Ngbanga ti nyen a yeke nzoni ti manda Bible?

A si na mo ti hunda tere ti mo na mara ti ahunda so awe? Tongana a yeke tongaso, hinga so a yeke gi mo oko ape. Na ndo ti dunia kue, azo ayeke hunda ka tere ti ala na ambeni kota hundango ndo na ndo ti gigi ti azo. Me, eskê mo lingbi ti wara akiringo tënë ni?

Azo kutu mingi ayeke tene, “En!” Ngbanga ti nyen? Ngbanga ti so ala wara akiringo tënë na ahunda ti ala ni na yâ ti Bible. Mo ye ti hinga ye so Bible afa? A-Témoin ti Jéhovaha ayeke manda ka Bible na azo senge senge. Ni la tongana mo ye, mo lingbi ti hunda ti tene ala manda ni na mo.

Tâ tënë, na ngoi so a ye ti manda Bible na ambeni zo, ala yeke tene: “Mbi yeke na kua mingi.” “Mandango ye ni ayeke ngangu mingi.” “Mbi hinga ti mbi aye ni nzoni ape.” Me, ambeni zo ni ayeke ti ala na mbeni bango ndo nde. Ala yeda na pasa so ala wara ti manda ti hinga ye so Bible afa. Zia e bâ gi ambeni tapande ni:

• “Mbi gue lani na Eglize Catholique nga na ti aProtestant. Mbi gue na mbeni temple, so a iri ni temple Sikh, mbi gue na monastère ti aBouddhiste nga mbi manda théologie na université. Me, mbi wara pëpe kiringo tënë na ambeni gbâ ti ahunda ti mbi so mbi yeke na ni na ndo ti Nzapa. Na pekoni, mbeni Témoin ti Jéhovah aga na yanga-da ti mbi. Bê ti mbi adö ti bâ so lo kiri tënë na mbi gi na lege ti Bible, ye so asara si mbi yeda ti manda Bible.”—Gill, na Angleterre.

• “Mbi yeke lani na gbâ ti ahundango ndo na ndo ti gigi ti azo, me akiringo tënë so pasteur ti eglize ti mbi amû na mbi agbu bê ti mbi lani ape. Me, mbeni Témoin ti Jéhovah akiri tënë na ahunda ti mbi ni gi na lege ti Bible. Na ngoi so lo hunda mbi wala mbi ye ti manda Bible, mbi yeda na ngia na bê.”—Koffi, na Bénin.

• “Mbi ye lani ti hinga ye na ndo ti dutingo ti azo so akui awe. Mbi pensé ti mbi lani so akuâ alingbi ti sara sioni na azo so ayeke na fini, me mbi ye lani ti hinga ye so Bible afa na ndo ni. Tongaso, mbeni kamarade ti mbi so ayeke Témoin ti Jéhovah akomanse ti manda Bible na mbi.”—José, na Brésil.

• “Mbi tara lani ti manda Bible, me mbi mä yâ ni ape. Na pekoni, aTémoin ti Jéhovah asi na mbi, na ala zi nda ti gbâ ti aprophétie ti Bible polele na mbi. Mbi ye lani ti manda encore ambeni ye ni nde.”—Dennize, na Mexique.

• “Mbi hunda lani tere ti mbi wala Nzapa ayeke pensé nga na mbi la? Ni la, mbi mû desizion ti sambela Nzapa so a sara tënë ti lo na yâ ti Bible. Na ndade ni, aTémoin ti Jéhovah aga na yanga-da ti mbi, na mbi yeda ti manda Bible.”—Anju, na Népal.

Atënë ti azo so adabe ti e na tënë ti Jésus so: “Ngia ayeke na ala so ahinga so ala yeke na bezoin ti aye ti yingo.” (Matthieu 5:3). Biani, a dü azo kue na nzara ti hinga Nzapa. Me, a yeke gi Nzapa oko la alingbi ti kaï nzara ni so, na lo sara ni na lege ti Bible.

Tongaso, mandango Bible andu aye wa? Mo lingbi ti bâ nzoni dä tongana nyen? A yeke kiri tënë na ahunda so na yâ ti article ti peko.