Akota Bungbi: Ngoi ti Ngia!
1 Akota bungbi ti aTémoin ti Jéhovah ayeke angoi ti kota ngia. Teti angu ngbangbo oko na ndo ni, abungbingo tele so asala ye na ndo ti maïngo ti aye so a ba na yâ bungbi ti e laso. A to nda ni na akete ye, e ba kota deba nzoni ti Jéhovah na ndo kusala ti e na ndo sese kue. Na kozo kota bungbi ti e so a sala na ngoi ti laso na Chicago, Illinois, na ngu 1893, wungo ti ala kue so na popo ti azo 360 so aga na kota bungbi, so amu tele ti ala na Jéhovah na lege ti batême ayeke la ni 70. Azo kue so na ndo lê sese kue aga na Kota Bungbi ti District “Awasalango Ye Alingbi na Tene ti Nzapa” ayeke la ni 9 454 055 so na popo ni azo 129 367 awara batême. So tâ pendere nda ti tene ti duti na ngia!
2 Ngbele ye na ngoi so a sû Bible, abungbingo tele ti azo ti Nzapa aduti mbeni kota lege ti mu fango ye so alondo na Jéhovah. Na ngoi ti Ezra nga na ti Nehémia, azo adengi mê na dikongo Ndia “na ndapelele juska na kota lâ.” (Néh. 8:2, 3) Teti so ala wara mbeni nzoni gbungo nda ti Ndia na ngoi ni so, azo ni asala “ngia mingi.” (Néh. 8:8, 12) E kue e yeke na ngia so akota bungbi ayeke mbeni pendere ngoi teti e ti wara nzoni fango ye nga na kobe ti yingo so Jéhovah amu “na tâ ngoi ni” na lege ti “ngba ti be-ta-zo na ti ndara.” (Mat. 24:45, NW) Teti so giriri Jésus atene a lingbi zo aduti na fini na lege ti ‘tene kue so asigigi na yanga ti Jéhovah,’ akota bungbi ayeke kota ye teti nzoni ti e na lege ti yingo.—Mat. 4:4.
3 Ngangu kue so zo asala ti duti dä ayeke ye senge pepe: A lingbi zo kue na popo ti e azia na gbele lo ti ga na alango kue ti Kota Bungbi ti District “Awafango Tene ti Nzapa” ti ngu so. A lingbi e leke ti ga hio na ndapelele lâ oko oko na ti ngbâ juska na tenengo “Amen!” na sambela ti nda ni. Ti sala ni, peut-être a lingbi e gbian programme ti e. Ti wara lege ti zia kua ti nginza ti gue na kota bungbi alingbi ti ga na ambeni kpale. A lingbi e luti ngangu na ndo aye so e leke na bê, pepe ti zia si aye ni aga gi tongana pasa ayeke dä. Tongana e yeke na bezoin ti wara mbeni ndo ti lango na/wala mbeni kutukutu, a lingbi e ba lege ni hio kozoni. Atä angangu wa e sala, e yeke wara nzoni dä.
4 Azo ti Jéhovah ahaka pepe adeba nzoni so ala wara na guengo na mbeni kota bungbi na wungo ti nginza so ala mu ndali ni. Ba atapande ti ambeni ita so aleke na bê ti ala ti gue na Assemblée Internationale ti aTémoin ti Jéhovah, “Ye so Bê ti Nzapa Aye,” so a sala na ngu 1958 na gbata ti New York. Mbeni ita-koli akanga ndokua ti lo ti lekengo ada teti ayenga use ti mu tele ti lo mveni na mungo maboko so a hunda na ti gue na kota bungbi. Mbeni ita-koli na Îles Vierges akä sese ti lo so asala hectare oku si sewa ti lo kue, azo omene, alingbi ti gue dä. Mbeni koli na wali ti lo so ala ade pendere akä mangboko ti ala si ala lingbi ti gue na amolenge ti ala ota kue, so kozo ni ayeke na ngu mbasambala na tanga ni ayeke na nze use, na assemblée ni. Na Californie, a tene na akoli ota so ayeke aita ti mitele so tongana ala ga na kua ti ala pepe, ala yeke wara ni mbeni pepe tongana ala kiri. Ye oko, ye so akanga lege na ala pepe ti gue na kota bungbi so ala lingbi ti glisa pepe.
5 Jéhovah afuta ngangu so e sala na bê kue: Jéhovah aba na ahiri deba nzoni na ndo angangu so azo ti lo asala. (aHéb. 6:10) Na tapande, na Kota Bungbi ti ngu 1950 “Maïngo ti Théocratie”, ala so ague na kota bungbi ni amä mbeni diskur so ala ngbâ ti dabe na ni “Afini Bungbi ti Aye.” Ita Frederick Franz azingo nzala ti ala kue na hundango tene so: “Bungbi so ayeke duti ande na ngia ti hinga so ge, na lakui so, na popo ti e, mbeni wungo ti azo ayeke dä so ayeke ga ande amokonzi ti fini sese?” Na peko ti angu 50 na ndo ni, e ngbâ ti wara ngia na lege ti gbungo nda ti Psaume 45:17 (45:16, NW) so polele.
6 Na peko ti so lo gue na kota bungbi ti ngu so ahon, mbeni mokonzi ti sewa so bê ti lo asi na tene ti singila asû atene so: “Aita, i yeke hinga lâ oko pepe tongana nyen kota bungbi so asö fini. Sewa ti mbi ague na mbeni gbata teti gingo kua, me na nda ni dutingo ti e na lege ti yingo ague kirikiri. . . . E ba na nene ni pepe akungba ti e ti Chrétien. E zia même biaku lege ti gue na abungbi nga ti fa nga tene. . . . Kota bungbi so akiri akpengba e, na e kiri e zia na gbele e aye ti yingo na e yeke leke aye ti wara ni.”
7 Jéhovah ayeke mu na e kobe ti yingo so atia e. Lo gbala mbeni table so asi singo na akobe na ngoi ti akota bungbi ti e. Fade yekiango mingi aye so Nzapa amu na e ayeke pusu e ti tene oko tene so Corneille atene giriri tongana bazengele Pierre ague ti ba lo: “E kue ayeke na ndo so na lê ti Nzapa ti mä ye kue so Seigneur akomande mo ti tene.” (Kus. 10:33) Zia e leke na bê ti ga “na ndo so na lê ti Nzapa” na ambage kue ti Kota Bungbi ti ngu so, “Awafango Tene ti Nzapa” na ti sala ngia!