Akiringo Tene na Ahundango Tene ti I

◼ Zo wa alingbi ti sambela na ngoi ti abungbi ti kongrégation?

Sambela so a sala na iri ti azo ayeke mbeni kota mbage ti vorongo ti e. Ti sambela Jéhovah na iri ti kongrégation ayeke mbeni matabisi ti ngele ngangu nga na kota kungba. Teti sambela ayeke kota ye mingi, a lingbi a-ancien asala ye na ndara na ngoi so ala gi ti ba aita-koli wa alingbi ti sambela na ngoi ti abungbi. A lingbi aita-koli so asambela na iri ti kongrégation aduti aChrétien biazo so awara batême awe, so a hinga ala teti nzoni tapande ti ala na so kongrégation ayekia ala. A lingbi asambela so ala tene na lege ti yekiango ndo afa na gigi kpengba songo so ala lë na Jéhovah Nzapa. Na yâ ti La Tour de Garde ti 15 mai 1986, article so li ti tene ni ayeke “Des prières publiques qui viennent d’un coeur humble.” adabe na akota kpengba-ndia so ayeke mbilimbili nzoni teti azo so asambela na gbele azo kue na iri ti kongrégation.

Fade a-ancien ayeke hunda pepe na mbeni ita-koli so tambela ti lo ayeke na lege ni kue pepe wala so ane tele ti lo pepe, nga pepe na mbeni zo so ayeke ndulu ti dema tele ti lo hio wala so na yâ ti asambela ti lo na gbele azo kue ayeke sala tene ti akpale so lo wara na ambeni zo, ti sambela. (1 Tim. 2:8) Tongana ayeke mbeni pendere so awara batême awe, a lingbi ala ba wala lo lingbi awe ti sambela na iri ti kongrégation.​—Kus. 16:1, 2.

Ngoi na ngoi, na abungbi ti fango tene, mbeni ita-wali alingbi ti sambela tongana mbeni ita-koli so alingbi ti mu li ti bungbi ni ayeke dä pepe. Na ngoi so, a lingbi lo gbe siriki na li ti lo na mbeni lege so alingbi na ni. Tongana a ba so ita-koli oko ayeke duti ande pepe na ambeni bungbi ti fango tene, a lingbi a-ancien ahunda na mbeni ita-wali so alingbi ti mu li ni.

Mingi ni, président ti kota bungbi ayeke tene sambela ti tongo nda ni. Ye oko, na ngoi ti ambeni bungbi, tongana aita-koli so alingbi ayeke mingi, a lingbi ti tisa mbeni zo nde na ita so amu li ti bungbi ni wala so asala ndangba diskur ni, ti tene kozo sambela wala ti nda ni. Na yâ aye kue, a lingbi a sala tene ni kozo na ita so ayeke tene ande sambela na ngoi ti bungbi si lo lingbi ti gbu li ti lo nzoni na ndo ye so lo yeke tene ande. Tongaso lo lingbi ti tene mbeni sambela so ayeke na lege ni na so alondo na bê, alingbi na bungbi ni.

A hunda pepe ti tene asambela ni ayo. Tongana mbeni ita-koli atene mbeni sambela na gbele azo kue, ayeke nzoni lo londo, na lo sala tene ngangu nga polele. Na lege so, fade azo kue so aga ayeke mä sambela ni na alingbi ti tene na bê kue “Amen” na nda ni.​—1 aChron. 16:36; 1 aCor. 14:16.