Zia lumière ti e aza lakue

¹ Lumière ayeke nyen? Mbeni bakari afa pekoni tongana “mbeni ye so asala si lê abâ ye.” Me ti tâ tënë ni, atâa so senda-kode ague na li ni mingi, zo ade ti hinga pëpe tâ kiringo tënë na hundango tënë ti Jéhovah so ayeke na Job 38:24. Tongana nyen e lingbi ti ngbâ na fini tongana lumière ayeke dä pëpe? Tongana lumière ayeke dä pëpe, e lingbi pëpe ti duti na fini. Na lege ti mitele, e yeke na bezoin ti lumière ti bâ na ndo, na Bible atene na e so na lege ti yingo “Nzapa ayeke Lumière”. (1 Jean 1:5). Fini ti e kue ayeke na maboko ti lo so ‘amû na e lumière’.​—Ps. 118:27.

² Ye so ayeke tâ tënë na lege ti mitele; me na lege ti yingo a yeke mingi ahon so. Vorongo ti wataka ahanda azo mingi, lo bi ala na yâ bingo ti yingo, ndo so ala yeke “tatara ndo ti gi tele ti da tongana awaziba”. (Es. 59:9, 10). Me ndoye ti lo na be-nzoni ti lo so ahon ye kue apusu Jéhovah ti ‘to lumière ti lo na tene-biani’. (Ps. 43:3). Azo ti be-nzoni kutu mingi ayeda na ni, na ala ‘sigigi na yâ bingo si ala ga na yâ lumière ti Lo so ayeke ye ti kpene.’​—1 Pi. 2:9.

³ Jésus Christ asala kota kusala ti ga na lumière na azo. Lo tene: “Mbi ga tongana lumière na sese so, si zo so amä na bê na Mbi alingbi duti na bingo pëpe.” (Jean 12:46). Lo mû lani ngoi ti lo kue, ngangu ti lo kue na aye ti lo kue ti sala si azo ahinga lumière ti tâ tënë. Lo tambela na yâ ti akota kodoro nga na akete kodoro ti lo kue ti fa tënë. Atâa so a hunda na lo ti gbu ngangu na yâ ti aye ti ngangu so alondo na ndo kue, lo ngbâ be-ta-zo na yâ kusala ti lo ti kangbi lumière ti tâ tënë.

⁴ Jésus abi bê ti lo lani ti soro adisciple ti lo, ti fa ye na ala nga ti leke ala mbilimbili ti sala mbeni ye so ayeke nde. Na Matthieu 5:14-16, e diko wango so lo mû na ala: “I yeke lumière ti sese so. . . . Zia lumière ti i aza na gbele azo, si ala lingbi bâ nzo kusala ti i, na ala mû gloire na Babâ ti i so ayeke na yayu.” Tongana ti so Jésus asala, ala su lani “na sese so tongana asungo ye” na kangbingo lumière ti tâ tënë mingi (aPhil. 2:15). Na ngia, ala yeda na kungba so ala bâ ni tongana kozo ye so ala gi ni na yâ fini ti ala. Ngoi kete na pekoni, Paul alingbi ti tene lani so “a fa na azo kue na gbe ti yayu” nzo tënë ni (aCol. 1:23). Kongregation ti aChrétien kue lani abungbi beoko ti sala kota kusala so.

⁵ Laso, a lingbi e kiri singila teti so e yeke na popo ti azo so ake “kusala ti bingo”. (aRom. 13:12, 13). E lingbi ti fa na gigi bê ti kiri singila ti e na mungo tapande so Jésus na aChrétien be-ta-zo ti giriri azia. Laso, azo ayeke na bezoin ti mä tâ tënë mingi ahon ti angoi kue na yâ mbaï ti azo. Mbeni kusala nde so a hunda ti sala ni hio na so aga na aye ti nzoni mingi tongaso ayeke dä pëpe.

