Mandango Mbeti ti Sese so na Aye ti Yingo so Mo Zia na Gbele Mo
1 Mbeni nzoni mandango akozo gere ti mbeti na ngoi ti lâ ti pendere ti mo ayeke mu lege na mo ti diko na ti sû mbeti nzoni, nga ti wara mbeni nzoni hingango ye na ndo ti géographie, senda-mbaï, mathématiques nga asenda-ye. Tongana angu ayeke hon, mo yeke manda ti gbu li nzoni, ti gi nda ti aye so asi, ti leke akpale na ti sigigi na ambeni tene ti bibe so alê lengo. Mandango ye so ayeke mu ande maboko na mo na yâ fini ti mo kue, me kamba wa ayeke na popo ni na aye ti yingo so mo zia na gbele mo ti wara na yâ fini? Na tongana nyen a lingbi ti mu maboko na mo ti wara “ndara ti sala kusala nga na ngangu ti gbu li nzoni”?—aProv. 3:21, 22, NW.
2 Sala si mo lingbi teti kua ti Nzapa: Na ekole, mo dengi mê nzoni na ngoi ti afango mbeti, na mo sala na bê kue adevoir ti mo na yanga-da. Tongana mo manda ti diko mbeti nzoni na tongana mo lê anzoni kode ti mandango ye, a yeke duti ande ngangu pepe na mo ti manda Tene ti Nzapa na ti ngbâ ngangu na lege ti yingo. (Kus. 17:11) Ti wara nzoni hingango ye na ndo ti aye mingi ayeke mu maboko na mo ti hinga nzoni azo so mo yeke wara na ngoi ti salango kusala ti e ti fango tene na so ndo so ala londo dä, akota tene ti mabe ti ala, wala atene so agbu bê ti ala ayeke nde nde. Ye so mo yeke manda na ekole ayeke mu maboko ande na mo ti yö akungba ti mo ti aChrétien na yâ bungbi ti Nzapa.—Ba 2 Timothée 2:21; 4:11.
3 Manda ti bata tele ti mo mveni: Tongana mo bi bê ti mo nzoni na ni, mo lingbi nga ti wara akode so ayeke mu lege na mo ti bata tele ti mo na ngoi so mandango mbeti ti mo ahunzi awe. (Ba 1 Timothée 5:8.) Mo soro nzoni mara ti mbeti wa mo yeke manda ande. Ahon ti mu tele ti mo na amandango mbeti so warango kua na pekoni ayeke ngangu, zia mo gi ti manda mbeni kusala wala ti manda mbeti na ndo aye so ayeke mu lege na mo ti wara na ndo kue mbeni kua so alingbi. (aProv. 22:29) Na warango mara ti fango lege tongaso, mo yeke wara lege ti bata tele ti mo tongana mo mu desizion na pekoni ti gue ti sala kua na ndo so a hunda awakua dä mingi ahon.—Ba Kusala 18:1-4.
4 Mbeni nzoni mandango agere ti mbeti na ngoi so mo ngbâ na da-mbeti ayeke mu ande maboko na mo ti kono kusala ti mo ti fango tene. Tongaso, mo sala ngangu ti wara ahingango ye so ayeke mu lege na mo ti bata tele ti mo legeoko na guengo na li ni ti mo na yâ kusala ti Jéhovah. Na salango tongaso, fade angu so mo yeke sala na da-mbeti ayeke mu maboko na mo ti wara aye ti yingo so mo zia na gbele mo.