Asewa so ayeke aChrétien, ala “leke tere ti ala”

“Ala leke tere ti ala, ngbanga ti so a yeke na mbeni ngbonga so ala bi bê ti ala na ni pëpe si Molenge ti zo ayeke ga.”​—LUC 12:40.

1, 2. Ngbanga ti nyen a yeke nzoni e bâ na nene ni wango ti Jésus so atene “ala leke tere ti ala”?

“NA NGOI so Molenge ti zo ayeke ga na yâ ti gloire ti lo” na lo yeke kangbi “popo ti azo”, nyen la ayeke si na mo nga na sewa ti mo? (Mat. 25:31, 32). Teti so ye so ayeke si na mbeni ngbonga so e bi bê ti e na ni pëpe, a yeke kota ye ti tene e bâ na nene ni wango so Jésus amû lo tene: “Ala leke tere ti ala”!​—Luc 12:40.

² Article so ahon afa tongana nyen zo oko oko kue ti yâ ti sewa alingbi ti mû maboko na sewa ni kue ti lango pëpe na lege ti yingo na lege so ala kue ayeke gi ti bâ na nene ni kusala ti ala na yâ ti sewa. Zia e bâ ambeni ye nde so e lingbi ti sara ti tene sewa ti e aduti nzoni na lege ti yingo.

Zia lê ti ala angbâ lakue ti ‘bâ ye nzoni’

3, 4. (a) A lingbi asewa so ayeke aChrétien asara hange na nyen? (b) Ti duti na lê so “abâ ye nzoni” aye ti tene nyen?

³ Ti tene asewa aleke tere ti ala ndali ti gango ti Christ, a lingbi ala sara hange si mbeni ye agboto lê ti ala yongoro pëpe na aye so ala yeke sara ti voro na Jéhovah. Teti so nzara ti warango gbâ ti kungba ayeke mbeni kûkû so asewa mingi atï na yâ ni, zia e bâ tënë so Jésus atene na e ti ngbâ ti duti na lê so “abâ ye nzoni”. (Diko Matthieu 6:22, 23.) Legeoko tongana ti so mbeni lampe ayeke mû lege na e ti bâ ndo so e yeke tambela dä si e pika gere ti e pëpe, na lege ti fä ye so e yeke bâ na “lê ti bê ti e” alingbi ti sara si lê ti e azi na amû maboko na e ti sara ye sân ti pika gere ti e.​—aÉph. 1:18.

⁴ Ti tene lê ti e abâ ye polele, a lingbi asara kua nzoni nga aluti gi na ndo ti ye so e yeke bâ. A yeke nga legeoko tongaso teti lê ti bê ti e. Na lege ti fä, ti duti na lê so abâ ye nzoni aye ti tene ti zia lê ti e gi na ndo ti ye oko. Ahon ti duti na mbeni fini so aluti gi na ndo ti aye ti mitele nga ti gi bê mingi gi na ndo ti aye so sewa ti e ayeke na bezoin ni na lege ti mitele, e zia lê ti e angbâ gi na ndo ti aye ti yingo (Mat. 6:33). Ye so aye ti tene ti duti na ngia gi na yâ ti aye so e yeke na ni nga e zia kusala ti Nzapa na kozo ndo na yâ ti fini ti e.​—aHéb. 13:5.

5. Tongana nyen mbeni maseka afa so “lê” ti lo ayeke gi na ndo ti kusala ti Nzapa?

⁵ E yeke wara aye ti nzoni tongana e fa na amolenge ti e ti duti lakue na lê so abâ ye nzoni. Bâ tapande ti maseka-wali so ayeke na kodoro ti Éthiopie. Lo hinga mbeti mingi na ekole. Ye so asara si na ngoi so lo hunzi mandango mbeti ti lo na lycée, a mû na lo bourse ti mû lege na lo ti manda mbeti ayo. Me, teti so lo zia lê ti lo gi na ndo ti kusala ti Jéhovah, lo ke bourse ni. Kete na pekoni, lo wara mbeni kua so nze na nze a lingbi ti futa lo na mbeni nginza so wungo ni ayeke nduru na kutu use ti nginza so a yeke sara na kua na kodoro ti e. Nginza so ayeke kota mingi tongana a haka ni na nginza so a yeke futa na mingi ti azo nze na nze na yâ ti kodoro ti lo. Me “lê” ti maseka-wali so ayeke gi na ndo ti kusala ti pionnier. Lo yeke pëpe na bezoin ti bâ babâ na mama ti lo awe si lo ke kua ni. Bê ti babâ na mama ti lo ayeke tongana nyen na ngoi so ala mä tënë ti ye so lo sara so? A nzere na ala nga ala tene na lo so ala yeke na ngia mingi ndali ti ye so lo sara!

