Mungo maboko na asewa
1. Na lege wa lango ti Sabbat ti yenga oko oko aga lani na ye ti nzoni na asewa ti azo ti Israël?
1 Tënë ti batango sabbat ayeke lani mbeni ye so na lege ti ndoye Jéhovah aleke ti tene asewa abâ nzoni dä. Azo ti Israël ayeke wu tere ti ala lani na peko ti akua ti ala ti lâ oko oko na ala yeke na ngoi ti gbu li na ndo ti aye ti nzoni so Jéhovah asara nga na ndo ti songo ti ala na lo. Ababâ na amama alingbi ti mû ngoi ni so ti yôro Ndia ti Nzapa na bê ti amolenge ti ala (Deut. 6:6, 7). Yenga oko oko, lango ti Sabbat ayeke mû lege na azo ti Jéhovah ti gbu li na ndo ti songo ti ala na lo.
2. Nyen la tënë ti Sabbat afa na e na ndo ti Jéhovah?
2 Biani, laso Jéhovah ahunda pëpe na asewa ti bata lango ti Sabbat. Me, ndia so afa na e mbeni ye na ndo ti Nzapa ti e. Lakue, lo yeke bi bê ti lo mingi na ndo ti nzoni duti ti azo ti lo na lege ti yingo (És. 48:17, 18). Laso, mbeni lege so Jéhovah afa so tënë ti nzoni duti ti azo ti lo na lege ti yingo agbu bê ti lo mingi ayeke na lege ti Mandango tënë ti Nzapa na sewa.
3. Nda ti Mandango tënë ti Nzapa na sewa ayeke nyen?
3 Nda ti Mandango tënë ti Nzapa na sewa ayeke nyen? Na nze ti janvier 2009 a to nda ti sara bungbi ti Mandango Buku ti Congrégation gi na oko lango so ayeke sara na Ekole ti Kusala ti aChrétien nga na Bungbi ti Kusala. Mbeni nda ti gbiango ye so ayeke ti mû lege na asewa ti sara si songo ti ala na Jéhovah akiri akpengba na ziango na sese mbeni kapa ti Mandango tënë ti Nzapa na sewa yenga oko oko. A wa lani asewa kue ti tene, tongana lege ayeke dä, ala kiri na lango ti mandango ye ti ala na sewa na lango so kozo a yeke manda na buku si ala sara lisoro mingi na ndo ti Bible na ti manda ye alingbi na abezoin ti sewa ti ala.
4. Mandango tënë ti Nzapa na sewa ayeke ninga gi l’heure oko? Fa nda ni.
4 Lani, ti tene e gue na bungbi ti Mandango Buku ti Congrégation, e yeke mû ngoi ti leke tere ti e, ti gue na bungbi ni nga na ambeni ye tongaso. Ti mingi ti e, ti gue na bungbi ti l’heure oko so amû ngoi mingi. Gbiango ye so a ga na ni na yâ ti kapa ti abungbi ti e amû lege na e ti manda tënë ti Nzapa na sewa na lango ni so. Ye oko, a ye pëpe ti tene so alingbi Mandango tënë ti Nzapa na sewa ni aninga gi l’heure oko. Nde na so, a lingbi e gbu li ti e na ndo ti abezoin nga na akatikati ti sewa ti e na e leke kapa ni alingbi na ni.
5. Ngoi ni kue ayeke gi ngoi ti lisoro? Fa nda ni.
5 Ngoi ni kue ayeke gi ngoi ti lisoro? Na ngoi so akoli na awali so asara mariage awe wala asewa so amolenge ayeke dä ayeke sara lisoro na popo ti ala na ndo ti tënë ti Nzapa, ala yeke kpengba mba (aRom. 1:12). Songo ti azo ti sewa ni akiri ti kpengba. Tongaso, a lingbi Mandango tënë ti Nzapa na sewa aluti mingi na ndo ti Bible. Me, zo oko oko na yâ ti sewa ni alingbi nga ti mû ngoi ti manda ye lo wani. Na tapande, na peko ti so sewa ni asara lisoro awe, azo ni kue alingbi ti ngbâ place oko na ngoi so zo oko oko ayeke manda ye lo wani wala lo leke tere ngbanga ti ambeni mbage ti bungbi wala lo diko apériodique. Ambeni sewa ayeke zi télé na ngoi ni so pëpe.
