Vorongo Nzapa na yâ ti sewa: Mo lingbi ti sara si a nzere ahon ti kozo?

Mbeni babâ na Brésil atene: “Vorongo Nzapa na yâ ti sewa so e yeke sara na lakui anzere na e mingi asara si ngoi na ngoi tongana mbi tene na azo ti sewa ti mbi pëpe so mandango ye ni ahunzi awe, e yeke gue juska l’heure ahon na bï.” Mbeni babâ na Japon atene so molenge ti lo ti koli so ayeke na ngu bale-oko ahinga pëpe so l’heure ayeke hon nga lo ye ti tene mandango ye ni ahunzi ape. Ngbanga ti nyen? Babâ ti lo atene: “Lo yeke na nzara ti manda ye na asara si lo yeke na ngia mingi.”

A yeke amolenge kue la ayeke na ngia na ngoi ti vorongo Nzapa na yâ ti sewa ape. Ambeni aye ni pëpe. Ngbanga ti nyen? Mbeni babâ ti sewa na Togo atene: “A lingbi vorongo Jéhovah adë gi dengo ape.” Tongana vorongo Nzapa na yâ ti sewa adë gi dengo, a yeke nzoni a changé fason ti sarango ni. Asewa mingi abâ so ngoi ti vorongo Nzapa na yâ ti sewa ayeke mbeni ngoi so azo ayeke na “ngia” legeoko tongana ti so azo ti Israël abâ lâ ti sabbat tongana mbeni ngoi so ala yeke na ngia.​—És. 58:13, 14.

A lingbi ababâ so ayeke aChrétien asara kue ti tene sewa ti ala ayeke na ngia na ngoi ti vorongo Nzapa na yâ ti sewa. Tongana ala sara tongaso, mandango ye ni ayeke kiri ti nzere mingi. Ralf, so ayeke na amolenge ti wali ota nga na ti koli oko, atene so vorongo Nzapa na yâ ti sewa so ala yeke sara ayeke tongana lisoro na zo kue ayeke sara tënë. Na ambeni ngoi alingbi ti duti ngangu ti sara si mandango ye ni anzere na azo ni kue nga ti tene ala kue asara lisoro na ngoi ti mandango ye ni. Mbeni mama ayeda na tënë so, lo tene: “Mbi yeke lakue na ngangu pëpe ti sara si vorongo Nzapa na yâ ti sewa anzere na azo ti sewa ti mbi kue tongana ti so bê ti mbi aye.” Nyen la mo lingbi ti sara ti tene vorongo Nzapa na yâ ti sewa anzere ahon ti kozo?

DUTI NDURU TI CHANGÉ YÂ TI AYE SO ALA YEKE MANDA

Mbeni babâ na Allemagne so ayeke na amolenge use atene: “A lingbi e sara si fango ye ni alingbi na amolenge ti e.” Natalia, so ayeke na amolenge use, atene: “Amolenge ti e aye mingi ti tene e changé lakue yâ ti aye so e yeke manda.” Asewa mingi ayeke kangbi yâ ti aye so ala yeke manda na ngoi ti vorongo Nzapa na yâ ti sewa. Cleiton, so ayeke na Brésil so ayeke na amolenge use so angbâ maseka atene so, sarango tongaso asara si vorongo Nzapa na yâ ti sewa anzere nga azo ti sewa ni kue asara tënë. Tongana babâ na mama ni akangbi yâ ti aye so ala yeke manda na ngoi ti vorongo Nzapa na yâ ti sewa, a yeke sara si ala mû maboko na amolenge ni oko oko alingbi na bezoin ti ala teti so ngu ti ala ayeke nde nde. A yeke nzoni ala soro mbeti so ala ye ti manda nga ala gbu li ti ala na ndo ti kode so ala yeke manda na ni.

Nyen la ambeni sewa ayeke sara ti mû lege na ala ti manda aye nde nde? Ambeni sewa ayeke to nda ti vorongo Nzapa na yâ ti sewa na hengo bia na Jéhovah. Juan, so ayeke na Mexique, atene: “A sara si tere ti e kue anzere na a leke e ti to nda ti mandango ye ti e.” Azo ti sewa ti lo asoro abia so atënë ti yâ ni ague oko na aye so ala yeke manda ye na ndo ni na lakui.

Asewa mingi ayeke diko mbeni mbage ti Bible legeoko. Ti tene e changé yâ ti aye so e yeke manda, zo oko oko ayeke diko ye na place ti azo nde nde so a sara tënë ti ala na yâ ti mbage ti Bible so e yeke diko ni. Na tongo nda ni ye so anzere lani pëpe na mbeni babâ ti sewa so ayeke na Japon. Lo tene: “Ti diko ye tongaso anzere ti lo ape.” Me amolenge ti lo ti koli use ayeke lani na ngia mingi so anzere na babâ na mama ti ala ti voro Nzapa na yâ ti sewa legeoko na ala. Ambeni sewa même ayeke sara akete scénette ti ambaï ti Bible. Roger, so ayeke na Afrika ti Mbongo so ayeke na amolenge use, atene: “Mingi ni amolenge ayeke bâ ambeni ye na yâ ti mbeni mbaï ti Bible so e ababâ na amama ti ala e bâ ni ape.”

