“Sara si lege so mo tambela dä aduti nzoni lege” tongaso si mo gue na li ni
NA NGOI so azo ti Israël alondo na Babylone ti gue na Jérusalem na ngu 537 kozo ti Christ, Jéhovah abi bê ti lo na lege so ala yeke mû ti gue na ni. Lo tene lani na ala, lo tene: “I leke lege ti azo ni; i fû sese, i fû sese na ndo ti lege; i lungula tênë dä.” (És. 62:10). Gbu li ti mo ti bâ tongana nyen la azo ti Israël asara lani kua so. Ala so ahon ti ala kozo la peut-être akanga adû so ayeke na ndo ti lege ni nga ala leke ni nzoni ti tene amba ti ala so ayeke ga na peko ti ala ahon dä ti gue na Jérusalem.
E lingbi ti mû tapande so ti haka na ye so ayeke mû lege na e ti si na aye so e zia na gbele e na lege ti yingo. Jéhovah aye si awakua ti lo kue atambela na lege so sân ti tene asenge senge ye akanga lege na ala. Lo wa e, lo tene: “[Sara si lege so mo tambela dä aduti nzoni lege, FD] si lege ti mo kue aga nzoni.” (aProv. 4:26). Atâa mo yeke maseka wala mo ga kamême kota zo awe, mo lingbi ti wara ndara na lege ti wango so Nzapa amû so.
LEKE LEGE TI MO NA MUNGO ANZONI DESIZION
Peut-être asi so mo mä azo atene na ndo ti mbeni maseka atene: ‘Maseka-wali so ayeke na kota pasa’ wala ‘maseka-koli so alingbi ti ga mbeni kota zo na yâ ti gigi ti lo.’ Mingi ni amaseka ayeke na nzoni seni, ala hinga ye nga ala yeke na nzara ti ga kota zo na yâ ti gigi ti ala. Bible atene tâ tënë tongana lo tene: “Ngangu ti apendere koli ayeke gloire ti ala.” (aProv. 20:29). Maseka so amû ngangu ti lo wala akode ti lo ti sara na Jéhovah alingbi ti si na aye so lo zia na gbele lo na lege ti yingo nga lo yeke wara tâ ngia.
Me tongana ti so e hinga, azo ti dunia so abâ na nene mingi akode so amaseka ti e ayeke na ni. Tongana mbeni maseka so ayeke Témoin ti Jéhovah ahinga mbeti mingi na ekole, wafango mbeti na lo wala kamarade ti lo alingbi peut-être ti pusu lo ti manda mbeti ayo ti ga kota zo na yâ ti dunia so. Wala azo alingbi ti pusu mbeni maseka-koli wala mbeni maseka-wali so ayeke kpe loro nzoni ti yeda ti ga mbeni kota wanguru na gigi ti lo. Mara ti ye tongaso asi na mo awe? Wala mo hinga mbeni zo so azo ayeke pusu lo ti sara tongaso? Nyen la ayeke mû ande maboko na mbeni Chrétien ti mû nzoni desizion?
Afango ye ti Bible alingbi ti mû maboko na zo ti leke tere ti lo ti tambela na ndo ti lege so ayeke nzoni. Zo-ti-fa-tene 12:3 atene: “Fadeso, mo dabe mo na Lo so acréé mo, na lâ ti pendere ti mo.” Tongana nyen la mo wala mbeni maseka so mo hinga lo nzoni alingbi ti ‘dabe ti ala na lo so acréé ala’?
Gbu li ti mo na ndo ti ye so asi na Erica so ayeke na Afrika ti Do. Lo ye lani ti pika ndembo ti gere mingi. Na ngoi so lo yeke na ngu 15, a soro lo ti pika ndembo na yâ ti équipe ti kodoro ti lo. So ti tene so a yeke ninga ande ape lo yeke wara pasa ti gue na poto ti manda pikango ndembo, na peut-être ti ga kota wapikango ndembo na yâ ti gigi ti lo. Me tongana nyen la lo lingbi ti sara ye alingbi na wango so ahunda ti ‘dabe ti lo na zo so acréé lo’? Nyen la e wala ambeni mba ti e amaseka alingbi ti manda na lege ti tapande so?
Na ngoi so Eric angbâ ti manda mbeti, lo to nda ti manda Bible na aTémoin ti Jéhovah. Lo ga ti hinga so Wasarango lo ayeke sara si pasi ti azo ahunzi biani biani. Eric abâ so a yeke kota ye ti mû ngoi ti lo nga ngangu ti lo ti sara ye so Jéhovah aye. Na bango aye so kue, lo ke ti soro ti ga kota wapikango ndembo. Me lo wara batême nga lo mû tere ti lo ti sara aye ti yingo. A si na mbeni ngoi, lo ga wakua ti mungo maboko na pekoni, a tisa lo ti gue na ekole ti aita-koli so ayeke kumbamba.
Tongana Eric angbâ ti gue na li ni na lege ti pikango ndembo, peut-être azo ayeke hinga lo mingi nga lo lingbi ti wara nginza mingi. Me lo hinga so tënë ti Bible ayeke tâ tënë, tënë so a tene: “Mosoro ti zo ti mosoro ayeke kodoro ti lo ti ngangu, na kota gbagba ti bira ti lo na yâ bibe ti lo.” Biani nzoni duti so mbeni zo apensé so lo lingbi ti wara na lege ti nginza ti tâ tënë ni ayeke gi mvene. Na ndo ni, azo so agi gi ti wara gbâ ti mosoro ‘akpo tere ti ala na aye ti vundu mingi.’—1 Tim. 6:9, 10.