6, 7. Kpale wa a yeke nzoni e ‘zi lê ti e’ na ndo ni?

⁶ Atënë ti Jésus so ayeke na Matthieu 6:22, 23 ayeke nga mbeni gbotongo mê na ndo ti sarango bê ti ye. Jésus afa so lê so “abâ ye nzoni” ayeke nde na ‘lê so ayeke sioni’. Mbupa ti Grec so a kiri pekoni na ‘sioni’ aye nga ti tene “bê ti ye” wala “bê ti warango ye”. (Mat. 6:23). Jéhovah abâ bê ti warango ye tongana nyen? Bible atene: “Zia a sara même tënë ti lango-sioni, tënë ti sioni ye nde nde kue wala ti bê ti warango ye na popo ti ala pëpe.”​—aÉph. 5:3.

⁷ A yeke ngangu ti tene zo lo wani lo bâ so lo yeke na bê ti warango ye. Me a lingbi ti duti ngangu pëpe ti bâ so ambeni zo la ayeke na bê ti warango ye. Ni la, a yeke na lege ti ndara ti tene e sara ye alingbi na wango ti Jésus so: “Ala zi lê ti ala na ala sara hange na alege nde nde kue ti sarango bê ti ye.” (Luc 12:15). Ti sara ni a lingbi e gbu li ti e ti bâ wala aye wa bê ti e aye ni mingi. A yeke nzoni asewa so ayeke aChrétien agbu li nzoni na ndo ti ngoi nga na nginza so ala yeke mû ndali ti angia, gbotongo gere kete nga warango aye ti mitele.

8. Tongana a ndu tënë ti vongo mbeni ye, tongana nyen e lingbi ti fa so e sara ye na lege ti ndara?

⁸ Ti vo mbeni ye ahunda aye mingi ahon gi ti bâ wala mo yeke na nginza ti vo ni wala pëpe. Gbu nga li na ndo ti atënë so: ‘Mbi yeke wara ngoi ti sara kusala na ye ni so lakue nga ti bâ lege ni si angbâ nzoni? A yeke hunda ande ngoi oke na mbi ti manda ti sara kua na ni nzoni?’ Ala amaseka, ala yeda pëpe na asabango kue so dunia so ayeke sara na ndo ti ambeni marque ti bongo wala ambeni kungba. Mingi ni aye ni so ngere ni ahon ka ndo ni gi ndali ti so iri ni awu mingi. Me a yeke lakue kota ye pëpe ti tene zo awara ni. Manda ti kanga nzara ti bê ti mo. Nga, gbu li ti mo ti bâ wala ye ni so mo ye ti vo ni so ayeke mû maboko na sewa ti mo ti leke tere ti ala ndali ti gango ti Molenge ti zo? Mä na bê na zendo so Jéhovah amû lo tene: “Fade mbi yeke zia mo lâ oko pëpe nga mbi yeke girisa mo lâ oko pëpe.”​—aHéb. 13:5.

Zia aye ti yingo na gbele mo na gi ti wara ni

9. Ye wa tombango peko ti aye ti yingo alingbi ti sara na ndo ti mbeni sewa?

⁹ Mbeni ye so azo ti yâ ti sewa alingbi ti sara ti kpengba mabe ti ala nga ti sara si sewa ni kue aduti nzoni na lege ti yingo ayeke ti zia na gbele ala aye ti yingo na ti gi ti wara ni. Sarango ye so ayeke mû maboko na ala ti bâ wala kusala so ala yeke sara na Jéhovah ayeke gue na li ni. A yeke mû nga maboko na ala ti bâ ye wa a lingbi aduti kota ye na lê ti ala.​—Diko aPhilippien 1:10.

