Lungo ye mingi ayeke ga na gbâ ti deba nzoni
1 E kue e yeke ku kungo gango tâ tënë ti azendo so ayeke na yâ Tënë ti Nzapa. Même laso, Jéhovah amû adeba nzoni mingi so alingbi ti ga na kota ngia na yâ fini ti e. Me, ti wara biani ye ti nzoni na lege ni, a hunda mingi na e ti sala ngangu. Tongana ti so bazengele Paul atene, “zo so alu ye mingi, fade lo ko ye mingi nga.” (2 aCor. 9:6). Bâ aye use so na yâ ni e lingbi ti sala kusala na kpengba-ndia so.
2 Kusala ti e mveni: Tongana e yeke sala ngangu kue ti fa nzo tënë na azo, fade e yeke wara adeba nzoni mingi (aProv. 3:27, 28). Mbeni ye so alingbi na gonda ayeke so, ambeni ita ayeke lu aye mingi na konongo yâ ti kusala ti ala ti ga pionnier auxiliaire wala pionnier permanent. E kue e lingbi ti lu ye mingi na dutingo ndulu ti kiri ti bâ azo so asala nzara ti tâ tënë, na ti sala si nzara ni alë lengo. Na ngoi kue so lege azi, e lingbi ti fa na ala so ala lingbi ti manda Bible (aRom. 12:11). Tongana e sala ngangu e mveni na lege so, aye ti pekoni ayeke mû wâ na e, na ayeke kono ngia ti e na yâ kusala.
3 Salango kusala teti aye ti Royaume: Na yâ salango tënë ti lo, Paul afa so kamba ayeke na popo ti ‘lungo ye mingi’ na mungo ye na lege ti mitele (2 aCor. 9:6, 7, 11, 13). Laso, na lege ti mitele, aye mingi ayeke dä so e lingbi ti sala teti kusala ti Royaume. E lingbi ti mû mbage ti e na lekengo aDa ti Royaume na ti Assemblée. E lingbi nga ti duti ndulu ti sukula ni na ti sala si ando so e yeke voro tâ Nzapa dä aduti nzoni. Nde na so, e lingbi ti mû nginza si a lingbi vo na aye so kongregation ti e mveni ayeke na bezoin ni, nga ti tene a mû maboko na kusala ti fango tënë ti Royaume na ti salango adisciple na ndo sese kue. Tongana e oko oko kue e mû mbage na kusala ti e, e yeke duti ande na ngia ti bâ gbâ ti adeba nzoni so Jéhovah atuku na ndo kusala ti lo so lo mû yanga ti tene a sala ni!—Mal. 3:10; Luc 6:38.
4 Mbeti ti Nzapa awa e ‘ti sala nzoni, ti wu na nzo kusala, ti mû ye mingi na azo na ti kangbi ye na azo.’ Tongana e bata gbotongo mê so, e yeke wara adeba nzoni mingi fadeso. Na oko ngoi ni, e yeke ‘bungbi ye teti e mveni, ti leke nzo gere teti lâ ni so ayeke ga, si e lingbi gbu fini so ayeke tâ fini biani.’—1 Tim. 6:18, 19.