Bible alingbi ti aidé mo ti gbu ngangu na yâ ti akpale

Ambeni kpale ayeke dä so laso zo alingbi ti kpe ni ape wala ti leke ni ape. Na tapande, tongana mbeni zo so mo ye lo akui wala mo wara mbeni kobela so a peut ti sava ni ape, oko ye so mo peut ti sara ayeke gï ti gi ti hinga tongana nyen ti hon ndö ti vundu ti mo ni. Eskê Bible alingbi ti aidé e na yâ ti mara ti angangu kpale tongaso?

AKOBELA SO A PEUT TI SAVA NI APE

Rose atene: “Mbi yeke na mbeni kobela so andu acellule ti mbi na so asara si mbi yeke wara angangu douleur lakue lakue. Gigi ti mbi aga tâ ngangu.” Mbeni ye so asara si lo gi nga bê ti lo mingi ayeke so, na ambeni ngoi lo lingbi pëpe ti zia li ti lo kpô na ngoi so lo yeke manda Bible wala na ngoi so lo yeke sara aye so andu kua ti Nzapa. Me atënë ti Jésus so ayeke na Matthieu 19:26 a-aidé lo ngangu, a tene: “Nzapa alingbi ti sara ye kue.” Rose amanda so ambeni lege nde ti mandango ye ayeke dä. Ndali ti so adouleur so lo wara alingbi ti sara si na ambeni ngoi lo peut ti diko mbeti ape, lo komanse ti mä dikongo Bible na ndö ti appareil nga na ambeni mbeti so asara tënë na ndö ti Bible.a Rose atene: “Tongana fade aye ni so ayeke dä ape, mbi hinga ye so mbi peut ti sara ape ti bata songo ti mbi na Nzapa.”

Tongana a si so gï gbagburu tongaso Rose apeut pëpe ti sara mbeni ye so lo yeke sara kozo, lo tene so 2 aCorinthien 8:12 adë bê ti lo mingi, a tene: “Tongana bê ti zo aye biani ti mû ye, a yeke yamba ye ni alingbi na ye so lo yeke na ni, me a yeke yamba ni pëpe alingbi na ye so lo yeke na ni pëpe.” Atënë so arappelé na Rose so ye so lo yeke sara so anzere na Nzapa, ndali ti so lo sara ye kue so lo peut ti sara atâa so lo yeke na kpale.

VUNDU TI KUÂ TI MBENI ZO

Delphine, so e sara tënë ti lo kozo, atene: “Na peko ti so molenge ti mbi ti wali ti ngu 18 akui lani, vundu asara mbi ngangu juska mbi komanse ti bâ so mbi peut ti ngbâ ande na fini ape. Aye ayeke duti ande tongana ti kozo ape.” Mbeti ti Psaume 94:19 adë bê ti lo ngangu. Na yâ ni zo so asû Psaume ni atene na Nzapa, atene: “Na ngoi so agingo bê ahon ndö ti mbi, mo dë bê ti mbi nga mo sara si mbi duti na siriri.” Delphine atene: “Mbi sambela Jéhovah ti aidé mbi ti wara mbeni ye so mbi peut ti sara si mbi sara vundu mingi encore ape.”

Mbi bi terê ti mbi kue na yâ ti kua ti mungo maboko na azo. Tongana ngoi ayeke hon, lo bâ terê ti lo tongana mbeni crayon de couleur, so même si yâ ni afâ, zo apeut ti ngbâ ti sara kua na ni. Legeoko nga, atâa so vundu asara lo mingi, lo manda so lo peut ti aidé ambeni zo nga. Lo tene: “Mbi ga ti bâ hio so, tongana mbi sara kua na amama-ndia ti Bible nga na aye so Bible afa ti dë bê ti azo so mbi yeke manda Bible na ala, a yeke mo bâ mo tene Jéhovah la ayeke dë bê ti mbi so.” Delphine asû molongo ti azo so Bible asara tënë ti ala na so na ambeni ngoi ayeke lani na yâ ti kota vundu. Lo bâ so “azo ni kue ayeke azo so asambela mingi.” Lo manda nga so lo lingbi ti gbu ngangu na yâ ti akpale ni so gï tongana lo diko Bible.