10, 11. Na yâ ti sewa, ambeni ye ti yingo wa ala yeke gi ti si dä? Ambeni ye wa ala ye ti zia na gbele ala ti si dä na yâ ti ngoi so ayeke ga?

¹⁰ Ti gi même ti zia na gbele ala ambeni kete ye so ala lingbi ti si dä na yâ ti kete ngoi alingbi ti ga na aye ti nzoni mingi na azo ti yâ ti sewa ni. Na tapande, ala lingbi ti zia na gbele ala ti sara lisoro lakue na ndo ti versê ti lâ oko oko. Acommentaire ti amembre ti sewa ni alingbi ti mû maboko na mokonzi ti sewa ni ti hinga maïngo ti ala na lege ti yingo. Ti diko Bible lakue ndo oko na sewa ayeke mbeni nzoni lege so azi na amolenge ti maï kode ti dikongo ye ti ala nga na gbungo nda ti ye ti ala na ndo ti Bible (Ps. 1:1, 2). Nga, a yeke nzoni pëpe ti zia na gbele e ti sara si asambela ti e aga nzoni ahon ti kozo? Mbeni nzoni ye so e lingbi nga ti zia na gbele e ayeke ti gi ti duti na ambage ti lengo ti yingo mingi ahon ti kozo (aGal. 5:22, 23). Ka ti gi ti zia tere ti e na place ti azo so e wara na fango tënë ayeke tongana nyen? Ti sara ngangu ti sara ni na yâ ti sewa alingbi ti mû maboko na amolenge ti manda ti bâ mawa ti zo, nga ala yeke duti peut-être nduru ti gi ti sara kusala ti pionnier wala ti missionnaire.

¹¹ Ngbanga ti nyen mo na sewa ti mo agbu li pëpe na ndo ti ambeni ye so ala lingbi ti zia na gbele ala na ti gi ti si dä? Ala lingbi ti zia na gbele ala ti fa tënë angbonga mingi ahon ti kozo? Ala lingbi ti gi ti hon ndo ti mbeto ti fa tënë na téléphone, na ndo ti lege wala na ando ti dengo buze? Ka ti gue ti fa tënë na ando so a yeke na bezoin ti awafango tënë dä mingi, a yeke tongana nyen? Mbeni membre ti sewa ni alingbi ti manda mbeni fini yanga ti kodoro ti mû lege na lo ti fa nzoni tënë na azo ti mbeni kodoro nde?

12. Nyen la amokonzi ti sewa alingbi ti sara ti mû maboko na asewa ti ala ti maï na lege ti yingo?

¹² Mo so mo yeke mokonzi ti sewa, gi ti bâ ando so sewa ti mo alingbi ti maï dä na lege ti yingo. Na pekoni, gi ti zia na sese ambilimbili ye so ala lingbi ti sara ti si na ye so ala zia na gbele ala. A yeke nzoni aye so ala zia na gbele ala ti si dä alingbi na ngangu ti ala nga na dutingo ti ala (aProv. 13:12). Tâ tënë, ti gi ti wara aye ti nzoni so ala zia na gbele ala ahunda ngoi. Tongaso, mû ngoi so ala yeke sara lisoro na ndo ti asenge senge ye ti gi ti sara na kusala ndali ti aye ti yingo (aÉph. 5:15, 16). Sara ngangu ti wara aye so mo zia na gbele sewa ti mo ti si dä (aGal. 6:9). Mbeni sewa so agi ti wara aye ti yingo so lo zia na gbele lo ayeke sara si “azo kue abâ maïngo” ti lo.​—1 Tim. 4:15.

