Aprophétie so aga tâ tënë

Na yâ ti mbeni mbage so ahon e bâ so prêtre ti Delphes ahanda Crésus, na ye so asara si gbia ti Perse asö benda na ndö ti lo. Me na mbage, Bible nga atene mbeni prophétie so andu mbeni gbia ti Perse na so aga tâ tënë kue kue kue.

Ngu 200 tongaso kozo si a dü gbia ti Perse ni, prophète Ésaïe so ayeke Hébreu afa lani so iri ti gbia ni ayeke duti ande Cyrus nga lo fa tongana nyen la Cyrus ni ayeke sö benda ande na ndö ti ngangu gbata ti Babylone.

Ésaïe 44:24, 27, 28 atene: “Jéhovah, lo so afuta mbeni ye ti zi mo . . . atene: Mbi la mbi tene na ngu so alï, mbi tene: ‘Mo hule, nga mbi yeke sara si akota ngu ti mo kue ahule.’ Mbi la mbi sara tënë ti Cyrus, mbi tene: ‘Lo yeke berger so mbi soro lo, nga lo yeke sara ye kue kue kue so bê ti mbi aye.’ Mbi la mbi sara tënë ti Jérusalem, mbi tene: ‘A yeke kiri ti leke ni.’ Mbi sara tënë ti temple, mbi tene: ‘A yeke zia gere ti mo na sese.’”

Hérodote, so ayeke mbeni wasungo-mbaï ti Grec, atene so aturugu ti Cyrus azi lani mbeni lege ti tene Ngu ti Euphrate so ayeke sua na yâ ti gbata ti Babylone ahon dä. Kode ti Cyrus so amû lege na aturugu ti lo ti fâ ngu ni ti lï na yâ ti gbata ni. Na peko ti so Cyrus amû gbata ni awe, lo zi aJuif so a mû lani ala na ngbâa na Babylone nga lo mû lege na ala ti kiri ti leke Jérusalem, so a futi ni lani asara ngu 70 awe.

Ésaïe 45:1 atene: “Bâ tënë so Jéhovah atene na lo so lo soro lo, na Cyrus, lo so Lo gbu maboko ti lo ti koli si lo sö benda na ndö ti amara so ayeke na gbele lo, si lo zi aye ti bira na maboko ti agbia nga si lo zi aporte so lê ni ayeke use, tongaso si ayanga ti gbagba ni akanga pëpe.”

Azo ti Perse alï na yanga ti aporte ti gbata ni so lê ni ayeke use na so a zia yanga ni angbâ tâ gï na zingo ni tongaso. Tongana fade azo ti Babylone ahinga ye so Cyrus angbâ ti sara so, ka ala yeke kanga aporte kue so ayeke na terê ti ngu ni. Me na ngoi ni so, zo oko ti batango gbata ni ayeke lani dä ape.

Me, pendere prophétie so ayeke mbeni oko ti gbâ ti aprophétie so ayeke na yâ ti Bible so aga tâ tënë awe.a Aprophétie ti Bible ayeke nde na aye so azo atara ti fa na ndö ti kekereke ti zo, so mingi ni alondo na anzapa ti ala ti wataka. Aprophétie ti Bible alondo na Lo so atene: “Na tongo nda ni, mbi fa tongana nyen ye ni ayeke hunzi, nga ngbene ye giriri mbi fa aye so ade ti si pëpe.”—Ésaïe 46:10.

Gï oko tâ Nzapa, so iri ti lo ayeke Jéhovah la alingbi ti sara mara ti tënë tongaso. Nda ti iri ti lo aye ti tene “Lo so asara si ye aga mbeni ye wala ye abâ gigi.” Tënë ni so afa so Nzapa ayeke na ngangu ti hinga ye so ayeke si kekereke nga ti leke aye si ague oko na ye so bê ti lo aye. Tënë ni so adë nga bê ti e so lo yeke sara ande si azendo kue so lo mû na e asi biani.

APROPHÉTIE SO AGA TÂ TËNË LASO

Eskê mo hinga ye so aprophétie ti Bible atene na ndö ti ngoi ti e ti laso? A sara fadeso nduru na ngu 2 000 tongaso awe la Bible atene so “angoi ti akpale so ayeke ngangu na zo ti kanga bê na yâ ni” ayeke si “na lâ ti nda ni.” Lâ ti nda ni ti nyen? A yeke lâ ti nda ni ti sese wala ti azo ape, me a yeke ti abira, aye ti sioni nga na pasi so azo ayeke bâ teti angu mingi mingi. Zia e bâ gï ambeni kete mbage ti aprophétie so afa so e yeke na “lâ ti nda ni.”

