Mo Yeke Sala Kusala ti Mo Kue?
1 Na yâ buku ti Kusala, a tene na e so adisciple ti Jésus asala kusala ti ala na salango “tene ti témoin kue” na azo. (Kus. 2:40, NW; 8:25; 28:23) A duti biani ye so bazengele Paul azia na gbele lo ti wara. (Kus. 20:24) A yeke pepe ye so mo zia nga na gbele mo tongana wakua ti nzo tene? Tongana nyen mo lingbi ti sala ni?
2 Leke fango ye ti mo: Ti bata si mo sala tene ti témoin nzoni na yâ fango tene, lekengo tele ayeke kota ye. A yeke biani tâ tene tongana mo fa apériodique, teti so atene ti yâ ni ayeke gbian lakue. Ti mu maboko na e ti sala kusala nzoni ahon, numéro ti Kusala ti Royaume so ayeke na mbeni fini ye: kete article so ayeke na gati ti mbeti ni, so afa molongo ti atapande ti fango ye teti Tour ti Ba Ndo na Réveillez-vous! so asigigi ade ti ninga pepe. Fade a yeke gboto lê na ndo ti mbeni kota tene, so asi na ngoi ni na so ayeke gbu bê ti azo mingi, teti numéro oko oko kue. Tongana nyen mo lingbi ti leke andulu fango ye so?
3 Soro mbeni kode ti fango ye so mo ba a yeke lë ande lengo mingi ahon na yâ territoire ti mo. Diko article ni nzoni, na sû na mbeti angbongboro tene so alingbi ti zingo nzala ti azo. Gi mbeni versê so a fa pekoni na yâ ti périodique ni so ague oko na lisoro ni na so mo lingbi ti diko na zo ni. Zia na ndo ni mbeni kete tene ti nda ni ti pusu zo so amä mo ti diko périodique ni na, tongana a lingbi na ni, sala mbeni ndulu tene ti fa na zo ni so lo lingbi ti mu mbeni contribution teti kusala so aTémoin ti Jéhovah asala na ndo ti sese kue. Fadeso, tara fani mingi peko ti fango ye ti mo.
4 Leke ti sala kusala na Bible: Tongana mo leke tele ti mo nzoni, fani mingi mo lingbi ti sala kusala na mbeni versê na yâ fango ye ti mo. Na tapande, na ando mingi awafango tene so ayeke na kode alë anzoni lengo tongana ala gue na yanga-da ti zo ni na Bible na maboko, ala balao lo, na ala tene:
◼ “E yeke hunda na azo tongana ala mä na bê na ye so . . .” Diko Genèse 1:1, nga na pekoni hunda: “Mo yeda na tene so?” Tongana zo ni ayeda, na pekoni tene: “Mbi nga mbi yeda na ni. Ye oko, mo tene ti mo so tongana Nzapa aleke aye so kue, lo yeke nga na gunda ti ye ti sioni?” Na peko ti so mo mä kiringo tene ti lo, diko Zo-ti-fa-tene 7:29. Zi buku Hingango Ye na lembeti 71, na diko paragraphe 2. Wa lo ti diko buku ni. Tongana zo ni ayeda pepe na tene ti Genèse 1:1, wa lo ti diko buku Création.
5 Ba peko ti nzala kue so a fa: Mo lingbi pepe ti sala kusala ti mo kue tongana mo ba pepe peko ti nzala so a fa na gigi. Tongana mo wara mbeni pendere lisoro, atä mo zia apériodique wala mbeni mbeti nde wala mo zia ni pepe, sû na mbeti iri nga na adresse ti zo ni. Na bê kue tara ti lë nzala ti zo ni na kiringo ti ba lo hio. Glisa pepe ti hunda ti manda Bible na lo.
6 Adisciple ti kozo siècle ahinga la ni so Jésus amu yanga na ala ti “sala tene ti témoin [“kue,” NW].” (Kus. 10:42) Oko komandema so andu e, teti a yeke gi oko lege so e lingbi ti sala na adisciple. (Mat. 28:19, 20) Zia e sala ngangu mingi ti sala kusala ti e kue.—2 Tim. 4:5.