Manda tënë ti Nzapa na sewa lakue

13. Gbiango ye wa a sara na yâ ti kapa ti abungbi ti congrégation? Ahundango tënë wa a yeke nzoni e gbu li ti e dä?

¹³ Mbeni kpengba ye so ayeke mû maboko na asewa ti “leke tere ti ala” ndali ti gango ti Molenge ti zo ayeke kota gbiango ye so a sara na yâ ti kapa ti abungbi so e yeke sara yenga na yenga. Kota gbiango ye so ato nda ni na lango oko ti janvier ti ngu 2009. E yeke wara tere mbeni pëpe na yâ ti mbeni lango nde ti yâ ti yenga ti sara bungbi ti Mandango Buku ti Kongregation. Fadeso, a bungbi ni na bungbi ti Ekole ti Kusala ti aChrétien nga na Bungbi ti Kusala. A ga lani na gbiango ye so ti mû lege na asewa so ayeke aChrétien ti sara si songo ti ala na Nzapa akpengba na ziango na sese mbeni mbilimbili kapa ti manda tënë ti Nzapa na sewa yenga na yenga. Ngoi ahon mingi fadeso awe ngbene ye so a ga na gbiango ye so. E lingbi ti hunda tere ti e: ‘Mbi yeke mû ngoi so ti manda na tënë ti Nzapa na sewa wala ti manda ye mbi wani? Mbi wara ye so a zia na sese Mandango tënë ti Nzapa na sewa ndali ni so?’

14. (a) Kozo ndani so e yeke manda tënë ti Nzapa lakue na sewa wala e wani ayeke so wa? (b) Ngbanga ti nyen ti zia mbeni ngoi nde ti manda tënë ti Nzapa ayeke kota ye?

¹⁴ Kozo ndani so e yeke manda tënë ti Nzapa lakue na sewa wala e oko, a yeke ti ga nduru na Nzapa (Jacq. 4:8). Tongana e mû ngoi ti manda Bible lakue nga e sara si hingango ye ti e na ndo ti Wasarango e ague na li ni, songo ti e na lo ayeke kpengba. Tongana e ga nduru na Jéhovah mingi, e yeke ndoye lo na ‘bê ti e kue, na âme ti e kue, na bibe ti e kue nga na ngangu ti e kue.’ (Marc 12:30). Tâ tënë, e ye mingi ti mä yanga ti Nzapa nga ti ga azo so ayeke sara ye tongana ti lo (aÉph. 5:1). Tongaso, Mandango tënë ti Nzapa na sewa lakue ayeke kota ye so ayeke mû maboko na azo kue ti yâ ti sewa ti e ti “leke tere ti ala” na lege ti yingo na ngoi so e yeke ku “kota ye ti vundu” so a fa tënë ni kozoni awe (Mat. 24:21). Kpengba ye so la ayeke sara si e sö kuâ.

15. Ye wa Mandango tënë ti Nzapa na sewa ayeke sara na ndo ti lege so azo ti yâ ti sewa ayeke sara ye na mba?

¹⁵ Mbeni ye nde ayeke nga dä so a zia na sese Mandango tënë ti Nzapa na sewa ndali ni: a yeke ti mû maboko na azo ti yâ ti sewa ti ga nduru mingi na mba. Ti mû ngoi ti duti ndo oko na ti sara lisoro na ndo ti aye ti yingo yenga na yenga ayeke sara ngangu na ndo ti lege so azo ti yâ ti sewa ayeke sara ye na mba. Songo ti koli na wali ti lo ayeke kiri ti kpengba mingi tongana ala yeke na ngia ti duti ndo oko ti manda Bible. (Diko Zo-ti-fa-tene 4:12.) Ababâ na amama nga na amolenge so abungbi oko ti manda tënë ti Nzapa alingbi ti duti beoko na yâ ti ndoye so ayeke “kamba ti bungbingo ye mbilimbili.”​—aCol. 3:14.

