava, a tene so cancer ti lo ahunzi awe. Ye oko, na oko ngoi ni, e wara lettre ti Béthel so ahunda na e ti ngbâ ti fa tënë na congrégation ti e. E sara ngangu ti ngbâ lakue ti fa tënë.

A si na mbeni ngoi, mbi wara kua na Texas. E tene teti so dê na ndowa ayeke kâ mingi ape, a yeke sara ande nzoni na e. Na tongana e si kâ, ndo ni asara e nzoni. E sara ngu 25 ge na Texas na e yeke na popo ti aita so e ye ala mingi.

AYE SO E MANDA

Teti mbeni ngoi Grace awara cancer ti kamba ti yâ nga na ti go, nga ade ti ninga ape lo wara ti me. Me lâ oko lo dema tere pëpe ndali ti gbâ ti akpale so lo wara na yâ ti fini ti lo. Lo ke pëpe tënë so a tene koli la ayeke mokonzi ti sewa. Fani mingi azo ayeke hunda lo atene: “Ala sara tongana nyen si mariage ti ala aga nzoni nga ala use kue ayeke na ngia so?” Lo fa aye osio, lo tene: “E yeke anzoni kamarade. Lâ oko oko e yeke fa na mba aye so asi na e. E ye mingi ti duti ndo oko ti sara lisoro lâ oko oko. Nga tongana e sara ngonzo na tere ti mba, e yeke leke tënë ni kozoni si e lango.” Biani, na ambeni ngoi e yeke son bê ti mba, me e yeke pardone mba nga e girisa na ndo ni. Ye so amû maboko na e mingi.

E manda anzoni ye mingi na yâ ti akpale kue so e wara:

1.  Zia bê ti mo lakue na ndo ti Jéhovah na yeda na aye so lo zia lege na ni ti tene asi. Zia bê ti mo na hingango ye ti mo pëpe.​—aProv. 3:5, 6; Jér. 17:7.

2.  Zia si tënë ti Jéhovah, Bible, afa lege na mo, atâa kpale ni ayeke tongana nyen. Ti mä yanga ti Jéhovah nga ti sara ye alingbi na andia ti lo ayeke kota ye. Tongana mo mä yanga ape andâ mo ke yanga, tënë ni kue awe la.​—aRom. 6:16; aHéb. 4:12.

3.  Ye so ayeke kota ahon atanga ni kue na yâ ti fini ti zo ayeke ti duti na nzoni iri na gbele Jéhovah. Gi ti zia na kozo ndo aye so bê ti Jéhovah aye ahon ti gi amosoro na lege ti mitele.​—aProv. 28:20; Zo-ti. 7:1; Mat. 6:33, 34.

4.  Sambela ti yapu nga ti sara kua nzoni na yâ ti kua ti Jéhovah alingbi na ngangu ti mo. Zia lê ti mo na ndo ti ye so mo lingbi ti sara, pëpe na ndo ti ye so mo lingbi pëpe ti sara.​—Mat. 22:37; 2 Tim. 4:2.

5.  Hinga so gi bungbi ti Jéhovah oko la lo yeke iri tënë nzoni na ndo ni nga lo bâ ni na nzoni lê.​—Jean 6:68.

Mbi na Grace e sara na Jéhovah ahon ngu 75, nga ngu so e sara na Jéhovah na peko ti mariage ti e ayeke nduru na ngu 65. Na yâ ti angu so kue, e yeke biani na ngia ti bungbi oko ti sara na Jéhovah. E sambela ti tene aita nga kue abâ tongana nyen la ziango bê kue na ndo ti Jéhovah ayeke ga na ye ti nzoni na zo.