Fini programme ti assemblée ti circonscription

¹ A lingbi e zia bê kue na Jéhovah si e lingbi luti ngangu na yâ mabe, na yâ mbeni sese so aga kirikiri. Tongana nyen e lingbi ti fa na gigi ziango bê kue so na yâ fini ti e ti lâ oko oko? Tongana nyen ziango bê kue na Jéhovah asala ngangu na ndo fini ti e mveni nga na ti sewa ti e? Tongana nyen a yeke mû maboko na e ti luti na gbe ti ngangu so sese ti Satan ayeke sala na ndo e? Programme ti assemblée ti circonscription ti ngu ti kusala 2003 ayeke kiri tënë na ahundango tënë so. Kota li ti tënë ni ayeke ‘Zia bê ti mo na Jéhovah, na mo sala nzoni’.​—Ps. 37:3.

² E yeke fa ziango bê na ndo Jéhovah pëpe gi na ambeni ngoi, wala gi na angoi so ye amanke e. Me andu ambage nde nde ti fini ti e ti lâ oko oko. A gboto lê na ndo tënë so na yâ kozo diskur ‘Zia bê ti mo na Jéhovah na ngoi kue’. (Ps. 62:9). Diskur na mbage osio, so li ti tënë ni ayeke ‘Fa na gigi ziango bê kue na Jéhovah’ ayeke fa ande na e tongana nyen ti wara asango ti Bible so alingbi ti mû maboko na e ti sala si mariage ti e atambela nzoni, ti leke akpale so abâ gigi na yâ sewa, na ti wara ye ti mitele so e yeke na bezoin ni. A yeke gi na salango ye alingbi na asango ti Bible so e yeke wara si e lingbi sala aye so kue.

³ Sese ti Satan atara ti forcé e ti duti na mbeni bango ndo so ayeke na lege ni pëpe na ndo ye ti nzoni na ye ti sioni, na ti sala kangbi pëpe na popo ti ye so a lingbi e zia na kozo ndo wala pëpe (Es. 5:20). Adiskur tongana “Sala hange na aye ti fini so ayeke senge senge” nga “Kpe ye ti sioni; duti zo so asala ye ti nzoni” ayeke kpengba lekengo na bê ti e ti bata andia ti Jéhovah so ayeke na nduzu mingi.​—Amos 5:14.

⁴ Awakua ti Nzapa ayeke duti ande na bezoin ti zia bê kue na Jéhovah na ngoi so lo yeke ga ti futi bungbi ti aye ti sioni ti fadeso. A gboto lê na ndo ni na yâ kota diskur “Zingo zo na gbe ti akota kpale ti sese so aga ndulu”. Na peko ti diskur so, fade a hunda e oko oko kue ti bâ dutingo ti e mveni na lege ti diskur “A yeke diko mo ande na popo ti azo so alingbi na Royaume ti Nzapa?” Programme ni ayeke hunzi na mbeni wango, ti “Zia bê kue na azendo ti Jéhovah”.

⁵ Mbeni kota mbage ti assemblée oko oko ayeke diskur ti batême. Tongana mbeni zo aye ti mû batême, a lingbi lo sala tënë ni hio na surveillant président si a lingbi leke aye ndali ni.

⁶ Na ngoi ti fadeso, so aye ayeke gbian kirikiri, Jéhovah ayeke gi oko tâ lingu ti ziango bê na ti ye so ayeke changé pëpe (Ps. 118:8, 9). Zia e kue e kpengba ziango bê ti e na lo na guengo na aprogramme ti assemblée ti circonscription ni kue.