6. A yeke manda tënë ti Nzapa na sewa ni tongana nyen?
6 A yeke manda tënë ti Nzapa na sewa ni tongana nyen? Mandango ye ni ayeke lakue gi hundango tënë na kiringo tënë pëpe. Ti sara si Mandango tënë ti Nzapa na sewa aduti mbeni ye so adë dengo pëpe nga so anzere na zo, asewa mingi aleke kapa ni tongana ti abungbi so e yeke sara na mercredi wala jeudi. Ala kangbi yâ ti mandango ye ni na ambage nde nde na ala yeke sara ni na alege nde nde nga. Na tapande, ala lingbi ti diko Bible legeoko, ti leke ambeni mbage ti abungbi na ti sara ambeni démonstration ndali ti fango tënë. Ambeni wango ayeke na lembeti 6.
7. A yeke nzoni ngoi ti mandango ye ni aduti tongana nyen?
7 A yeke nzoni ngoi ti mandango ye ni aduti tongana nyen? Sewa ti mo ayeke manda ande ye mingi tongana ngoi ti mandango ye ni amû ngia nga tere ti azo ni ayapu. Tongana lege ayeke dä na ambeni ngoi ala lingbi ti duti na gigi ti manda ye ni. Tongana a hunda ti tene ala wu tere kete si, ala lingbi ti sara tongaso. Ambeni sewa aleke ti te wala ti nyon mbeni kete ye na peko ti kapa ni. A hon ti tene ababâ na amama amû ngoi ti mandango ye ni ti suku wala ti se amolenge ti ala, ala lingbi ti mû ngoi ni so ti gboto lê na ndo ti ambeni sarango ye wala ambeni kpale so ala bâ na yâ ti sewa ni. Ye oko, a yeke nzoni ti sara lisoro na ndo ti kpale so abâ gi mbeni molenge oko na mbeni ngoi nde ti zia kamene na lê ti lo na devant ti aita ti lo pëpe. A yeke nzoni Mandango tënë ti Nzapa na sewa aduti mbeni ngoi so amû ngia na zo nga ayapu ti lingbi na dutingo ti Nzapa ti e so e yeke voro lo so ayeke Nzapa so ayeke na ngia.—1 Tim. 1:11.
8, 9. Ababâ ti sewa ni alingbi ti leke tere ti ala tongana nyen?
8 Babâ ti sewa ni alingbi ti leke tere ti lo tongana nyen? Sewa ni ayeke wara ande ye ti nzoni mingi tongana babâ ti sewa ni aleke tere ti lo kozoni na ndo ti aye so alingbi ti manda ni nga na nzoni lege ti mandango na ye ni (aProv. 21:5). A yeke nzoni ti tene koli na wali ti lo amä tere kozoni na ndo ni. Peut-être ababâ ti sewa ni alingbi ti hunda amolenge ti ala ngoi na ngoi na ndo ti lekengo kapa ni. Tongana ala sara tongaso ayeke mû maboko na ala ti hinga aye so agbu bê ti amolenge ti ala.
9 Mingi ti ayenga ni babâ ti sewa ni ayeke pëpe na bezoin ti mû ngoi mingi ti leke tere ti lo. Tongaso, ambeni mbage ti mandango ye ni ayeke dä so sewa ni alingbi ti sara ni yenga oko oko, na babâ ti sewa ni ayeke pëpe na bezoin ti leke lakue mbeni fini kapa ti aye ti mandango ni nde. Peut-être babâ ti sewa ni alingbi ti leke mbeni fini kapa ni gi na peko ti so ala hunzi ti manda ye, teti so lo ngbâ ti dabe ti lo na abezoin ti sewa ni. Ambeni babâ ti sewa ayeke sû kapa ni na lê ti mbeni nduru mbeti na ala yeke zia ni na mbeni place so sewa ni alingbi ti bâ ni hio, na tapande ti collé ni na tere ti frigo. Ye so ayeke sara si tere ti azo ti sewa ni ayeke nzere ti hinga kozoni ye so ala yeke manda ande, na ala yeke ku ni kungo na ala lingbi ti leke tere ti ala.