16. Fa tongana nyen ambeni ita-wali ota awara ye ti nzoni na sorongo mbeni ngoi ti manda tënë ti Nzapa.

¹⁶ Bâ tongana nyen ambeni ita-wali ota so ayeke awomua nga so aga mbakoro awe awara ye ti nzoni na lege ti mandango Bible. Aita-wali so ayeke pëpe afami, me ala yeke na yâ ti gbata oko nga ala yeke anzoni kamarade a sara ngu mingi awe. Ala ye mingi ti duti ndo oko nga ti duti azo so aye aye ti yingo ahon ti sara gi senge kamarade. Ni la, ala soro mbeni ngoi ti manda Bible na lakui. Ala to nda ni na mandango buku ‘Fa nda ti tënë ni kue’ na ndo ti Royaume ti Nzapa. Mbeni oko atene: “Mandango ye ni anzere na e mingi, ye so asara si mingi ni a yeke ninga ahon ngbonga oko. E tara ti bâ na yâ ti li ti e aye so asi lani na aita ti e akozo Chrétien nga e sara lisoro na ndo ti ye so e yeke sara tongana mara ti aye ni so asi na e. Na pekoni, na fango tënë e yeke gi ti sara ye alingbi na aye so e manda na ngoi ti lisoro ti e. Ye so asara si kusala ti fango tënë nga na ti sarango adisciple anzere mingi na e nga alë lengo mingi ahon ti kozo.” Mandango tënë ti Nzapa asara si anzoni kamarade ota so akpengba na lege ti yingo nga ala yeke nduru mingi na mba. Ala tene: “E ye mandango tënë ti Nzapa mingi.”

17. Aye wa ayeke sara si zo ayeke wara ye ti nzoni na lege ti Mandango tënë ti Nzapa na sewa?

¹⁷ Ti ti mo ayeke tongana nyen? Aye ti nzoni wa mo wara na ziango mbeni ngoi teti mandango tënë ti Nzapa na sewa wala mo wani? Tongana mo sara ni lakue lakue pëpe, mo yeke wara pëpe ye so a zia ni na sese ndali ni. A yeke nzoni azo kue ti yâ ti sewa aleke tere ti ala ti manda ye na ngoi so a zia ndali ni. A yeke nzoni a zia lege pëpe na akete kete ye ti kanga lege na ni. Nga, soro gbakuru ni alingbi na sewa ti mo nga sara si mandango ye ni amû maboko na azo ti sewa ti mo ti sara ye alingbi na ni na yâ ti fini ti ala ti lâ oko oko. Nyen la mo lingbi ti sara ti sara si mandango ye ni anzere? Sara kua na akode ti fango ye so ayeke nzoni nga sara si mandango ye ni aduti ngoi ti siriri nga ngoi so a ne zo.​—Jacq. 3:18.a

“Zia lê ti e angbâ na zingo ni” nga e “leke tere ti e”

18, 19. So mo hinga so gango ti Molenge ti zo ayeke pusu nduru nduru, a lingbi ye so asara nyen na ndo ti mo nga na sewa ti mo?

¹⁸ Kite ayeke pëpe so bubango ti aye ti dunia na ngoi ti e afa biani so ngbene ye na ngu 1914, sioni dunia ti Satan so alï na yâ ti andangba lango ti lo awe. Harmaguédon ayeke pusu nduru nduru. Na yâ ti kete ngoi, Molenge ti zo ayeke ga ti futi azo ti sioni (Ps. 37:10; aProv. 2:21, 22). So mo hinga ye so, a yeke nzoni pëpe ti zia si a sara ngangu na ndo ti mo nga na sewa ti mo?

¹⁹ Mo yeke sara ye alingbi na wango ti Jésus so ahunda ti duti lakue na lê so “abâ ye nzoni”? Atâa so azo ti dunia so ayeke gi ti wara amosoro, yango-iri, wala kota ndo, sewa ti mo ayeke tomba ti lo peko ti aye ti yingo? Mo yeke manda tënë ti Nzapa na sewa wala mo wani? Mo wara aye ti nzoni so a zia Mandango tënë ti Nzapa na sewa na sese ndali ni? Tongana ti so a sara tënë ni na yâ ti article so ahon, Bible afa kusala ti mo babâ ti sewa, mama wala molenge so sarango ni ayeke mû maboko na azo ti sewa ni kue ti ‘zia lê ti ala angbâ na zingo ni’. Mo yeke sara ni? (1 aThes. 5:6). Tongana a yeke tongaso, mo yeke ‘leke tere ti mo’ teti gango ti Molenge ti zo.

[Kete tënë na gbe ni]

Mo manda nyen?

• Fa tongana nyen asewa so ayeke aChrétien alingbi ti “leke tere ti ala” na lege so . . .

ala yeke na lê so “abâ ye nzoni”.

ala zia aye ti yingo na gbele ala nga ala gi ti wara ni.

ala manda tënë ti Nzapa na sewa lakue.