Kota Bungbi ti Lango Oko: Fini Kapa Ni

Kota li ti tene ti kota bungbi ti lango oko teti fini ngu ti kusala ayeke na mbeni kpengba versê ti Bible so ayeke na gunda ni: “I Mä Nzapa, I Ke Diable.” (Jacq. 4:7) A yeke nzoni fango lege teti angoi ti ngangu so! Teti so e bata komandema ti Nzapa, e tingbi lê na lê na Satan. Fade kapa ni ayeke fa na e tongana nyen ti luti na gbele asioni ye so Zabolo aleke ti futi mabe ti e. Ambeni nzoni ye wa ti ngele ngangu e yeke wara ande na lege ti yingo na kota bungbi so?

Fade surveillant ti circonscription ayeke fa tongana nyen diskur “Azo ti Sewa Afa na Gigi Mango Yanga ti Nzapa” akpengba asewa ti luti na gbele angangu ti sese so. Kozo diskur ti lango ni ti wamungo diskur so aga gango, “Ti Ke Zabolo Aye ti Tene Nyen,” ayeke fa ande ngbanga ti nyen na tongana nyen a lingbi e sala kota ngangu ti ke amayele ti Satan ti buba dutingo ti e na lege ti yingo. A leke ambage use mbilimbili teti apendere, so a lingbi a sala nga hange na ye so Zabolo aleke ti sala. A-Chrétien mingi so ayeke abiazo fadeso ake anzala ti sese na ngoi so ala de pendere. Fade e yeke duti na ngia ti mä ambeni ti aye so asi na ala.

A hunda na azo kue ti duti na gbe ti yanga-ti-komande. Tongaso, hunzingo ti diskur ti wamungo diskur so aga gango ayeke gboto lê ande na ndo ti aye osio, so na yâ ni a lingbi e fa na gigi mango yanga ti Nzapa: (1) na mbage ti angorogbia, (2) na yâ ti kongregation, (3) na yâ kusala ti mitele, nga (4) na yâ ti sewa. So tâ pendere kapa!

A lingbi ala so aye ti wara batême na kota bungbi ti lango oko so asala tene ni fade fade na surveillant-président. Tongana a fa ni, a lingbi e kue e sû lango ni na yâ ti calendrier ti e na e leke ti gue na kapa ti kota bungbi ni kue. Adeba nzoni so e wara ayeke ninga ande teti lakue lakue tongana e ngbâ ti mä Jéhovah lakue lakue.