⁶ Tongana nyen ti za tongana asungo ye? Kozo ye ti sala ayeke ti mû mbage ti e na fango tënë ti Royaume. Kongregation oko oko aleke tele ti lo lakue ti fa tënë na yâ ti territoire ti lo. Abuku ayeke mingi na ayanga nde nde. Na lege ti abungbi, e wara akota fango ye, na ala so ayeke na kode mingi amû maboko ti fa ye na amba ti ala. Akoli, awali, akangba na même amolenge, alege azi na ala ti mû mbage ti ala na ni. A tisa zo oko oko kue na yâ kongregation ti mû mbage ti lo dä alingbi na ngangu ti lo nga na dutingo ti lo. Ye kue na yâ ti kongregation aluti na ndo fango tënë, na a leke aye ti tene a mû maboko na zo oko oko ti mû mbage ti lo dä. Dutingo ndulu lakue na kongregation ayeke nzoni lege mingi ti hinga na bê kue so lumière ti e angbâ ti za.

⁷ E lingbi ti za lumière ti e na alege mingi sân ti fa tënë. Gi na lege ti tambela ti e, e lingbi ti gboto lê ti azo. A yeke ye so lani Pierre abi bê ti lo dä tongana lo tene: “I tambela mbilimbili na popo ti aGentil, si . . . ala lingbi mû gloire na Nzapa, na lâ ni so Lo ga ti bâ ala, teti ala bâ nzo kusala ti i awe.” (1 Pi. 2:12). Azo mingi afâ ngbanga na ndo mbeni kusala wala na ndo mbeni bungbi na lege ti tambela ti azo ti yâ ni. Tongana awabango ndo abâ azo so ayeke na nzoni tambela, asala ye na lege ni, aduti na siriri na ala kpe ndia, ala yeke bâ azo tongaso tongana azo so ayeke nde, na ala yeke tene so fini ti ala aluti na ndo akpengba-ndia so ayeke kota mingi ahon ala so azo mingi amû pekoni. Tongaso, mbeni koli ayeke za lumière ti lo tongana lo yekia na lo ndoye wali ti lo; mbeni wali ayeke sala nga legeoko na kpengo koli ti lo. Amolenge afa so ala yeke nde tongana ala mä yanga ti ababâ na mama ti ala, ala kpe ye ti pitan nga na nyongo mbangi. Azo aye mingi mbeni wakua so abi bê ti lo na kusala ti lo, asala ye na lege ni na so ane amba ti lo. Ti sala ye tongaso ayeke sala si lumière ti e aza, na e yeke fa na amba ti e ti sala tongana e.

⁸ Fango tënë ayeke ti tene na azo ye so e manda na yâ Tënë ti Nzapa. A yeke ye so a sala ni na ndo estrade wala na yanga-da ti azo; me kusala ni angbâ gi na ando so pëpe. Akusala ti e ti lâ oko oko asala si e yeke tingbi na azo mingi. Ngoi oke mo yeke mû na yâ ti lango oko oko ti sala tënë na azo so alango na tele ti da ti mo? Azo ayeke ga na ndo ti mo lakue? Azo oke si mo yeke tingbi na ala tongana mo gue ti vo ye, mo gue ti mû bus wala mo gue na kua? Tongana mo yeke mbeni maseka so angbâ na ekole, mo lingbi ti diko wungo ti azo so mo yeke sala tënë na ala lâ oko oko? Alege ti sala tënë na azo ayeke mingi. A hunda na mo ti duti gi na mbeni kete tënë ti Bible na li ti mo, ti duti na Bible na ambeni tract na tïtî mo, na ti to nda ti lisoro tongana lege azi.​—1 aThes. 2:2.

⁹ E yeke wara adeba nzoni tongana e sala si lumière ti e aza: E yeke na ambeni tapande ti kpengba zo ti aye so asi na peko ti fango tënë na lege kue so azi. Mbeni wali ti ngu 55 aye ti fâ lege. Me gi na oko ngoi ni so mbeni kutukutu aye ti pika lo, mbeni ita-wali agbu maboko ti lo na agboto lo, na lo tene na lo: “Ala sala hange si. E yeke na mbeni ngoi so aye aga sioni mingi!” Na pekoni, ita-wali ni afa na lo ngbanga ti nyen ngoi ti e ayeke sioni. Wali ni ahunda lo: “Ala yeke Témoin ti Jéhovah?” Teti ita ti lo ti wali amû lani na lo mbeni buku ti e, wali ni aye lani ti wara mbeni Témoin ti Jéhovah; tingbingo tele so asala si ye so lo ye aga tâ ye.

