Akiringo tënë na ahundango tënë ti i

◼ A lingbi e yü bongo na e leke kuali ti e tongana nyen na ngoi so e gue ti bâ Béthel na abiröo ti filiale?

Tongana e gue na Béthel, atâa tongana a yeke gi ti bâ biröo na ando ti lango ni wala ti bâ ambeni ita ti sewa ti Béthel, “a lingbi yungo bongo ti e, lekengo kuali ti e na tambelango ti e aduti legeoko tongana e yeke gue na abungbi na Da ti Royaume.” (om 131). Ye oko, a bâ so tongana ambeni ita-koli na aita-wali ague ti bâ abiröo ti filiale, ala yeke yü bongo na lege ni pëpe. Salango ye tongaso ayeke na lege ni pëpe. A lingbi e zia nzoni tapande na ndo tënë ti lekengo tele ti e, e leke ni nzoni, me ahon ndo ni pëpe. A lingbi a fa na gigi nengo tele so alingbi na awakua ti Jéhovah.​—1 Tim. 2:9, 10.

A yeke na nene ni mingi ti sala tongaso na ngoi ti salango vizite na Béthel nga na abiröo ti filiale. Ngbanga ti nyen? Ngbanga ti so e yeke gboto lê ti azo mingi so ayeke aTémoin ti Jéhovah pëpe tongana e yeke gue kâ. Gi na lege ti aye so ala bâ, azo tongaso alingbi ti bâ awakua ti Nzapa nga na bungbi ti lo na nzoni lê wala na sioni lê. Tongana azo so e yeke manda Bible na ala wala ambeni zo nde aye peut-être ti gue ti bâ Béthel, a yeke nzoni ti dabe ti ala na ndo nene ti yungo bongo nga ti leke kuali ti ala na lege ni. Fade sewa ti Béthel ayeke duti na bê ti kiri singila tongana i sala tongaso.

Teti so e yeke aChrétien, a lingbi e sala hange si yungo bongo ti e asala pëpe si azo apika gere ti ala (2 aCor. 6:3, 4). Nde na so, na lege ti nzoni salango ye ti e, e lingbi lakue ti “sepela nzo tënë ti Nzapa Sauveur ti e na yâ ye kue.”​—Tite 2:10.