“Fa Tënë ti Nzapa Kue”

¹ Tongana mo yekia na bê kue mbeni ye ti nzoni so mo wara, mo yeke fa ni na lege ti bango ndo na akusala ti mo pëpe? Biani mo yeke sala tongaso! Na ndo nzoye na nzobe so Jéhovah afa na azo, bâ tongana nyen bazengele Paul asala ye na gbe ni. Lo tene: “Singila na Nzapa teti matabisi ti lo so lo mû senge senge na so a lingbi ti fa pekoni kue pëpe”! ‘Matabisi so a mû senge senge’ so andu nyen? “Kota grâce ti Nzapa” kue so a fa na e, so kota fä ahon kue ayeke matabisi ti Molenge ti lo mveni tongana kota ngele teti siokpari ti e.​—2 aCor. 9:14, 15, NW; Jean 3:16.

² Tënë ti singila ti Paul aduti lani gi tënë ti yanga senge? Oko pëpe! Lo fa tâ bê ti kiri singila ti lo na alege mingi. Lo bi bê ti lo lani mingi na ndo nzoni duti ti afon lo Chrétien na lege ti yingo na lo ye ti sala ye kue so lo yeke na ngangu ti sala ti mû maboko na ala ti wara ye ti nzoni mingi na lege ti nzobe ti Nzapa. Na ndo azo tongaso, Paul atene: “I ga azo so e ndoye i mingi, tongaso nzala ti sala nzoni na i asala e, na e yeke na ngia ti mû na i gi Tene-nzoni ti Nzapa pëpe, me âme ti e mveni nga.” (1 aThes. 2:8) Nde na mungo maboko na ala so aga mbage awe ti kongregation ni ti wara biani lege ti salut ti ala, Paul afa nzo tënë lakue, lo tambela teti akilomètre saki mingi na ndo sese nga na ndo kota ngu ti ingo ti wara azo “so bê ti ala alingbi na ye so a hunda teti fini ti lakue lakue.” (Kus. 13:48, NW) Tâ bê ti kiri singila ti Paul teti ye kue so Jéhovah asala teti lo apusu lo “ti fa tënë ti Nzapa kue.”​—aCol. 1:25.

³ Bê ti kiri singila ti e teti ye kue so Jéhovah asala teti e apusu e pëpe ti mû maboko na lege ti yingo na azo so a lingbi ti wara ni na yâ kongregation ti e? (aGal. 6:10) Na bê ti e apusu e pëpe ti mû mbage mingi ahon na yâ kusala ti fango nzo tënë ti Royaume na yâ territoire ti e kue?​—Mat. 24:14.

⁴ Mbeni Lege ti Fa Bê ti Kiri Singila: Ngu oko oko Matanga ti Dango Bê na kui ti Christ amû na e mbeni lege so ayeke nde ti fa bê ti kiri singila teti ye so Jéhovah na Jésus asala teti e. A yeke pëpe gi mbeni bungbi senge na popo ti abungbi mingi wala mbeni ngoi ti dabe na mbeni ye so asi. Jésus atene: “I ngbâ ti sala ye so ti dabe i na mbi.” (Luc 22:19, NW) Matanga ti Dango Bê na kui ti Christ ayeke mbeni ngoi ti gbu li na ndo mara ti zo so Jésus ayeke. A yeke mbeni ngoi ti hinga so lo yeke biani na fini na lo yeke sala kusala laso, na so a mû na lo gloire na ngangu ti komande ti gbia teti fini ti lo ti be-ta-zo nga sadaka ti lo. Dango Bê so ayeke nga mbeni lege so azi ti fa mango yanga ti e na mungo li ni ti Christ na ngoi so lo yeke fa lege na aye nga na akusala ti kongregation ti aChrétien. (aCol. 1:17-20) A lingbi azo ti Nzapa kue aga na yekiango ndo na Matanga ti Dango Bê na kui ti Christ. Na ngu so a yeke sala ni na peko ti lindango ti lâ na jeudi lango 28 ti mars, ngu 2002.

⁵ Ndali ti ngangu kusala so a sala kozoni na dango bê na Mémorial ni na ngu so ahon, a wara na Bê Afrika mbeni fini kota wungo ti azo 14 392 so aga na Mémorial ni. Fade wungo ti azo kue so ayeke ga ande na Mémorial na ngu so ayeke duti oke? A yeke luti mingi na ndo ‘ngangu kusala so e sala nga na tiri ti e,’ ti mû maboko na azo mingi ti ga.​—1 Tim. 4:10, NW.

