I Wara Ngia na yâ Kusala ti I ti Nzoni-kue
1 Ala kiri “na tâ ngia.” Mbaï ti Mbeti ti Nzapa afa na gigi bibe ti adisciple 70 na ngoi so ala yeke fa tondo ti kusala ti ala na Jésus, na peko ti mbeni ngangu kapa ti fango tene. Ala yeke la ni na kota ngia na yâ bê ti ala ti sala ye so bê ti Nzapa aye. (Luc 10:17) Ye nyen alingbi ti mu maboko na e ti hinga mara ti ngia tongaso na yâ kusala ti e ti nzoni-kue?
2 Mbeni nzoni bango ndo: Jéhovah amu na e kota matabisi ti fa na azo pendere ye so lo leke ti sala. Na lege ti fango tene ti e, e lingbi ti mu maboko na mbeni zo ti sigigi na gbe ti sioni salango ye ti sese nga na yâ akamba ti lege ti vorongo ti wataka. E lingbi ti mu na azo beku ti duti na fini na yâ mbeni sese so awusuwusu so angoro e laso ayeke duti ande dä pepe. Gbu li na ndo ngia so Jéhovah ayeke wara tongana e lu nzoni ale-kobe ti tâ tene na yâ mbeni bê so ayeke mä tene. E duti na nzoni bango ndo na sambelango ti tene yingo ti Nzapa alë na yâ e lengo so ayeke ngia, na ngoi so e yeke sala kusala ti e na bê kue.
3 Mbeni fango lege so alingbi: A lingbi ti haka bungbi so na ngoi ni Jésus amu wango na adisciple ti lo 70 na bungbi so e hiri ni laso bungbi ti kusala. Lo fa ye si ala lingbi sala kusala ti ala nzoni. (Luc 10:1-16) Laso, bungbi ti kusala ayeke fa na e tongana nyen ti si na gbele azo, ti to nda ti alisoro, ti to nda na ti manda Bible na azo na da. Na mungo bê ti e kue dä nga na salango si kusala ti e alë mingi ahon, fade e yeke tiri na bibe ti fango tene pepe na kode wala ti warango alengo mingi pepe, na fade e yeke zia na place ni bê so adö pepe nga na ngia.
4 E zia bê ti e kue na ndo kekereke: Jésus awara ngia na yâ kusala ti lo ti nzoni-kue atä apasi so lo luti na gbele ni. Ngbanga ti nyen? Ngbanga ti so lo zia lê ti lo mbilimbili na ndo adeba nzoni na amatabisi so ayeke ku lo. (aHéb. 12:2) E lingbi ti sala legeoko tongaso na ziango yingo ti e nga na bê ti e kue na ndo iri ti Jéhovah na adeba nzoni so ayeke ga na yâ fini sese ti Nzapa. Salango tongaso ayeke mu tâ ngia na a sala si kusala ti e ayeke na nda ni.
5 Ti mu na Jéhovah mbeni kusala ti nzoni-kue ayeke matabisi ti kota ahon so ayeke. Tongaso, zia e tene: “Mbi wara ngia mingi, O Nzapa ti mbi, ti sala ye so bê ti mo aye.”—Ps. 40:8, NW.