KIRINGO TËNË NA AHUNDA TI AZO
Jésus Christ ayeke kiri ngbanga ti nyen?
Lani, kozo ti tene Jésus Christ ague na yayu na ngu 33, lo tene lo yeke gue ti kiri ande. Lo haka lo wani na mbeni koli so a dü lo na yâ ti sewa ti akota zo. Koli ni so avoyagé a ninga me na kiringo ti lo, lo ga gbia. Tapande so aye ti fa so na ngoi so Jésus ayeke kiri, lo yeke ga na nzoni gouvernement na azo.—Diko Luc 19:11, 12.
Jésus ayeke ga ande na nzoni gouvernement na azo
Jésus Christ ayeke kiri na mara ti tere wa? Lani, a zingo lo na tere so ayeke ti yingo (1 Pierre 3:18). Na pekoni, lo gue na yayu nga lo duti na tere ti Nzapa, na mbage ti maboko ti lo ti koli (Psaume 110:1). Angu mingi na pekoni, a gue na Jésus na gbele Jéhovah Nzapa, “Lo Ti Giriri,” ti tene lo mû na Jésus ni ngangu ti komande na ndo ti azo kue. So aye ti fa so Jésus ayeke kiri tongana zo ape, me tongana mbeni Gbia so lê ayeke bâ lo pëpe.—Diko Daniel 7:13, 14.
Tongana Jésus akiri, lo yeke sara nyen?
Na ngoi so Jésus na a-ange ti lo ayeke si, lo yeke fâ ngbanga ti azo kue. Me singo ti lo ni so, azo ayeke bâ ni ape. Lo yeke fâ asioni zo me lo yeke mû fini ti lakue lakue na azo so ayeda na lo tongana Gbia.—Diko Matthieu 25:31-33, 46.
Na ngoi ti komandema ti lo ande, lo yeke sara si sese aga Paradis. Lo yeke zingo azo so akui ti tene ala duti na yâ ti Paradis ni na ndo ti sese ge.—Diko Luc 23:42, 43.