Gigi ti mo ti kekereke, mo la mo yeke soro ni!

ESKÊ MO LINGBI BIANI TI SORO GIGI TI MO TI KEKEREKE? Ambeni zo atene so a diko déjà aye so ayeke si na yâ ti gigi ti zo awe, me zo lo wani la ayeke soro ape. Tongana ala raté ti sara aye so ala leke ti sara, ala yeke tene: “A diko ti tene mbi sara ye ni ape.”

Ti ambeni, li ti ala ayeke ga kirikiri na ngoi so ala bâ so lege ayeke dä ape ti sigi na yâ ti sioni dunia ti laso so. Ala yeke gi ti sara effort ti sara si gigi ti ala aga nzoni ahon ti kozo, me lakue na nda ni aye tongana bira, sarango ye ti sioni na zo, ngu so asuku amû ndo wala sese so ayengi nga na akobela ayeke buba yâ ti aye so ala leke ti sara. Ndani la ala yeke tene: ‘Ngbanga ti nyen ti ngbâ ti sara a-effort ni so kue?’

A yeke tâ tënë so aye so ayeke si na yâ ti gigi apeut ti sara ye mingi na ndö ti aye so mo leke ti sara (Zo-ti-fa-tene 9:11). Me, tongana a ndu tënë ti fini ti lakue lakue so e yeke ku ni, a yeke mo la mo yeke soro ni. Ni la, Bible afa so gigi ti mo ti kekereke adépend na ye so mo yeke soro. Zia e bâ ye so Bible atene.

Na ngoi so azo ti Israël aye lani ti lï na Sese ti Zendo, na iri ti Jéhovah Moïse atene na ala lo tene: “Mbi zia na gbele mo fini na kuâ, tufa na deba; a lingbi mo soro fini si mo lingbi ti ngbâ na fini, mo na ahale ti mo, na lege so mo ndoye Jéhovah Nzapa ti mo, mo mä yanga ti lo nga mo ngbâ nduru na lo.”​—Deutéronome 30:15, 19, 20.

“Mbi zia na gbele mo fini na kuâ, tufa na deba; a lingbi mo soro fini.”​—Deutéronome 30:19

Biani, Nzapa azi lani azo ti Israël na gbe ti ngbâa na Égypte na lo mû na ala pasa ti duti na liberté nga na ngia na yâ ti Sese ti Zendo. Me ala yeke wara aye ni so kue gï tongaso ape. Ti tene ala wara ni, ala doit ti “soro fini.” Ala yeke soro ni tongana nyen? Na lege so ala ‘ndoye Nzapa, ala mä yanga ti lo nga ala ngbâ nduru na lo.’

Laso, a zia na devant ti mo mara ti ye ni so ti soro. Nga, ye so mo yeke soro ti sara laso la ayeke fa wala gigi ti mo ti kekereke ayeke duti ande tongana nyen. Tongana mo soro ti ndoye Nzapa, ti mä yanga ti lo nga ti ngbâ nduru na lo, aye ti fa so mo soro fini, so ti tene fini ti lakue lakue na yâ ti paradis na ndö ti sese. Me ti sara aye ni so aye biani ti tene nyen?

SORO TI NDOYE NZAPA

Ndoye ayeke kozo sarango ye ti terê ti Nzapa. Bazengele Jean asû na gbe ti yingo ti Nzapa atene: “Nzapa ayeke ndoye.” (1 Jean 4:8). Ndani la, na ngoi so mbeni zo ahunda Jésus ti hinga commandement wa la ayeke kota ahon atanga ni kue, Jésus atene: “Mo ndoye Jéhovah Nzapa ti mo na bê ti mo kue, na âme ti mo kue nga na bibe ti mo kue.” (Matthieu 22:37). A lingbi ndoye la apusu e ti tene e duti na nzoni songo na Jéhovah Nzapa, me a yeke pëpe mbeto wala ngbanga ti so e ye ti mä yanga ti lo nga gï tongaso. Me ngbanga ti nyen la a lingbi e soro ti ndoye Nzapa?

Ndoye ti Jéhovah teti azo ayeke tongana ndoye so ababâ na amama ayeke na ni ndali ti amolenge ti ala. Atâa so ababâ na amama ayeke na siokpari na terê ti ala, ndoye apusu ala ti fa ye, ti encouragé, ti mû maboko nga ti fa lege na amolenge ti ala ndali ti so ala ye ti tene amolenge ni aduti na ngia nga ala ga anzoni zo. Nyen la ababâ na amama ayeke ku na mbage ti amolenge ni? Ala ye si amolenge ti ala aye ala nga ala sara ye alingbi na aye so ala fa na ala ndali ti nzoni ti ala. Eskê a yeke na lege ni ape ti tene Babâ ti e ti yayu, so ayeke ti lo mbilimbili-kue, aku na mbage ti e ti tene e fa so e ndoye lo ndali ti aye kue so lo sara ndali ti e?