Mbeni ye so asewa alingbi ti sara ti changé yâ ti aye so ala yeke manda a yeke ti tene ala kue aleke ambeni ye, na tapande arche ti Noé wala temple ti Salomon. A nzere mingi ti sara recherche ti leke aye tongaso. Na Asie mbeni molenge-wali so ayeke na ngu oku na babâ na mama ti lo nga na âta ti lo ti wali asara tongaso. Na yâ ti salon ti ala, ala sara mbeni ngia na sewa na ndo ti voyage ti missionnaire ti bazengele Paul. Ambeni sewa asara ngia na ndo ti ambaï ti mbeti ti Exode. Donald, so ayeke na ngu 19 na Togo, atene: “So e changé yâ ti aye so e yeke manda asara si aye achangé na yâ ti sewa ti e, nga na yâ ti vorongo Nzapa so e voro na sewa.” Mo lingbi ti pensé na ndo ti mbeni ye so mo na asewa ti mo alingbi ti leke ti tene vorongo Nzapa na yâ ti sewa ti ala anzere ahon ti kozo?

A YEKE KOTA YE TI LEKE TERE NZONI

Atâa so changengo yâ ti aye so a yeke manda ayeke sara si vorongo Nzapa na yâ ti sewa anzere, a hunda ti sara aye mingi ti tene azo kue awara ye ti nzoni dä. A lingbi azo ti sewa ni kue aleke tere ti ala. A yeke ngangu na amolenge ti manda ye teti ngoi mingi. Tongaso, a lingbi babâ ti sewa agbu li ti lo nzoni na ndo ti aye so lo na sewa ti lo ayeke manda nga lo mû ngoi ti leke tere ti lo nzoni. Mbeni babâ ti sewa atene: “Tongana mbi leke tere ti mbi, mandango ye ni ayeke ga na ye ti nzoni na azo ti sewa ti mbi kue.” Mbeni babâ na Allemagne ayeke fa na azo ti sewa ti lo kozoni aye so ala yeke manda na yâ ti ayenga so ayeke ga. Mbeni babâ na Bénin so ayeke na amolenge omene ayeke bâ ka mbeni DVD so bungbi ti Jéhovah asigigi na ni na ngoi ti vorongo Nzapa na yâ ti sewa. Ala yeke leke tere ti ala tongana nyen? Babâ ni ayeke mû na ala ahundango ndo kozoni na lango ti mandango ye ni. Lekengo tere ayeke sara si vorongo Nzapa na yâ ti sewa anzere mingi.

Tongana azo ti sewa ahinga awe ye so ala yeke manda ni, ala lingbi ti sara lisoro na ndo ni na yâ ti yenga ni na ayeke sara si ala yeke ku ngoi ti mandango ye ni kungo na ngia. Na tongana azo oko oko na yâ ti sewa ayeke na kua ti sara na ngoi ti mandango ye ni, a yeke sara si zo oko oko ayeke bâ so ye so ala manda na ngoi ti vorongo Nzapa na yâ ti sewa abâ lo.

ALA SARA NI LAKUE

A yeke ngangu na asewa mingi ti voro Nzapa na yâ ti sewa lakue. Ngbanga ti nyen?

Ambeni babâ ayeke sara kua teti angbonga mingi ti mû kobe na sewa ti ala. Na tapande, mbeni babâ na Mexique ayeke londo na ngbonga omene ti ndapre na ayeke kiri na yanga-da gi na ngbonga miombe ti bï. Na ambeni ngoi, a lingbi nga ambeni babâ achangé lango ti vorongo Nzapa na yâ ti sewa ndali ti vizite ti surveillant so ague na ando nde nde wala ndali ti kota bungbi.

Atâa akpale so alingbi ti si, a lingbi e sara kue ti voro Nzapa na yâ ti sewa lakue. Loïs so ayeke na ngu 11 na so ayeke na Togo atene so ala yeke sara kue ti voro Nzapa na yâ ti sewa lakue. Lo tene: “Atâa so ambeni ye ayeke si so asara ka si e to nda ti voro Nzapa na yâ ti sewa na l’heure ape, e yeke sara ni lakue.” Tongaso, a yeke nzoni ti tene lango ti vorongo Nzapa na yâ ti sewa ayeke na tongo nda ti yenga. Ngbanga ti nyen? Ngbanga ti so tongana mbeni ye so e ku tere ti e na ni ape asi, e lingbi ti soro mbeni lango nde na yâ ti yenga ni ti sara ni.

Ngbanga ti nyen a iri ngoi ni so ngoi ti vorongo Nzapa na yâ ti sewa? Ngbanga ti so ayeke mbeni mbage ti vorongo so e yeke voro na Jéhovah. Zia e na azo ti sewa ti e kue e mû “bagara” na sacrifice na Jéhovah (Os. 14:2). Zia tere ti e kue anzere na ngoi ti vorongo Nzapa na yâ ti sewa, teti so “tâ ngia ti L’Éternel ayeke ngangu ti i.”​—Néh. 8:9, 10.