Mandango Bible a-aidé Delphine ti zia bê ti lo na ndö ti aye so ayeke si kekereke, me pëpe na ndö ti aye so ahon awe. Mbeti ti Kusala 24:15 adë bê ti lo, a tene: “A yeke zingo ande na kuâ azo ti mbilimbili na azo so ayeke mbilimbili pëpe.” Eskê Delphine ayeke na confiance so Jéhovah ayeke zingo ande molenge ti lo? Lo wani lo tene so ni yeke na kite oko ape so ni yeke bâ ande molenge ti ni na ngoi so Jéhovah aleke awe. Lo tene nga so lo imaginé lo na molenge ni na dutingo na yâ ti jardin ti ala na peko ti zingongo ti akuâ, na so lo bâ ye ni tongana mbeni ye so asi déjà awe.

a Mo lingbi ti wara gbâ ti ambeti so audio ni ayeke dä na ndö ti site jw.org.

Bible alingbi ti aidé mo ti wara dengo bê même na angoi ti ngangu

TONGANA NYEN LA NZAPA APEUT TI AIDÉ E?

Bible akiri tënë polele na ndö ni. A tene: “Jéhovah ayeke nduru na azo kue so ayeke iri lo; azo kue so ayeke iri lo na bê ti ala kue. Lo mû na azo so akpe mbeto ti lo aye so ala sara nzara ni; lo mä toto so ala toto na lo ti mû maboko na ala, na lo zi ala.” (Psaume 145:18, 19). So pendere tënë la ape? Me tongana nyen la Nzapa ayeke kiri tënë na asambela ti azo so aye biani ti tene lo aidé ala?

LO YEKE MÛ NA E NGANGU:

Akpale apeut ti sara si e découragé, e yeke na ngangu ape, mawa asara e nga e ye tënë ti Nzapa encore mingi ape (aProverbe 24:10). Me Jéhovah ayeke “mû ngangu na zo so awoko, nga lo sara si azo so ayeke na ngangu pëpe awara ngangu mingi.” (Ésaïe 40:29). Bazengele Paul, so atingbi na angangu kpale, atene: “Mbi wara ngangu ti sara aye kue ndali ti lo so lo mû ngangu ni na mbi.” (aPhilippien 4:13). Yingo vulu ti Nzapa amû ngangu na Paul. Mo kue mo peut ti hunda Nzapa ti mû na mo yingo vulu ti lo.—Luc 11:13.

LO YEKE MÛ NA E NDARA:

Nyen la mo peut ti sara ti tene a-aidé mo ti mä yâ ti Bible nga ti sara ye alingbi na awango ti Bible? Disciple Jacques atene: “Tongana ndara amanke mbeni zo na popo ti ala, zia lo ngbâ ti hunda ni na Nzapa, ngbanga ti so Nzapa ayeke mû ye mingi na azo kue na lo yeke suku ndali ni pëpe; na a yeke mû ni na lo.” (Jacques 1:5). Mo peut ti sara ye alingbi na asambela ti mo na lege so mo yeke gï ti diko Bible nga ti sara ye alingbi na aye so Bible afa ni (Jacques 1:23-25). Tongana mo sara tongaso, mo yeke bâ tâ polele so awango ti Bible ayeke tâ awango ti ndara.

LO YEKE MÛ NA E SIRIRI:

Même tongana mo yeke na yâ ti kota gingo bê, Jéhovah apeut ti aidé mo ti tene bê ti mo adë. Mbeti ti Lo, Bible, atene: “Ala gi bê ti ala na ndö ti mbeni ye pëpe, me na yâ ti aye kue, na lege ti sambela, na lege ti vorongo terê na Nzapa nga na sambela ti kiringo singila, ala hunda na Nzapa aye so agbu bê ti ala, na fade siriri ti Nzapa so ahon ndö ti bibe kue ayeke bata bê ti ala nga na lege ti hingango ndo ti ala na lege ti Christ Jésus.” (aPhilippien 4:6, 7). Hunda na Jéhovah ti mû na mo siriri ti bê.

Ka tongana akpale ti mo ni ahon hio ape? Tene ape so Nzapa agirisa mo awe. Atâa tongana akpale ti mo ni angbâ, Nzapa alingbi ti mû na mo courage nga ti aidé mo ti gbu ngangu (1 aCorinthien 10:13). Bible amû nga zendo so mbeni ngoi ayeke ga ande so akpale ti azo ayeke hunzi biani biani!