Lege ti sara si mandango Bible ti mo aga na mo aye ti nzoni nga anzere na mo mingi
JOSUÉ atingbi na mbeni kpale. A lingbi lo gue na mara ti Israël na Sese ti Zendo na yâ ti ambeni ye so ayeke ngangu mingi. Ye oko, Jéhovah adë bê ti lo nga lo kpengba lo, lo tene: ‘Sara ye na mbeto pëpe, luti tongana koli, sara ye alingbi na andia ti mbi. Diko ni bï na lâ, zia si lê ti mo akpengba ti sara ye alingbi na atënë kue so a sû na yâ ni. Tongaso fade lege ti mo ayeke ga nzoni na mo yeke sara ye na ndara.’—Jos. 1:7, 8.
Na yâ ti “angoi ti akpale so ayeke ngangu na zo ti kanga bê na yâ ni” so, e kue e yeke tingbi na ambeni ye so ayeke ngangu mingi (2 Tim. 3:1). Legeoko tongana Josué, e lingbi ti gbu lê ni tongana e sara ye alingbi na awango so Jéhovah amû na lo. A lingbi e diko Bible lakue nga e sara kua na amama-ndia ni nzoni ti hon ndö ti atara so e tingbi na ni.
Me e mingi e lingbi ti tene so e yeke anzoni wamandango ye ape nga mandango ye ayeke kete ye na e ape. Ye oko, mandango Bible ayeke kota ye mingi. Tongana mo diko encadré “Gi ti sara aye so,” mo yeke wara aye so alingbi ti mû maboko na mo ti sara si mandango Bible ti mo aga na mo aye ti nzoni nga anzere na mo mingi.
Mbeni zo ti sungo Psaume ahe bia, atene: “Fa na mbi lege ti acommandement ti mo, ndali ti so mbi wara ngia dä mingi.” (Ps. 119:35). Mo nga kue mandango Bible alingbi ti nzere na mo. Tongana mo ngbâ ti manda Bible, mo yeke wara anzoni ye mingi ti pensé na ndö ni.
Atâa so mo yeke mû li ni na ndö ti mbeni mara ape tongana ti Josué lani, mo yeke na akpale ti mo wani. Tongaso, legeoko tongana Josué, manda aye so a sû ni ndali ti nzoni ti mo nga sara ye alingbi na ni. Tongana mo sara ni, mo nga kue lege ti mo ayeke ga nzoni na mo yeke sara ye na ndara.