‘E Wu na Nzo Kusala’

¹ Na andangba ngu ti kusala so bazengele Paul asala na wâ, lo yeke lani ndulu mingi na Timothée nga na Tite. Lo sû na ala oko oko atënë so alingbi ti kpengba zo. Lo tene na Tite so ‘‘a lingbi ala so amä na bê na Nzapa awe abata nzoni ti sala nzo kusala lakue.” (Tite 3:8) Lo tene na Timothée so a lingbi ala so azia beku na Nzapa ‘awu na nzo kusala.’ (1 Tim. 6:17, 18) So tâ pendere wango teti e kue! Ye oko, ye nyen ayeke pusu ande e ti sala anzo kusala na yâ fini ti e? Na ambilimbili kusala wa a lingbi e sala na yâ ti alango so ayeke ga?

² Ye so ayeke pusu e ti sala anzo kusala alondo na mabe so e yeke na ni na Jéhovah, nga ndoye ti e teti lo. Pendere beku so lo mû na e ayeke pusu nga e ti sala anzo kusala. (1 Tim. 6:19; Tite 2:11) Mbilimbili na nze so e yeke dä, a dabe ti e so Jéhovah ato lani Molenge ti lo Jésus na ndo sese, si Jésus alingbi lungula tënë ti wataka na li ti Babâ ti lo, nga ti zi lege ti fini ti lakue lakue na azo kue so alingbi na ni. (Mat. 20:28; Jean 3:16) Fade a yeke fa nda ti ye so polele na ngoi ti Matanga ti Mémorial ti kuâ ti Christ, na lango 28 ti nze ti mars. Na yengo da na beku so e yeke na ni ti wara fini ti lakue lakue, bê ti e apusu e pëpe ti sala kue ti ‘wu na nzo kusala’? Biani, e ye ti sala ni! Akusala wa a lingbi a sala ni fadeso?

³ Anzo Kusala ti Sala na Mars nga na Anze ti Peko: Biani, fade e gue na Mémorial, kota matanga ti ngu oko oko, so aTémoin ti Jéhovah na ndo sese kue ayeke sala. (Luc 22:19) Ye oko, e ye ti kangbi ngia ti e teti ngoi so na azo mingi nga. Bâ tondo ti kusala na yâ ti Tour ti Ba Ndo ti lango 1 ti nze ti janvier ti ngu 2002. Fade mo yeke bâ so na ngu so ahon, na yâ ti akodoro mingi na ndo sese kue, wungo ti azo so ague na Mémorial ayeke fani ota, osio, oku, wala mingi, ahon wungo ti awafango tënë ti ndo ni. A hunda biani na akongregation oko oko kue ti kangbi ambeti ti tisango ndo na azo na Mémorial na yâ ti territoire ti ala kue. Ni la, a to nda ni laso juska ti si na lango 28 ti nze ti mars, e ye ti sala ngangu kue ti tisa azo na Mémorial, na ti mû maboko na ala ti manda ye na ndo beku ti wara salut.

⁴ Ti si na nze ti avril, lâ ayeke linda hio pëpe, nga ngoi ni ayeke nzoni. Ambeni ita ayeke gbu angoi so ti fa na tënë. Tongana nyen e lingbi ti sala kusala na anzoni ngoi tongaso ti ‘wu na anzo kusala’? Na ngbango lakue ti fa nzo tënë na ngia, nga na dutingo “na nzala ti sala nzo kusala.” (Tite 2:14; Mat. 24:14) Tongana mo lingbi pëpe ti duti pionnier auxiliaire na nze ti mars, mo lingbi ti sala ni na nze ti avril, ti mai, wala use kue? Tongana mo mû kusala ti pionnier na nze ti mars, mo lingbi ti ngbâ lakue ti sala ni?

⁵ Ambeni ita so asala kua ti nginza abâ so ala lingbi ti fa tënë ngbonga oko wala mbeni ye tongaso na ngoi so ala yeke gue na kua. Ala yeke fa tënë na ndo ti lege, ala gue abâ azo so ayeke na aplace ti kua so ayeke zi hio na ndapelele. Ambeni ita ayeke mû mbage ti ngbonga so ala bata teti tengo kobe ti fa na tënë. Ambeni awara lege ti manda Bible na mbeni kamarade ti ala ti ndo ti kua na ngoi ni so. Aita-wali mingi so ayeke sala kusala na yanga-da awara lege ti bata ambeni ngoi teti fango tënë tongana amolenge ti ala ague na ekole. Ambeni ayeke zingo hio ti sala kusala ti da ti ala na kota ndapelele. Na a sala si ala yeke na ngoi mingi ahon na yâ lango teti kusala ti fango tënë na ti fango ye.​—aEph. 5:15, 16.

⁶ Peut-être mo lingbi pëpe ti mû kusala ti pionnier auxiliaire. Tongana a yeke tongaso, mo lingbi ti leke programme ti fa tënë mingi ahon. Mo lingbi ti sala ngangu kue ti sala nzoni, ti wu na anzo kusala, ti mû na ti kangbi tâ tënë na ambeni zo.​—1 Tim. 6:18.

⁷ Bi Bê na Nzo Kusala ti Salango Adisciple: Ngu oko oko, azo so asala nzala ti tâ tënë ayeke ga na Mémorial. Lege ayeke dä ti tene ambeni ita na yâ kongregation abi lê na ndo ala so aga, me so ade ti manda Bible pëpe? Lege ayeke dä ti sala afini vizite na ala ti mû maboko na ala ti gue na li ni na lege ti yingo? Peut-être mingi ti azo so aga na Mémorial ayeke gi asewa ti aita. Ambeni peut-être amanda lani Bible awe, na ala yeke gi na bezoin ti tene awa ala ti kiri ti manda Bible, na ti ga na abungbi. So tâ ngia si e yeke na ni ti bâ so ala kiri aga awakua ti Jéhovah so asala kusala na wâ na popo ti e!

