E sala kangbi pëpe na yâ fango tënë ti e
1 Pierre atene lani: “Nzapa ayekia mbeni zo teti lê ti lo pëpe; me na yâ amara kue, zo so akpe mbito ti Nzapa, na lo sala ye ti mbilimbili, lo lingbi na lê ti Lo.” (Kus. 10:34, 35). Kusala ti e laso angbâ ti fa biani so ye so ayeke tâ tënë. Ni la, a yeke nzoni ti tene e sala ngangu kue ti hon ndo ti aye so alingbi ti kanga lege na e ti ndu azo kue na nzo tënë.
2 Na ngoi so e yeke fa tënë da na da wala na alege kue so azi na ambeni ndo, a yeke ye ti dongo bê pëpe ti wara azo so atene pëpe wala amä pëpe yanga ti kodoro so a sala na bungbi ti kongregation ti e. E lingbi nga ti sala tënë na azo so asala nzara ti tënë ni me so alango pëpe na territoire ti e. Kpale ti yanga ti kodoro akanga lege na ambeni zo ti wara nzoni kue na yâ tokua ti Royaume so e yeke fa. Na tapande wambongi so asala tënë gi na lege ti salango maboko ti lo. Ye nyen a lingbi ti sala ti wara lege ti hon ndo ti kpale ti yanga ti kodoro so akanga lege na e ti ndu azo nzoni na nzo tënë? Na ye wa a lingbi ti sala ti mû maboko na azo so asala nzara ti tâ tënë me so alango na yâ territoire ti e pëpe?
3 Na nze ti août ti ngu so, Société atokua lani ambeti Veuillez suivre l’intérêt (S-43) na akongregation kue. Nda ti mbeti so ayeke ti mû lege ti hinga nzoni azo so atene pëpe yanga ti kodoro ti kongregation ti ndo so ala lango dä, nga ala so ayeke awambongi, ti mû lege na ala ti mä tokua ti Royaume na yanga ti kodoro ti ala mveni. A mû nga lege ti mû maboko mingi na mbeni zo so asala nzara ti tënë ni so e wara lo na fango tënë me so da ti lo ayeke na yâ territoire ti e pëpe.
4 Tongana mo wara mbeni zo na fango tënë so ayeke wambongi wala so amä pëpe yanga ti kodoro so a sala na bungbi ti kongregation, mo lingbi ti sû tënë polele na ndo oko ti ambeti so. A lingbi ti sala ni atâa zo ni asala nzara ti tâ tënë pëpe. Mo lingbi pëpe lakue ti hinga iri ti zo ni, me mo lingbi ti sû na ndo ni ndo ti lango ti zo ni nga na yanga so lo yeke tene. A lingbi ti zia mbeti ni na yâ boîte ti rapport na Da ti Royaume. Fade secrétaire ayeke ro ni ti bâ wala atënë so a sû ayeke na lege ni nga polele, na lo tokua ni na kongregation so ayeke ndulu wala na groupe so ayeke bâ lege ti azo so atene yanga ti kodoro so a fa na ndo mbeti ni.
5 Ti ambeni, a yeke peut-être na bezoin ni pëpe. Na tapande, mingi ti akongregation ti yanga ti Anglais ti akota gbata ahinga nzoni ndo so azo so ayeke tene yanga ti Anglais alango dä na yâ ti territoire ni. Me na mbeni mbage, azo so atene mbeni yanga ti kodoro alingbi ti kangbi tele ti ala kirikiri. Tongaso, a lingbi ti hunda na kongregation wala groupe so asala kua na yanga ti kodoro ni ti gi yâ ti aterritoire nde nde, na lo yeke duti ande na ngia ti tene a mû maboko na lo ti hinga ndo so azo ni ayeke dä ti tene peut-être a mû na ala maboko.
6 Tongana kongregation wala mbeni groupe so alingbi ti fa tënë na yanga ti kodoro ni so ayeke dä pëpe, peut-être mbeni wafango tënë ti oko ti akongregation ti ndo ni so ahinga yanga ti kodoro ni alingbi ti sala ni. Tongana a wara mbeni zo oko pëpe so atene yanga ti kodoro ni même na peko ti so abâ tënë ni na surveillant ti gbata ni, a lingbi aita ti ndo ni asala ye kue so ala lingbi ti sala ti fa tënë na azo ni. Brochure Ouarango Nguia na Ndo Sesse Teti La Koue! amû maboko mingi na yâ mara ti aye tongaso.
7 A lingbi wafango tënë oko oko aduti ndulu ti sala kua na mbeti Veuillez suivre l’intérêt tongana ti so a hunda. Tongana kongregation ade ti wara pëpe mbeti S-43, aye so a hunda tongana sango a lingbi ti sû ni na ndo kete kugbe-mbeti na ti tokua ni tongana ti so a fa kozoni na nduzu. Na salango ngangu lakue ti ndu azo na nzo tënë atâa yanga ti kodoro so ala tene, e yeke mû peko ti ndoye ti Nzapa ti e, Jéhovah, “so aye azo kue awara salut, na ahinga tene-biani mbilimbili.”—1 Tim. 2:4.