⁶ Nde na gango na Kobe ti Lakui ti Seigneur, e lingbi peut-être ti kono yâ ti kusala ti e ti fango tënë. E yeke na kite pëpe so aita-koli na aita-wali mingi ayeke mû ande kusala ti pionnier auxiliaire teti nze oko wala ahon so. Ngu oko oko teti angu oku so ahon, Bê Afrika awara ndulu na azo 414 so amû kusala ti pionnier auxiliaire na ngoi ti Mémorial, ti londo na mars ti si na mai. Mo lingbi ti leke aye ti mo ti mû pendere kusala ti pionnier auxiliaire na ngu so? A yeke duti ande mbeni pendere lege ti fa tâ bê ti kiri singila ti mo teti matabisi ti ndoye so Nzapa amû so ayeke sadaka ti Christ. Mo lingbi ti duti na beku ti wara deba nzoni ti Jéhovah, tongana ti so aye so aga na pekoni afa.

⁷ Mbeni ita-wali so asala kua ti ngoi kue asû mbeti ti fa ye so asi na lo tongana lo mû kusala ti pionnier auxiliaire na mars so ahon: “Kusala ti Royaume ti février ti ngu 2001 awa azo kue so dutingo ti ala alingbi ti mû kusala ti pionnier auxiliaire na ngoi ti Mémorial. Teti so mars ayeke na asamedi oku, a lingbi na kapa ti mbi nzoni. Tongaso mbi yeda ti sala demande ni.” Tongana lo to nda ti nze ni, lo zia na gbele lo ti sala kue ti to nda ti mbeni mandango Bible. Lo sala ni? Biani, na yâ angbonga 52 ti lo ti fango tënë na nze so! Tënë ti lo ti nda ni ayeke nyen? “Apendere ye ti nzoni ayeke dä tongana e sala kota ngangu.”

⁸ Aye ti nzoni wa azo ti mbeni sewa so amû kusala ti pionnier legeoko alingbi ti wara? Mbeni sewa ti azo osio so amû ni na avril so ahon abâ so a duti mbeni nze so ala yeke glisa ni lâ oko pëpe. Mama ni atene: “So tâ ngia si e wara lâ na lâ, teti kusala ni abungbi e oko! Alisoro na ndo kusala ti fango tënë ti e ti lâ oko oko asala si ngoi ti tengo kobe ti e amû ngia mingi.” Molenge-koli ni atene: “Mbi yeke lani na ngia ti fa tënë legeoko na Babâ na yâ ti yenga ni, so mingi ni a yeke lango ti kua ti lo.” Babâ ni atene nga: “Teti so mbi yeke beli ti sewa, tele ti mbi anzere ti hinga so e yeke sala kua legeoko na yâ kusala ti kota ahon ti ngoi ti e.” Sewa ti mo alingbi ti sala kusala ti pionnier legeoko? Ngbanga ti nyen pëpe ti sala lisoro na sewa ti bâ wala lege ayeke dä teti azo ti da ti mo kue ti mû kusala ti pionnier auxiliaire na ngoi ti Mémorial so?

⁹ E Lingbi ti Sala si Mars Ahon Tanga ti Anze Kue? Na octobre ti ngu 2000, Kusala ti Royaume ahunda tënë so: “E Lingbi ti Sala si Octobre 2000 Ahon Tanga ti Anze Kue?” Kiringo tënë ni aduti lani so wa? A wara gbâ ti afini kota wungo. A wara fini kota wungo ti azo 2 410 na Togo na ti azo 196 na Sénégal so amû kusala ti pionnier auxiliaire na yâ nze oko. Nga, a wara afini wungo ti angbonga, ti ziango ambeti na tïtî azo, na ti afini vizite. Mo dabe mo na kota ngia so akusala nde nde ti yingo aga na ni na yâ kongregation ti mo na nze so ayeke nde? E lingbi ti sala kusala ti lingbi na ni wala même ti hon ni na ngu so? Tongana e kue e sala ngangu, mars 2002 alingbi ti ga “Nze ti E So Ahon Tanga ti Anze Kue.” Ngbanga ti nyen mars?

