HUNDA TI AMASEKA
Nyen la mbi peut ti sara tongana mbi ye ekole ape?
Awafango mbeti so ayeke dur mingi. Pression ti amba ti mo. Stress ti a-examen nga na gbâ ti adevoir à la maison. Tongana mo ye ekole ape, peut-être anzoni raison ayeke dä la asara si mo ye ni ape. Mbeni maseka so iri ti lo ayeke Rachela atene:
“A nzere na mbi ti gue na mbeni ndo nde, me na ekole ape. Mbi ye mingi ti gue na plage, ti passé temps na akamarade ti mbi, ti aidé aparent ti mbi ti tö kobe wala ti sara nettoyage.”
Tongana mo nga kue mo yeke na mara pensé ti Rachel so, mo peut ti bâ atemps so mo yeke passé na ekole tongana da ti kanga so mo doit ti kanga bê dä juska ti tene mo sigi na ngoi so mo wara diplôme ti mo. Nyen la apeut ti aidé mo ti duti na nzoni bango ndo na ndö ti ekole?
Mo hinga? Tongana mo yeke na nzoni bango ndo na ndö ti ekole, mo yeke maîtrisé terê ti mo na mo yeke bâ ekole ape tongana mbeni ye so mo doit gï ti kanga bê dä. Ti tene ni na mbeni lege nde, ekole ayeke mbeni ye so ayeke aidé mo ti wara akode so mo yeke na bezoin ni tongana mo kono.
Ti tene mo duti na nzoni bango ndo na ndö ti ekole, gi ti gbu li na ndö ti aye so a fa na gbe ni ge:
Mandango mbeti. Tongana mo manda mbeti nzoni, a yeke aidé ande mo ti leke akpale so mo yeke wara na place ti kua nga na yâ ti ambeni ye na yâ ti gigi ti mo ahon ti tene mo zia bê ti mo na ndö ti azo. Hunda terê ti mo: ‘Même si ambeni ye ayeke dä so asara si mbi ye ekole ape, aye ti nzoni wa la mbi yeke wara na lege ti mandango mbeti?’
Mama-ndia ti Bible: “Bata ndara ti sara ye ti nzoni, nga kode so mo yeke na ni ti gbu li nzoni”—aProverbe 3:21.
Ti hinga ye mingi na ndö ni, diko article “Nyen la mbi peut ti sara tongana mbi yeke wara ka nzoni note ape na ekole?”
Asarango ye ti mo. Anzoni sarango ye so ekole ayeke mû lege na mo ti duti na ni apeut ti aidé mo ti hinga tongana nyen la mo peut ti sara kua na ngoi ti mo, ti fa lege na terê ti mo wani nga ti duti mbeni zo so ahinga ti sara kua ti lo nzoni. Asarango ye ni so ayeke aidé mo ande na temps so mo kono. Hunda terê ti mo: ‘Na lege wa la anzoni sarango ye so ekole amû lege na mbi ti duti na ni ayeke aidé mbi ti fa lege na terê ti mbi wani nga ti duti mbeni zo so ahinga ti sara kua ti lo nzoni? Achangement wa la mbi doit ti sara na yâ ti aye so?’
Mama-ndia ti Bible: “Mara ti ngangu kua nde nde kue aga na ye ti nzoni.”—aProverbe 14:23.
Ti hinga ye mingi na ndö ni, diko article “Comment gérer mon temps ?”
Songo ti mo na azo. Nzoni songo so mo yeke na ni na amba ti mo ti ekole ayeke aidé mo ti bâ mawa ti azo nga ti ne ala. Mbeni maseka-koli, so iri ti lo ayeke Joshua, atene: “Ti manda ti sara lisoro na azo ayeke nga kota ye tongana mandango histoire nga na science. A yeke asarango ye so mo yeke na bezoin ni na yâ ti gigi ti mo.” Hunda terê ti mo: ‘Aye wa la mbi manda na ekole na ndö ti mango terê na azo, même na mbage ti ala so dutingo ti ala wala aye so ala mä na bê na ni ayeke nde na ti mbi?’
Mama-ndia ti Bible: “Ala gi lege ngangu ti duti na siriri na azo kue.”—aHébreu 12:14.
Ti hinga ye mingi na ndö ni, diko article “Tongana nyen la mbi peut ti sara lisoro nzoni ahon ti kozo?”
Gigi ti mo ti kekereke. Ekole apeut ti aidé mo ti hinga aye so mo yeke na ngangu ti sara ni nga ti tene mo zia na gbele mo a-objectif so mo peut ti atteindre ni nzoni. Mbeni maseka-wali, so iri ti lo ayeke Brooke, atene: “Mo peut ti sara mbeni formation na ndö ti mbeni mbilimbili ye, tongana ti so mbi sara, tongaso si na temps so mo wara diplôme ti mo, mo yeke prêt awe ti sara mbeni kua.” Hunda terê ti mo: ‘Tongana nyen la mbi yeke bâ lege ti mbi wani na peko ti so mbi wara diplôme ti mbi na ekole? Tongana nyen la mbi peut ti duti sûr so aye so mbi manda ayeke ye so mbi yeke na bezoin ni na yâ ti domaine ti kua ni so?’
Mama-ndia ti Bible: “Mo gbu li ti mo mbilimbili kozo si mo mû mbeni lege.”—aProverbe 4:26, Mbeti ti Nzapa, Tënë so amu fini.
a A changé ambeni iri ni.