⁸ Tongana e mû mbage mingi na kusala ti fango tënë na nze ti mars nga na pekoni, fade e wara azo mingi so asala nzala ti tâ tënë, na so e lingbi ti kiri ti bâ ala. Tara ti zia na ala mbeni hundango tënë na guengo ti mo. Na pekoni, tene so fade mo mû na ala kiringo tënë ni na vizite ti peko. Na salango tongaso, fade e yeke leke lege teti mbeni fini vizite. A yeke nzoni mingi ahon ti kiri hio ti bâ ala. Tongana e wara lani lege pëpe ti to nda ti mbeni mandango Bible na kozo vizite ni, e lingbi ti tara ti sala ni na vizite ti peko tongana lege ayeke dä.

⁹ Tongana e yeke fa tënë na lege, a lingbi e bi bê kue ti to nda ti lisoro na azo. Azo so asala nzala ti tâ tënë, na so aita awara ala na ngoi ti fango tënë na ndo lege amû na aita ni a-iri, a-adresse nga numéro ti singa ti ala. Tongana zo ni ayeke lango pëpe na yâ territoire ti mo, sû mbeti na ndo (S-43), na mo mû ni na secrétaire ti kongregation ti mo. Fade secrétaire ni ayeke tokua mbeti ni na kongregation ti territoire so zo ni alango dä. Tongana lo lingbi pëpe ti sala ni, fade lo tokua ni na biröo ti filiale, si a bâ lege ni. Na lege so, a lingbi ti mû maboko na lo.

¹⁰ Tongana mo yeke gi na numéro ti singa, me pëpe adresse ti zo ni, mo lingbi ti sala fini vizite na zo ni na pikango singa na lo. Leke kozoni ye so mo ye ti sala lisoro dä. Duti na buku Comment raisonner ndulu na tele ti mo ti bi lê dä hio. Ambeni ita awara aye ti nzoni na mandango Bible na azo na lege ti singa, so na popo ni a yeke wara nga azo so ayeke ngangu ti tingbi ala na kodoro. Tongana mbeni ita-wali ayeke fa tënë da na da, lo yeke hunda anuméro ti singa ti awali kue so asala nzala ti tâ tënë. Ye ti pekoni ayeke so lo wara lege ti to nda ti amandango Bible use.

¹¹ Sala Kusala Legeoko na A-ancien ti Mû Maboko na Ala So Azia ti Fa Tënë: A-ancien ayeke ndulu mingi ti bi bê na lege ti ndoye na ala so azia ti fa tënë. Mingi ti aita tongaso aleke awe na bê ti ala mveni ti kiri ti ga na abungbi ti kongregation. Ala bâ so a lingbi ala duti ndulu na bungbi ti Jéhovah, ti wara nzoni duti ti yingo so a fa pekoni na Psaume 91. Ambeni ayeke fadeso ndulu ti kiri ti fa tënë. Tongana ambeni ita so azia ti fa tënë aga na Mémorial na nze so, ala lingbi ti duti na ngia ti tene mbeni zo amanda Bible na ala. Tongana a yeke tongaso, fade a-ancien aleke aye si mbeni ita alingbi ti manda Bible na ala so aye. Tongana a tisa mo ti mû maboko na lege so, fade a yekia mungo maboko ti mo mingi.​—aRom. 15:1, 2.

¹² “Sala Nzo Kusala Lakue”: Aita mingi amû lani kusala ti pionnier auxiliaire teti nze oko wala mingi. Ala bâ so kusala ti ala ti fango tënë amaï na yâ ti anze so aga na pekoni. Ala tingbi na azo so asala nzala ti tâ tënë, so ayeke na bezoin ti tene a kiri a bâ ala. Ye so apusu ala ti sala ngangu mingi ahon ti kiri lakue ti bâ azo so. Ambeni ita ni ato nda ti manda Bible na azo, na ye so amû lege na ala ti mû mbage ti ala mingi ahon na kusala ti fango tënë.

¹³ Na mbage, ambeni ita aleke na bê ti kiri ti bâ aye so aga na kozo ndo na yâ fini ala. Ala ye ti sala ni ngbanga ti so ala wara ngia mingi ahon na yâ kusala ti fango tënë na ti salango adisciple. Ye ti pekoni ayeke so, ambeni ita azia mbage ti kusala ti ala ti nginza ti ga pionnier auxiliaire. Ambeni awara lege ti mû kusala ti pionnier permanent. Ala zia beku ti ala mingi ahon na ndo Nzapa, pëpe na aye so sese so alingbi ti mû. Ala bâ so ti ‘mû ye mingi na azo, na ti kangbi ye na azo’ ayeke ga na adeba nzoni ti Jéhovah, na akpengba beku ti ala ti wara “tâ fini biani.” (1 Tim. 6:18, 19) Biani, tongana azo mingi amû kusala ti pionnier, fade kongregation kue ayeke wara aye ti nzoni. Apionnier ayeke ndulu ti sala tënë ti aye so ala wara na yâ kusala ti ala, ti tisa ambeni ita ti mû mbage na yâ kusala ni. Salango tongaso asala si mbeni nzoni pupu ti yingo amaï na yâ kongregation.

¹⁴ Zia e kue e ‘wu na anzo kusala’ na ngoi ti Mémorial so nga na anze ti peko, na mungo mbage ti e mingi ahon na yâ kusala ti fango tënë. Zia e fa na gigi bê ti kiri singila teti ye so Jéhovah asala na mungo na e beku ti fini ti lakue lakue na ndo sese ti mbilimbili.​—2 Pi. 3:13.