¹⁰ Anda ti tënë ayeke use so a lingbi mars aduti mbeni nze ti kusala so ayeke nde. Kozoni kue, a yeke sala Mémorial ni ndulu na nda ti mars, na kusala ni a yeke zi lege na e kota ti tisa azo mingi. Use ni, na ngu so mars ayeke na anda-yenga oku, ti samedi na dimanche kue, so asala si a yeke duti ande ngangu pëpe na azo so asala kua wala so ague na ekole ti mû kusala ti pionnier auxiliaire. Ngbanga ti nyen pëpe ti duti fadeso na ti leke mbeni kapa so alingbi na mo, na salango kusala na kalendrier so ayeke na yâ supplément so? Kusala ti pionnier auxiliaire alingbi ti kpengba oko pëpe tongana ti so mo bi bê dä. Na tapande, tongana mo leke na yâ kapa ti mo ti fa tënë angbonga 8 yenga oko oko, mo yeke leke ti wara gi ambeni ngbonga 10 na yâ tanga ti alango ti nze ni ti wara angbonga 50 so a hunda.

¹¹ Ye nyen a-ancien alingbi ti sala ti mû maboko na azo kue ti kongregation ti “fa tënë ti Nzapa kue”? A lingbi ala kpengba wâ ti aita na lege ti abungbi nga alisoro so ala yeke sala na ala. Asurveillant ti Mandango Buku ti Kongregation nga na awamungo maboko ti ala alingbi ti londo ti sala tënë na zo kue so ayeke na yâ bungbi ti ala nga ti duti ndulu ti mû maboko na ala. Peut-être a hunda ti tene gi ambeni kete tënë ti nzobe so akpengba zo wala ti mû ambeni nzoni wango. (aProv. 25:11) Fade azo mingi ayeke bâ so na gbiango ambeni kete ye na yâ kapa ti ala, ala lingbi ti wara ngia ti sala kusala tongana apionnier auxiliaire. Na yâ akongregation nde nde, mingi ti a-ancien na aserviteur ti mungo maboko nga na awali ti ala azia mbeni pendere tapande na mungo kusala ti pionnier auxiliaire legeoko na ngoi ti Mémorial. Ye so apusu gbâ ti awafango tënë ti bungbi legeoko na ala. Ndali ti akatikati ti seni wala ambeni ye nde, ambeni wafango tënë alingbi peut-être pëpe ti mû kusala ti pionnier ni, me a lingbi ti wa ala ti fa na gigi bê ti kiri singila ti ala na salango ye kue so ala lingbi ti sala na yâ kusala ni legeoko na tanga ti azo ti kongregation ni.

¹² Nzoni tambelango ti aye aluti gi na ndo nzoni lekengo ye ti a-ancien. A lingbi ala leke kapa teti fango tënë na angoi so alingbi na azo na yâ yenga ni kue. Tongana lege ayeke dä, fade surveillant ti kusala ni amû kozoni ambeni ita-koli so ayeke na alengo so alingbi ti mû li ni na yâ abungbi kue teti fango tënë. Fade a yeke hunda ti leke tele nzoni si abungbi so ahon apenze-ngbonga 10 ti si na 15 pëpe, so na yâ ni a yeke kangbi yâ ti azo, a yeke fa territoire ni, na a yeke sala mbeni sambela. (Bâ Akiringo Tënë na Ahundango Tënë ti I na yâ Kusala ti Royaume ti septembre, ngu 2001.) A lingbi a zi nda ti kapa ti kusala ti nze ni polele na kongregation na a zia ni na ndo ti tableau.

¹³ Fade a yeke wara mbeni territoire so alingbi. Fade surveillant ti kusala atingbi nga na ita so abâ lege ti aterritoire ti leke si a sala kusala na yâ territoire so a yeke fa ka tënë dä mingi pëpe. Fade a yeke gboto lê mingi na ndo fango tënë na azo so a wara ala pëpe na yanga-da, nga fango tënë na ndo ti lege, na yâ ti a-magasin, na fango tënë na lakui. Na ndo so a hunda, a lingbi ti mû maboko na ambeni wafango tënë ti fa tënë na lege ti singa.