MÄ YANGA TI LO

Na yanga ti kodro so a sû na Bible ândö, tënë “mä” aye nga ti tene “mä yanga.” Na tapande, tongana e tene na mbeni molenge e tene “Mä babâ na mama ti mo”, e yeke hunda na lo ti mä yanga la, ni la ape? Tongaso, ti mä yanga ti Nzapa aye ti tene ti gi ti hinga aye so lo fa nga ti sara ye so lo hunda. Teti so e peut ti mä go ti Nzapa droit tongaso ape, e yeke mä go ti lo na lege so e yeke diko Bible nga e yeke sara ye alingbi na atënë so ayeke na yâ ni.​—1 Jean 5:3.

Jésus afa so ayeke kota ye ti mä yanga ti Nzapa, lo tene: “Zo ayeke ngbâ na fini gï na lege ti mapa pëpe, me na lege ti tënë kue so asigi na yanga ti Jéhovah.” (Matthieu 4:4). Kobe ayeke kota ye mingi na e, me ti manda ye na ndö ti Nzapa ayeke kota mingi ahon ni. Ngbanga ti nyen? Gbia Salomon atene: “Ndara ayeke bata zo tongana ti so nginza ayeke bata zo. Me nzoni ti hingango ye ayeke so: Ndara ayeke bata fini ti wa ti lo.” (Zo-ti-fa-tene 7:12). Hingango ye nga na ndara so alondo na Nzapa alingbi ti bata e laso nga alingbi ti aidé e ti soro ti sara aye so alingbi ti gue na e ti wara fini ti lakue lakue.

NGBÂ NDURU NA LO

Rappelé na mbeni tënë so Jésus atene so e bâ ni na yâ ti mbage so ahon, so a tene: “Lê ti lege so ague na fini ayeke kete nga yanga ti gbagba ni ayeke kete mingi, na azo mingi pëpe ayeke wara ni.” (Matthieu 7:13, 14). Ti voyagé na ndö ti mara ti lege tongaso, a yeke duti ande nzoni ti tene mbeni zo so ahinga lege ni nzoni afa ni na e nga e ngbâ nduru na terê ti lo tongana e ye ti si na ndo so e ye ti gue dä, so ti tene ti wara fini ti lakue lakue. Ni la, a yeke nzoni ti tene e ngbâ nduru na Nzapa (Psaume 16:8). Me e yeke ngbâ nduru na Nzapa ni tongana nyen?

Lâ na lâ, e yeke na gbâ ti aye so e doit ti sara ni nga ambeni mingi ayeke dä so e ye ti sara. Aye ni so apeut ti sara si e yeke na ngoi mingi ape wala e wara nga ngoi ape ti gbu li na ndö ti aye so Nzapa aye ti tene e sara. Ndani la Bible adabe ti e, a tene: “Zia ala sara hange mingi na tambela ti ala si aduti tongana ti azo ti buba pëpe, me tongana ti azo ti ndara, na sarango kusala nzoni na ngoi ti ala, ndali ti so ngoi ni ayeke sioni.” (aÉphésien 5:15, 16). E yeke ngbâ nduru na Nzapa na lege so e fa so songo ti e na lo la ayeke kota ye mingi na yâ ti gigi ti e.​—Matthieu 6:33.

A YEKE NA MO TI SORO

Mo peut ti sara mbeni ye ti changé gigi ti mo ti ândö ape, me ambeni ye ayeke dä so mo peut ti sara ti tene mo na azo so mo ye ala awara mbeni nzoni gigi ti kekereke. Bible afa so Babâ ti e ti yayu, Jéhovah Nzapa, aye e mingi nga lo fa na e ye so lo ye ti tene e sara ni. Bâ tënë so prophète Michée atene:

“Mo zo, lo fa na mo ye so ayeke nzoni awe. Nyen la Jéhovah ahunda na mo ti sara? Ye so lo hunda na mo ayeke gï ti sara ye so ayeke mbilimbili, ti bâ tâ ndoye na nene ni, nga ti tambela na Nzapa ti mo na sarango terê ti mo kete!”​—Michée 6:8.

Eskê mo yeke ye ande dä ti tambela na terê ti Jéhovah na ti wara fini ti lakue lakue so lo leke ti mû na azo kue so asara tongaso? Desizion ni ayeke na yâ ti maboko ti mo!