10. Ti ala so ayeke gi ala oko, ala lingbi ti sara kusala na ngoi ti Mandango tënë ti Nzapa na sewa ni tongana nyen?
10 Ka tongana mbi yeke gi mbi oko? Ti ala so ayeke gi ala oko, ala lingbi ti mû ngoi ti Mandango tënë ti Nzapa na sewa ni ti manda ye ala wani. Kozoni kue, dikongo Bible, lekengo abungbi nga na dikongo apériodique alingbi ti duti na yâ ti kapa ti mandango ye ti zo lo wani. Na ndo ti aye so, ambeni wafango tënë asoro ti manda ambeni ye nde nga. Ngoi na ngoi, ala lingbi ti tisa mbeni wafango tënë wala mbeni sewa ti manda ye legeoko na ala ti tene ala kpengba mba.
11, 12. Ambeni ye ti nzoni wa aga na lege ti Mandango tënë ti Nzapa na sewa lakue lakue?
11 Aye ti nzoni wa aga na lege ti Mandango tënë ti Nzapa na sewa lakue lakue? Ala so abi tere ti ala na bê ti ala kue na yâ ti tâ vorongo Nzapa ayeke ga lakue nduru mingi na Jéhovah. Na ndo ni, asewa so ayeke voro Jéhovah ndo oko ayeke na kpengba songo na popo ti ala. Mbeni ita-koli na wali ti lo so awara aye ti nzoni na lege ti Mandango tënë ti Nzapa na sewa atene: “E yeke apionnier na e yeke na molenge pëpe, e yeke ku ngoi ti Mandango tënë ti Nzapa na sewa kungo. E bâ so songo ti e na popo ti e nga songo ti e na Babâ ti e ti yayu akiri akpengba. Tongana e zingo na ndapre ti lango ni so, e yeke tene na mba: ‘Mo hinga ye so ayeke ku e na lakui so? Mandango tënë ti Nzapa na sewa!’”
12 So a zia na sese tënë ti Mandango tënë ti Nzapa na sewa amû nga maboko na asewa so ayeke na kua mingi. Mbeni ita-wali so ayeke pionnier na so ayeke bata amolenge ti lo ti koli use gi lo oko asû mbeti atene: “Kozo, kapa ti mandango ye ti e na sewa atambela nzoni pëpe. Teti so mbi fatigué, mbeni lango e manda ye, mbeni lango e manda ye pëpe. Lani mbi hinga pëpe tongana nyen ti sara ni. Tongaso mbi sû mbeti so na ala ti kiri singila mingi na ala ndali ti kapa ti Mandango tënë ti Nzapa na sewa ni. Fadeso mandango ye ti e na sewa ayeke tambela nzoni nga lakue lakue na e wara aye ti nzoni dä.”
13. Nyen la ayeke fa ande so sewa ti mo ayeke wara aye ti nzoni wala pëpe na lege ti Mandango tënë ti Nzapa na sewa?
13 Legeoko tongana tënë ti batango lango ti Sabbat, Mandango tënë ti Nzapa na sewa ayeke mbeni matabisi so Babâ ti e ti yayu amû ti mû maboko na asewa (Jacq. 1:17). Lege so azo ti Israël ayeke sara kua na lango ti Sabbat la ayeke fa wala ala yeke wara aye ti nzoni mingi na lege ti yingo wala pëpe. Legeoko nga, lege so e yeke sara kusala na lango ti Mandango tënë ti Nzapa na sewa la ayeke fa wala sewa ti e ayeke wara aye ti nzoni dä wala pëpe (2 aCor. 9:6; aGal. 6:7, 8; aCol. 3:23, 24). Tongana sewa ti mo asara kusala nzoni na ngoi so, fade ala lingbi nga ti tene oko tënë so mbeni wasungo psaume atene: “Me a yeke nzoni na mbi ti ga nduru na Nzapa. Mbi zia bê ti mbi na L’Éternel Nzapa, Ndo Ti Bata tere ti mbi.”—Ps. 73:28.
[Kete tënë na lembeti 5]
A yeke nzoni Mandango tënë ti Nzapa na sewa aduti mbeni ngoi so amû ngia na zo nga ayapu ti lingbi na dutingo ti Nzapa ti e so e yeke voro lo so ayeke Nzapa so ayeke na ngia
[Encadré na lembeti 6]
BATA NI
Ambeni tënë ndali ti Mandango tënë ti Nzapa na sewa
Bible:
• Ala diko mbeni mbage ti achapitre ti Bible so ayeke diko ni na yâ ti yenga ni. Ambeni mbaï ayeke na yâ ti Bible so alingbi ti mû lege na mbeni zo na ngoi ti dikongo ni ti duti zo ti fango peko ti atënë ni na atanga ni alingbi ti diko tënë ti ambeni zo so ayeke na yâ ti mbaï ni.
