Jéhovah ayeke mû maboko na azo so azia bê ti ala na lo
1 Azo mingi abâ nginza, ngangu na akode ti azo tongana aye so amû lege na zo ti bâ nzoni na yâ fini ti lo (Ps. 12:5; 33:16, 17; 49:7). Ye oko, azo so akpe mbito ti Jéhovah na azia bê ti ala na lo, Bible adë bê ti ala so ‘Lo yeke zo ti sala na ala, na Vala ti ala.’ (Ps. 115:11). Zia e bâ aye use so na yâ ni a lingbi e fa so e yeke zia bê ti e na Jéhovah.
2 Tongana awakua Chrétien: Na ngoi kue so e yeke fa ye na yâ ti kongregation wala na fango tënë, a lingbi e zia bê ti e na Nzapa. Bâ tapande ti Jésus. Atâa so lo yeke Molenge ti Nzapa, lo zia lani bê ti lo na ndo ndara wala kode ti lo mveni pëpe, me lo zia bê ti lo kue na ndo Babâ ti lo ti yayu (Jean 12:49; 14:10). A lingbi e sala tongaso nga mingi ahon so! (aProv. 3:5-7). A yeke gi na lege ti deba nzoni ti Jéhovah si akete ngangu so e yeke sala ayeke mû ande gonda na lo nga ayeke sala nzoni na ambeni zo.—Ps. 127:1, 2.
3 E yeke fa so e yeke zia bê ti e na Jéhovah na sambelango lo ti wara fango lege ti lo nga mungo maboko ti yingo vulu ti lo (Ps. 105:4; Luc 11:13). Na ndo ni, e yeke fa so e zia bê ti e na Nzapa na salango si fango ye ti e aluti na ndo Tënë ti lo, Bible. Tokua ti Bible ayeke na ngangu ti ndu bê ti azo na ti gbian fini ti ala (aHéb. 4:12). Tongana e sala kusala “na ngangu so Nzapa amû” na e, Jéhovah ayeke wara gonda.—1 Pi. 4:11.
4 Na gbele akpale: A lingbi e gi nga ti bi lê na mbage ti Jéhovah ti wara mungo maboko tongana e yeke na gbele akpale nga na aye so asala ngangu na ndo e (Ps. 46:2). Na tapande, patron ti e alingbi ti gi bê ti lo ti zia lege na e ti gue na mbeni kota bungbi, wala e lingbi ti wara mbeni kpale na yâ sewa ti e. E yeke fa so e zia bê ti e na Jéhovah na sambelango lo na bê kue nga na salango ye alingbi na fango lege so lo mû na yâ Tënë ti lo nga na bungbi ti lo (Ps. 62:9; 119:143, 173). Na salango tongaso, awakua ti Jéhovah ayeke wara mungo maboko ti lo na yâ gigi ti ala.—Ps. 37:5; 118:13, 16.
5 Jéhovah mveni adë bê ti e: “Ngia ayeke na zo so azia bê ti lo na L’Eternel, na beku ti lo ayeke na yâ L’Eternel.” (Jér. 17:7). Zia e fa so e zia bê ti e na lo na yâ ye kue so e sala!—Ps. 146:5.