“Sala ye ti nzoni na azo kue”

¹ “Fa Tënë ti Nzapa Kue” na ‘E Wu na Nzo Kusala’. A yeke lani akota li ti tënë ti supplément ti Kusala ti Royaume so e bâ ni na nze ti février nga na mars ngu 2002 (aCol. 1:25; 1 Tim. 6:18). Na yâ ti asupplément so, a wa e ti sala ngangu kue ti mû maboko na azo so asala nzala ti tâ tënë ti ga na Mémorial, ti mû maboko na aita so azia ti fa tënë ti kiri ti mû mbage ti ala na akusala ti kongregation, na ti mû maboko na amolenge ti e nga na awamandango Bible so alingbi fadeso awe ti komanse ti fa nzo tënë. Kite ayeke pëpe so e wara ngia na yâ anzo kusala so kue e sala. Fadeso, “tongana e wara lege ni, a lingbi e [ngbâ lakue ti] sala ye ti nzoni na azo kue”.​—aGal. 6:10.

² Hiri ala ti kiri ti ga: Atondo afa so, na Bê nga na Do ti Afrika, wungo ti azo ahon saki ngbangbo omene so ayeke pëpe awafango nzo tënë ague lani na Mémorial na ngu so ahon. Teti so gango ti ala na Mémorial afa na gigi so ala sala kamême nzala ti tâ tënë, ye nyen a lingbi e sala ti zingo nzala ti ala, so ‘bê ti ala alingbi na ye so a hunda teti fini ti lakue lakue’ ti ga ‘awamabe’? (Kus. 13:48). E wa ala ti kiri ti ga na abungbi ti kongregation fade fade.

³ Ngbanga ti nyen ti hiri pëpe mbeni zo so asala nzala ti tâ tënë ti gue na Mandango Buku ti Kongregation ti mä mbeni nzoni lisoro na ndo prophétie ti Isaïe? Tongana mo yeke mbeni fami ti zo ni wala kamarade ti lo, na mo yeke na devoir na Ekole ti Kusala ti aChrétien na yâ ti alango so ayeke ga, mo lingbi ti hiri lo ti ga ti mä diskur ti mo. Fa na lo iri ti adiskur so ayeke mû na yâ ti ayenga so ayeke ga (A lingbi a wara lakue na ndo tableau ti ambeti fini programme ti adiskur ti kongregation. Zia si ngbele ni angbâ dä pëpe). Gi alege nde nde ti zingo na yâ zo ni nzala ti voro Jéhovah. Biani, tongana mbeni ita na yâ kongregation ade ato nda ti manda Bible pëpe na zo ni, mo lingbi ti mû maboko na lo na lege ti nzobe.

⁴ Ngbâ lakue ti mû maboko na aita so azia ti fa tënë: Mingi ti azo so aga na Mémorial amû tele ti ala na Jéhovah awe. Ye oko, ala zia ti fa nzo tënë na wâ. Na mbage, bazengele Paul awa e ti “sala ye ti nzoni . . . na aita ti e awamabe.” (aGal. 6:10). Tongaso, a lingbi aita so azia ti fa tënë aduti akozo zo so e bi bê na ala.

⁵ Peut-être ambeni mingi ayeda na wango so a-ancien na ambeni ita amû na ala ti kiri ti sala kusala. Tongana a-ancien ahunda na mo ti mû maboko na mbeni ita so akiri ti mû mbage ti lo na fango tënë na wâ, hinga so fade ndoye ti mo mveni na mbage ti Jéhovah nga na mbage ti kusala ti fango tënë ayeke kpengba bê ti lo. Fa na lo tongana nyen mo yeke fa tënë na ambage nde nde ti kusala ni, si lo lingbi ti wara ngia na yâ ni. A yeke mû ande nga maboko na lo ti ngbâ lakue ti fa tënë, na ti wara adeba nzoni ti Jéhovah.

⁶ Sala si afini zo ato nda ti fa tënë nzoni: Na ngoi so mbeni wali ahinga so ade ti ninga pëpe lo wara tâ bungbi ti Nzapa, lo ye ti to nda ti fa tënë fade fade. Tongana a fa na lo awe ye so a hunda na mbage ti lo, lo tene: “Mbi ye ti komanse ni fade fade.” Tongana a yeda na mbeni zo so mo yeke manda Bible na lo ti komanse ti fa tënë, mû maboko na lo ti bâ nene ti “to nda ni fade fade”, na ti mû lege na lo ti to nda ni nzoni. Mû maboko na lo ti leke tele nzoni na ti mû mbage lakue na kusala ti fango tënë yenga oko oko.

⁷ Tongana a yeke molenge ti mo mveni si aga mbeni fini wafango tënë so ade ti mû batême pëpe, sala kusala na lo si lo lingbi gue na li ni alingbi na ngu nga na ngangu ti lo. Na lege ti kete mungo maboko ti mo so, lo lingbi mbeni lâ ti dö bê ti mo tongana mo bâ kode so lo yeke na ni ti ga na mbeni zo ti sala lisoro, ti diko aversê, na ti zia mbeti na azo. Tongana lo wara mbeni zo so ayeda na fango tënë ti lo, leke lo ti sala mbeni fini vizite, na ti kiri lakue ti mû maboko na zo ni.

⁸ Kono yâ ti kusala ti mo mveni: Dutingo ti mo amû lege na mo ti kono mungo mbage ti mo na yâ kusala ti fango tënë même na anze so aga na peko ti ngoi ti Mémorial? Mo lingbi ti zia mbeni ngbonga oko wala use na ndo ti angbonga so mo yeke sala ka yenga oko oko? Mo yeke bâ kozoni na yâ ti kalendrier lawa si mo lingbi ti kiri ti mû kusala ti pionnier auxiliaire? Wala mo lingbi ti leke dutingo ti mo ti mû kusala ti ngoi kue? Angangu kue so e yeke sala na yâ fango tënë alingbi ti mû maboko na mbeni zo ti yeda na tâ tënë! (Kus. 8:26-39). Na ngoi so e yeke ku kungo alango so ayeke ga, zia e “gi lege lakue ti sala nzoni na popo ti i na azo kue.”​—1 aThes. 5:15.

[Encadré na lembeti 3]

Ngbâ lakue ti mû maboko na:

□✔ Azo so aga na Mémorial

□✔ Awafango tënë so akiri ti sala kusala na wâ

□✔ Afini wafango tënë so ade ti mû batême pëpe