A Lingbi ti Tene Nyen na Zo so Atene Nzapa Ayeke Dä Pepe?
1 “Mbi mä na bê so Nzapa ayeke dä pepe,” a yeke ye so mbeni wafango ye ti Pologne atene na mbeni ita-wali so ayeke missionnaire na Afrika. Ye oko, ita-wali ni awara lege ti sala lisoro na wali so na lo zia na lo buku La vie: comment est- elle apparue? Évolution ou création? Tongana ita-wali ni akiri ti ba lo na yenga ti peko, wafango ye ni atene na lo: “Fadeso mbi mä na bê na Nzapa!” Lo diko buku Création ni kue na fadeso lo hunda mbeni mandango Bible. Tongana nyen e lingbi ti fa tene na azo so atene ala mä na bê na Nzapa pepe? Zia e ba kozoni kue anda ti ye nde nde so apusu azo ti tene so ala yeke awamabe pepe.
2 Aye so asala si zo amä na bê pepe: A dü zo pepe na bibe ti mä na bê pepe na Nzapa. Mingi ti ala ayeke kozoni na yâ ti mbeni lege ti vorongo, nga na yâ mbeni ngoi ti fini ti ala, ala mä na bê na Nzapa. Ye oko, ndali ti akota kpale ti seni, akota gingo bê ti sewa wala ti aye ti kirikiri, mabe ti ala awoko. Ti ambeni, a yeke ye so ala manda na yâ kota da-mbeti si abuba mabe ti ala na yâ Nzapa. Zia e ba ambeni tapande ti azo so amä na bê so Nzapa ayeke dä pepe na so awara mbeni kpengba mabe na yâ Jéhovah Nzapa na aga aTémoin ti lo.
3 A dü mbeni wali so alango na Paris na mbeni kobela ti bio so asala si tele ti lo anze. Atä so lo wara batême ti Catholique awe, lo tene na bê ti lo so Nzapa ayeke dä pepe. Mbeni lâ, lo hunda na ambeni mamere ngbanga ti nyen Nzapa azia lege si a dü lo na tele so anze, ala kiri tene na lo: “A yeke ngbanga ti so lo ndoye mo.” Lo ke ti yeda na tene so ayeke na lege ni pepe. E fa nga peko ti tapande ti koli so ade pendere ti kodoro ti Finlande, so awara mbeni kobela ti mi so a lingbi kaï ni pepe. A ninga pepe lo tambela na lege ti mbeni puse ti awanzen. Mama ti lo ague na lo na ndo ti mbeni Pentecôtiste, so apika kate ti lo na ndo ti akode ti lo ti savango zo. Me a ba ye ti kpene pepe, na ye so asala si pendere koli so asala nzala ti Nzapa mbeni pepe, na lo ga mbeni zo so amä na bê so Nzapa ayeke dä pepe.
4 Mbeni zo ti Honduras akono na yâ ti lege ti vorongo ti aCatholique, me lo manda senda-ndara ti dutingo ti azo nga na tene ti mabe so a tene Nzapa ayeke dä pepe. Na yengo dä kue na fango ye ti kota da-mbeti so atene azo alondo na lege ti nyama, lo zia ti mä na bê na Nzapa. Legeoko nga, mbeni wali ti États-Unis ti Amérika akono na yâ lege ti vorongo ti Méthodiste. Na kota da-mbeti, lo manda ye na ndo ti senda-bibe. Aye ti pekoni na ndo ti mabe ti lo ayeke la ni so wa? Lo tene: “Gi nze ota senge abuba mabe ti mbi kue na yâ lege ti vorongo.”
5 E ndu bê ti azo so asala biani nzala ti tene ni: Mingi ti azo so atene ala mä na bê na Nzapa pepe aye ti hinga mbeni yorö na akpale tongana seni so ayeke nzoni pepe, mango tele pepe na yâ ti sewa, ye ti kirikiri, na ambeni ye tongaso. Ala ye biani ti wara kiringo tene na mara ti ahundango tene tongaso; ‘Ngbanga ti nyen sioni ayeke dä?’ ‘Ngbanga ti nyen vundu ayeke si na azo so asala ye ti nzoni?’ na ‘Nda ti fini ayeke nyen?’
6 Mbeni koli na wali ti lo so ayeke la ni na Suisse akono na yâ bibe so atene Nzapa ayeke pepe. Na ngoi so a sala tene na ala na ndo ti tâ tene, na tongo nda ni a nzere na ala pepe. Me ala yeke la ni na akota kpale ti sewa na ala bi bê ti ala ti kangbi tele. Na ngoi ti ambeni vizite, na lege ti Bible aTémoin ni afa na ala lege ti leke akpale tongaso. Bê ti ala adö mingi na bango so Mbeti ti Nzapa amu anzoni wango, na ala yeda ti manda Bible. Songo ti ala akiri akpengba, na ala gue na li ni na lege ti yingo na ala wara batême.
7 Ye so e lingbi ti tene na mbeni zo so atene Nzapa ayeke dä pepe: Tongana mbeni zo atene na e so ti lo Nzapa ayeke dä pepe, e gi ti hinga nda ni. Mango na bê ti lo so Nzapa ayeke dä pepe aga na lege ti fango lege so lo wara, akpale so lo yeke na ni wala ndendia na afango ye ti wataka so lo ba? E lingbi ti hunda na lo: “Mo mä na bê tongaso a ninga?” wala “A sala tongana nyen si mo ga zo so amä na bê na Nzapa pepe?” Kiringo tene ti lo ayeke fa ye so e yeke tene na pekoni. Tongana a lingbi a fa na mbeni zo atene so alingbi ti gbu bê biani, buku Y a-t-il un Créateur qui se soucie de vous? alingbi ti kiri tene na lo.
8 E lingbi ti ngbâ ti sala mbeni lisoro na hundango na lo:
◼ “Mo hunda tele ti mo awe na tene so: ‘Tongana Nzapa ayeke dä, ngbanga ti nyen pono na ye ti kirikiri ayeke dä mingi na ndo ti sese?’ [E zia zo ni akiri tene.] Mbi lingbi ti fa na mo ye so Bible atene na ndo ni?” E diko Jérémie 10:23. Na peko ti so e diko versê ni awe, e hunda na zo ni bibe ti lo na ndo ni. Na pekoni, e fa na lo chapitre 10 ti buku Créateur. E tisa zo ni ti mu mbeti ni na ti diko ni.—Ti wara ambeni wango nde, ba buku Comment raisonner, al. 111-12.
9 Biani azo kue so amä na bê na Nzapa pepe ayeke yeda ande pepe na tâ tene. Ye oko, mingi ni ayeda na gingo nda ti mbeni bango ndo nde. Zia e duti na ndara, na ngangu ti ga na zo ti yeda na ni, na mingi ahon, na ngangu ti Tene ti Nzapa ti mu maboko na ala ti ba nda ti tâ tene.—Kus. 28:23, 24; aHéb. 4:12.