Mbeni ngoi nde ti wa tele na popo ti e
1 Mbeni lango alingbi pëpe ti hon sân ti tene awakua ti Jéhovah awara atara ti mabe. Teti so Satan ahinga ngoi angbâ na lo mingi pëpe, lo yeke sala ndangba sioni bira ti buba dutingo be-biani ti e na Jéhovah (Apoc. 12:12). A yeke kota ye mingi ti tene e “kpengba na yâ Seigneur, na yâ ngangu ti ngangu ti Lo” si e “lingbi ti luti ti gbu ngangu na lâ ti sioni, na tongana [e] sala ye kue awe, e luti.”—aEph. 6:10, 13.
2 Ti bungbi na aita ti e wamabe ayeke mbeni lege so Jéhovah aleke ti mû maboko na e ti wara ngangu. Bazengele Paul abâ ye so na nene ni. Lo yeke lani na kota nzala ti duti na popo ti aita ti lo Chrétien si ala “lingbi kpengba”. (aRom. 1:11, 12). Ti mû ngangu na e ti sala ye so bê ti Nzapa aye, Wabatango Bungbi aleke, na lege ti ndoye, ti mû lege na e ti wara ngia na wango tele na popo ti e na ngoi ti Assemblée ti District “Awakua ti Royaume so ayeke na wâ”.
3 Gue si mo wara aye ti nzoni: Zia na gbele mo ti gue na alango ota ti assemblée ni kue. E yeke ‘wara aye ti nzoni teti e mveni’ na singo kâ kozoni si hengo kozo bia akomanse nga ngbango na “Amen”, so a tene na bê kue, ti sambela ti nda ni (Es. 48:17, 18). Ti wara ngoi ti gue na alango ota kue ti kota bungbi ni, a lingbi ambeni ita aleke programme ti ala ngoi mingi kozoni. Biani, ti gue na patron ti mo juska lo yeda ti mû na mo ngoi ayeke kete ye pëpe. Ye oko, e yeke na beku so fade Jéhovah ayeke mû maboko na e ti sala ye so bê ti lo aye (1 Jean 5:14, 15). Tongana ade e sala ni pëpe, a yeke fadeso ngoi ti leke aye teti futango na lege nga teti ndo ti lango, e kanga maboko pëpe na kungo ti tene lege azi na e. E lingbi ti duti na beku so fade Jéhovah ahiri deba nzoni na ndo ngangu so e yeke sala ti gue na alango ota ti assemblée ni kue.—aProv. 10:22.
4 Ku ngoi ti wango tele so kungo: A si na mo mbeni lâ awe ti tene na peko ti mbeni kota bungbi: “Kota bungbi so ayeke pendere ahon atanga ni kue!” Ngbanga ti nyen mo sala tënë tongaso? Teti so e yeke mbilimbili-kue pëpe, ngoi na ngoi e lingbi ti woko, na e yeke na bezoin ti wara wango na lege ti yingo (Es. 40:30). Mbeni ita-wali atene: “Sese so asala si mbi woko. Akota bungbi ayeke mû maboko na mbi ti kiri na lê ti mbi na ndo aye ti yingo, na mungo na mbi ngangu so mbi yeke na bezoin ni. A lingbi ti tene so wango ti kpengba zo ni asi tâ gi na ngoi so mbi yeke na bezoin ni mingi ahon.” A lingbi ti tene so mo bi bê mbeni lâ tongaso awe.
5 E yeke wara wango ti kpengba zo pëpe gi na lege ti adiskur na ti ahundango tënë, me nga na lege ti ambeni kpengba mbage ti akota bungbi ti e. Mbeni ita-koli atene: “Ye so mbi ye mingi ayeke kode ti fango tongana nyen ti sala kusala na akpengba-ndia ti Bible. A yeke polele, na afa mbilimbili ye ti sala. Biani, ambeni ye ti ngele mingi, so afa na e tongana nyen ti wara ye ti nzoni na lege ti atapande ti nzoni wala ti sioni so azo ti giriri azia ayeke adrame. Mbeni ye so mbi yeke ku ka kungo ayeke sigingo ti afini mbeti, na nzara ni angbâ ti sala mbi même ngoi mingi na pekoni so mbi kiri na kodoro.”
6 Akota bungbi ayeke mbeni kpengba ye so Jéhovah aleke na ngoi ti “lâ ti ye ti ngangu” so (2 Tim. 3:1). A yeke mû maboko ti bata wango so asû na gbe ti yingo: “I bata, i duti kpô na mabe, i sala tongana akoli, i kpengba.” (1 aCor. 16:13). Ni la, zia e leke na bê kue ti gue na alango kue ti Kota Bungbi ti District “Awakua ti Royaume so ayeke na wâ”, na ti wara ngia dä!
[Encadré na lembeti 3]
Leke tele ti gue na alango ota ni kue
■ Hunda mbeni ngoi so mo lingbi ti manke kua.
■ Hunda ti wara mbeni ndo ti lango na gbata so a sala kota bungbi ni dä.
■ Leke tongana nyen mo yeke gue ande na kota bungbi ni.