Angia so aga na lege ti kusala ti ngoi kue
1 Teti so mo yeke maseka, kite ayeke pëpe so mo bi bê awe na ndo avenir ti mo. A-Proverbe 21:5 atene na e so “zo so abi bê ti lo ti sala kusala biani, awara ye mingi”. A yeke teti nzoni ti mo ti bi bê mingi na ndo aye so mo zia na gbele mo ti wara na yâ fini. Tongana mo yeke leke aye so mo ye ti sala na yâ fini ti mo ti kekereke, bi bê ti mû kusala ti ngoi kue. Ngbanga ti nyen?
2 Hunda ambeni ita biazo so amû kusala ti pionnier na lâ ti pendere ti ala ti hinga bibe ti ala na ndo kusala ni. Biani, fade kiringo tënë ti ala kue ayeke legeoko: “A yeke lani apendere ngoi na yâ fini ti mbi!” Mbeni ita-koli so awara ngia na lege ti kusala ti ngoi kue so lo yeke sala ni ngbele ye na ngoi so lo de pendere atene na pekoni: “A yeke mû kota ngia mingi ti bi bê na ndo angoi so mbeni zo ade pendere, na ti bâ so lo bi bê na ndo wango ti ndara so ayeke na yâ ti Bible: ‘Fadeso, mo dabe mo na Lo so acréé mo, na lâ ti pendere ti mo’ ”. (Zo-ti. 12:3). A hunda ti tene babâ na mama nga na amolenge aduti na nzoni programme ti fango tënë si amolenge ni alingbi ti wara ngia na ngoi so ala de pendere.
3 Babâ na mama, i wa amolenge ti i ti mû kusala ti ngoi kue: Jéhovah, Babâ ti ndoye, ayeke fa na i mbilimbili lege wa a lingbi i gue dä (Es. 30:21). Na mungo mara ti fango lege ti ndoye tongaso, Lo zia mbeni nzoni tapande na ababâ na mama so ayeke aChrétien. A hon ti zia amolenge ti i mveni si asoro lege so ayeke nzoni na lê ti ala, i leke ala na lege ti ndara na ndo lege so a lingbi ala mû ti wara adeba nzoni ti Jéhovah. Tongaso, tongana ala kono awe, fade fango lege ti i ayeke mû maboko na ala ti “hinga nzoni na sioni.” (aHéb. 5:14). Na lege ti aye so ala manda, abiazo ahinga so ala lingbi pëpe ti zia bê na ndo bango ndo ti ala mveni; a lingbi ala zia bê kue na Jéhovah ti sala si alege ti ala aga mbilimbili (aProv. 3:5, 6). Na teti so apendere ayeke na kode mingi pëpe na yâ fini, a lingbi ala zia bê mingi ahon na ndo Jéhovah.
4 Ababâ na mama, tongana amolenge ti i asi ndulu na lâ ti pendere, wala kozoni, i sala lisoro na ala na ndo kua so ala ye ti sala na yâ fini ti ala. Awamungo wango na yâ ti ada-mbeti, awafango mbeti, akamarade ti ekole ayeke tara ande ti pusu ala ti tomba peko ti aye ti sese, so andu mosoro. I mû maboko na amolenge ti i ti soro mandango mbeti so afa mbeni kusala na zo, na lekengo ala ti wara aye ti bata na tele ti ala, sân ti glisa aye ti Royaume (1 Tim. 6:6-11). Mingi ni, alycée so na yâ ni a yeke manda akode ti kua alingbi ti leke mbeni zo nzoni ti wara kete kua ti nginza, na ti mû kusala ti pionnier permanent na oko ngoi ni.
5 I wa apendere ti gi matabisi ti dutingo kumbamba. Na pekoni, tongana ala soro ti sala mariage, fade ala lingbi ti yô nzoni anene kungba so aga na peko ti mariage (Bâ par. 19 ti supplément ti Le Ministère du Royaume ti France ti juin 2001 na ndo li ti tënë “Vous portez-vous volontaire?”). Na salango nzoni tënë ti kusala ti pionnier, ti sala kusala na ndo so bezoin ayeke dä mingi, na Béthel, nga tongana pionnier spécial, i yôro yeke yeke na yâ bê ti apendere, même ala so adë kete, nzala ti sala kusala na fini ti ala na mbeni lege so amû ngia na Jéhovah. Salango tongaso ayeke ga na aye ti nzoni nga na ambeni zo nde, na ayeke mû ngia na ala mveni.
6 Apendere, i zia kusala ti ngoi kue na kozo ndo: Apendere, peut-être i ye ti hinga ye so kusala ti pionnier ayeke? I lingbi ti tara ni na mungo kusala ti pionnier auxiliaire ngoi na ngoi, tongana lege ayeke dä na ngoi so i ngbâ ti manda mbeti, nga na ndembe ti vacances. Tongaso fade i yeke bâ tongana nyen kusala ti pionnier ayeke mbeni kusala so amû ngia! I lingbi ti mû kusala ti pionnier auxiliaire na popo ti ngoi so ato nda ni fadeso juska na ngoi ti vacances ti peko?
7 Tongana mo yeke mbeni ita-koli so ade pendere na yâ bungbi ti Nzapa, gbu li nzoni ti gi ti ga serviteur ti mungo maboko (1 Tim. 3:8-10, 12). Na ndo ni, leke na bê ti mo ti sala kusala na Béthel, wala ti gue na Ekole ti Formation Ministérielle, tongana ngu ti mo alingbi awe. Fade kode so mo yeke wara na yâ kusala ti pionnier ayeke fa na mo akpengba ye, na tapande: salango aye kue na lege ti programme, maïngo lege so mo yeke leke na tele teti akusala ti mo nde nde, tongana nyen ti sala ye legeoko na ambeni zo, nga tongana nyen ti yô kungba nzoni. Fade aye so kue ayeke leke mo nzoni teti akota matabisi ti kusala so ayeke ga.
8 Kelele ti tene kusala ti ngoi kue atambela nzoni ayeke ti gi lakue alege nde nde ti sala kusala ti Nzapa na wâ. Bazengele Paul awa mara ti bibe tongaso, na lo fa adeba nzoni so alingbi ti ga na pekoni: “Ye kue so i sala, i zia bê ti i dä biani, i sala teti Seigneur, . . . teti i hinga fade Seigneur amû na i ye ti héritier ti ga futa ti i.” (aCol. 3:23, 24). Zia Jéhovah adeba nzoni na ndo i na lege ti angia mingi so i yeke wara na yâ kusala ti ngoi kue!