¹⁰ Mbeni kusala ti nzobe alingbi ti duti kozo ye ti sala ti mû maboko na ambeni zo ti manda tâ tënë. Na ngoi so ala yeke kiri na kodoro na peko ti fango tënë, ambeni ita-wali use abâ so tele ti mbeni wali so azu na yâ ti mbeni bus aso. Ala luti na ala hunda lo wala lo ye ti tene mbeni zo amû maboko na lo. Bê ti lo adö ti bâ so azo use so lo hinga ala pëpe abi bê na lo, na lo gbu gere ti ala mingi ti fa na lo ye so apusu ala ti bi bê na lo tongaso. Ye so azi lege na ala ti fa tënë. Wali ni aku pëpe ti fa na ala ndo so lo yeke dä na lo tisa ala na wâ ti ga ti bâ lo. Ala to nda ti manda na lo. Kete na pekoni, wali ni akomanse ti gue na abungbi, na fadeso lo yeke fa tâ tënë na ambeni zo.

¹¹ Girisa lâ oko pëpe so mo yeke mbeni Témoin! Tongana Jésus asala tënë ti adisciple ti lo tongana “lumière ti sese so”, lo ye ti tene so a lingbi ala mû maboko na azo ti wara ye ti nzoni na yâ lumière ti yingo ti Tënë ti Nzapa so aza. Tongana e sala ye alingbi na wango ti Jésus, e yeke bâ fango tënë ti e tongana nyen?

¹² Na hingango so e lingbi pëpe ti duti Chrétien gi teti mbeni kete ngoi, e mû tele ti e na Nzapa, ‘e ke tele ti e mveni’ na e yeda ti mû peko ti Jésus “lakue.” (Mat. 16:24, NW ). E ye ti sala na ‘bê ti e biani’ na gbungo alege kue so azi ti za lumière ti e tongaso e ndu azo na ndo kue so ala yeke dä (aCol. 3:23, 24). A lingbi e ke asalango ye ti sese so, e bata wâ so e yeke na ni kozo na e sala kue ti tene lumière ti e angbâ lakue ti za ngangu. Peut-être ambeni azia si wâ ti ala adë na lumière ti ala aza gi kete, so zo alingbi ti bâ ni nzoni pëpe. A lingbi a mû maboko na azo tongaso ti tene ala kiri awara wâ ti ala teti fango tënë.

¹³ Ambeni alingbi peut-être ti kiri na peko ngbanga ti so azo mingi aye ti mä e pëpe. Paul atene lani so tënë na ndo ti Christ “ayeke tënë ti buba na lê ti ala so ayeke kui”. (1 aCor. 1:18). Ye oko, atâa atënë so azo alingbi ti tene, Paul atene na ngangu: “Kamene asala mbi pëpe teti Tene-nzoni so.” (aRom. 1:16). Zo so ayeke na kamene abâ tele ti lo kete wala lo lingbi pëpe. Tongana nyen si e lingbi ti duti na kamene na ngoi so e yeke sala tënë na ndo Lo Ti Nduzu Ahon Kue nga na ndo aye ti pendere so lo leke awe ti tene e duti na tâ ngia teti lakue lakue? A yeke na lege ni pëpe ti tene e bâ tele ti e kete wala e lingbi pëpe na ngoi so e yeke fa atâ tënë so na ambeni zo. Nde na so, a lingbi bê ti e apusu e ti mû ye ti nzoni ti e mveni, na fango na gigi so e hinga biani ‘kamene asala e pëpe’.​—2 Tim. 2:15.

¹⁴ Lumière ti tâ tënë so ayeke za laso na yâ ti akodoro mingi na ndo sese kue amû na azo ngangu beku ti fini ti lakue lakue na ndo fini sese na yâ paradis. Zia e fa na gigi so e mû na bê ti e wango ti za lumière ti e lakue! Tongana e sala ni, fade e yeke wara ande ngia legeoko tongana ti adisciple so lâ na lâ ‘ala zia pëpe ti fa nda ti tënë, na ti fa Tene-nzoni ti Jésus, Lo so ayeke Christ.’​—Kusala 5:42.