¹⁴ Mû Maboko na Ala ti Kiri ti Fa Tënë: Ambeni zo ayeke dä na yâ territoire ti mo so azia ti fa tënë? Azo so ayeke lakue mbage ti kongregation ni na a lingbi a mû maboko na ala. (Ps. 119:176) Teti so hunzingo ti ngbele sese so ayeke ndulu mingi na so fini sese ayeke tâ na gbele e, e yeke na tâ nda ti tënë ti sala ngangu kue ti mû maboko na azo so azia ti fa tënë. (aRom. 13:11, 12) Na yâ angu oku so ahon, na Cameroun azo ahon 350 ngu oko oko ayeda na maboko so a mû na ala na akiri afa tënë. E lingbi ti sala nyen ti mû maboko na azo mingi ahon ti kiri ti zingo ndoye nga beku so ala yeke na ni na tongo nda ni?​—aHéb. 3:12-14.

¹⁵ Fade bungbi ti a-ancien ayeke sala lisoro na ndo lege so ala lingbi ti mû maboko na azo so azia ti fa tënë na yâ angu so ahon. (Mat. 18:12-14) Fade secrétaire ni ayeke bâ carte ti kusala ti awafango tënë ti bâ azo kue so azia ti fa tënë. Fade a yeke leke ye mbilimbili ti mû maboko na ala na lege ti vizite pastorale. Peut-être mbeni ancien aye ti sala vizite na mbeni wafango tënë ndali ti so lo hinga lo nzoni kozoni wala lo sala giriri kusala na lo mingi, wala a lingbi ti hunda na ambeni wafango tënë nde ti mû maboko. Peut-être ala manda ye lani na zo so azia awe ti fa tënë na ala yeda na matabisi ti mû maboko na ngoi so a hunda ni. Beku ayeke dä so bê ti mingi ti ala so azia ti fa tënë ayeke pusu ande ala ti kiri ti to nda ti fa tënë ti Nzapa. Tongana a bâ so ala lingbi kue awe, mbeni ngoi ti nzoni ahon ayeke dä pëpe gi ti to nda ni na ngoi ti Mémorial ni!​—Bâ Akiringo Tënë na Ahundango Tënë ti I na yâ supplément ti Kusala ti Royaume ti janvier, ngu 2001 ti wara anzene nzene tënë na ndo ni.

¹⁶ Ambeni Alingbi Kue ti Fa Tënë? Jéhovah angbâ lakue ti hiri deba nzoni na ndo azo ti lo na salango si “aye ti pendere ti amara kue” alï na yâ bungbi ti lo. (Hag. 2:7, NW) Ngu oko oko, azo ngbangbo mingi alingbi kue ti ga awafango tënë so ade awara batême pëpe. Ala yeke azo wa? Amolenge ti aTémoin ti Jéhovah nga na awamandango Bible so ague na li ni. Tongana nyen e hinga so ala lingbi kue awe ti ga awafango nzo tënë?

¹⁷ Amolenge ti A-Témoin ti Jéhovah: Teti angu mingi, amolenge mingi afa tënë da na da na tele ti ababâ na mama ti ala, atâa so ade ala ga pëpe awafango tënë so ade amû batême pëpe. Mars alingbi ti duti mbeni nzoni ngoi ti sala si ala to nda ni. Tongana nyen mo yeke hinga wala molenge ti mo alingbi kue awe ti fa tënë? Lembeti 100 ti buku Organisés pour bien remplir notre ministère atene so a yeke “tongana molenge ni ayeke na nzoni tambela na lo lingbi ti fa mabe ti lo na gigi na salango lisoro na azo na ndo nzo tënë ni, teti bê ti lo apusu lo ti sala tongaso.” Tongana mo bâ so molenge ti mo alingbi kue awe, sala tënë ni na mbeni oko ti a-ancien so ayeke na yâ Komite ti Kusala ti Kongregation ti mo.

¹⁸ Awamandango Bible So Alingbi Kue: Na peko ti so mbeni wamandango Bible awara hingango ye na ague na abungbi teti mbeni ngoi awe, lo lingbi peut-être ti duti na nzala ti ga mbeni wafango tënë ti Royaume. Tongana mo yeke manda Bible na mara ti zo tongaso, bâ ahundango tënë so: Lo yeke gue na li ni, alingbi na ngu nga na ngangu ti lo? Lo to nda ti kangbi mabe ti lo awe na azo na lege kue so azi? Lo yeke yü ‘fini zo ti yâ ni’? (aCol. 3:10) Lo lë alengo so a hunda ti ga mbeni wafango tënë so ade amû batême pëpe, so a fa ni na alembeti 97-99 na yâ buku Notre ministère? Tongana a yeke tongaso, bâ Komite ti Kusala ti Kongregation ti mo si lo lingbi hunda na a-ancien use ti tingbi na mo nga na wamandango ye ni. Tongana a bâ so lo lingbi kue awe, fade a-ancien use so ayeke tene na lo so lo lingbi ti to nda ti mû mbage na yâ kusala ti fango tënë na gbele azo.

