Mo fa na azo awe tongana nyen ti manda Bible na kozo gango ti mo?
Tongana a hunda na azo ti manda Bible, ambeni atene so a nzere na ala ti manda Bible pëpe wala ala yeke manda Bible na eglize ti ala. Teti so na yâ ti li ti ala mandango Bible ayeke gi tongana ti so ala yeke sara ka, ala hinga pëpe so ye so alingbi ti zi lê ti ala nga ayeke nzere na ala. Tongaso, ahon ti tene mo hunda gi na ala wala ala ye ti manda Bible, mû kete penze-ngbonga ti fa na ala tongana nyen ti manda ni na kozo gango ti mo. Na tapande, tene gi na yanga pëpe so mo hinga ti tö kobe nzoni, nga so mo yeke gue ti tö mbeni ti ga na ni na ala ande; zia si ala tara ni gi na lê ni lê ni! Bâ tongana nyen mo lingbi ti sara ni na yâ ti kete ngoi. Sara kusala na atënë ti yâ ti Kusala ti Royaume ti février 2006 na lembeti 8:
“Mo pensé so atënë so ge ayeke ga ande tâ tënë mbeni lâ?” [Diko Ésaïe 33:24 na zia zo ni akiri tënë.] Mbi ye ti fa na mo mbeni pendere ye na ndo ti tënë so. Mû na zo ni buku Bible afa, na fa na lo paragraphe 22 so ayeke na lembeti 36. Diko hundango tënë so ayeke na gbe ti lembeti ni, nga hunda na lo ti gi kiringo tënë ni na ndembe so mo yeke diko paragraphe ni na lo. Na pekoni, kiri mo hunda tënë ni, na mä kiringo tënë ti zo ni. Zi Bible ti mo na diko mbeni oko ti aversê ni na zo ni legeoko na mo. Bi mbeni hundango tënë na sese so mo yeke kiri tënë na ni na vizite ti peko. Mû rendez-vous na lo. So mo to nda ti étude awe la!