2 Timothée 3:1-5 atene: “Na lâ ti nda ni . . . azo ayeke duti ande azo so andoye gï terê ti ala wani, azo so andoye nginza, azo so abâ terê ti ala kota na ndö ti amba ti ala, azo ti baba, azo ti zongango Nzapa nga na azo, azo so ake yanga ti ababâ na amama ti ala, azo so ahinga ti kiri singila pëpe, azo so ayeke abe-ta-zo pëpe, azo so aye amba ti ala zo pëpe, azo so aye ti mä terê na amba ti ala pëpe, azo ti pango amba ti ala, azo so akanga nzara ti bê ti ala pëpe, azo so ayeke asioni zo, azo so andoye nzoni ye pëpe, azo ti kango amba ti ala, azo so li ti ala akpengba, azo so wuma ti ala ahon ndö ni, azo so andoye ngia ahon ti ndoye Nzapa, ala yeke sara ye mo bâ mo tene ala voro Nzapa na bê ti ala kue, me ala ke ngangu so vorongo Nzapa na bê kue ayeke sara na ndö ti zo.”

Eskê mo kue mo yeda so a bâ mara ti asarango ye ni so na terê ti azo mingi laso ape? Eskê mo bâ so e yeke na popo ti azo so andoye gï terê ti ala wani, andoye nginza nga so wuma ti ala ahon ndö ni? Eskê mo bâ so azo ayeke ku gï ti tene amba ti ala la asara ye na ala, me ti ala, ala ye ti mä terê na amba ti ala ape? Peut-être mo kue mo bâ so gbâ ti amolenge laso ayeke mä yanga ti ababâ na amama ape nga so azo andoye ngia mingi ahon ti ndoye Nzapa. Nga, aye ni ayeke ga gï sioni sioni ti gue na ni.

Matthieu 24:6, 7 atene: “Ala yeke mä ande tënë ti abira so atï nduru na ala wala abira so atï yongoro na ala. . . . Mara ayeke londo na bira na terê ti mbeni mara, na royaume ayeke londo na bira na terê ti mbeni royaume.”

Ambeni zo atene so ti londo na ngu 1914 ti ga na ni, wungo ti azo so akui ndali ti bira nga na fango terê ahon kutu 100. Tara ti bâ toto, vundu nga na pasi so aga na peko ti ye ni so. Eskê azo amanda ye na lege ti aye ni so nga ala zia lege ti sarango bira?

Matthieu 24:7 atene: “Kota nzara ayeke tï.”

Mbeni ndokua ti Bendo ti Gigi (PAM), atene: “Na yâ ti dunia kobe so ayeke dä apeut fade ti lingbi azo kue, me azo kutu 815 ayeke lango lakue na nzara na yâ ti ala na bï. Na ndö ni, tongana a mû azo ota, oko na popo ni ayeke te kobe nzoni ape.” A tene nga so ngu oko oko nzara ayeke fâ akete molenge kutu ota tongaso.

Luc 21:11 atene: “Sese ayeke yengi ngangu.”

Ngu oko oko, azo ayeke sentir yengingo ti sese 50 000 tongaso na popo ti ati so kue ayeke passé na ndö ti sese. Na milieu ni, 100 tongaso ayeke kungbi ada, nga ngu oko oko mbeni kota yengingo ti sese oko ayeke manke ti passé ka ape. A tene so, na popo ti ngu 1975 ti si na ngu 2000, asese so ayengi ayeke fâ azo 471 000 tongaso.

Matthieu 24:14 atene: “A yeke fa ande nzoni tënë ti Royaume na ndö ti sese kue so azo ayeke dä tongana mbeni tënë ti témoin ndali ti amara kue. Na pekoni, nda ni ayeke ga.”

A-Témoin ti Jéhovah, so wungo ti ala ahon kutu miombe tongaso, ayeke fa nzoni tënë ti Royaume ti Nzapa na ndö ti dunia kue na yâ ti akodro 240 tongaso. Ala yeke fa ni na yâ ti akota gbata, akete kodro so ayo, agbako nga na yâ ti ahoto. Prophétie ni atene so tongana a sara ande kua ni so alingbi na ti so bê ti Nzapa aye awe, “na pekoni, nda ni ayeke ga.” Tënë so aye ti tene nyen la? A ye ti tene so a yeke futi ande gouvernement ti azo na gï Royaume ti Nzapa la ayeke komande ande. Azendo wa la ayeke ga ande tâ tënë na gbe ti Royaume ti Nzapa? Ti hinga ni, diko mbage so ayeke ga na pekoni.