¹⁹ Ti Avril na Mai Ayeke Tongana Nyen? Ala nga kue ayeke duti ande anze so ayeke nde ti kono yâ ti kusala ti fango tënë ni. Azo mingi so amû kusala ti pionnier auxiliaire na mars alingbi nga ti sala ni mbeni na avril nga/wala na mai. Na avril nga na mai, e yeke fa mingi ni apériodique Tour ti Ba Ndo na Réveillez-vous! na yâ kusala ni. So ye ti nzoni si ala yeke sala na yâ fini ti azo so adiko ni! Apériodique so asala kusala mingi ti wara kota wungo so ague na li ni, so a bâ na ndo sese kue. E yeke sala kota ngangu na avril nga na mai ti mû apériodique na azo mingi. Leke kapa ti mo fadeso ti mû mbage dä kue.

²⁰ Ndali ti guengo na li ni ti kusala ti fango tënë so a leke ni, mo bâ so a lingbi mo kono wungo ti apériodique so mo wara na lege ti kongregation? Na yâ ngu ti kusala ni kue, e yeke gboto lê mingi na ndo Tour ti Ba Ndo na Réveillez-vous! na samedi oko oko, Lango ti Apériodique ti e. Ye oko, teti so mingi ti aita ayeke mû ande kusala ti pionnier auxiliaire na e kue e yeke gboto lê na ndo apériodique teti anze use ni kue, peut-être a lingbi mo kono komande ti apériodique ti mo na kongregation ni. Tongana a yeke tongaso, e hunda mo ti sala tënë ni fade fade na ita so abâ lege ti apériodique na yâ kongregation ti mo.

²¹ Azo mingi afa bê ti kiri singila teti article so ayeke na yâ Kusala ti Royaume, oko oko, so li ti tënë ni ayeke “Ye ti Tene na ndo Apériodique.” Mo wara ye ti nzoni awe na lege ni na mandango atapande ti afango ye ni? Ngbanga ti nyen pëpe ti mû mbeni mbage ti mandango ye ti mo na sewa yenga oko oko ti manda fani mingi na popo ti ala peko ti afango ye so?

²² Wara Ye ti Nzoni Mingi na Ngoi ti Mémorial So: Legeoko tongana bazengele Paul, zia e fa na Jéhovah tongana nyen e yekia mingi “matabisi so lo mû senge senge, so a lingbi fa pekoni pëpe” na mungo mbage ti e kue na akusala ti yingo so a leke ni teti ngoi ti Mémorial. Aye so andu (1) guengo na matanga ti kota ahon ti ngu ni, tengo Kobe ti Lakui ti Seigneur na jeudi, lango 28 ti mars, ngu 2002; (2) mungo maboko na azo so azia ti fa tënë ti kiri ti wara “kozo ndoye ti [ala]” (Apoc. 2:4; aRom. 12:11); (3) mungo maboko na amolenge ti e nga na ambeni wamandango ye so alingbi kue ti ga awafango tënë so ade amû batême pëpe; nga (4) mungo mbage ti e na yâ kusala ti fango nzo tënë mingi ahon, même ti mû kusala ti pionnier auxiliaire na mars nga na ambeni nze so aga na peko.​—2 Tim. 4:5.

²³ Sambela so e sala na bê kue ayeke ti tene e kue e mû mbage mingi na yâ fango nzo tënë ti Royaume na ngoi ti Mémorial so, si na lege ni e fa kota ni ti bê ti kiri singila ti e teti ye kue so Jéhovah asala teti e.

[Encadré na lembeti 6]

Kapa ti Mo Teti Fango Tënë na Mars 2002

Lundi Mardi Mercredi Jeudi Vendredi Samedi Dimanche

1 2 3

Lango ti

Apériodique

4 5 6 7 8 9 10

Lango ti

Apériodique

11 12 13 14 15 16 17

Lango ti

Apériodique

18 19 20 21 22 23 24

Lango ti

Apériodique

25 26 27 28 29 30 31

Lango ti

Apériodique

MÉMORIAL

NA PEKO

TI LINDANGO

TI LÂ

Mo Lingbi ti Leke ti Wara Angbonga 50 Teti Kusala ti Pionnier Auxiliaire na Mars?