Amaseka mingi ayeke na ngia nga ala duti nzoni na sarango kua ti ngoi kue. Eric atene: “Mbi ga na popo ti bungbi ti azo mingi so asara kua ti ngoi kue. Bungbi ti aita so ayeke nzoni ndo so a lingbi mbi duti dä, nga mbi kiri singila mingi na Jéhovah so afa na mbi oko lege ti wara tâ ngia nga ti duti nzoni na yâ ti gigi ti mbi.”
Ti ti mo, a yeke tongana nyen? Ahon ti zia na gbele mo ti mû peko ti aye ti dunia so, leke “lege ti mo” nzoni na gbele Jéhovah na sarango kua ti pionnier.—Bâ encadré “Lo wara aye ti nzoni so lo wara pëpe na dasendagi.”
ZI AYE SO AYE TI KANGA LEGE NA MO
Na ngoi so mbeni ita-koli na wali ti lo ayeke sara vizite na filiale ti Amerika, ala bâ so aita so ayeke sara kuâ ti Jéhovah kâ ayeke na ngia. Na pekoni ita-wali ni atene: ‘E bâ so aye so e yeke sara ka teti Jéhovah alingbi ape.’ Tongaso, ita-koli ni na wali ti lo amû desizion ti mû ngoi ti ala nga na ngangu ti ala ti sara kua mingi teti Jéhovah.
Na mbage, a yeke lani kete ye ape na ita-koli so na wali ti lo ti changé aye so a lingbi ala changé na yâ ti gigi ti ala. Me mbeni lâ ala gbu li ti ala na ndo ti mbeni versê ti Bible ti lango ni so. A yeke Jean 8:31, so afa tënë so Jésus atene, lo tene: “Tongana ala ngbâ na yâ ti tënë ti mbi, ala yeke biani adisciple ti mbi.” Versê so asara si ala tene: “Aye kue so e sara ti duti na ye mingi ape na yâ ti gigi ti e, a yeke nzoni sacrifice.” Ala kä kota da ti ala, ala zi aye kue so alingbi ti kanga lege na ala, nga ala gue na mbeni congrégation so bezoin ayeke dä. Fadeso ala yeke apionnier, me ala yeke mû nga maboko ti leke aDa ti Royaume nga ala yeke avolontaire na a-assemblée ti district. Ye ti nzoni wa la ala wara na pekoni? Ala tene: “Bê ti e adö ti bâ ngia so e yeke na ni ndali ti so e yeke na aye mingi ape na yâ ti fini ti e nga e yeke sara gi ye so bungbi ti Jéhovah awa e ti sara.”
NGBÂ NA NDO TI LEGE SO AYEKE SARA SI MO GUE NA LI NI NA LEGE TI YINGO
Salomon atene: “Zia lê ti mo abâ ndo mbilimbili, mo bâ ndo mbilimbili na gbele mo.” (aProv. 4:25). Legeoko tongana ti so zo ti kpengo na oto ayeke zia lê ti lo gi na ndo ti lege so ayeke na devant ti lo, a lingbi e kpe aye so alingbi ti kanga lege na e ti zia aye ti yingo na gbele e na ti si dä.
Aye ti yingo wa la mo lingbi ti zia na gbele mo ti si dä? Mbeni nzoni ye so mo lingbi ti zia na gbele mo ti si dä ayeke ti sara kua ti ngoi kue. Mbeni nzoni ye ni ayeke peut-être ti gue na yâ ti mbeni congrégation so ayo ape na so ayeke na bezoin ti anzoni wafango tënë ti mû maboko na aita ni ti fa tënë na yâ ti territoire ti ala kue. Wala mbeni congrégation alingbi ti duti na anzoni wafango tënë mingi me a-ancien na awakua ti mungo maboko ayeke dä mingi ape. Mo lingbi ti mû maboko na mbeni oko ti alege so e fa ge? Mo lingbi ti sara tënë ni na mbeni surveillant ti bâ wala mo lingbi peut-être ti mû maboko. Tongana mo ye ti gue na ndo so ayo, mo lingbi ti hunda asango na ndo ti acongrégation so ayo so ayeke na bezoin ti mungo maboko.b
Zia e kiri na ndo ti ye so a sara tënë ni na Ésaïe 62:10. Ambeni Juif asara lani kua ngangu ti tene lege so ala yeke hon dä ti kiri na kodoro ti ala aduti polele tongaso si ala lingbi ti si na ndo so ala yeke gue dä. Tongana mo sara ngangu ti si na aye so mo zia na gbele mo na yâ ti kua ti Nzapa, kiri na peko ape. Jéhovah ayeke mû maboko na mo ti sara aye so mo zia na gbele mo ti si dä. Ngbâ lakue ti hunda na Jéhovah ndara na ngoi so mo yeke gi lege ti zi aye so alingbi ti kanga lege na mo. Na ngoi so alingbi, mo yeke bâ ande tongana nyen la Jéhovah ayeke mû maboko na mo ti “sara si lege so mo tambela dä aduti nzoni lege”.—aProv. 4:26.