‘E Mu Ye Mingi na Azo na E Kangbi Ye na Azo’
1 A sala asiècle mingi awe, bazengele Paul ahunda na Timothée ti wa afon lo ti ‘sala nzoni, ti si singo na anzo kusala, ti duti ndulu ti kangbi ye na azo.’ (1 Tim. 6:18) Paul asû nga mbeti na aChrétien Hébreu ti glisa pepe “ti sala nzoni na ti mu ye na azo.” (aHéb. 13:16) Ngbanga ti nyen lo mu awango-tene so? Teti lo hinga so a yeke mu “gloire, yango-iri, na siriri [na] azo oko oko kue so asala nzoni.”—aRom. 2:10.
2 Teti lo yeke Wasalango Ye, Jéhovah Nzapa ayeke Mveni ti aye kue. (Apoc. 4:11) Na kite pepe, e ba na nene ni ye so lo sala teti e na lege ti ye so ayeke ti lo. Atä so azo mingi ayeke na bê ti kiri singila pepe, Lo ti Nduzu Ahon Kue amu lege na azo kue ti wara nzoni na lege ti aye so lo leke na nzobe ti bata na fini. (Mat. 5:45) Lo mu même Molenge ti lo so lo ndoye lo mingi na sadaka, si e wara fini ti lakue lakue. A lingbi ndoye so a fa na mbage ti e apusu e pepe ti fa bibe ti kiri singila na mungo ye na amba ti e?—2 aCor. 5:14, 15.
3 Ye nyen e lingbi ti kangbi na azo? A yeke tâ na lege ni ti sala kusala na amatabisi kue so e yeke na ni na mbeni lege so anzere na Nzapa. E ye biani ti mu maboko na kusala ti fango tene ti Royaume na ndo sese kue na lege ti mitele na ti yingo. Tâ tene, nzo tene ayeke mosoro ti ngele ngangu ahon so zo alingbi ti wara ni, teti a yeke “ngangu ti Nzapa ti sö azo kue”. (aRom. 1:16) Tongana e mu na bê kue ngoi na angangu ti e nze oko oko na yâ kusala ti fango tene nga na fango ye, e yeke kangbi ande mosoro ti yingo so na azo, ye so ayeke mu ande lege na ambeni zo ti wara fini ti lakue lakue.
4 Bê ti Jéhovah ayeke na ngia mingi tongana e mu maboko na azo so ayeke na mosoro mingi pepe. Lo mu zendo ti hiri deba nzoni na ndo ti e, na lo dabe ti e nga: “Na lâ ti ngonzo, mosoro asala ye pepe, me mbilimbili azi zo na yâ kui.” (aProv. 11:4; 19:17) Zia e mu maboko na kusala ti Royaume na lege ti mitele na e mu mbage ti e mingi ahon na fango nzo tene: na salango tongaso e yeke fa so e mu ye biani na azo na e yeke ndulu ti kangbi ye na ala.