Ekole ti Kusala ti Théocratie na Ngu 2000
1 Ekole ti kusala ti théocratie ayeke tâ deba nzoni teti azo ti Jéhovah. Na lege ti lo, na yâ ngu bale oku so ahon, azo kutu mingi amaï akode ti sala tene na gbele azo na ti fa atâ tene ti Bible. (Ps. 145:10-12; Mat. 28:19, 20) Ekole ni amu maboko nga na mo ti gue na li ni? E yeke kiri ti wara ande ye ti nzoni na pekoni na ngu 2000 tongana e mu mbage ti e kue dä na tongana e sala ye alingbi na awango so ayeke mu ande na e.
2 Awango-tene na ndo adevoir nga na ambeti ti sala na kusala ayeke na kozo lembeti ti programme ti ekole ti ngu 2000. A fa na yâ ni ngoi so amu teti mbage oko oko, ndo so amu adevoir ni dä, lege ti sala na adevoir ni na ambeni tene nde. A yeke nzoni mo mu ngoi ti diko awango-tene so nzoni, ti sala ye alingbi na ni na pekoni.
3 Dikongo Bible ti yenga oko oko: A mu aprogramme nde nde use ti dikongo Bible ti yenga. Kozoni, a yeke programme so asala ni ka lakue so amu lege ti diko ndulu na alembeti oku ti Bible. Angbongboro tene ti Bible andu dikongo ye so. Use ni, a yeke programme nde ti dikongo Bible so a hunda ti diko ndulu na alembeti bale oko. Na mungo peko ni, mo lingbi ti diko Bible kue na yâ ti angu ota. Biani, ambeni peut-être aye ande ti diko ye ahon ti so a hunda na yâ programme nde ti dikongo Bible so, mê na mbage, a yeke ngangu ande na ambeni ti mu pekoni. E wara ngia na yâ ye so e lingbi ti sala, ahon ti haka tele ti e na ambeni. (aGal. 6:4) Ye so ayeke kota ahon ayeke ti diko Tene ti Nzapa lâ oko oko.—Ps. 1:1-3.
4 Ti zia iri na Ekole ti kusala ti théocratie, a lingbi a sala tene ni na surveillant ti ekole. Ba na nene ni adevoir ti mo, na ke ni senge senge pepe. Ba ekole tongana mbeni ye so Jéhovah aleke. Leke tele ti mo nzoni, ba nda ti atene ni nzoni na sala tene na bê kue; a yeke tongaso si mo yeke wara ye ti nzoni mingi ahon na lege ti ekole so ayeke nde biani.