• Haka peko ti mbaï ni tongana ti so ayeke sara drame.
• Fa na zo oko oko ti yâ ti sewa ni kozoni aversê so lo yeke diko ande, na hunda na lo ti leke mbeni hundango tënë oko wala use na ndo ni. Na pekoni, ala gi akiringo tënë ni legeoko.
• Yenga oko oko, sû mbeni versê na ndo ti mbeni nduru mbeti na gi ti bata atënë ni na li nga tara ti fa pekoni. Leke ambeni nduru mbeti ni na kiri mo bâ ni yenga oko oko ti bâ wungo ti aversê so mo lingbi ti dabe ti mo na ni.
• Mä dikongo Bible na lege ti kasete wala CD, na oko ngoi ni, bâ ni na yâ ti Bible ti mo wani.
Abungbi:
• Ala kue aleke mbeni mbage ti abungbi place oko.
• Ala tara gere ti abia so a yeke he ande na yenga ti peko.
• Tongana mbeni zo ti sewa ni ayeke sara ande devoir na Ekole ti Kusala ti aChrétien wala lo yeke na démonstration na Bungbi ti Kusala, ala bâ tongana nyen lo lingbi ti sara ni wala ala tara pekoni na lê ti azo ti sewa ni kue.
Abezoin ti sewa ni:
• Ala bâ ambeni tënë na yâ ti buku Les jeunes s’interrogent wala buku Mä Kota Wafango ye.
• Ala sara mbeni démonstration so afa tongana nyen ti sara ye na gbele mbeni ye so alingbi ti si na ekole.
• Ala sara mbeni démonstration so na yâ ni babâ na mama ni amû place ti amolenge ni na amolenge ni aga babâ na mama ni. Amolenge ni agi mbeni tënë so ala yeke sara lisoro na ndo ni na babâ na mama ni.
Fango tënë:
• Ala sara ambeni démonstration ndali ti fango tënë ti samedi wala dimanche.
• Ala gi ti bâ ambeni mbilimbili ye so azo ti sewa ni alingbi ti zia na gbele ala ti sara ti kono yâ ti kusala ti ala ti fango tënë na ngoi ti Mémorial wala na ngoi ti vacances.
• Zia ngoi kete na zo oko oko ti sewa ni ti gi kiringo tënë na ahundango tënë nde nde so a lingbi ti hunda na fango tënë, na sara ambeni démonstration na ndo ni.
Ambeni ye ti sarango ni:
• Ala diko mbeni article oko na yâ ti mbeni fini périodique.
• Hunda kozoni na zo oko oko ti sewa ni ti diko mbeni article oko so agbu bê ti lo na yâ ti mbeni fini périodique na ti fa pekoni ande.
• Ngoi na ngoi, tisa mbeni ita-koli na wali ti lo wala mbeni wafango tënë oko na Mandango tënë ti Nzapa na sewa ni, na tongana lege ayeke dä, hunda na ala ambeni tënë.
• Ala bâ mbeni limon so bungbi ti Jéhovah asigigi na ni, na pekoni, ala sara lisoro na ndo ni.
• Ala sara lisoro na ndo ti ambage so atene “Les jeunes s’interrogent” wala “Apprenons en famille” so ayeke na yâ ti Réveillez-vous!
• Ala sara lisoro na ndo ti ambage so atene “Enseignez vos enfants” wala “Pour nos jeunes lecteurs” so ayeke na yâ ti Tour ti Ba Ndo.
• Ala diko fini Annuaire des Témoins de Jéhovah wala mbeni fini mbeti so asigigi na ndangba kota bungbi ti district na ala sara lisoro na ndo ni.
• Ala kiri ala bâ angbongboro tënë ti kota bungbi so ala gue dä.
• Ala bâ ambeni ye so Jéhovah aleke na tapande anyama wala akeke, na ala sara lisoro na ndo ni ti bâ ye so e lingbi ti manda na ndo ti Jéhovah.
• Ala sara mbeni dessin wala mbeni carte wala mbeni plan.