“Zia lumière ti ala aza”
1. Nyen la e yeke na pasa ti za ni?
1 Ti londo na sigingo ti lâ ti si na lindango ni, e bâ lumière aza pendere na amû gonda na Jéhovah Nzapa. Me, mbeni lumière ayeke dä so Jésus atisa adisciple ti lo ti duti na ni; a yeke “lumière so amû fini na zo.” (Jean 8:12). A yeke mbeni kota pasa ti duti na mara ti lumière ti yingo ni so, me a ga nga na kota kungba. Jésus atene: “Zia lumière ti ala aza na gbele azo,” si ambeni zo awara nzoni dä (Mat. 5:16). Laso kota bingo na lege ti yingo angoro e, ni la a lingbi a za lumière so, teti bezoin ni ayeke laso kota mingi. Tongana ti Jésus, na lege wa e lingbi ti zia si lumière ti e aza?
2. Na lege wa Jésus afa nene ti za lumière ti yingo so?
2 Na lege ti fango tënë: Jésus amû lani ngoi ti lo, ngangu ti lo nga na aye so lo yeke na ni ti sara si azo ahinga lumière ti tâ tënë na yanga-da ti ala, na ndo so azo ayeke dä mingi, na ndo ti ahoto, so ti tene na ndo kue so lo lingbi ti wara azo dä. Lo hinga lani so ti mû tâ lumière ti yingo na azo ayeke kpengba ye so ayeke ngbâ teti lakue lakue (Jean 12:46). Ti ndu azo mingi, Jésus aleke lani adisciple ti lo ti duti “lumière ti dunia so.” (Mat. 5:14). Ala zia lani si lumière ti ala aza na sarango ye ti nzoni na amba ti ala azo nga na fango tâ tënë na ndo ti Nzapa na azo ni.
3. Na lege wa e lingbi ti fa so e bâ tâ na nene ni lumière ti tâ tënë?
3 Azo ti Nzapa amû na nene ni mingi kungba so ala yeke na ni ti “ngbâ ti tambela tongana amolenge ti lumière,” na ala yeke fa tënë na azo na ndo kue so ala lingbi ti wara ala dä (aÉph. 5:8). Même ti diko gi Bible wala ambeni mbeti ti e na lê ti azo dandara na ngoi ti wungo tere na ekole wala na place ti kua alingbi ti zi lege na lisoro na ndo ti Bible. Mbeni ita-wali asara tongaso, na lo to nda ti mbeni étude nga lo kangbi abuku 12 na akamarade ti lo ti ekole.
4. Ngbanga ti nyen ti ‘zia si lumière ti e aza’ andu nga nzoni sarango ye ti e?
4 Na lege ti anzoni kusala: Ti zia si lumière ti e aza andu nga sarango ye ti e ti lâ oko oko (aÉph. 5:9). Na place ti kua, na ekole nga na ando so azo ayeke dä, azo ayeke bâ ka sarango ye ti aChrétien so ayeke nde, na ye so azi lege ti fa tâ tënë na ala (1 Pi. 2:12). Na tapande, nzoni sarango ye ti mbeni molenge-koli ti ngu oku apusu wafango ye na lo ti iri babâ na mama ti lo. Lo tene: “Lâ oko ade mbi bâ mbeni molenge so ayeke gi ti sara ye ti nzoni na yâ ti aye kue tongana ti lo so pëpe!” Biani, kusala ti e ti fango tënë nga na nzoni sarango ye ti e ayeke gboto azo na mbage ti “lumière so amû fini na zo” nga ayeke mû gonda na Nzapa ti e.